Asiɛ wunmuan’n su’n, politiki’n w’a bubu nvlenvle’m be nun. Afuɛ 2022 nun’n be usausali sran wie’m be kosan wie mun. “Sɛ be bu sran sɔ’m be nun akpasua nɲɔn’n, akpasua kun tra su waan be nvle’m be nunfuɛ nga be suan politiki akpasua fanunfanun’m be bo’n be ti sɛman kaan sa.”

 ?A sieli i nzɔliɛ kɛ amun asa liɛ’n su lɔ’n politiki ti’n sran’m be afiɛn saci kpa kɔ i ɲrun? ?Ngue ti yɛ ɔ ti sɔ-ɔ? ?Be kwla siesie i sɔ liɛ’n? Nian ndɛ nga Biblu’n kan’n.

 Biblu’n dun mmua kannin kɛ e blɛ liɛ nga mɔ be flɛ i “mɛn’n i awieliɛ blɛ’n” i nun’n sran kpanngban be ayeliɛ’n ti’n bo kun yolɛ’n yó kekle kpa.

•   “Mɛn’n i awieliɛ blɛ nun’n, lika’n wá yó kekle kpa. Afin sran’m bé bú be bɔbɔ be wun akunndan, […] be su kunndɛman kɛ be nin be wiengu’m bé tí be wun aniɛn.”—2 Timote 3:1-3.

 Kannzɛ sran kaka be mian be ɲin yo naan awa’m be kwla di junman kpa’n sanngɛ ɔ yoman ye. Sran mɔ be akunndan nga be bu’n timan kun’n be bo kwlá yoman kun naan b’a di junman likawlɛ. I sɔ’n kle kɛ ndɛ nga Biblu’n kɛnnin i laa kpa’n ti su.

•   “Sran sie i wiengu kpɛkun ɔ kle i yalɛ’n.”—Akunndanfuɛ’n 8:9.

 Sanngɛ Biblu’n fa e ɲin sie i like ng’ɔ́ wá síesíe sa sɔ’n su. Like sɔ’n yɛle awa kun mɔ i su kpɛn’n kwla yi sa nga be kle klɔ sran’m be yalɛ andɛ’n.

 Biblu’n kan siefuɛ kun m’ɔ kwla siesie sran’m be su sa mun’n i ndɛ. I waan sran sɔ’n yɛle Zezi Klisi. Zezi le tinmin nin kwlalɛ, yɛ ɔ klo kpa kɛ ɔ́ yó naan klɔ sran’m be kwlaa be bo yo kun naan kusu be di fɔundi.

•   “I blɛ su’n, sran kpa’m bé bó nɲrɛ kɛ waka sa, yɛ fɔundi’n yó dan.”—Jue Mun 72:7.

•   “Nvlenvle’m be kwlaa bé sú i.”—Jue Mun 72:11.

 Zezi yɛ ɔ kwla si sran’m be sie-ɔ, afin sran’m be ndɛ lo i yɛ ɔ kunndɛ kɛ ɔ́ úka be. I li be nga be yoli be tɛtɛ’n yɛ ɔ kunndɛ kɛ ɔ́ úka be kpa’n niɔn.

•   “Ɔ́ dé yalɛfuɛ m’ɔ kpan kunndɛ ukalɛ’n, ɔ nin sran ng’ɔ leman wie’n nin sran ng’ɔ leman ukafuɛ’n. Ɔ́ sí sran ng’ɔ leman wie’n nin yalɛfuɛ’n be aunnvɔɛ, yɛ ɔ́ dé yalɛfuɛ mun. Ɔ́ dé be be nga be kle be yalɛ’n nin nzaje sa yofuɛ’m be sa nun.”—Jue Mun 72:12-14.

 Suan Ɲanmiɛn Sielɛ’n m’ɔ ti awa kun m’ɔ o ɲanmiɛn su lɔ’n mɔ Zezi ti i su kpɛn’n i su like. Nian wafa nga a kwla ɲɛn i sielɛ’n i su ye’n, ɔ nin wafa nga a kwla suan sielɛ sɔ’n i bo’n.

•   Nian video nga be flɛ i ?Ngue yɛle Ɲanmiɛn Sielɛ’n?

•   Kanngan ndɛ ng’ɔ suan “Ɲanmiɛn Sielɛ blɛ’n nun’n ndrunmun dilɛ’n su tranman lɛ” nun.