?Ngue ti yɛ e klo e aɲia dandan nga e yo be afuɛ nuan kwlaa’n be bo tranlɛ-ɔ? Kɛ Izraɛlifuɛ’m be blɛ’n su sa’n, e aɲia dandan’m be yo maan e nin e niaan kpanngban kpa e kwla su Zoova likawlɛ. Ndɛ fɛfɛ nga e tie be aɲia sɔ’m be bo’n be uka e naan e nin Zoova e afiɛn w’a mantan titi. Asa’n blɛ sɔ’m be nun’n kɛ e nin e janvuɛ mun nin e osufuɛ mun e yia’n, ɔ yo e fɛ kpa. Sa kwlaa sɔ’m be ti’n, e kunndɛman kɛ e aɲia nga e fa cɛn ba nsan e yo be’n, be nun kun sa sin e sin.

Kɛ blɛ wie nun’n e yia kɛ ngalɛ sa’n ɔ fataman kɛ e bu e ngunmin e wun akunndan. Sanngɛ wafa nga e kwla kle e wiengu’m be kɛ e klo be’n, maan e bu i akunndan wie. (Gal 6:10; Ebr 10:24, 25) Kɛ atin’n su’n e tanndanman e niaan’m be ɲrun annzɛ kusu bia nga e mian be wun’n be ngunmin yɛ e fa be’n i lɛ nun’n, e kle kɛ e buman e ngunmin e wun akunndan. Sanngɛ e bu e wiengu’m be akunndan wie. (Fp 2: 3, 4) Aɲia sɔ’m be bo’n e nin aniaan uflɛ e kwla tra janvuɛ. I sɔ yolɛ nun’n, e kwla yo like kun. Yɛle kɛ kwlaa naan aɲia’n w’a bo i bo’n yɛ wunmiɛn lolɛ blɛ’n nun’n e kwla fa e ɲin e sie i sran kun mɔ e simɛn i’n su naan e nin i y’a koko yalɛ. Yɛ kɛ aɲia’n ko wie’n maan e yo sɔ wie. (2Ko 6:13) Janvuɛ nga e tra be blɛ sɔ’n nun’n, e nin be nun wie mun e kwla tran lele anannganman! Ng’ɔ ti cinnjin kpa’n yɛle kɛ, kɛ sran’m be sie i nzɔliɛ kɛ e yi klolɛ kpafuɛ’n i nglo’n, i sɔ’n kwla su be bo naan b’a su Zoova.​—Zn 13:35.

AN NIAN VIDEO NGA BE FLƐ I KƐ NVLENVLE AƝIA MUN: “KLOLƐ’N WIEMAN LE”! I SIN’N, AN TƐ KOSAN NGA’M BE SU:

• Afuɛ 2019 nun’n, anuannzɛ’n yiali aniaan wie mɔ be fin nvle uflɛ nun’n e nvlenvle aɲia’m be bo. ?Wafa sɛ yɛ aniaan nga be o kan be yoli aɲia sɔ mun’n be kleli kɛ be klo aniaan sɔ mun-ɔn?

• ?Ngue ti yɛ klolɛ’n nin bo kun yolɛ nga Zoova i sufuɛ’m be yi i nglo’n ɔ leman wunsu-ɔ?

• ?Klolɛ ng’ɔ fata kɛ Klisifuɛ’m be yi i nglo’n, i su ndɛ benin yɛ Anuannzɛ’n i Ɲrun Dinfuɛ’m be fali e ɲin sieli su-ɔ?

• ?Wafa sɛ yɛ sran klolɛ’n ukali aniaan nga be o Alemaɲin nin Kore di Sidi lɔ mun-ɔn?

• ?Ngue yɛ e kwlaa y’a fua kpa kɛ é yó-ɔ?