Asɔnun sunman be su kpɛn’m be wla sran’m be fanngan kɛ be fa be wun wla Ikrɛnin lɔ alɛ kunlɛ’n nun. An nian wafa nga asɔnun su kpɛn wie’m be jran be nga be kun alɛ sɔ’n be sin’n:

•   Be flɛ Ikrɛnin lɔ asɔnun su kpɛn kun kɛ Epifanisi Klikli’n. Ɔ seli kɛ: “É lá be kwlaa nga be kun Ikrɛnin m’ɔ ti e nvle’n i ti alɛ’n be ase. […] E bu amun akunndan, e srɛ Ɲanmiɛn man amun yɛ e suan amun bo.”—The Jerusalem Post, afuɛ 2022, Marsi 16.

•   Zronali kun seli kɛ: “Kɛ Risi lɔ asɔnun Ɔɔtodɔsu i nunfuɛ’m bé yó asɔnun Mɔnnɛn cɛn’n, be su kpɛn’n srɛli Ɲanmiɛn mannin Risi sonja mun. Ɔ wlali be fanngan kɛ be kpli be nvle’n i ti kɛ nga be si i yo’n sa. Kɛ ɔ́ yó sɔ’n nn Risi awa’n fá alɛ wlá Ikrɛninfuɛ’m be sin.”—Reuters, afuɛ 2022 Avrili 3.

 ?Ɔ fata kɛ Klisifuɛ’m be kun alɛ?—?I su ndɛ benin yɛ Biblu’n kan-ɔn?

 Biblu’n kle kɛ be nga be nian Zezi i ajalɛ’n su sakpasakpa’n, be kunman alɛ.

•   “Fa ɔ tokofi’n sie i osu’n nun. Afin be kwlaa nga be tra tokofi nun’n, tokofi yɛ bé fá kún be-ɔ.”—Matie 26:52.

   ?Sɛ sran kun jran alɛ kunfuɛ’m be sin annzɛ ɔ kun alɛ’n ɔ kwla se kɛ ɔ nanti Zezi i ndɛ sɔ’n su?

•   “Ń má mán amun mmla uflɛ: Amun klo amun wiengu. Kɛ nga n fa kloli amun sa’n, amun kusu amun klo amun wiengu sɔ. Sɛ amun klo amun wiengu’n, yɛ sran’m be kwlaa bé sí kɛ amun ti min sɔnnzɔnfuɛ-ɔ.”—Zan 13:34, 35.

   ?Sɛ sran kun jran alɛ kunfuɛ’m be sin annzɛ ɔ kun alɛ’n ɔ kwla se kɛ ɔ yi klolɛ nga Zezi seli kɛ bé fá síe i sɔnnzɔnfuɛ’m be nzɔliɛ’n i nglo?

 Sɛ a kunndɛ kɛ á sí nun kpa ekun’n, kanngan ndɛ nga nun: “Peut-on concilier guerre et christianisme ?”

 ?Andɛ’n Klisifuɛ kun kwla se kɛ ɔ kunman alɛ? Ɛɛn. Biblu’n dun mmua seli kɛ blɛ ng’ɔ o yɛ’n m’ɔ ti “mɛn’n i awieliɛ blɛ’n” i nun’n, sran mɔ be fin nvlenvle kwlaa nun’n “be su suanman alɛ kunlɛ kun.” I sɔ mɔ bé yó’n nin like nga Zezi kleli’n be kɔ likawlɛ.—Ezai 2:2, 4.

•   Sɛ a kunndɛ kɛ á sí nun kpa ekun’n, kanngan Sasafuɛ Tranwlɛ’n nga nun: “?Wafa sɛ yɛ Ɲanmiɛn bu alɛ kunlɛ’n niɔn?”

 Ɔ ka kan’n, Zoova a m’ɔ ti “Ɲanmiɛn m’ɔ yo maan sran di fɔundi’n” wá sín i awa’n m’ɔ o ɲanmiɛn su lɔ’n i lika dé sran mun “be nga be kle be yalɛ’n nin nzaje sa yofuɛ’m be sa nun.”—Filipufuɛ Mun 4:9; Jue Mun 72:14.

•   Sɛ a kunndɛ kɛ á sí wafa nga i sɔ liɛ’n kpɛ́n su’n, nian video nga be flɛ i kɛ: ?Ngue yɛ be flɛ i Ɲanmiɛn Sielɛ’n niɔn?