Afuɛ 2022 Zuie anglo’n nun’n, mɛn wunmuan’n nun’n sran wie’m be toli be wiengu wun tui:

•   Afuɛ 2022 Zuie i le 10 su’n, zronali kun seli kɛ: “Kɛ be kunnin Zapɔn lɔ bian nga be flɛ i Sinzo Abe’n [m’ɔ ti Famiɛn’n i mantanfuɛ klikli laa’n,] i sɔ’n boli Zapɔn lɔfuɛ mun nin nvle uflɛ nunfuɛ’m be wla. Afin be lɔ’n, be tɛmɛn i sɔ klunwi sa liɛ’n be yo kpɛkun tui i su mmla nga be kpɛli’n be fa kanman ngowa.”—The Japan Times.

•   Afuɛ 2022 Zuie i le 4 su’n, zronali kun seli kɛ: “Bian kun fali tui kunnin sran nsan ninnge atɛ yowlɛ dan kun nun, Kopenagi lɔ. I sɔ’n sanngannin Danimaaki lɔfuɛ’m be akunndan.”—Reuters.

•   Afuɛ 2022 Zuie i le 10 su’n, zronali kun seli kɛ: “Afriki di Sidi lɔ’n, sran wie’m be fali tui kunnin sran 15 nzan nɔnwlɛ kun nun, Soweto lɔ.”—The Guardian.

•   Afuɛ 2022 Zuie i le 5 su’n, zronali kun seli kɛ: “Kɛ ɔ fɛ i Zuie i le 2 su m’ɔ́ fá jú i le 4 su’n, Etazinin lɔ’n sran wie’m be fali tui kunnin sran 220 tra su.”—CBS News.

 ?Klunwi sa kɛ ngalɛ’n sa’n, bé wíe cɛn kun? ?Ndɛ benin yɛ Biblu’n kan-ɔn?

 Biblu’n se kɛ e o ‘mɛn’n i awieliɛ blɛ’n nun’ naan blɛ sɔ’n nun’n sran’m bé yó wlɛ yɛ be klun yó wi dan. (2 Timote 3:1, 3) Sa kɛ ngalɛ sa’m be ti’n, srɛ kun sran mun dan. (Liki 21:11) Sanngɛ Biblu’n se kɛ blɛ wie wá jú’n klunwi sa’m bé wíe yɛ sran’m “bé wá trán lika fɔun kun nun, bé trán sua kpa nun, yɛ bé trán wunmiɛn lolɛ lika mɔ be ti diin’n be nun.” (Ezai 32:18) ?Wafa sɛ yɛ klunwi sa’m bé wíe-ɔ?

 Ɲanmiɛn wá núnnún klunwifuɛ mun nin alɛ kunlɛ ninnge mun.

•   “Klunwifuɛ’m be liɛ’n, bé núnnún be asiɛ’n su.”—Ɲanndra Mun 2:22.

•   “[Ɲanmiɛn] yo maan alɛ kunlɛ’n wie asiɛ wunmuan’n su. Ɔ bubu ta’n nin cua’n be nun. Ɔ yra alɛ kunlɛ kakaklolo mun sin nun.”—Jue Mun 46:9.

 Ɲanmiɛn wá klé sran’m be like naan be nin be wiengu’m be tran klanman.

•   “Be su yoman sa tɛ fi, yɛ be su saciman like fi oka m’ɔ ti min liɛ klonglo’n su. Afin saan Zoova i silɛ’n ɔ́ yí asiɛ’n kɛ jenvie’n nun nzue’n sa.”—Ezai 11:9.

•   Dɔ nga su bɔbɔ’n, Ɲanmiɛn su kle sran’m be like mɛn wunmuan’n nun naan be yaci klunwi sa’m be yolɛ yɛ be yi alɛ kunlɛ ninnge’m be blo. Yɛle kɛ ‘be fa be tokofi mun be yo tokpo, yɛ be fa be cua mun be yo wlɔsɔ.’—Mise 4:3.

 Sɛ a kunndɛ kɛ á sí like nga Ɲanmiɛn wá yó naan srɛ w’a kunman sran’m be kun’n i kpa ekun’n, kanngan ndɛ nga nun: “Affranchis de la peur : est-ce possible ?”

 Sɛ a kunndɛ kɛ á sí wafa nga klunwi sa’m bé wíe mlɔnmlɔn’n i kpa ekun’n, kanngan ndɛ nga nun: “Enfin la paix sur la terre !”