?Aliɛ mɔ be ɲɛnmɛn i kun’n i su ndɛ benin yɛ Biblu’n kan-ɔn?
Like kun m’ɔ kle sran kpanngban be yalɛ kpa andɛ’n, yɛle awe’n. Ɔ maan mɛn siefuɛ’m be su mian be ɲin kpa naan sran’m be kwlaa be ɲan like be di. a ?Sanngɛ cɛn wie lele’n, awe’n su kunman sran fi kun? ?I su ndɛ benin yɛ Biblu’n kan-ɔn?
Biblu’n kannin kɛ awe’n wá kpɛ́n e blɛ liɛ nga nun
Biblu’n dun mmua seli kɛ e blɛ liɛ nga nun’n, awe’n wá kún sran mun. Ɔ flɛ blɛ sɔ’n kɛ “mɛn’n i awieliɛ blɛ.” (2 Timote 3:1) Nán Ɲanmiɛn ti yɛ sran’m be ɲanman like be diman-ɔn. Sanngɛ ɔ seli kɛ sa sɔ’n wá jú. (Zaki 1:13) Sa sɔ’n i su ndɛ nga Biblu’n kan’n be nun nɲɔn yɛ:
Awe’n wá kpɛ́n lika fanunfanun nun. (Matie 24:7) Biblu’n nun ndɛ sɔ’n kle e kɛ awe’n wá kpɛ́n lika sunman nun. Be nga be nian wafa nga fie su ninnge’m be yo ye’n ɔ nin wafa nga be fa cɛcɛ sran mun’n be su’n be seli kɛ: ‘Awe’n kun sran mun kpa w’a tra laa’n. Asa’n, sran wie’m be ɲanman aliɛ ng’ɔ ko yo be ye’n be diman. Wie’m be liɛ kusu’n, aliɛ nga be ɲɛn i’n ɔ juman lika fi.’ b Nvle wie’m be nun’n, sran kpanngban kpa be ɲanman aliɛ kpa sa be diman. Ng’ɔ ti tɛ kpa bɔbɔ’n, yɛle kɛ be sunman lika be ka nun be wu.
“N wunnin nnɛn kpanngɔ ble tuun kun. Toe kun wo sran ng’ɔ ti su’n i sa nun.” (Sa Nglo Yilɛ 6:5) Nnɛn kpanngɔ’n nin sran ng’ɔ ti su’n, be ti awe ng’ɔ kpɛn mɛn i awieliɛ blɛ nga nun’n, i nzɔliɛ. c Toe ng’ɔ o sran ng’ɔ ti nnɛn kpanngɔ’n su’n i sa nun’n, ɔ fa sunnzun aliɛ. Aliɛ’n kusu ti kaan sa. Ɔ maan aliɛ nga sran’m be ɲɛn i’n, ɔ juman lika fi. Kɛ nnɛn kpanngɔ’n nin sran ng’ɔ ti su’n bé wlán sín’n, kpɛkun sran kun nɛn tɛli. Ɔ seli kɛ ninnge’m bé gúa’n wá úka su kpa. I sɔ’n ti’n, i waan be yo aliɛ kan ng’ɔ o be sa nun’n i cɛcɛ. (Sa Nglo Yilɛ 6:6) Ndɛ sɔ mɔ Biblu’n kan’n yɛ e wun i andɛ-ɔ. Sran kpanngban be ɲanman aliɛ kpa naan b’a di. Wie’m be kusu sika nga be ko ɲɛn i naan b’a to aliɛ’n yɛ be lemɛn i-ɔ.
Awe’n su tranman lɛ kun
Fluwa sifuɛ’m be waan fie su ninnge nga asiɛ’n sufuɛ’m be tinuntinun be kwla ɲɛn i’n, ɔ sɔnnin tra su bɔbɔ. ?Sɛ ɔ ti sɔ’n niɔn, ngue ti yɛ sran’m be ɲanman aliɛ be diman-ɔn? ?Yɛ ngue yɛ Zoova d m’ɔ ti e Yifuɛ’n ɔ́ wá yó naan i sɔ sa liɛ’n w’a wie-ɔ? ?Ndɛ benin yɛ Biblu’n kan-ɔn?
Sa ng’ɔ o lɛ’n: Mɛn siefuɛ’m be kwlá yoman naan yalɛ’n nin sran lufle bulɛ’n mɔ be ti yɛ awe kun sran mun’n b’a wie.
Like nga Ɲanmiɛn wá yó’n: Ɲanmiɛn Sielɛ’n wá sín klɔ sran’m be awa’n i osu. (Daniɛli 2:44; Matie 6:10) Andɛ’n, yalɛ’n ti’n sran kpanngban kpa be kwlá ɲanman aliɛ be diman. Sanngɛ i sɔ liɛ’n wá káci. Biblu’n kannin like nga Zezi Klisi m’ɔ ti Ɲanmiɛn Sielɛ’n i su Famiɛn’n wá yó’n i ndɛ. Ɔ seli kɛ: “Ɔ́ dé yalɛfuɛ m’ɔ kpan kunndɛ ukalɛ’n, ɔ nin sran ng’ɔ leman wie’n nin sran ng’ɔ leman ukafuɛ’n. […] Ble nin i wunsu ninnge’m bé bú asiɛ’n su, bé bú oka’m be ti’n su.”—Jue Mun 72:12, 16.
Sa ng’ɔ o lɛ’n: Kɛ sran’m be kun alɛ’n, be saci ninnge kpanngban. Kpɛkun lika’n yo kekle sran’m be su. Ɔ maan aliɛ ndɛ’n kusu ɔ yo kekle wie.
Like nga Ɲanmiɛn wá yó’n: “[Zoova] yo maan alɛ kunlɛ’n wie asiɛ wunmuan’n su. Ɔ bubu ta’n nin cua’n be nun. Ɔ yra alɛ kunlɛ kakaklolo mun sin nun.” (Jue Mun 46:9) Ɲanmiɛn wá núnnún alɛ ninnge’m be kwlaa. Kpɛkun ɔ́ wá núnnún be nga be yo maan alɛ tɔ’n. Ɔ maan kɛ sran’m bé kó kúnndɛ aliɛ’n, srɛ su kunman be. Asa ekun’n, aliɛ ɲanlɛ’n su yoman kekle. Biblu’n se kɛ: “Sran kpa’m bé bó nɲrɛ kɛ waka sa, yɛ fɔundi’n yó dan lele saan anglo’n nunman lɛ kun.”—Jue Mun 72:7.
Sa ng’ɔ o lɛ’n: Kɛ nzue tɔ dan tratra su’n annzɛ kɛ wia’n bo dan’n ɔ saci fie su ninnge mun, kpɛkun nnɛn’m be wu.
Like nga Ɲanmiɛn wá yó’n: Ɲanmiɛn wá yó maan nzue’n ɔ nin awunmuan’n, ɔ nin wia’n ɔ nin be wunsu ninnge mun be su saciman ninnge’m be kun. Ɲanmiɛn wá yó maan lika’n wá yó kpa. Ɔ maan fie su ninnge’m bé yó ye. Biblu’n se kɛ: “[Zoova] yo maan aunmuan m’ɔ fita kekle kpa’n ɔ kan ase, jenvie m’ɔ bo’n ɔ jran diin. […] Ɔ yo maan aawlɛ flɛnnɛn’n kaci nzue lika m’ɔ ti ndɛma ngunmin’n, yɛ asiɛ kee’n kaci nzue ti. Ɔ yo maan be nga awe kun be’n be tran lɛ. […] Be di fie, yɛ be ta viɲin mɔ be su mma kpanngban kpa’n.”—Jue Mun 107:29, 35-37.
Sa ng’ɔ o lɛ’n: Sika dunman nun ti’n, sran wie’m be yo aliɛ nga be timan kpa’n be atɛ. Wie’m be liɛ kusu be yo like kwlaa nga be kwla yo naan be nga be sa mian aliɛ wun’n b’a ɲɛnmɛn i.
Like nga Ɲanmiɛn wá yó’n: Ɲanmiɛn Sielɛ’n wá núnnún be kwlaa nga be bu sran lufle’n ɔ nin aɲinkplifuɛ mun. (Jue Mun 37:10, 11; Ezai 61:8) Biblu’n kle kɛ Zoova “yɛ ɔ di be nga be di be lufle’n be ndɛ’n i klanman-ɔn, ɔ man be nga awe kun be’n be kpanwun.”—Jue Mun 146:7.
Sa ng’ɔ o lɛ’n: Afuɛ nuan kwlaa nun’n, aliɛ nga sran’m be guɛ i blo annzɛ ɔ saci’n ɔ sɔnnin kpa.
Like nga Ɲanmiɛn wá yó’n: Kɛ Ɲanmiɛn Sielɛ’n i su famiɛn’n wá síe sran mun’n, junman nga sran wie’m bé wá dí’n yɛle aliɛ’n i su nianlɛ. I nun nga Zezi o asiɛ’n su wa’n, w’a kplinman su kɛ sran’m be saci aliɛ. I wie yɛle kɛ cɛn kun’n, ɔ yoli abonuan sa mannin sran akpi nnun (5.000) tra su be aliɛ. I sin’n, ɔ seli i sɔnnzɔnfuɛ’m be kɛ: “An tiantian i sinsin kanngan nga be kali’n be nuan. I liɛ’n, wie fi su saciman.”—Zan 6:5-13.
Ɲanmiɛn Sielɛ’n ti’n, ninnge kwlaa nga be ti yɛ awe kun sran mun’n be su tranman lɛ kun. Ɔ maan sran’m be kwlaa bé ɲán aliɛ kpa bé dí. (Ezai 25:6) Sɛ a kunndɛ kɛ á sí blɛ nga Ɲanmiɛn Sielɛ’n wá yó sɔ’n, a kwla kanngan ndɛ akpasua nga nun: “?Blɛ benin nun yɛ Famiɛn nga Ɲanmiɛn sieli i’n ɔ́ wá síe asiɛ’n niɔn?”
a Le Programme de développement durable à l’horizon 2030, adopté par tous les états membres des Nations Unies en 2015.
b Rapport conjoint de L’Organisation des Nations unies pour l’alimentation et l’agriculture, le Fonds international de développement agricole, le Fonds des Nations unies pour l’enfance, Le Programme Alimentaire Mondial des Nations Unies, et L’Organisation mondiale de la Santé.
c Sɛ a kunndɛ á sí nnɛn kpanngɔ nnan ɔ nin be su fufuɛ nga be kan be ndɛ Sa Nglo Yilɛ fluwa’n nun be su ndɛ’n, kanngan ndɛ akpasua nga be flɛ i kɛ “?Ngue yɛ sran nnan sɔ’m be ti be nzɔliɛ-ɔ ?”
d Ɲanmiɛn i dunman’n yɛle Zoova. (Jue Mun 83:18) Kanngan ndɛ nga be flɛ i kɛ “?Wan yɛle Zoova?” i nun.
Ninnge wie mɔ be kwla yo ɔ fɛ ekun'n
KOSAN MƆ BIBLU’N TƐ BE SU’N
?Nzɔliɛ onin yɛ ɔ kle kɛ e o “mɛn i awieliɛ blɛ’n” nun-ɔn?
Biblu’n kannin ninnge kaka mɔ bé klé e o mɛn’n i awieliɛ blɛ’n nun’n be ndɛ.
NINNGE CINNJIN NGA BIBLU’N KLE BE’N
?Ngue yɛ be flɛ i Ɲanmiɛn Sielɛ’n niɔn?
I nun mɔ Zezi kán Ɲanmiɛn ndɛ’n, ɔ kannin Ɲanmiɛn Sielɛ’n i ndɛ trali like kwlaa. I afuɛ ya kpanngban yɛ, sran’m be srɛ maan Sielɛ’n i blɛ’n ju.
