Laa Izraɛli lɔ’n Zoova ukali yalɛfuɛ mun. ?Andɛ’n wafa sɛ yɛ ɔ ukɛ i sufuɛ nga be ti yalɛfuɛ mun-ɔn?

• Ɔ kle be like naan akunndan nga be bu i sika’n su’n ɔ yo sɛsɛ.​—Lik 12:15; 1Ti 6:6-8

• Ɔ uka be naan be bu be wun sran.​—Zb 34:19

• Ɔ wla be fanngan kɛ be di junman kekle kpa yɛ be kpalo ayeliɛ tɛtɛ mun.​—Nya 14:23; 20:1; 2Ko 7:1

• Ɔ yoli maan be o be niaan Klisifuɛ mɔ be klo be’n be afiɛn.​—Zn 13:35; 1Zn 3:17, 18

• Ɔ yo maan be lafi be ɲrun lɔ like kpa kun su.​—Ju 9:18; Eza 65:21-23

Kannzɛ e su sa’m be ti sɛ ti sɛ’n, sanngɛ ɔ fataman kɛ e koko dan. (Eza 30:15) Sɛ e dun mmua kunndɛ Ɲanmiɛn i Famiɛn Diwlɛ’n titi’n, Zoova nían e lika yɛ ɔ́ mán e like nga e sa miɛn i wun’n.​—Mt 6:31-33.

AN NIAN VIDEO NGA BE FLƐ I KƐ KLOLƐ’N WIEMAN LE: KANNZƐ E TI YALƐFUƐ’N​—KƆNGO. I SIN’N, AN TƐ KOSAN NGA’M BE SU:

• Aniaan wie’m be tuli ajalɛ be ɔli nvle kun aɲia kun bo. ?Wafa sɛ yɛ aniaan nga be tran aɲia yowlɛ’n i wun koko lɛ’n be sɔli be nun-ɔn?

• ?Video nga nun’n ngue yɛ ɔ kle kɛ Zoova klo yalɛfuɛ mun-ɔn?

• ?Kannzɛ e le like-o, annzɛ e leman like-o, wafa sɛ yɛ e kwla nian Zoova i ajalɛ’n su-ɔ?