Zoova maan e le “niaan” kaka mɛn wunmuan’n nun mɔ be uka e-ɔ. (1Pi 5:9) Sɛ jasin fɛ bolɛ’n ti kekle man e’n, e niaan sɔ’m be kwla uka e. I wie yɛle Pɔlu liɛ’n. Kɛ ɔ́ bó jasin fɛ’n Akila nin Prisiyi, Silasi, Timote ɔ nin sran uflɛ wie’m be ukɛli i.—Yol 18:1-5.

?Wafa sɛ yɛ e niaan sɔ’m be kwla uka e jasin fɛ’n i bolɛ’n nun-ɔn? Kɛ sran’m be usa e kosan fa tanndan e ɲrun’n e niaan sɔ’m be kle e ajalɛ trele wie mun naan y’a wun wafa nga e kwla tɛ su’n. Asa’n kɛ é kɔ́ sran’m be osu nianlɛ annzɛ kɛ é kɔ́ be like klelɛ’n be uka e wie. Asɔnun’n nun’n, bu sran kun m’ɔ kwla uka wɔ’n i akunndan yɛ se i kɛ ɔ uka wɔ. Sɛ a yo sɔ’n ɔ wiengu kun’n dí aklunjɔɛ, yɛ amun nɲɔn’n amún ɲán su ye.—Fp 1:25.

AN NIAN VIDEO NGA BE FLƐ I KƐ ZOOVA UKA E NAAN Y’A DI AKLUNJUƐ SRAN’M BE LIKE KLELƐ’N NUN: E NIAAN KLISIFUƐ MUN. I SIN’N, AN TƐ KOSAN NGA’M BE SU:

• ?Wafa sɛ yɛ Neta ukali Jadi naan ɔ tran aɲia’m be bo-ɔ?

• ?Kɛ é kɔ́ sran kun i Biblu’n nun like klelɛ’n, ngue ti yɛ ɔ fata kɛ e se e niaan’m be kɛ be ko suman e-ɔ?

• ?Ngue like yɛ Abigaɛli klo i mɔ Jadi kusu klo i wie-ɔ?

• ?Jasin fɛ bolɛ’n nun’n ngue yɛ e niaan Klisifuɛ’m be kwla kle e-ɔ?