Andɛ mɛn nga e o nun yɛ’n, sran’m be flɛ sa kpa’n kɛ sa tɛ yɛ be flɛ sa tɛ’n kɛ sa kpa. (Eza 5:20) I ng’ɔ ti tɛ’n yɛle kɛ sran wie’m be yo ninnge nga Zoova kpɔ be’n. I wie yɛle kɛ be nin be wiengu bla annzɛ yasua be la. Suklu lɔ kusu’n, gbanflɛn nin talua wie mun annzɛ kusu sran uflɛ wie’m be kunndɛ kɛ bé láka gbanflɛn nin talua nga be su Zoova’n naan be nian be ayeliɛ tɛ’n su. ?Wafa sɛ yɛ amun kwla uka amun mma mun naan b’a jran sa kɛ nga lɛ sa’n i ɲrun kekle-ɔ?

Amun uka amun mma mun naan be si Zoova i mmla mun. (Sau 18:3) Bian nin bla nna’n i su ndɛ nga Biblu’n kan’n amun nin be koko su yalɛ blɛblɛblɛ. I sɔ yolɛ nun’n, amun nian be afuɛ’n. (Mml 6:7) Amun usa amun wun kɛ: ‘?Like ng’ɔ ti i nuan su mɔ be kwla yo be kle sran kun kɛ be klo i’n, n yiyili nun n kleli min mma mun? ?N yiyili nun n kleli be kɛ be wun wlawlalɛ’n nun’n, ɔ fataman kɛ be fa be wun be kle? ?N kleli be kɛ ɔ le be lika wie m’ɔ fataman kɛ sran kɛn i-ɔ? ?Sɛ be fa bian nin bla nna nga be fa fite nzra nun’n be kle be’n annzɛ sɛ be se be kɛ be yo like wie m’ɔ ti tɛ Zoova ɲrun’n ngue yɛ bé yó-ɔ?’ Sɛ be si ninnge ng’ɔ fata kɛ be yo’n, sa sunman tó fúan be. (Nya 27:12; Ak 7:12) Kɛ amun yo sɔ’n, amun kle kɛ aja like nga Zoova fa mannin amun’n, amun bu i like cinnjin.​—Ju 127:3.

AN NIAN VIDEO NGA BE FLƐ I KƐ MAAN AMUN SUA’N I BO WLA ASE KPA: AN SASA AMUN MMA MUN NAAN B’A YOMAN BE “SA TƐ” I SIN’N, AN TƐ KOSAN NGA’M BE SU:

• ?Ngue ti yɛ kɛ ɔ yo naan siɛ nin niɛn wie’m be kan bian nin bla nna’n i su ndɛ kle be mma mun’n ɔ ti kekle man be-ɔ?

• ?Ngue ti yɛ ɔ fata kɛ siɛ nin niɛn’m be nian “Zoova i mmla’n nin i afɔtuɛ’m” be su be ta be mma mun-ɔn?​—Efɛ 6:4

• ?Ninnge benin yɛ Zoova i anuannzɛ’n yili be mɔ be uka siɛ nin niɛn mun naan b’a kwla kan bian nin bla nna’n i su ndɛ b’a kle be mma mun-ɔn?​—w19.05 12, Kuku

• ?Ngue ti yɛ ɔ fata kɛ siɛ nin niɛn’m be nin be mma’m be koko yalɛ tikatika-ɔ?