MAAN AMUN ƝIN TRAN SU!
?Ngue ti yɛ sran’m be bo kwlá yoman kun-ɔn?—?I su ndɛ benin yɛ Biblu’n kan-ɔn?
Mɛn siefuɛ mun nin mɛn’n nun anuannzɛ’m b’a kwlá yoman naan sran’m be bo w’a yo kun. Kɛ ɔ fɛ i Alɛ Dan Nɲɔn Su’n nun lele m’ɔ́ fá jú andɛ’n, alɛ nga be o mɛn’n nun’n b’a sɔn b’a tra laa’n. I sɔ’n ti’n, sran kɔe lele miliaa nɲɔn be wun be ɲrun.
?Ngue ti yɛ sran’m be bo kwlá yoman kun-ɔn? ?I su ndɛ benin yɛ Biblu’n kan-ɔn?
Sa nsan nga ti yɛ sran’m be bo kwlá yoman kun’n
1. Ninnge nga sran’m be yo be’n ti’n, be bo kwlá yoman kun kaan sa. Biblu’n seli kɛ e blɛ liɛ nga nun’n “sran’m bé bú be bɔbɔ be wun akunndan, bé yó sika klofuɛ, bé dí be nuan, bé tú be wun, […] be nin be wiengu’m be su nantiman klanman, […] be su kunndɛman kɛ be nin be wiengu’m bé tí be wun aniɛn, […] be su siman be wun su nian, bé yó wlɛ, […] bé yó ɲin kekle, bé dí tutre.”—2 Timote 3:2-4.
2. Klɔ sran’m be tinuntinun be kwlá yoman naan be su sa’m b’a wie. Kannzɛ bɔbɔ be bo yo kun’n, be su kwlá yoman sɔ. Ɔ fata kɛ Ɲanmiɛn Zoova a m’ɔ ti be Yifuɛ’n ɔ uka be. Biblu’n se kɛ: “Klɔ sran m’ɔ su nanti’n, nɛ́n i bɔbɔ yɛ ɔ fata kɛ ɔ kle i ja’n i atin-ɔn.”—Zeremin 10:23.
3. Suɛn Tɔnfuɛ Satan m’ɔ ti klunwifuɛ’n, i yɛ ɔ sie mɛn’n niɔn. “I yɛ ɔ laka asiɛ’n sufuɛ’m be kwlaa mɔ be mlin’n niɔn.” (Sa Nglo Yilɛ 12:9) Sɛ ‘mɛn wunmuan’n te wo klunwifuɛ sɔ’n i sa nun’n,’ alɛ’n nin nzaje sa mun bé trán lɛ tititi.—1 Zan 5:19.
?Wan yɛ ɔ kwla yo maan sran’m be bo yo kun-ɔn?
Biblu’n se kɛ nán klɔ sran’m be fanngan nun yɛ bo kun yolɛ’n trán lɛ-ɔ, sanngɛ Ɲanmiɛn fanngan nun-ɔn.
“Zoova waan yoo: ‘Amun wun akunndan nga n bu’n, min bɔbɔ yɛ n si i kpa-ɔ. Fɔundi yɛ n kunndɛ kɛ amun di-ɔ, n kunndɛman kɛ amun wun ɲrɛnnɛn. N kunndɛ kɛ amun ɲrun lɔ’n yo kpa naan amun wla gua ase.’”—Zeremin 29:11.
?Wafa sɛ yɛ Ɲanmiɛn wá yía ndɛ sɔ’n i nuan-ɔn? “Ɲanmiɛn m’ɔ man fɔundi’n ɔ́ wá kpɔ́tɔ Satan.” (Rɔmunfuɛ Mun 16:20) Ɲanmiɛn wá sín i awa m’ɔ o ɲanmiɛn su lɔ’n i lika yó maan fɔundi trán asiɛ’n su. Be flɛ awa sɔ’n kɛ “Ɲanmiɛn Sielɛ’n.” (Liki 4:43) Zezi Klisi yɛ ɔ ti Ɲanmiɛn Sielɛ’n i su Famiɛn’n niɔn. Kɛ ɔ́ wá síe sran mun’n, ɔ́ yó maan bé klé sran’m be like maan bé trán fɛfɛ.—Ezai 9:6, 7.
Sɛ a kunndɛ kɛ á sí nun kpa ekun’n, kanngan ndɛ nga nun: “?Ngue yɛ Ɲanmiɛn Sielɛ’n wá yó-ɔ?”
a Ɲanmiɛn i dunman’n yɛle Zoova.—Jue Mun 83:18.
Ninnge wie mɔ be kwla yo ɔ fɛ ekun'n
NINNGE CINNJIN NGA BIBLU’N KLE BE’N
?Ngue yɛ be flɛ i Ɲanmiɛn Sielɛ’n niɔn?
I nun mɔ Zezi kán Ɲanmiɛn ndɛ’n, ɔ kannin Ɲanmiɛn Sielɛ’n i ndɛ trali like kwlaa. I afuɛ ya kpanngban yɛ, sran’m be srɛ maan Sielɛ’n i blɛ’n ju.
NDƐ WIE MUN EKUN
E kwla lafi su kɛ e ɲrun lɔ’n yó kpa
?Ngue ti yɛ e ɲrun lɔ sa’m be su ndɛ nga Biblu’n kan’n ɔ nin sran’m be liɛ nga be kan’n ɔ timan kun-ɔn?
E SU NDƐ
Se e naan e wa nian ɔ osu
A nin Zoova i Lalofuɛ mun amun koko Biblu’n nun ndɛ kun su yalɛ, annzɛ kunndɛ kɛ á sí be su ndɛ kpa.
