Aiti lɔ’n, kakawlongafuɛ mun ti’n, lika’n ti sannganwa. Sa kekleekle yolɛ’n w’a tru Afriki di Sidi nin Mɛksiki ɔ nin Amlɛnkɛn’m be mɛn’n i ja ngua lɔ nvle wie’m be nun. Kannzɛ nvle wie’m be nun’n, lika’n w’a tɔ fɔun kan’n, sanngɛ sa tɛtɛ yofuɛ wie’m be wlu sran’m be sua’m be nun be wua. Wie’m be wɔ sran’m be loto annzɛ be sua’m be nun. Ɔ maan sran’m be klun titi be, be wla guaman ase.

 Nanwlɛ, asiɛ wunmuan’n su’n, sran’m be diman mmla su kun. ?I su ndɛ benin yɛ Biblu’n kan-ɔn?

 Biblu’n seli kɛ ninnge’m be nun kun m’ɔ́ klé kɛ e o “mɛn’n i awieliɛ blɛ’n” nun’n yɛle kɛ sran’m be su diman mmla su kun. (Matie 24:3) Kɛ Zezi Klisi kán ninnge nga be kle kɛ e o mɛn’n i awieliɛ blɛ’n nun’n be ndɛ’n, ɔ seli kɛ:

•   “Yɛ mmla mɔ sran sunman be su diman su’n ti’n, sran kpanngban be su kloman be wiengu kɛ laa’n sa kun.”—Matie 24:12.

 Asa ekun’n, Biblu’n seli kɛ “mɛn’n i awieliɛ blɛ nun’n,” sran’m “be su siman be wun su nian, bé yó wlɛ, be su kloman like ng’ɔ ti kpa’n.” (2 Timote 3:1-5) Kɛ mɔ sran’m be bu be ngunmin be wun akunndan’n i ti yɛ le nɲɔn nun’n, be diman mmla su-ɔ.

 Sanngɛ lika’n su kaman kɛ ngalɛ’n sa trilili. Biblu’n waan ɔ cɛ kan’n, be nga be diman mmla su’n be su tranman lɛ kun.

•   “Ɔ ka kaan sa’n, be su wunman klunwifuɛ’m be kun. Á wá nían kan be o lɛ’n, yɛ á wá wún kɛ be nunman lɛ kun. Sanngɛ asiɛ’n yó wɛtɛɛfuɛ’m be liɛ, yɛ fɔundi dan mɔ bé dí’n ti’n, be klun jɔ́ kpa fɔuun.”—Jue Mun 37:10, 11.

 É wlá ɔ fanngan kɛ a suan Biblu’n nun ndɛ sɔ m’ɔ cici e wla’n i su like. Asa’n, á wún kɛ sa nga Biblu’n kannin be ndɛ’n yɛ be su kpɛn su andɛ-ɔ. Kanngan ndɛ nga’m be nun:

 “Une espérance réelle pour des jours meilleurs”

 “?Nzɔliɛ onin yɛ ɔ kle kɛ e o “mɛn i awieliɛ blɛ’n” nun-ɔn?”

 “?Biblu’n dun mmua kannin andɛ sran’m be ayeliɛ’n i ndɛ?”