Biblu’n kan sran kpanngban mɔ Zoova tɛli be srɛlɛ’n su’n be ndɛ. Kɛ Zoova i sufuɛ’m be sie i nzɔliɛ kɛ Zoova tie be tinuntinun be srɛlɛ’n naan kusu ɔ uka be’n be Ɲanmiɛn sulafilɛ’n i bo wla ase kpa. I sɔ’n ti’n kɛ é srɛ́ Zoova’n maan ndɛ nga é kán klé i’n yo trele yɛ e sie wafa ng’ɔ tɛ e srɛlɛ’n su’n i nzɔliɛ. Maan ɔ tran e klun kɛ wafa ng’ɔ́ tɛ́ e srɛlɛ’n su’n ɔ kwla yo kɛ nga e fa sunnzunnin’n sa annzɛ ɔ su yoman sɔ. Asa kusu’n, ɔ kwla tra nga e sunnzunnin’n bɔbɔ. (2Ko 12:7-9; Efɛ 3:20) ?Wafa sɛ yɛ Zoova tɛ e srɛlɛ’m be su-ɔ?

• Kɛ sa’m be o e su’n ɔ man e wunmiɛn yɛ ɔ yo maan e akunndan’n sannganman.—Fp 4:13

• Ɔ man e ngwlɛlɛ naan y’a fa ajalɛ ng’ɔ ti kpa’n.—Zak 1:5

• Ɔ man e wunmiɛn naan y’a kwla yo ninnge nga e sunnzun kɛ é yó be’n.—Fp 2:13

• Kɛ e koko’n ɔ yo maan e wla gua ase yɛ e akunndan’n sannganman.—Fp 4:6, 7

• Ɔ sin aniaan’m be lika naan be man e ninnge nga e mian be wun’n annzɛ be fɔnvɔ e yɛ be wla e yakpa.—1Zn 3:17, 18

• Ɔ uka be nga e srɛ e man be’n.—Yol 12:5, 11

AN NIAN VIDEO NGA BE FLƐ I KƐ ZOOVA TIE E SRƐLƐ’N I SIN’N, AN TƐ KOSAN NGA’M BE SU:

• ?Sɛ tukpacɛ wie ti’n e kwlá yoman ninnge mun kɛ laa’n sa’n wafa sɛ yɛ aniaan bian Simizu i su ndɛ’n kwla uka e-ɔ?

• ?Wafa sɛ yɛ e kwla niɛn i ajalɛ’n su-ɔ?