MAAN AMUN ƝIN TRAN SU!
?Balɔn nga nvlenvle’m be to’n ɔ kwla yo maan sran’m be bo yo kun sakpa?—?I su ndɛ benin yɛ Biblu’n kan-ɔn?
Be waan sran kɔe miliaa nnun bé nían balɔn nga nvlenvle’m be su to i afuɛ 2022, Novanblu i le 20 lele m’ɔ́ fá jú Desanblu i le 18. Kɛ ngowa kanlɛ ninnge kɛ nga sa’m be ju’n, sran’m be bo yo kun be nian. Ɔ maan sran wie’m be bu i kɛ ninnge sɔ’m be kwla yo sran’m be ye tra ngalɛ’n.
Nɛlisɔnun Mandela mɔ laa’n ɔ ti Afriki Di Sidi plezidan’n, ɔ seli kɛ: “Ngowa kanlɛ ninnge kɛ balɔn tolɛ sa’n, be kwla yo maan mɛn’n kaci. I sɔ ninnge’m be yo maan sran’m be lafi like kun su, be bo yo kun. Wafa ng’ɔ yo sɔ’n ɔ ti i liɛ ngunmin.”
Gianin Ɛnfantino m’ɔ ti FIFA a i plezidan’n, ɔ seli kɛ: “Kɛ be to balɔn’n, ɔ yo maan sran’m be bo yo kun. Afin be wla o like kunngba su, yɛ be di aklunjɔɛ likawlɛ. Ɔ yo maan be wun kɛ be kwla klo sran ngba yɛ be kwla klo like kunngba’n.”
?Balɔn tolɛ nga be flɛ i Kupu di mɔndu’n annzɛ ngowa kanlɛ like uflɛ kwla yo ninnge sɔ mun sakpa? ?Sran’m be bo kwla yo kun?
?Ɔ yo maan sran’m be bo yo kun sakpa?
Afuɛ liɛ’n balɔn nga nvlenvle’m be toli’n w’a yoman balɔn tolɛ sa ngbɛn. Balɔn sɔ’n kpɛli akplowa kaka ba. Sran’m be su ndɛ mun nin politiki ndɛ kɛ sran wie’m be sran bulɛ nin sika ndɛ nun sran wie’m be lufle bulɛ sa’n be tɛli akplowa sɔ’m be nun.
Ɔ nin i sɔ ngba’n, sran kaka be waan ngowa kanlɛ ninnge sɔ’m be yo fɛ kpa. Wie’m be kunndɛ kɛ ninnge sɔ’m be yo naan sran’m be bo yo kun naan ɔ ka sɔ titi. Sanngɛ i sɔ’n kwlá yoman ye. Afin kɛ i sɔ blɛ liɛ’n ko ju’n, ayeliɛ nga sran’m be yi be nglo’n be ti’n, sran’m be bubu be wun nun. Biblu’n seli kɛ ayeliɛ sɔ’m bé klé kɛ e o blɛ nga be flɛ i kɛ “mɛn’n i awieliɛ blɛ’n” i nun.—2 Timote 3:1-5.
Like ng’ɔ́ yó maan sran’m be bo yó kun sakpa’n
Biblu’n kan like kun m’ɔ́ yó maan sran’m be kwlaa be bo yó kun’n i ndɛ. I waan ɲanmiɛn su lɔ awa kun mɔ be flɛ i kɛ “Ɲanmiɛn Sielɛ’n” yɛ ɔ́ wá yó maan asiɛ’n sufuɛ’m be kwlaa be bo yó kun-ɔn.—Liki 4:43; Matie 6:10.
Ɲanmiɛn Sielɛ sɔ’n i su Famiɛn’n yɛle Zezi Klisi. Ɔ́ wá yó maan fɔundi trán asiɛ wunmuan’n su. Biblu’n se kɛ:
“Sran kpa’m bé bó nɲrɛ kɛ waka sa.”—Jue Mun 72:7.
“Ɔ́ dé yalɛfuɛ m’ɔ kpan kunndɛ ukalɛ’n. […] Ɔ́ dé be be nga be kle be yalɛ’n nin nzaje sa yofuɛ’m be sa nun.”—Jue Mun 72:12, 14.
Dɔ nga su bɔbɔ’n, ndɛ nga Zezi kannin be’n be ti’n sran miliɔn kpanngban mɔ be fin nvlenvle 239 nun’n be bo w’a yo kun. Sran sɔ’m be wlali sran kpɔlɛ’n i ase. Sɛ a kunndɛ kɛ á sí nun kpa ekun’n, kanngan ndɛ akpasua nga nun: “E kwla wla sran kpɔlɛ’n i ase.”
a I bo’n yɛle Fédération Internationale de Football Association. Anuannzɛ sɔ’n yɛ ɔ nian balɔn nga be to i mɛn wunmuan’n nun’n i su-ɔ.
Ninnge wie mɔ be kwla yo ɔ fɛ ekun'n
KOSAN MƆ BIBLU’N TƐ BE SU’N
?Nzɔliɛ onin yɛ ɔ kle kɛ e o “mɛn i awieliɛ blɛ’n” nun-ɔn?
Biblu’n kannin ninnge kaka mɔ bé klé e o mɛn’n i awieliɛ blɛ’n nun’n be ndɛ.
NDƐ WIE MUN EKUN
E kwla lafi su kɛ e ɲrun lɔ’n yó kpa
?Ngue ti yɛ e ɲrun lɔ sa’m be su ndɛ nga Biblu’n kan’n ɔ nin sran’m be liɛ nga be kan’n ɔ timan kun-ɔn?
NINNGE CINNJIN NGA BIBLU’N KLE BE’N
?Ngue yɛ be flɛ i Ɲanmiɛn Sielɛ’n niɔn?
I nun mɔ Zezi kán Ɲanmiɛn ndɛ’n, ɔ kannin Ɲanmiɛn Sielɛ’n i ndɛ trali like kwlaa. I afuɛ ya kpanngban yɛ, sran’m be srɛ maan Sielɛ’n i blɛ’n ju.
SASAFUƐ TRANWLƐ'N
Ɲanmiɛn Sielɛ blɛ’n nun’n ndrunmun dilɛ’n su tranman lɛ
E SU NDƐ
Se e naan e wa nian ɔ osu
A nin Zoova i Lalofuɛ mun amun koko Biblu’n nun ndɛ kun su yalɛ, annzɛ kunndɛ kɛ á sí be su ndɛ kpa.
