MAAN AMUN ƝIN TRAN SU!
Mɛn wunmuan’n nun’n lika’n w’a lo dan w’a tra su—?I su ndɛ benin yɛ Biblu’n kan-ɔn?
Afuɛ 2022 Zuie anglo’n nun’n, mɛn wunmuan’n nun’n be waan lika’n loli dan trali su:
Afuɛ 2022 Zuie i le 25 su’n, zronali kun seli kɛ: “Sinua’m be mɛn’n nun lɔ’n awa’n seli kɛ klɔ kɔe 70 su’n lika’n wá ló dan trátrá su. I kpɛ nɲɔn su nga bé kán sɔ’n yɛ ɔ o lɛ-ɔ.”—CNN Wire Service.
Afuɛ 2022 Zuie i le 17 su’n, zronali kun seli kɛ: “Abloki lɔ bo kaka be su yra lika mɔ w’a lo dan’n ti.”—The Guardian.
Afuɛ 2022 Zuie i le 24 su’n, zronali kun seli kɛ: “Mɔnnɛn’n, Etazinin klɔ kaka su’n, lika’n loli dan tratrali su. Klɔ sɔ’m be o Etazinin i wia afiliɛ lɔ nin i ngua lɔ lika’n nun ɔ nin i wia atɔliɛ lɔ.”—The New York Times.
?I kwlaa sɔ’n kle sɛ? ?Cɛn wie lele’n sran’m be su kwlá tranman asiɛ’n su kun? ?Ngue ndɛ yɛ Biblu’n kan-ɔn?
?Lika’n m’ɔ lo dan’n yia Biblu’n nun ndɛ wie’m be nuan?
Ɛɛn. Lika’n m’ɔ lo dan’n yia e blɛ su ndɛ wie mɔ Biblu’n dun mmua kannin’n be nuan. I wie yɛle kɛ Zezi seli kɛ é wá wún “ninnge sroesroe mun” nin “abonuan sa wie mun.” (Liki 21:11) Lika’n m’ɔ lo dan ti’n, sran kpanngban be bu i kɛ sran’m bé wá sáci asiɛ’n naan e su kwlá tranman su kun.
?Sran’m be su kwlá tranman asiɛ’n su kun?
Cɛcɛ. Ɲanmiɛn yili asiɛ’n kɛ sran’m be tran su titi. (Jue Mun 115:16; Akunndanfuɛ’n 1:4) Ɔ su kplinman su kɛ sran’m be saci asiɛ’n mlɔnmlɔn. I kpa bɔbɔ’n ɔ tali nda kɛ ɔ́ “núnnún be nga be saci asiɛ’n.”—Sa Nglo Yilɛ 11:18.
Maan e fa e ɲin e sie ninnge nɲɔn ekun mɔ Ɲanmiɛn tali nda kɛ ɔ́ yó be’n be su:
“Aawlɛ flɛnnɛn’n nin asiɛ kee’n bé bó sró, yɛ lika kpɛtɛkplɛɛ’n i klun wá jɔ́, ɔ́ wá bó nɲrɛ kɛ safran’n sa.” (Ezai 35:1) Ɲanmiɛn su yaciman asiɛ’n lɛ naan ɔ kaci lika srolo kɛ aawlɛ flɛnnɛn’n sa. Sanngɛ ɔ́ wá síesíe i lika nga be ti saciwa’n be ye.
“A nian asiɛ’n i lika, a yo maan i su ninnge’m be yo ye, yɛ ɔ ti kpa dan.” (Jue Mun 65:9) Ɲanmiɛn wá yó maan asiɛ’n káci lika klanman.
Sɛ a kunndɛ kɛ á sí wafa nga lika m’ɔ kacikaci’n ɔ yia Biblu’n nun ndɛ’m be nuan’n, kanngan ndɛ nga nun: “Les changements climatiques et notre avenir : qu’en dit la Bible ?”
Sɛ a kunndɛ kɛ á sí nda nga Ɲanmiɛn tɛli i kɛ ɔ́ síesíe asiɛ’n i ye’n i su ndɛ wie mun ekun’n, kanngan ndɛ nga nun: “Qui sauvera la terre ?”
Ninnge wie mɔ be kwla yo ɔ fɛ ekun'n
KOSAN MƆ BIBLU’N TƐ BE SU’N
?Nzɔliɛ onin yɛ ɔ kle kɛ e o “mɛn i awieliɛ blɛ’n” nun-ɔn?
Biblu’n kannin ninnge kaka mɔ bé klé e o mɛn’n i awieliɛ blɛ’n nun’n be ndɛ.
NINNGE CINNJIN NGA BIBLU’N KLE BE’N
?Ngue ti yɛ Ɲanmiɛn yili asiɛ’n niɔn?
Ninnge nglanmannglanman’m b’a yi asiɛ’n i piɛ. Ɲanmiɛn sieli i kan ɔ nin i fata’n sɛsɛsɛ. ?Ngue ti yɛ Ɲanmiɛn niannin nun yoli i sɔ liɛ’n niɔn?
KOSAN MƆ BIBLU’N TƐ BE SU’N
?Asiɛ’n sáci mlɔnmlɔn?
Biblu’n kan like nga Ɲanmiɛn wá yó i asiɛ’n su’n i ndɛ.
