Ɲanmiɛn Ndɛ’n wla e fanngan kɛ e bu e niaan Klisifuɛ nga b’a yo oke’m be kɛ e si nin e nin mun sa, yɛ e bu gbanflɛn nin talua mun kɛ e niaan mun sa. (Kanngan 1 Timote 5:1, 2 nun.) Ɔ fata kɛ aniaan bian’m be yo aniaan bla’m be cɛcɛ yɛ be ɲin yi be.

Ɔ fataman kɛ aniaan bian kun nin aniaan bla kun be tra ndalie annzɛ kusu ɔ yo like wie m’ɔ́ yó aniaan bla’n i kɛnsrɛn-ɔn. (Zb 31:1) Ɔ fataman kɛ aniaan bian kun m’ɔ nin-a jaman bla’n ɔ yo ninnge wie mun naan aniaan bla kun bu i kɛ ɔ klo i-ɔ, kusu nn ɔ timan sɔ.

Sɛ asɔnun’n nun’n aniaan bla kun wunman ninnge wie’m be wlɛ naan ɔ usa asɔnun kpɛnngbɛn mun ninnge sɔ’m be su kosan’n, ɔ fata kɛ be sie be su i nuan bo. Annzɛ kusu sɛ ɔ koko ndɛ wie kle be’n, maan be sie be su i nuan bo. Aniaan bla nga be leman bian’n be yɛ ɔ fata kɛ asɔnun kpɛnngbɛn’m be fa be ɲin be sie be su kpa-ɔ.—Ri 2:8, 9.

AN NIAN VIDEO NGA BE FLƐ I KƐ MAAN E YI SRAN KLOLƐ’N I NGLO ASƆNUN’N NUN TITITI: ANGBETI MUN NIN AIKA BA MUN. I SIN’N, AN TƐ KOSAN NGA’M BE SU:

• ?Wafa sɛ yɛ asɔnun’n nunfuɛ’m be kleli kɛ be klo aniaan bla Minti-ɔ?

• ?Kɛ asɔnun’n nunfuɛ’m be kleli kɛ be klo aniaan bla Minti nin i mma mun’n wafa sɛ yɛ i sɔ’n ɲannin ta klɔfuɛ’m be su-ɔ?

• ?Kɛ aniaan’m be kleli kɛ be klo aniaan bla Minti i mma mun’n wafa sɛ yɛ i bo’n guali-ɔ?

?Asɔnun nun’n ninnge trele benin mun yɛ e kwla yo e kle kɛ e klo aniaan bla mun-ɔn?