JƆNUN nin i osufuɛ’m be tran Ɛndi lɔ klɔ kaan kun su. Jɔnun i si’n ti Zoova i Lalofuɛ. Kɛ afuɛ 1960 wá jú’n, yɛ be yoli i batɛmun-ɔn. Sanngɛ Jɔnun nin i niaan mun, nin be nin’n be ti Katoliki. Yɛ be asɔnun sɔ’n ti be cinnjin kpa. I sɔ’n ti’n, be kleli be si m’ɔ ti Zoova i sufuɛ’n i yalɛ dan.

Cɛn kun Jɔnun i si’n sunmɛnnin i kɛ ɔ ko fa anvelɔpu kun mɛn i janvuɛ Zoova lalofuɛ kun. Sanngɛ cɛn sɔ’n nun nglɛmun’n, kɛ Jɔnun waan ɔ́ tíke baliko kun su’n, ɔ kpɛli i sa mma. Ɔ kunndɛman kɛ ɔ́ kpɛ́ i si’n i atin srɛ. I sɔ’n ti’n, ɔ cicili i sa mma’n su, yɛ ɔ fali anvelɔpu’n ɔli-ɔ.

Kɛ Jɔnun juli i si i janvuɛ’n i awlo lɔ’n, ɔ fali anvelɔpu’n mannin bian’n i yi’n. Bla’n ti Zoova i Lalofuɛ wie. Bla’n wunnin kɛ Jɔnun i sa mma’n ti kpɛwa. I sɔ’n ti, ɔ ko fali ayre nunnunnin Jɔnun i kannin’n i ɲrun. Kpɛkun, ɔ cicili su. I sin’n, ɔ tɔnnin te fa mannin Jɔnun. Kɛ ɔ́ nɔ́n’n, nn bla’n kán Ɲanmiɛn ndɛ’n klé i.

Ye nga bla’n yoli Jɔnun ti’n, ɔ wa kacili akunndan ng’ɔ bu i Zoova i Lalofuɛ’m be wun’n. Like nga Zoova i Lalofuɛ’m be kle m’ɔ nin Katoliki’m be liɛ’n timan kun’n, ɔ usali bla’n i su kosan nɲɔn. Ɔ usɛli i kɛ: ‘?Zezi yɛ ɔ ti Ɲanmiɛn’n niɔn? ?Ɔ fata kɛ e srɛ Mali?’ Kɛ mɔ bla suannin Jɔnun i klɔ aniɛn’n (Gujarati) ti’n, ɔ tɛli i su aniɛn sɔ’n nun. Ɔ fali Biblu’n yɛ ɔ fa tɛli i su-ɔ. Kpɛkun, ɔ fali fluwa kun mɛnnin i.

Jɔnun kanngannin fluwa’n nun’n. Ɔ wunnin kɛ i nun ndɛ’m be ti nanwlɛ. Ɔ ɔli be asɔnun’n nun lɔ kpɛkun, kosan nɲɔn ng’ɔ fa usali bla’n, ɔ fa usali i plɛti’n wie. Sanngɛ plɛti’n fali ya dan kpa. Ɔ fali Biblu’n to yili i Jɔnun i ɲrun lɛ. Kpɛkun, ɔ seli i ya su kɛ: “W’a kaci Satan. Kle min lika nga Biblu’n se kɛ Zezi timan Ɲanmiɛn’n. Kle min lika nga Biblu’n se kɛ nán be srɛ Mali’n. Kle min.” Plɛti’n i ayeliɛ’n boli Jɔnun i nuan dan. I sɔ’n ti’n, ɔ seli plɛti’n kɛ ɔ su kɔman Katoliki’m be asɔnun’n nun kun. Jɔnun yoli sɔ sakpasakpa, w’a ɔman lɔ kun.

Zoova i Lalofuɛ’m be wa kleli Jɔnun i Biblu’n nun like. Ɔ wunnin kɛ like nga be kle i’n ti nanwlɛ. Ɔ maan, ɔ kacili Zoova i sufuɛ. Kɛ ɔ́ kɔ́ i ɲrun’n, Jɔnun i osufuɛ wie’m be wa suli Zoova wie. Kɛ afuɛ kɔe 60 sinnin mɔ Jɔnun wun i sa mma ti kannvuɛn’n, i wla kpɛn su kɛ ye nga bla’n yoli i’n, i ti yɛ ɔ kacili Zoova i sufuɛ-ɔ.​—2 Korɛntfuɛ Mun 6:4, 6.