?NGUE TI YƐ Ɔ TI CINNJIN ƆN?: Sɛ Biblu’n nun like suanfuɛ’m be klo kɛ Zoova klun jɔ be wun’n, ɔ fata kɛ be fa be wun be mɛn i yɛ be yo be batɛmu. (1P 3:21) Be kwlaa nga be fa be wun be man Zoova mɔ be yo i nuan su sa’n, Zoova sasa be naan b’a kwla su i. (Ju 91:1, 2) Zoova yɛ Klistfuɛ’m be fa be wun be mɛn i ɔ. Nán klɔ sran, annzɛ junman, annzɛ anuannzɛ wie ɔ. Ɔ maan, ɔ ti cinnjin kɛ Biblu’n nun like suanfuɛ’m be klo Ɲanmiɛn kpɛkun be si i ye.—Rɔ 14:7, 8.

?WAFA SƐ YƐ É YÓ I SƆ Ɔ?

• Zoova i nzuɛn nga i ɲin fite like nga amun su suan nun’n, amun koko i su yalɛ. Jran su kpa kɛ ɔ ti cinnjin kɛ ɔ kanngan Biblu’n nun cɛn kwlakwla naan ɔ srɛ Zoova “titi.”—1Tɛ 5:17; Za 4:8

• Wla like suanfuɛ’n i fanngan naan ɔ klo kɛ ɔ́ fɛ́ i wun mán Ɲanmiɛn naan be yo i batɛmu. Yɛ, ukɛ i naan Ɲanmiɛn i sulɛ nun’n, ɔ dun mmua yo ninnge wie mun. I wie yɛle aɲia’m be bo lɔ kosan’m be su tɛlɛ’n, nin jasin fɛ’n m’ɔ kwla bo kle i mantanfuɛ nin i wiengu junman difuɛ mun’n. Nán ɔ wla fi kɛ Zoova mianman sran kɛ ɔ su i. Sran kun bɔbɔ yɛ ɔ fa ajalɛ kɛ ɔ́ fɛ́ i wun mán Zoova ɔ.—Mml 30:19, 20

• Nzuɛn ng’ɔ fata kɛ like suanfuɛ’n wla be ase’n, wlɛ i fanngan naan ɔ wla be ase. I liɛ’n, Zoova i klun jɔ́ i wun kpɛkun bé kwlá yó i batɛmu. (Nya 27:11) Nzuɛn wie’m be ase wlalɛ kwla yo kekle mɛn i. I sɔ’n ti’n, ɔ ti cinnjin kɛ a ukɛ i titi naan ɔ wlɛ i nzuɛn nga be timan kpa’n be ase naan ɔ fa nzuɛn uflɛ’n. (Ef 4:22-24) Sasafuɛ Tranwlɛ’n i nun ndɛ akpasua ng’ɔ suan “Biblu’n kaci sran mun,” a nin i be koko i nun ndɛ’m be su yalɛ.

• Aklunjuɛ nga Zoova i sulɛ man wɔ’n, kan kle i.—Eza 48:17, 18