?Ngue ti yɛ ɔ fata kɛ e siesie e wun-ɔn? Afin tukpacɛ kekle wie kwla ka lɛ tɔ e su kpɛ kunngba yɛ be kwla la e dɔɔtrɔ. Ɔ maan kɛ ɔ ko yo naan y’a ɲan ayre nga bé yó e’n i su ye kpa’n, dɔ nga su yɛ ɔ fata kɛ e siesie e wun-ɔn. Kɛ e yo sɔ’n, e kle kɛ e bu nguan’n nin mmoja’n be su mmla nga Zoova kpɛli’n i like cinnjin.—Yol 15:28, 29.

?Wafa sɛ yɛ e kwla siesie e wun-ɔn?

• Maan e nian nun kpa e klɛ fluwa nga be flɛ i kɛ Instructions médicales/Désignation d’une personne de confiance (DPA) a su. Maan e srɛ Ɲanmiɛn tankaan kpa kwlaa naan y’a klɛ su. Jasin bofuɛ nga b’a yo be batɛmun’n be kwla ɲan fluwa sɔ’n wie aniaan ng’ɔ fa asɔnun’n nun fluwa mun man sran mun’n i sa nun. Be nga be le ba’n be kwla fa fluwa kpe kan nga be flɛ i kɛ carte d’identité (ic) m’ɔ ti ba kanngan’m be liɛ’n aniaan sɔ’n i sa nun.

• Sɛ a ti wunnzɛfuɛ’n, se asɔnun kpɛnngbɛn’m be kɛ be fa fluwa nga be flɛ i kɛ Informations pour les femmes enceintes (S-401) kun man wɔ. Fluwa sɔ’n úka ɔ naan sɛ sa wie ju blɛ mɔ a nin-a wuman ba’n ɔ nin ɔ ba wulɛ cɛn nun’n w’a kwla fa ajalɛ kpa.

• Sɛ a kpinndinnman naan mmoja ndɛ ba nun’n annzɛ be waan bé lá ɔ dɔɔtrɔ’n, dun mmua bo su kle asɔnun kpɛnngbɛn mun yɛ se dɔɔtrɔ’m be kɛ Zoova i Lalofuɛ kun wá kɔ́ nían ɔ osu.

?Wafa sɛ yɛ asɔnun kpɛnngbɛn’m be kwla uka wɔ-ɔ? Be kwla uka ɔ naan w’a klɛ fluwa DPA su. Sanngɛ nán asɔnun kpɛnngbɛn mun yɛ bé klé ayre ng’ɔ fata kɛ be fa yo wɔ’n annzɛ ajalɛ ng’ɔ fata kɛ a fa’n niɔn. (Rɔm 14:12; Gal 6:5) Kɛ a ko se amun asɔnun kpɛnngbɛn’m be kɛ ayre nga bé wá yó wɔ’n ɔ cɛman naan mmoja ndɛ w’a ba nun’n, ndɛndɛ kpa’n bé flɛ́ Komite ng’ɔ nin dɔɔtrɔfuɛ’m be di junman’n naan b’a uka wɔ.

?Wafa sɛ yɛ Komite ng’ɔ nin dɔɔtrɔfuɛ’m be di junman’n ɔ kwla uka wɔ-ɔ? Be kleli aniaan sɔ’m be like naan b’a kwla uka dɔɔtrɔ mun nin jɔlɛ difuɛ mun naan b’a wun sa nga ti yɛ e faman mmoja’n i wlɛ. Be nin be nga be seli be kɛ be kan ɔ ti ndɛ ɔ ayre yolɛ’n nun’n be kwla koko ayre nga i yolɛ nun’n be faman mmoja’n i su yalɛ. Sɛ ɔ nin i fata’n be kwla uka ɔ naan w’a wun dɔɔtrɔfuɛ kun m’ɔ ayre yolɛ nun’n ɔ su faman mmoja’n.

AN NIAN VIDEO NGA BE FLƐ I KƐ ?AYRE YOLƐ NUN’N SƐ BE KAN MMOJA NDƐ’N NGUE YƐ Ɔ KWLA UKA E NAAN Y’A FA AJALƐ KPA-Ɔ? I SIN’N, AN TƐ KOSAN NGA’M BE SU:

• ?Ngue yɛ a wunnin i video nga nun m’ɔ kwla uka ɔ naan sɛ ayre yolɛ nun’n be kan mmoja ndɛ’n w’a fa ajalɛ kpa-ɔ?

  Your answer