Nvlenvle’m be anuannzɛ nga be flɛ i ONU seli kɛ:

•   Kɛ ɔ fɛ i afuɛ 2023 Ɔktɔblu i le 7 su m’ɔ́ fá jú i le 23 su’n, alɛ ng’ɔ o Gaza nin Izraɛli nvle’n be afiɛn’n ti’n, sran 6.400 tra su b’a wu yɛ like yaya w’a yo sran 15.200. Sran sɔ’m be dan lika be timan sonja yɛ kusu be kunman alɛ’n wie. Asa’n sran akpiakpi kpanngban be wanndili alɛ’n.

•   Kɛ Sɛptanblu i le 24 fá jú’n, Risi nin Ikrɛnin lɔ alɛ’n ti’n sran 9.701 b’a wu yɛ like yaya w’a yo sran 17.748 Ikrɛnin lɔ.

 ?Ndɛ benin yɛ Biblu’n kan m’ɔ kwla fɔnvɔ be nga alɛ’n ti’n be fɛ’n niɔn?

 Biblu’n se kɛ Ɲanmiɛn wá yó maan ‘alɛ kunlɛ’n wíe asiɛ wunmuan’n su.’ (Jue Mun 46:9) Ɲanmiɛn wá fá i sielɛ’n, yɛle kɛ i awa m’ɔ o ɲanmiɛn su lɔ’n, ɔ́ síe klɔ sran’m be awa’m be osu. (Daniɛli 2:44) Ɲanmiɛn Sielɛ’n wá yó maan sran’m bé ɲán be ti.

 Nian like nga Zezi Klisi m’ɔ ti Ɲanmiɛn Sielɛ’n i su Famiɛn’n ɔ́ wá yó’n:

•   “Ɔ́ dé yalɛfuɛ m’ɔ kpan kunndɛ ukalɛ’n, ɔ nin sran ng’ɔ leman wie’n nin sran ng’ɔ leman ukafuɛ’n. Ɔ́ sí sran ng’ɔ leman wie’n nin yalɛfuɛ’n be aunnvɔɛ, yɛ ɔ́ dé yalɛfuɛ mun. Ɔ́ dé be be nga be kle be yalɛ’n nin nzaje sa yofuɛ’m be sa nun.”—Jue Mun 72:12-14.

 Ɲanmiɛn wá sín i Sielɛ’n i lika núnnún alɛ nin nzaje sa mun. Ɔ maan sran’m be su diman yalɛ kun yɛ be su wunman be ɲrun kun.

•   “Ɔ́ núnnún be ɲinmuɛn’n kwlaa, wie’n su tranman lɛ kun, be su yoman sɛ kun, be su sunman kun, be su wunman ɲrɛnnɛn kun. Laa ninnge’m be nunman lɛ kun.”—Sa Nglo Yilɛ 21:4.

 Ɔ ka kan’n, Ɲanmiɛn Sielɛ’n wá yó maan ninnge’m bé káci asiɛ’n su. Biblu’n dun mmua seli kɛ é wá tí “alɛ ngan, ɔ nin alɛ kunlɛ ndɛ mun.” (Matie 24:6) Sa sɔ mun nin sa uflɛ wie’m be kle kɛ e o klɔ sran’m be sielɛ’n i ‘awieliɛ blɛ’n nun’.—2 Timote 3:1.