MAAN AMUN ƝIN TRAN SU!

Alɛ’n nin lika m’ɔ kacikaci’n ti’n aliɛ ndɛ’n w’a yo kekle—?I su ndɛ benin yɛ Biblu’n kan-ɔn?

Ikrɛnin lɔ alɛ’n nin lika m’ɔ kacikaci’n ti’n aliɛ ɲanlɛ mɛn’n nun’n te yo kekle te kɔ. I li nvle nga be nun’n sran sunman be ɲanman aliɛ kpa be dimɛn i laa’n yɛ w’a yo sɔ kpa’n niɔn.

Afuɛ 2023, Zuie i le 17 su’n, Antonio Guterɛsi m’ɔ ti nvlenvle’m be anuannzɛ nga be flɛ i ONU’n i su kpɛn’n seli kɛ: “Alɛ’n nin lika m’ɔ kacikaci’n, nin sannzi nin kolan be gua m’ɔ uka su’n be ti’n fie dilɛ’n nin aliɛ ɲanlɛ’n b’a yo kekle.”
Afuɛ 2023, Zuie i le 23 su’n, ɛntɛnɛti su zronali kun seli kɛ: “Risi nvle’n waan be nuan m’ɔ sɛli su kɛ bé mán atin naan be kwla yo Ikrɛnin lɔ ninnge kɛ ble sa’n be atɛ nvle uflɛ’m be nun’n, ɔ diman su kun. Be nga be suɛn i sɔ sa’m be su like’n be waan i sɔ’n ti’n aliɛ ndɛ’n wá yó kekle kpa ekun asiɛ’n su. Yɛ nvle nga i nunfuɛ’m be leman sika’n be nun’n aliɛ’n i gua’n wá úka su kpa. I li sran ble mɛn’n i nglo lɔ lika’n nin wia afiliɛ lɔ lika’n nun yɛ ɔ́ wá yó sɔ kpa’n niɔn.—Atalayar.com.

Nian aliɛ ndɛ’n nin e ɲrun lɔ sa’m be su ndɛ nga Biblu’n kan’n.

Biblu’n dun mmua kannin kɛ aliɛ ndɛ w’a tɔ

Zezi seli kɛ: “Nvle kun wá jáso nvle uflɛ wun. Yɛ famiɛn kun wá jáso famiɛn uflɛ wun. Asa kusu’n, awe’n wá kpɛ́n.”—Matie 24:7.
Biblu’n nun fluwa nga be flɛ i Sa Nglo Yilɛ’n kan nnɛn kpanngɔ su fufuɛ nnan be ndɛ. Be nun kun ti alɛ’n i nzɔliɛ. Kun ng’ɔ su i su’n ti awe’n i nzɔliɛ. Ɔ ti blɛ mɔ aliɛ ɲanlɛ’n yó kekle yɛ kusu i gua’n úka su kpa’n i nzɔliɛ. Ɔ seli kɛ: “N wunnin nnɛn kpanngɔ ble tuun kun. Toe kun wo sran ng’ɔ ti su’n i sa nun. N tili like kun ngan. […] Ɔ seli kɛ: “Ble kilo kun ti denie kun a, ɔɔzu kilo nsan ti denie kun.”—Sa Nglo Yilɛ 6:5, 6.

E blɛ yɛ mɔ Biblu’n flɛ i ‘mɛn’n i awieliɛ blɛ’n’ i nun’n nun aliɛ ɲanlɛ’n i su ndɛ sɔ mɔ Biblu’n kannin be’n be su kpɛn su. (2 Timote 3:1) Sɛ a kunndɛ kɛ á sí “mɛn’n i awieliɛ” blɛ’n ɔ nin nnɛn kpanngɔ su fufuɛ nnan nga Sa Nglo Yilɛ fluwa’n kan be ndɛ’n be su ndɛ kpa ekun’n nian video m’ɔ suan Kɛ ɔ fɛ i afuɛ 1914 nun’n mɛn kacili, yɛ kanngan ndɛ ng’ɔ suan “?Ngue yɛ sran nnan sɔ’m be ti be nzɔliɛ-ɔ?” nun.

Wafa nga Biblu’n kwla uka wɔ’n

Afɔtuɛ kpakpa wie’m be o Biblu’n nun. Be kwla uka e naan y’a wun sa kekle nga be tɔ e su’n be trawlɛ. Be nun wie yɛle aliɛ’n i gua m’ɔ uka su’n nin awe m’ɔ kpɛn’n bɔbɔ. Nian afɔtuɛ sɔ wie mɔ be o ndɛ “Comment vivre avec moins” nun’n.
Asa kusu’n Biblu’n cici e wla kɛ lika’n wá yó kpa. Ɔ ta e nda kɛ blɛ kun wá jú’n, “ble nin i wunsu ninnge’m bé bú asiɛ’n su.” (Jue Mun 72:16) Sɛ a kunndɛ kɛ á sí i sɔ liɛ’n ɔ nin like nga ti yɛ a kwla lafi su’n be su like ekun’n kanngan ndɛ ng’ɔ suan “Une espérance réelle pour des jours meilleurs” nun.