Ɔ ka kan’n Zoova wá núnnún mɛn tɛ kain nga. Yɛle kɛ bé wá núnnún Ɲanmiɛn sulɛ wafawafa nga be timan su’n, yɛ nvlenvle’m be bo wá yó kun bé fá alɛ bé wlá Ɲanmiɛn i sufuɛ’m be sin. I sin’n, Armagedɔn alɛ’n nun’n Ɲanmiɛn wá núnnún klunwifuɛ mun. Klisifuɛ’m be ɲin o sa sɔ’m be sin kpa.

E siman ɲrɛnnɛn dan’n i su ndɛ kwlaa. I wie yɛle kɛ e siman blɛ trele nga i nun yɛ ɔ́ bó i bo’n. Asa’n, e siman sa nga ti yɛ politikifuɛ’m bé wá fá alɛ bé wlɛ́ i Ɲanmiɛn sulɛ wafawafa’m be sin’n. Kɛ nvlenvle’m bé wá fá alɛ be wlɛ i Ɲanmiɛn i sufuɛ’m be sin’n e siman blɛ ng’ɔ́ dí’n, yɛ kusu e siman like nga bé yó’n. Asa kusu’n, e siman like trele nga Zoova fá núnnún klunwifuɛ mun Armagedɔn alɛ’n nun’n.

Sanngɛ kusu like kwlaa ng’ɔ fata kɛ e si i naan y’a kwla jran kekle’n, Ɲanmiɛn ndɛ’n fa e ɲin sie su. I wie yɛle kɛ e si kɛ e o “mɛn’n i awieliɛ blɛ” nun. (2Ti 3:1) Kɛ bé wá fa alɛ bé wlá Ɲanmiɛn sulɛ wafawafa nga be timan su’n be sin’n Ɲanmiɛn wá “kpɛ́” blɛ’n su. I liɛ’n Ɲanmiɛn sulɛ kpafuɛ’n su nunnunman. (Mat 24:22) E si kɛ Zoova wá dé i sufuɛ mun. (2Pi 2:9) Asan’n, e si sran nga Zoova kpɛli i kɛ ɔ nunnun klunwifuɛ mun naan kusu ɔ de sran kpanngban kpa Armagedɔn alɛ’n nun’n. Sran sɔ’n ti nanwlɛfuɛ yɛ ɔ le tinmin.—Ngl 19:11, 15, 16.

Sa nga bé jú e ɲrun lɔ’n ti’n “srɛ kún sran mun dan kpa.” Sanngɛ sɛ e kanngan Biblu’n nun naan e bu wafa nga laa’n Zoova deli i sufuɛ mun i su akunndan’n, yɛ sɛ e bu sa nga bé jú e ɲrun lɔ’n be akunndan’n ‘é kwlá jáso é jrán yɛ é mán e ti’n su.’ Afin e si kpa kɛ e ti ɲanlɛ’n w’a mantan koko. —Lik 21:26, 28.