Afuɛ 2022 nun mɛn wunman’n nun’n sika nga awa’m be fa wlɛli i alɛ ninnge’m be nun’n ti dolaa miliaa 2.240. Nanwlɛ be nin-a wunmɛn i sɔ’n le. Like nga ti yɛ ɔ yoli sɔ’n ɔ fin Risi nin Ikrɛnin be alɛ’n. Afuɛ 2023 Avrili anglo nun’n, anuannzɛ kun (Institut international de recherche sur la paix de Stockholm (SIPRI)) seli kɛ:

•   Abloki mɛn’n nun lɔ’n “sika nga be fa wlɛ i alɛ kunlɛ ninnge’m be nun afuɛ kun nun’n i su ukali dan kpa. Kɛ ɔ fɛ i afuɛ 1991 nun’n i sɔ’n nin-a juman le.”

•   “Risi awa’n ukɛli i alɛ kunlɛ ninnge’m be su dan ti’n, mɛn’n nun nvle nga be fa sika dan wlɛ i alɛ kunlɛ ninnge’m be nun w’a kaci be nun nsan su’n. Kusu nn laa ɔ ti be nun nnun su’n.”

•   Etazinin’n yɛ ɔ ti be nun klikli’n niɔn. “Sika nga be fa wlɛ i alɛ kunlɛ ninnge’m be nun’n, sɛ be kan nga mɛn wunmuan’n nun nvle’m be fa wlɛ i alɛ kunlɛ ninnge’m be nun’n bo nun’n, ɔ ka kan ɔ́ jú i bue.”

 Bian kun suan Nan Tian. Ɔ o be nga klɛli SIPRI rapɔru’n nun wie. Ɔ seli kɛ: “Wafa nga awa’m be wla be wun ase be kunndɛ alɛ kunlɛ ninnge mun’n ɔ kle kɛ fɔundi nunman mɛn nga e wo nun yɛ’n nun yɛ srɛ kun sran mun.”

 Biblu’n seli kɛ e blɛ liɛ nga nun’n nvle nga be le kwlalɛ’n bé fá alɛ bé wlá be wiengu sin. Yɛ ndɛ tɔ́ be afiɛn kpɛ sunman. Asa’n ɔ kan like kunngba ng’ɔ kwla yo maan e di fɔundi’n i ndɛ wie.

•   Biblu’n flɛ blɛ nga e o nun yɛ’n kɛ “mɛn’n i awieliɛ blɛ.”—Daniɛli 8:19.

•   Daniɛli fluwa’n seli kɛ blɛ sɔ’n nun’n mɛn’n siefuɛ nga be le kwlalɛ’n bé wá sí akplowa. Awa sɔ’m “bé súsú” be wiengu bo naan bé nían be nun ng’ɔ le kwlalɛ’n. I sɔ yolɛ nun’n bé dí “sika” kpanngban kpa.—Daniɛli 11:40, 42, 43.

 Sɛ ɔ waan á sí ndɛ sɔ’n nun kpa ekun’n nian video ng’ɔ suan Ɲanmiɛn nuan ndɛ’n kpɛnnin su—Daniɛl ndɛ tre 11.

•   Biblu’n waan Ɲanmiɛn wá fá sielɛ uflɛ káci klɔ sran’m be awa mun. Ɔ́ “táka sielɛ kun mɔ be su nunnunmɛn i le-ɔ. Yɛ sielɛ sɔ’n su yoman nvle uflɛ fi i liɛ. Ɔ́ núnkun famiɛn diwlɛ kwlaa sɔ mun, yɛ ɔ́ yó maan be su tranman lɛ kun, kpɛkun i ngunmin ká lɛ tititi.”—Daniɛli 2:44.

•   Ɔ cɛ kan’n Zoova a wá yó like nga klɔ sran’m b’a kwlá yoman’n. Yɛle kɛ ɔ́ yó maan é dí fɔundi’n i kpafuɛ’n. ?Wafa sɛ yɛ ɔ́ yó i sɔ liɛ’n niɔn? Ɔ́ sín i Sielɛ m’ɔ o ɲanmiɛn su lɔ’n i lika núnnún alɛ kunlɛ ninnge mun nin nzaje sa’m be kwlaa.—Jue Mun 46:8, 9.

 Sɛ a kunndɛ kɛ á sí like nga Ɲanmiɛn i Sielɛ’n wá yó’n i kpa ekun’n, kanngan “Ɲanmiɛn i Famiɛn dilɛ blɛ’n nun’n, sran’m ‘bé nyán fɔundi lele’” nun.