MAAN AMUN ƝIN TRAN SU!

Siansifuɛ’m be waan asiɛ’n i nunnunlɛ dɔ’n w’a wie ju—?I su ndɛ benin yɛ Biblu’n kan-ɔn?

Afuɛ 2023, Zanvie i le 24 su’n, siansifuɛ wie’m be seli kɛ asiɛ’n i nunnunlɛ dɔ’n a w’a wie ju.

Anuannzɛ kun seli kɛ: “asiɛ’n i nunnunlɛ dɔ sɔ’n kle kɛ ninnge tɛtɛ nga sran’m be yo be’n ti’n ɔ ka kaan sa asiɛ’n sáci. I sɔ’n ti’n Jɔlɛ cɛn’n, siansifuɛ’m be seli kɛ Ikrɛnin lɔ alɛ’n nin bɔnbu dandan nga sran’m be waan bé tó’n ɔ nin lika mɔ w’a lo dan’n ti’n, dɔ sɔ’n w’a wie ju.”—AFP International Text Wire.
Zronali kun seli kɛ: “Jɔlɛ cɛn’n, Siansifuɛ’m be seli kɛ sɛ é kwlá sé’n ɔ ka segɔndu 90 cɛ naan asiɛ’n i nunnunlɛ dɔ’n w’a ju. Kɛ ɔ fɛ i laa lele andɛ’n, asiɛ’n i nunnunlɛ dɔ’n nin-a mantanman koko sa le.”—ABC News.
Zronali kun seli kɛ: “Siansifuɛ wie’m be waan klɔ sran’m be nunnunlɛ’n ɔ nin-a mantanman koko sa le.”—The Guardian.

?Asiɛ’n nin klɔ sran’m be nunnunlɛ’n w’a mantan koko sakpa? ?Sa nga bé jú e ɲrun lɔ’n ti’n ɔ fata kɛ srɛ kun e? ?I su ndɛ benin yɛ Biblu’n kan-ɔn?

Sa nga bé jú e ɲrun lɔ’n

Biblu’n se kɛ “asiɛ’n ká lɛ tititi” naan sran’m “bé trán su tititi.” (Akunndanfuɛ’n 1:4; Jue Mun 37:29) Ɔ maan sran’m be su saciman asiɛ’n mlɔnmlɔn yɛ be su yoman naan i su tranlɛ’n w’a yoman ye kun.

Ndɛ nga Biblu’n kan’n yɛle kɛ mɛn’n wíe. Biblu’n waan “mɛn’n su sin.”—1 Zan 2:17

Sɛ a kunndɛ kɛ á sí like nga Biblu’n flɛ i mɛn’n i awieliɛ’n, kanngan ndɛ nga “La fin du monde est-elle proche ? Qu’est-ce que l’apocalypse ?” i nun.
Sɛ a kunndɛ kɛ á sí sa nga bé wá jú mɛn’n nun’n ɔ nin blɛ nga bé jú’n i su ndɛ nga Biblu’n kan’n, kanngan ndɛ nga “Quand la fin du monde viendra-t-elle ? i nun.

E wla kwla gua ase

Kannzɛ mɛn’n nun sa’m b’a sɔn’n, sanngɛ Biblu’n kwla uka e naan e wla w’a boman e wun. ?Wafa sɛ?

Biblu’n man e afɔtuɛ kpakpa wie mɔ be kwla uka e-ɔ. (2 Timote 3:16, 17) I wie yɛle ndɛ nga: “Comment ne pas vous laisser submerger par l’inquiétude” Ndɛ sɔ’n kwla uka wɔ naan kannzɛ bɔbɔ lika’n w’a yo kekle’n sanngɛ ɔ wla w’a gua ase.
Biblu’n kan like kun mɔ e kwla fae wla gua su’n i ndɛ. (Rɔmunfuɛ Mun 15:4) Biblu’n yiyi sa nga be ju dɔ nga su’n ɔ nin nga bé wá jú e ɲrun lɔ’n be nun weinwein kpa kle e. I sɔ’n kwla uka e naan y’a jran mɛn’n nun sa’m be ɲrun kekle.

Sɛ a kunndɛ kɛ Biblu’n uka wɔ kpa’n, é wlá ɔ fanngan kpa kɛ andɛ bɔbɔ’n a kplin su kɛ e kle wɔ Biblu’n nun like. A su tuaman like fi.

a Siansifuɛ’m be fluwa kun seli kɛ: “Asiɛ’n i nunnunlɛ dɔ’n ti nzɔliɛ like kun m’ɔ kpɛn sran’m be wla kɛ ɔ ka kaan sa’n ninnge nga e yi be’n bé sáci asiɛ’n mlɔnmlɔn. Ɔ maan sɛ y’a nianman e wun su’n, asiɛ’n sáci yɛ sran fi su fiteman nun.”—Bulletin of the Atomic Scientists.