Mɛn wunmuan’n nun’n, sran kɔe miliɔn ableso (70) be timan sa. Yɛ be nun sunman be kan bobo aniɛn. Bobo aniɛn sɔ’m be ti ya nɲɔn (200) tra su. Sanngɛ ng’ɔ yo ɲrɛnnɛn’n yɛle kɛ sran’m be yo be nga be timan sa’n be tɛtɛ. Sa nga be kle sɔ’n be nun wie mun yɛ:

•   Anuannzɛ kun seli kɛ: “Mɛn wunmuan’n nun’n, sran’m be bu be nga be timan sa mlɔnmlɔn’n ɔ nin be nga be timan sa kpa’n be lufle.”—National Association of the Deaf (U.S.)

•   Anuannzɛ kun ekun seli kɛ: “Nvle nga i nunfuɛ’m be di yalɛ’n, be nga be timan sa’n be di yalɛ tra sran onga mun. Yɛ kɛ ɔ ko yo naan b’a ɔ suklu annzɛ b’a ɲan junman annzɛ kusu b’a ti mɛn’n nun ndɛ mun’n ɔ ti kekle.”—World Federation of the Deaf.

 ?Wafa sɛ yɛ Ɲanmiɛn bu be nga be timan sa’n mun-ɔn? ?Be nga be timan sa’n be su ndɛ benin yɛ Biblu’n kan-ɔn? ?Wafa sɛ yɛ Zoova i Lalofuɛ’m be uka be nga be timan sa’n andɛ-ɔ?

?Wafa sɛ yɛ Ɲanmiɛn bu be nga be timan sa’n mun-ɔn?

 Biblu’n kle kɛ be nga be timan sa’n be ndɛ lo Ɲanmiɛn Zoova a. Ɔ kunndɛman kɛ be bu be lufle. Asa’n, ɔ kunndɛ kɛ like ng’ɔ fa kle sran’m be kwlakwla’n, be fa kle be wie.

 Ndɛ nga Biblu’n kan’n: “Nán bo sutrefuɛ wie i sannzan.”—Sanwun Yolɛ 19:14.

 Ndɛ nga Biblu’n kan’n: “Ɲanmiɛn kpaman sran nun.”—Sa Nga Be Yoli’n 10:34.

 Ndɛ nga Biblu’n kan’n: ‘Zezi wlanwlannin klɔ dandan nin klɔ kanngan’m be kwlaa be su, [...] ɔ boli Ɲanmiɛn Sielɛ’n i jasin fɛ’n.’—Matie 9:35.

 Ndɛ nga Biblu’n kan’n: Zezi ‘yoli maan sutrefuɛ’m be tili sa, yɛ bobo’m be ijɔli.’—Marki 7:37.

 Ndɛ nga Biblu’n kan’n: “Sutrefuɛ’m be su’m bé tíke.”—Ezai 35:5.

 Like nga ndɛ sɔ’n kle e’n: Zoova seli kɛ sutrefuɛ’m bé tí sa.—Ezai 29:18.

Wafa nga Zoova i Lalofuɛ’m be uka be nga be timan sa’n andɛ’n

 E mɔ e ti Zoova i Lalofuɛ’n, e kan Ɲanmiɛn ndɛ’n e kle be nga timan sa’n mɛn wunmuan’n nun. ?Ngue yɛ e yo naan y’a kwla yo sɔ-ɔ? E kaci Biblu’n nin video wie mun bobo aniɛn 100 tra su nun. Asa’n e kle be nga be timan sa’n be Biblu’n nun like yɛ e yo aɲia mun bobo aniɛn’n nun. E yo i kwlaa sɔ’n e man be nga be kunndɛ kɛ Ɲanmiɛn uka be’n. E deman be like fi. ?Ngue ti-ɔ? Afin Zezi seli kɛ: “N fɛ i sɔ yolɛ’n n cɛli amun, amun kusu nán amun de like fi.”—Matie 10:8.

 A kwla wun ninnge sɔ mun e ɛntɛnɛti adrɛsi’n su annzɛ a kwla cuɛn wie sie ɔ mannzin’n nun. Nian wafa nga a kwla yo sɔ’n:

 JW.ORG su. E ɛntɛnɛti adrɛsi’n i nglo lɔ lika’n nun’n, aniɛn’m be su nzɔliɛ kun o lɛ. Tin nzɔliɛ sɔ’n su naan w’a wun bobo aniɛn trele nga a kunndɛ’n.

 JW Library Sign Language nun. Fa sie i ɔ mannzin’n nun, i liɛ’n á kwlá nían video mun bobo aniɛn’n nun annzɛ á kwlá fá be.

?Ninnge benin mun yɛ e fa kle be Biblu’n nun like-ɔ?

 Bobo aniɛn’n nun Biblu’n. Ɲanmiɛn Ndɛ’n—Mɛn Uflɛ Biblu’n yɛ ɔ ti Biblu nga be kacili i wunmuan’n bobo aniɛn nun’n be nun klikli’n niɔn. Be yili i Amlɛnkɛn’m be lɔ bobo’m be aniɛn nun. Siɛn’n b’a yi Mɛn Uflɛ Biblu’n i wunmuan annzɛ i bue bobo aniɛn kpanngban nun. Yɛ afuɛ kwlakwla’n, be yi i bobo aniɛn uflɛ nun. (Sɛ a kunndɛ kɛ á wún bobo aniɛn nga be nun yɛ be yili Biblu’n annzɛ á kánngan nun ɛntɛnɛti su’n, nian kuku nga nun: “ Ɲanmiɛn Ndɛ’n—Mɛn Uflɛ Biblu’n wo bobo aniɛn’n nun.”)

•   Nian video nga be flɛ i kɛ La Traduction du monde nouveau en entier est maintenant disponible en langue des signes américaine naan w’a wun like nga e yo naan y’a kwla yi Biblu bobo aniɛn nun’n.

•   Sɛ a kunndɛ kɛ á tíe bobo aniɛn’n nun Biblu nga be kanngannin nun’n, fa JW Library Sign Language sie ɔ mannzin’n nun. Ɔ́ úka ɔ naan w’a wun Biblu’n nun ndɛ mma trele nga a kunndɛ i bobo aniɛn’n nun’n.

•   Dimitro nin i yi Vita be timan sa, sanngɛ be mma’m be liɛ’n be ti sa. Be nin be mma’m be kanngan bobo aniɛn nun Biblu’n nun cɛn kwlakwla. Nian i su ye nga be ɲɛn i’n.

 Video nga be taka Biblu’n nun ndɛ’n su’n. Zoova i Lalofuɛ’m be yi video wie mun bobo aniɛn’n nun. Video sɔ’m be uka be nga be timan sa’n naan b’a kwla wun Biblu’n nun ndɛ’n i wlɛ naan kusu b’a nanti i nun afɔtuɛ’m be su. Afɔtuɛ sɔ’m be ti:

•   Be nga b’a ja bla annzɛ bian’n nin awlobo’m be liɛ.

•   Gbanflɛn nin talua’m be liɛ.

•   Ba kanngan’m be liɛ.

 E kle be nga be timan sa’n be Biblu’n nun like. Sran kun kwla kle wɔ Biblu’n nun like bobo aniɛn’n nun blɛ kwlaa nga a klo’n. Klɛ e fluwa naan e ko kle wɔ Biblu’n nun like. A su tuɛmɛn i ti sika.

 Bian kun suan Jezɔnun Senajonɔn, yɛ ɔ tran Filipinin lɔ. Nian wafa nga Biblu’n nun like suanlɛ’n ukɛli i naan ɔ nin Ɲanmiɛn be afiɛn w’a mantan kpa’n.

 Bian kun ekun suan Mario Antunɛzi. Laa ɔ ti pastɛɛ, Ɔndurasi lɔ. Ɔ usɛli i wun kosan kaka laa. Nian wafa ng’ɔ wunnin be su tɛlɛ’n. I bɔbɔ yiyili nun ndɛ nga nun: “J’avais plus de questions que de réponses.”

 Aɲia kanngan nin aɲia dandan mun. E le asɔnun bo kaka mɛn wunmuan’n nun mɔ be yo aɲia mun bobo aniɛn’n nun-ɔn. Be nga be timan sa’n be kɔ lɔ be ko su Ɲanmiɛn yɛ be suan like lemɔcuɛ kwlaa. Asa’n, afuɛ kwlakwla’n, e yo aɲia dandan mun bobo aniɛn’n nun. E aɲia kanngan nin aɲia dandan’m be bo’n, e kaci ndɛ’n naan be nga be timan sa’n mɔ be kunngba’n be ti aɲinsifuɛ’n b’a kwla wun ndɛ’n i wlɛ. Asa ekun’n, e yi be nga be ti aɲinsifuɛ’n be fluwa liɛ. Yɛ e deman like fi.

•   Kunndɛ asɔnun bo kun m’ɔ o koko lɛ’n.

•   Nian e aɲia kanngan nin aɲia dandan’m be su ndɛ’n.

•   Tran aɲia nga e yo e fa kle kɛ e wla kpɛn Zezi i wie’n su’n i bo. I yɛ ɔ ti e afuɛ kun nun aɲia’m be nun cinnjin kpafuɛ’n niɔn.

 Bian kun suan Zoze Luisi Ayala, yɛ ɔ tran Mɛksiki lɔ. Kɛ be wuli i’n, ɔ timan sa, yɛ i sin’n ɔ wa kacili aɲinsifuɛ. Nian wafa nga be ukɛli i blɛblɛ naan w’a si sran’m be Biblu’n nun like kle kpa’n.