Tra janvuɛ naan ɔ wun w’a yoman ɔ kɛ ɔ ngunmin yɛ a o sa—Wafa nga Biblu’n kwla uka wɔ’n
Afuɛ 2023 nun, ayre yofuɛ dandan wie’m be waan sran’m be wun m’ɔ yo be kɛ be ngunmin yɛ be o sa’n, ɔ ti tukpacɛ dan kun m’ɔ fata kɛ be kunndɛ i trawlɛ-ɔ. ?Be kwla ɲɛn i trawlɛ sakpa?
Amlɛnkɛn’m be lɔ dɔɔtrɔ bian kun m’ɔ suan Vivɛki Mɛɛfi’n seli kɛ: “Kɛ e wun yo e kɛ e ngunmin yɛ e o sa’n mɔ kusu e tran e liɛ ngunmin’n, ɔ kwla kaci e wun tukpacɛ. Yɛ i sɔ’n kusu ti’n e su kwlá diman aklunjɔɛ.” Sanngɛ ɔ kan uka su kɛ: “E kwla yo like kun.” ?Kɛ ngue sa? “E kwla yo ninnge kanngan wie mun cɛn kwlakwla naan e nin sran mun e afiɛn w’a mantan.” a
Nán kɛ e ngunmin e tran lika kun’n i ti yɛ saan fii e wun yo e kɛ e ngunmin yɛ e o sa-ɔ. Sran wie’m be nin sran kpanngban yɛ be tran-ɔn, sanngɛ be wun yo be kɛ be ngunmin yɛ be o sa. Kannzɛ ɔ ti sɛ ti sɛ-o Biblu’n kwla uka e. Afɔtuɛ nga be o nun’n be kwla uka e naan y’a tra janvuɛ kpa. Yɛ i sɔ’n kusu yó naan e wun w’a yoman e kɛ e ngunmin yɛ e o sa.
Biblu’n nun ndɛ wie mɔ be kwla uka wɔ’n
Maan a nin sran si yalɛ koko. Nán yalɛ kokolɛ’n i ngba yɛle kɛ e kan wafa nga e wun yo e’n i ndɛ. I wie yɛle kɛ e sie e su sran’m be nuan bo wie. Sɛ a mian ɔ ɲin kle sran kun kɛ i ndɛ lo wɔ’n a nin sran sɔ’n amun afiɛn mántan kpa.
Afɔtuɛ nga Biblu’n man’n: “Nán an bu amun ninnge liɛ’m be ngunmin be akunndan, sanngɛ an bu amun wiengu’m be liɛ’n i akunndan wie.”—Filipufuɛ Mun 2:4.
Tra janvuɛ fanunfanun. Tra be nga be kpɛnngbɛn tra wɔ’n nin be nga ɔ kpɛnngbɛn tra be’n be janvuɛ. A kwla tra be nga be ninnge yolɛ wafa’n nin amun liɛ’n timan kun’n, ɔ nin be nga be fin nvle uflɛ nun’n be janvuɛ wie.
Afɔtuɛ nga Biblu’n man’n: “Amun trɛ amun awlɛn’n nun.”—2 Korɛntifuɛ Mun 6:13.
Sɛ a kunndɛ kɛ á sí like nga a kwla yo naan a nin sran mun amun afiɛn w’a mantan kpa’n i su like kpa ekun’n kanngan ndɛ “Comment combler notre besoin d’amitié nun.”
a Our Epidemic of Loneliness and Isolation: The U.S. Surgeon General’s Advisory on the Healing Effects of Social Connection and Community, 2023.
