MAAN AMUN ƝIN TRAN SU!
Politiki ti’n, sran’m be yo be wiengu like yaya—?I su ndɛ benin yɛ Biblu’n kan-ɔn?
Mɛn wunmuan’n nun’n, politiki ndɛ’n ti’n, sran’m be yo be wiengu like yaya. Ɔ maan sran’m be klun titi be.
I wie yɛle kɛ afuɛ 2023 m’ɔ́ fá jú afuɛ 2024 nun’n, kɛ sran’m bé yó vote Mɛkisiki lɔ’n, be kunnin politikifuɛ 39. Asa ekun’n, be yoli sa wie mun ekun be fa kleli sran’m be yalɛ. Nvle sɔ’n nun’n, be nin-a yoman sran kpanngban be lika yaya kɛ ngalɛ’n sa le.
Koko nun wa’n, sran’m be yoli sa kpanngban be fa yoli be wiengu like yaya politiki ndɛ’n ti Abloki lɔ. I wie yɛle kɛ afuɛ 2024 nga nun Mɛ i le 15 su’n, sran’m be kunndɛli kɛ bé kún Slovaki nvle’n i siefuɛ’n. Sanngɛ w’a yoman ye.
Afuɛ 2024 nga nun, Zuie i le 13 su’n, sran’m be kunndɛli kɛ bé kún Amlɛnkɛn’m be presidan laa ng’ɔ suan Donaldi Trɔmpu’n. Sa sɔ’n sanngan Amlɛnkɛn’m be akunndan dan.
?Ngue ti yɛ politiki ndɛ ti’n, sran kpanngban be su yo be wiengu like yaya sɔ-ɔ? ?I sɔ liɛ’n, ɔ́ wíe cɛn kun? ?Ndɛ benin yɛ Biblu’n kɛn i sa sɔ’n su-ɔ?
Biblu’n seli kɛ sran’m bé wá búbú be wun nun politiki ndɛ’n ti
Biblu’n flɛ blɛ nga e o nun yɛ’n kɛ “mɛn’n i awieliɛ blɛ.” Ɔ seli kɛ blɛ sɔ’n nun’n, sran’m be su timan be wun aniɛn, yɛ bé yó be wiengu like yaya.
“Mɛn’n i awieliɛ blɛ nun’n, lika’n wá yó kekle kpa. Afin sran’m […] be su siman ye, be nin be wiengu’m be su nantiman klanman, […] be su kunndɛman kɛ be nin be wiengu’m bé tí be wun aniɛn, […] bé yó wlɛ, […] bé kpɛ́ be wiengu’m be bo waka, bé yó ɲin kekle, bé dí tutre.”—2 Timote 3:1-4.
Biblu’n kɛnnin i ekun kɛ blɛ sɔ’n nun’n, sran’m bé jáso awa’m be wun yɛ politiki ndɛ ti’n, lika’n su jɔman. (Liki 21:9) Sanngɛ i sɔ’n su kaman lɛ sa trilili.
Cɛn wie lele’n, lika’n su sannganman kun
Biblu’n kɛn i kɛ Ɲanmiɛn i awa m’ɔ o ɲanmiɛn su lɔ’n, ɔ́ wá sín klɔ sran’m be awa liɛ’m be osu.
“Ɲanmiɛn m’ɔ o nglo lɔ’n, ɔ́ [...] núnkun famiɛn diwlɛ kwlaa [nga be o lɛ’n], yɛ ɔ́ yó maan be su tranman lɛ kun, kpɛkun i ngunmin ká lɛ tititi.”—Daniɛli 2:44.
Ɲanmiɛn Sielɛ’n ti’n, sran’m be bo yó kun, yɛ mɛn wunmuan’n tɔ́ fɔuun.
Biblu’n kan Zezi Klisi m’ɔ ti Ɲanmiɛn Sielɛ’n i su famiɛn’n i ndɛ se kɛ ɔ ti “Fɔundi Wlengbi.” Yɛ ɔ́ yó maan “fɔundi’n su wieman le.”—Ezai 9:6, 7.
Kɛ é sé yɛ’n, Ɲanmiɛn Sielɛ’n i su famiɛn’n su uka be nga be lo be wun mɛn i naan ɔ sie be’n naan be nin be wiengu’m be tran klanman. Biblu’n kle kɛ ukalɛ mɔ famiɛn sɔ’n uka be’n, i bo’n gúa klanman. Biblu’n se kɛ: Bé wá fá be tokofi mun bé yó tokpo, yɛ bé fá be cua mun bé yó wlɔsɔ. Nvle kun su manman tokofi su nvle uflɛ wun, yɛ be su suanman alɛ kunlɛ kun.”—Ezai 2:3, 4.
Sɛ a kunndɛ kɛ á sí nun kpa ekun’n, kanngan ndɛ nga nun: “?Ngue yɛ Ɲanmiɛn Sielɛ’n wá yó-ɔ?” kpɛkun nian video nga: ?Ngue yɛle Ɲanmiɛn Sielɛ’n?