Kɛ be se kɛ sran kun ndɛ lo sran’n yɛle kɛ e wun ndɛ nga sran’n kan’n nin wafa nga i wun yo i’n be wlɛ. Asa’n, e bu i sran yɛ e wun i wlɛ kɛ ɔ mian ninnge wie’m be wun. Kɛ sran’m be ndɛ lo e’n be sie i sɔ liɛ’n i nzɔliɛ. Sɛ e kunndɛ kɛ é úka sran mun’n i sɔ’n úka e wie naan y’a kle kɛ be ndɛ lo e. Kɛ jasin fɛ bolɛ nun’n e kle kɛ sran’m be ndɛ lo e’n, i sɔ’n yo maan be fa be wun be mantan Zoova kpa. Afin be wun i wlɛ kɛ ɔ klo be yɛ ɔ nian be lika.​—Fp 2:4.

Kɛ é klé sran kun i like’n wafa nga é kán ndɛ’n nin wafa nga é síesíe e sa’n ɔ nin wafa nga é yó e ɲrun’n yɛ bé klé kɛ i ndɛ lo e sakpasakpa-ɔ. Asa ekun’n, kɛ sran’n kán ndɛ klé e’n sɛ e sie e su kpa i nuan bo’n é klé kɛ i ndɛ lo e. Kɛ e fa e ɲin e sie i like ng’ɔ ti sran’n i cinnjin’n su’n e kle kɛ i ndɛ lo e. Asa’n maan e fa e ɲin e sie i ninnge nga sran’n lafi su’n ɔ nin sa nga be o i su’n, be su wie. Maan e mɛn i afɔtuɛ nga be kwla ukɛ i’n, sanngɛ nán e miɛn i kplɔlɔ kɛ ɔ kaci. Kɛ sran’m be kplin su kɛ e uka be’n, i sɔ’n yo maan e di aklunjɔɛ kpa ekun jasin fɛ’n i bolɛ’n nun.

AN NIAN VIDEO NGA BE FLƐ I KƐ MAAN E SI LIKE KLE KPA NAAN Y’A DI AKLUNJUƐ SRAN’M BE LIKE KLELƐ’N NUN: MAAN SRAN’M BE NDƐ LO E. I SIN’N, AN TƐ KOSAN NGA’M BE SU:

• ?Kɛ Jadi kali siɛn’n wafa sɛ yɛ Neta kleli kɛ i ndɛ lo i-ɔ?

• ?Kɛ Jadi seli Neta kɛ afɛ’n ti’n ɔ su kwlá suanman like’n wafa sɛ yɛ Neta kleli kɛ i ndɛ lo i-ɔ?

• ?Kɛ Jadi seli Neta kɛ ɔ timan sran m’ɔ siesie ninnge mun sɛsɛɛsɛ’n wafa sɛ yɛ Neta kleli kɛ i ndɛ lo i-ɔ?