Kɛ ɔ fɛ i afuɛ 2018 Zanvie anglo’n nun’n, wafa nga e nin sran mun e kwla koko yalɛ’n i su ajalɛ’n o fluwa Klisifuɛ mun nin be junman aɲia fluwa’n i bue klikli’n su. ?Wafa sɛ yɛ e kwla nian su e di junman-ɔn?

Kɛ be man ɔ junman’n: Kosan nin Biblu’n nun ndɛ mma ɔ nin kosan nga á wá tɛ́ su cɛn uflɛ mɔ be o fluwa’n su’n yɛ ɔ fata kɛ a fa di ɔ junman’n niɔn. I sɔ’n kleman kɛ san fii ɔ fata kɛ a nian ajalɛ nga be kleli i video’n nun’n su sɛsɛsɛ naan w’a di ɔ junman’n. Sanngɛ, wafa nga á fíti ndɛ’n su’n, ɔ nin wafa nga á yíyí nun’n annzɛ ndɛ uflɛ mɔ a klo kɛ á fá úka su’n, ɔ bɔbɔ a kwla fɛ i su ajalɛ. Kannzɛ b’a seman ɔ kɛ a fa fluwa kun e Like klelɛ ninnge’m be siewlɛ’n nun man sran’n, sanngɛ a kwla fa fluwa kun mɛn i.

Kɛ á bó jasin fɛ’n: Wafa nga e nin sran mun e kwla koko yalɛ’n i su ajalɛ’m be uka e kpa. Sɛ sran’n kle kɛ ndɛ’n lo i’n, naan ɔ kunndɛ kɛ ɔ́ sí nun kpa ekun’n, ɔ ja nun lɛ’n a kwla yiyi ndɛ’n nun kpa ekun kle i. I lɛ nun’n, a kwla nian sran’n i osu nianlɛ i su ajalɛ’n su. Sɛ a klo’n, a kwla kaci ajalɛ nga be kleli’n i kan annzɛ kusu a kwla nian ajalɛ uflɛ su. Ɔ kwla yo ajalɛ kun mɔ e wunnin i anglo ng’ɔ sinnin lɔ’n nun annzɛ Biblu’n nun ndɛ mma kun m’ɔ kan sran’m be awlɛn’n. ?Kɛ sa wie ju amun asa’n su lɔ’n annzɛ lika uflɛ’n, amun jasin bowlɛ nunfuɛ’m be tɛ i ndɛ kan? Wafa nga á nían ajalɛ sɔ’m be su bó jasin fɛ’n, ɔ o ɔ sa nun. Sanngɛ nán ɔ wla fi su kɛ e “yo ninnge kwlaa sɔ mun jasin fɛ’n ti naan sran uflɛ ti wie.”​—1Ko 9:22, 23.