?Aliɛ ba kwlaa nun’n sa benin yɛ ɔ fata kɛ a jran be ɲrun kekle-ɔ? ?A ti awlobo kpɛn yɛ ɔ su junman’n sɔnnin? ?A ti siɛ annzɛ niɛn kun mɔ i ngunmin yɛ ɔ fata kɛ ɔ miɛn i ɲin naan w’a niɛn i mma’m be lika-ɔ? ?A ti gbanflɛn annzɛ talua kun m’ɔ wiengu’m be kle ɔ yalɛ suklu lɔ-ɔ? ?Tukpacɛ annzɛ kpɛnngbɛn yolɛ’n kle ɔ yalɛ? Sa o e kwlaa e su yɛ sa fanunfanun be tɔ e nun sunman e su blɛ kunngba’n nun. Sanngɛ e si kɛ ɔ cɛ kan’n Zoova yo maan é ɲán e ti.​—2Ko 4:16-18.

Ka naan blɛ sɔ’n w’a ju’n, kɛ e si kɛ Zoova wun e su sa’m be wlɛ naan kɛ e mian e ɲin e su i titi i sɔ’n jɔ i klun’n, ɔ gua e awlɛn su nzue. Asa’n kɛ e si kɛ ɔ́ yrá e su’n, i sɔ’n gua e awlɛn su nzue wie. (Ze 29:11, 12) Zezi kusu e ndɛ lo i wie. Ɔ maan kɛ e mian e ɲin e yo e liɛ nga e kwla yo’n, e lafi su kɛ ‘ɔ nin e o nun cɛn kwlaa.’ (Mt 28:20) Kɛ e bu e ti ɲanlɛ mɔ Ɲanmiɛn i Famiɛn Dilɛ dunman nun’n é ɲɛ́n i’n i akunndan’n, i sɔ’n yo maan e lafi Ɲanmiɛn su kpa ekun. Yɛ ɔ wla e fanngan naan y’a kwla jran sa nga be tɔ e su andɛ’n be ɲrun kekle.​—Rɔm 8:19-21.

AN NIAN VIDEO NGA BE FLƐ I KƐ KƐ MƆ LIKA’N SU YO KEKLE’N, MAAN E ƝIN TRAN ZEZI SU!​—NINNGE KPAKPA NGA ƝANMIƐN SIELƐ’N YÓ BE’N. I SIN’N, AN TƐ KOSAN NGA’M BE SU:

• ?Ngue ti yɛ klɔ sran mun nin Ɲanmiɛn be afiɛn wa tili nun-ɔn? ?Yɛ wafa sɛ yɛ i bo’n guali-ɔ?

• ?Ngue yɛ be nga be nin Zoova be nanti klanman’n bé ɲɛ́n i-ɔ?

• ?Wan ti yɛ i sɔ liɛ’n kwla yo ye-ɔ?

• ?Ninnge kpakpa nga é ɲán be mɛn klanman nun lɔ’n, beninfuɛ’n yɛ ɔ ɲin wo i sin kpa-ɔ?