Sɛptanblu anglo’n nun’n é wá yó like kwlaa nga e kwla yo naan y’a kle e mantanfuɛ’m be Biblu’n nun like. I sɔ yolɛ nun’n é wá fá fluwa pɛplɛpɛ A kwla di aklunjɔɛ tititi! é dí junman. Jasin bofuɛ’m be kwla fa be wun wlɛ i cɛn kunngun atin bolɛ junman’n nun. I lɛ nun’n be kwla di dɔ 30. ?Sanngɛ wafa sɛ yɛ é dí junman sɔ’n niɔn?

• Kpɛ klikli nga e to sran’n: Nian ndɛ ng’ɔ o fluwa’n i sin bui’n su naan a nin sran’n be koko yalɛ. Asa’n wafa nga e kle sran’m be Biblu’n nun like’n yiyi nun kle i. Be nga amun boli jasin fɛ’n kleli be laa mɔ be kleli kɛ Ɲanmiɛn ndɛ’n lo be’n amun ko nian be osu. Kɛ mɔ e fluwa nga e fa kle sran’m be Biblu’n nun like’n nin wafa nga e kle sran’m be Biblu’n nun like’n b’a kaci’n ti’n atrɛkpa’n be nga b’a kpliman su kɛ amun kle be like laa’n be kwla kplin su siɛn’n. Sɛ sran’m be nunman be awlo’n nán amun yaci fluwa’n lɔ. Asa’n be nga be kleli kɛ Ɲanmiɛn ndɛ’n lo be’n be ngunmin cɛ yɛ ɔ fata kɛ amun fa fluwa’n wlɛ i lɛtri sin amun ko man be-ɔ. Asɔnun kpɛnngbɛn nga be nian jasin fɛ bolɛ junman’n su’n bé wá yó jasin fɛ bolɛ aɲia wie mun ekun.

• Ajalɛ uflɛ nga e kwla fa’n: Sɛ amun asɔnun’n fa kakaklolo bo jasin fɛ’n amun fa fluwa pɛplɛpɛ A kwla di aklunjɔɛ tititi! sie nun. Be nga be kunndɛ kɛ bé fá fluwa’n amun se be kɛ sɛ be klo’n amun kwla kle be Biblu’n nun like naan be su tuɛmɛn i ti sika. Kɛ amun nin sran’n bé kókó yalɛ’n wafa nga e kle sran’m be Biblu’n nun like’n amun yiyi nun kle i. Sɛ amun klo’n kusu’n an fa ajalɛ uflɛ naan blɛ uflɛ nun’n amun a yiyi nun b’a kle i. Jasin bofuɛ nga be sa w’a tɔ junman’n i dilɛ nun’n, junman’n sunianfuɛ’n kwla fa ajalɛ uflɛ wie mun naan b’a bo jasin fɛ’n ata diwlɛ’m be nun. Amun kwla se an wiengu junman difuɛ’m be kɛ amun kunndɛ kɛ amún klé be Biblu’n nun like. Annzɛ kusu sɛ amún bó jasin fɛ nga b’a siesieman’n naan amun nin sran wie be koko yalɛ’n amun kwla se i kɛ an kunndɛ kɛ amún klé i Biblu’n nun like.

Zezi seli e kɛ e ‘kle sran’m be like’ naan be ‘kaci i sɔnnzɔnfuɛ.’ (Mt 28:19, 20) Maan jasin fɛ bolɛ ngunmin kun nga uka e naan e fa fluwa pɛplɛpɛ A kwla di aklunjɔɛ tititi! e kle sran’m be Biblu’n nun like.