1. ?Ngue ti yɛ ɔ fata kɛ e to jue e bo flɛ Ɲanmiɛn-ɔn?

JUE tofuɛ kun seli kɛ: ‘Kɛ e ti ndɛ kun’n, e bu akunndan. Kɛ e tie miziki’n, ɔ yo e fɛ. Sanngɛ, jue nga e to’n, ɔ wluwlu e wun.’ Kɛ e to jue e bo flɛ e Si Ɲanmiɛn Zoova’n, e mɛnmɛn i, yɛ e kle kɛ e klo i. Kpɛkun, e wun kɛ e nin i e afiɛn mantan. Ɲanmiɛn manmanlɛ jue’m be tolɛ’n ti i sulɛ wie. E ngunmin e kwla to jue e manman Ɲanmiɛn, annzɛ e nin e niaan mun e kwla to i likawlɛ.

2, 3. (a) ?Kɛ é yó aɲia mun’n, ngue ti yɛ aniaan wie’m be manman be nɛn’n su be toman jue mun-ɔn? (b) ?Kosan benin mun yɛ ɔ fata kɛ e tinuntinun e fa usa e wun-ɔn?

² Lika wie’m be nun’n, kɛ ɔ yo naan yasua’m be to jue nzra nun’n, ɔ ti kekle man be. Afin ɲannzuɛn kun be. ?Kɛ é yó e aɲia mun m’ɔ fata kɛ e to jue e bo flɛ Ɲanmiɛn’n, ɲannzuɛn kun e wie? Sɛ ɲannzuɛn kun e’n, ɔ timan kpa. Afin, e kwla bubu aniaan’m be sa sin. I li sɛ blɛ sɔ nun’n, asɔnun kpɛnngbɛn’m be yo like uflɛ, annzɛ be manman be nɛn’n su be toman jue’n, aniaan’m be kwla bu i kɛ jue tolɛ’n timan cinnjin.​—Jue Mun 30:13.

 ³ Kɛ e to jue e bo flɛ Zoova’n, ɔ ti i sulɛ wie. I sɔ’n ti, kɛ jue tolɛ blɛ’n ju’n, ɔ fataman kɛ e wlanwlan. Yɛ ɔ fataman kɛ be to jue’n e sin. Maan e tinuntinun e usa e wun kɛ: ‘?Wafa sɛ yɛ n bu aɲia’m be bo lɔ jue tolɛ’n niɔn? ?Sɛ jue tolɛ’n ti min nuan nun tankantankan’n, ngue yɛ ɔ fata kɛ n yo-ɔ? ?Ngue yɛ ń yó naan m’an tu min klun m’an to jue mun-ɔn?’

4, 5. ?Laa’n, ajalɛ benin mun yɛ be fali be Izraɛli lɔ naan b’a to jue Ɲanmiɛn i sua’n nun lɔ-ɔ?

⁴ Kɛ ɔ fɛ i lalafuɛ nun lele’n, Zoova i sufuɛ’m be bo ngowa kanlɛ ninnge’m be fa mɛnmɛn i. I nun mɔ Izraɛlifuɛ’m be nin Ɲanmiɛn be nanti klanman’n, kɛ bé sú i’n, be to jue be mɛnmɛn i. Kɛ Davidi síesíe junman ng’ɔ fata kɛ be di i Ɲanmiɛn sua’n nun’n, ɔ kpali levifuɛ 4.000 naan be bo ngowa kanlɛ ninnge mun, yɛ be to jue be manman Zoova. Be nga “be suannin Nyanmiɛn manmanlɛ jue mun kpa’n, bɔ be ti jue klefuɛ’n, be kwlaa be ti ya-nnyɔn-ablaɔcuɛ-nin-mɔcuɛ.”—1 Be Nyoliɛ 23:5; 25:7.

⁵ Kɛ bé yí Ɲanmiɛn sua’n i nglo’n, sran’m be boli ngowa kanlɛ ninnge mun, yɛ be sroli jue. Biblu’n se kɛ: “Be kwlaa, i awɛ bofuɛ o, i jue tofuɛ o, be o likawlɛ, be sroli jue be manmannin Anannganman, be bo flɛli i. Kɛ bɔ bé tó jue sɔ’n, wuun bé bó ninnge nga be tɛ’n: Awɛ mun, nin aaba ndɛ mun, ɔ nin like uflɛ mun. [...] Kɛ ɔ yoli sɔ’n, Nyanmiɛn ble’n yili Anannganman i sua’n.” Blɛ sɔ nun’n, nanwlɛ, Izraɛlifuɛ’m be lafili Ɲanmiɛn su kpa.—2 Be Nyoliɛ 5:13, 14; 7:6.

6. ?Ngue yɛ Neemi yoli naan b’a to jue b’a manman Zoova Zerizalɛmun lɔ-ɔ?

⁶ Kɛ Izraɛlifuɛ’m bé kplán Zerizalɛmun i wun talɛ’n, Neemi siesieli be junman’n sɛsɛsɛ. Asa ekun’n, ɔ siesieli Levifuɛ mun naan be to jue, yɛ be bo ngowa kanlɛ ninnge mun. Kɛ bé yí talɛ’n i nglo’n, jue nga be toli’n ti’n, cɛn dilɛ sɔ’n yoli fɛ kpa. Neemi buli jue tofuɛ’m be nun “akpasua dandan nyɔn.” Akpasua kun fin fama su. Yɛ kun fin bɛ su. Be nanti talɛ’n su yɛ be ba-ɔ. Kɛ be yiali Ɲanmiɛn sua’n i ɲrun lɛ’n, be toli jue aklunjuɛ su. Sran’m be tili be nɛn’n mmua kpa. (Neemi 12:27, 28, 31, 38, 40, 43) E lafi su kɛ Zoova tili jue nga i sufuɛ’m be toli be fa mɛnmɛnnin i cɛn sɔ nun’n, naan ɔ yoli i fɛ dan.

7. ?Wafa sɛ yɛ Zezi kleli kɛ Ɲanmiɛn manmanlɛ jue’m be tolɛ’n ti like cinnjin-ɔn?

⁷ Zezi blɛ su’n, Ɲanmiɛn i sufuɛ’m be toli jue be bo flɛli Ɲanmiɛn titi. Maan e bu sa ng’ɔ juli kɔnguɛ nga i nun yɛ be trali Zezi’n, i akunndan e nian. Kɛ Zezi nin i sɔnnzɔnfuɛ’m be wieli aliɛ di’n, be toli Zoova i manmanlɛ jue.—An kanngan Matie 26:30 nun.

8. ?Wafa sɛ yɛ Klistfuɛ klikli’m be kleli kɛ Ɲanmiɛn manmanlɛ jue’m be tolɛ’n ti like cinnjin-ɔn?

⁸ Ɲanmiɛn manmanlɛ jue’m be tolɛ yoli Klistfuɛ klikli’m be cinnjin wie. Klistfuɛ sɔ’m be yiaman Ɲanmiɛn sua’n nun kɛ Izraɛlifuɛ mun sa. Be niaan wie’m be sua’m be nun yɛ be yia be su Ɲanmiɛn-ɔn. Sua sɔ’m be timan klanman kɛ Ɲanmiɛn sua’n sa. Sanngɛ, kɛ  bé yó aɲia mun’n, be tu be klun be to jue. Akoto Pɔlu seli i niaan Klistfuɛ mun kɛ: “Ngwlɛlɛ nga an si i’n, an fɛ i kwlaa’n tu amun wun fɔ. An tu amun klun to jue ng’ɔ o Nyanmiɛn Jue fluwa nun, nin Nyanmiɛn manmanlɛ jue mɛnmɛn i, yɛ an lɛ i ase.” (Kolɔsfuɛ Mun 3:16) Jue nga be o e jue fluwa’n nun’n, ɔ fata kɛ e ‘tu e klun e to’ be. Afin, be o ninnge nga “sran kpa nanwlɛfuɛ b’ɔ si ngwlɛlɛ’n” man e’n be nun wie.—Matie 24:45.

9. (a) ?Ngue ti yɛ wie liɛ’n, jue tolɛ aɲia’m be bo’n ti tankantankan aniaan wie’m be nuan nun-ɔn? (b) ?Kɛ bé tó jue aɲia’m be bo’n, ngue yɛ ɔ fata kɛ e yo-ɔ? (c) ?Wan mun yɛ ɔ fata kɛ be fa jue tolɛ’n i nun ta-ɔ? (An nian foto ng’ɔ o kan like suanlɛ’n bo i bo lɛ’n.)

⁹ ?Ngue ti yɛ wie liɛ’n, jue tolɛ’n kun e ɲannzuɛn-ɔn? Atrɛkpa’n, ɔ fin wafa nga be tali e’n. Annzɛ kusu, kɛ e fa e wun sunnzun jue tofuɛ dandan nga be to jue televiziɔn nun, annzɛ aladio nun’n, e bu i kɛ e nuan nun yoman fɛ. Sanngɛ, ɔ fata kɛ e kwlakwla e to jue e manman Zoova. I sɔ’n ti, kɛ é yó aɲia mun’n, maan e man e jue fluwa’n su nglo. Kpɛkun, maan e man e ti’n su naan e tu e klun e to jue mun. (Ɛsdras 3:11; an kanngan Jue Mun 147:1 nun.) Ɲanmiɛn sulɛ sua wie’m be nun’n, be sieli televiziɔn mun. Kpɛkun kɛ bé tó jue’n, jue’n i nun ndɛ’m be fite televiziɔn sɔ’m be nun. Ɔ maan, sran’m be kwla nian su be to. Asa ekun’n, siɛn’n, kɛ asɔnun kpɛnngbɛn’m bé yó be suklu’n, be to Ɲanmiɛn i manmanlɛ jue mun. I sɔ’n kle kɛ, kɛ é tó jue aɲia’m be bo’n, ɔ fata kɛ asɔnun kpɛnngbɛn’m be fɛ i nun ta.

10. ?Sɛ e bu i kɛ e nuan nun yoman fɛ’n, ngue yɛ ɔ fata kɛ e wla kpɛn su-ɔ?

 ¹⁰ Aniaan wie’m be nɛn’n cɛnnin. Ɔ maan, be bu i kɛ sɛ be man be nɛn’n su be to jue’n, ɔ́ klé be wiengu’m be yalɛ. Wie’m be bu i kɛ be nuan nun yoman fɛ. Sanngɛ, e kwlakwla e si kɛ, kɛ é íjɔ’n, “e fɔn.” Ɔ nin i sɔ ngba’n, e yaciman ijɔlɛ. (Zak 3:2) I sɔ’n ti, nán e se kɛ e nuan nun yoman fɛ naan e toman Zoova manmanlɛ jue mun.

11, 12. ?Ngue yɛ e kwla yo naan y’a si jue to kpa-ɔ?

¹¹ Atrɛkpa’n, kɛ mɔ e siman jue to ti’n, jue tolɛ’n ti e nuan nun tankantankan. Sanngɛ, e kwla yo ninnge wie mun naan y’a si jue to. *—An nian nzɔliɛ’n i su ndɛ’n.

¹² Kɛ é tó jue’n, wafa ng’ɔ fata kɛ e lo wunmiɛn naan e nɛn’n w’a fite kpa’n, maan e wun i wlɛ. Kolan ti yɛ kannin’m be kpaja-ɔ. I wafa kunngba’n, kɛ é íjɔ annzɛ é tó jue’n, maan e lo wunmiɛn kɛ ɔ fata’n sa. I liɛ’n, e nɛn’n fíte kpa. (An nian afɔtuɛ nga be o fluwa nga be flɛ i kɛ Tirez profit de l’École du ministère théocratique i bue 181 lele 184 be nun.) Biblu’n kle kɛ, kɛ é tó jue é mánmán Zoova’n, maan e “bo sro.”—Jue Mun 33:1-3.

13. ?Ngue yɛ sɛ e yo’n, é sí jue’m be to kpa-ɔ?

¹³ Kɛ e ngunmin annzɛ e nin e awlofuɛ mun é sú Ɲanmiɛn awlo lɔ’n, maan e nian afɔtuɛ nga’m be su. Yɛle kɛ, maan e nian e jue fluwa’n nun naan e fa jue nga e klo i kpa’n. Yɛ maan e man e nɛn’n su e kanngan ndɛ’n nun. I sin’n, maan e man e nɛn’n su kɛ ngalɛ’n sa ekun naan e kanngan jue ɲanman kun nun e guɛ i lɔ, nán e jran. Kpɛkun, maan e man e nɛn’n su sɔ ekun e to jue’n. (Ezai 24:14) É wún kɛ e nɛn’n fite kpa tra laa’n. Sɛ e nɛn’n fite sɔ’n, ɔ ti kpa. Nán ɲannzuɛn kun e.

14. (a) ?Ngue ti yɛ sɛ e trɛ e nuan nun’n, e kwla to jue’m be kpa-ɔ? (An nian kuku nga be flɛ i kɛ “ Kɛ é tó jue’n” nun.) (b) ?Afɔtuɛ benin mun yɛ a bu i kɛ sɛ e nanti be su’n, é sí jue’m be to kpa-ɔ?

¹⁴ Kɛ é tó jue’n, nán maan e yo kɛ e su ijɔ sa. Sanngɛ, maan e trɛ e nuan nun kpa e to. I liɛ’n, e nɛn’n fíte weiin kpa. ?Yɛ sɛ e nɛn’n ti kaan nin? I lɛ nun’n, fluwa nga kɛ aniaan’m bé dí junman  aɲia’m be bo lɔ’n be nian nun be man be afɔtuɛ’n, maan e niɛn i bue 184 nun.

15. (a) ?Kɛ Anuannzɛ’n i ɲrun dinfuɛ’m bé yó be afuɛ nuan aɲia’n afuɛ 2016 nun’n, ngue yɛ aniaan bian Lɛti kɛnnin i ndɛ-ɔ? (b) ?Ngue ti yɛ be yili jue fluwa uflɛuflɛ kun-ɔn?

¹⁵ Afuɛ 2016 nun’n, kɛ Anuannzɛ’n i ɲrun dinfuɛ’m bé yó be afuɛ nuan aɲia’n, aniaan bian Stefɛnin Lɛti kannin e jue fluwa uflɛuflɛ kun i ndɛ. Be flɛ jue fluwa sɔ’n kɛ To jue aklunjuɛ su manman Zoova. Like nga ti yɛ ɔ fata kɛ be yi jue fluwa uflɛ sɔ’n, aniaan’n yiyili nun. I kun yɛle kɛ be yili Biblu Traduction du monde nouveau i uflɛ afuɛ 2013 nun. Wafa nga be kacili ndɛ wie mun Biblu uflɛ sɔ nun’n, i su yɛ be niannin be klɛli jue fluwa ufluflɛ’n i nun ndɛ mun-ɔn. Asa ekun’n, be kpɛli jue wie’m be ukali laa liɛ’m be su. Jue sɔ’m be kan jasin fɛ bolɛ’n nin e ti kpɔlɛ tɛ’n be ndɛ. Anuannzɛ’n i ɲrun dinfuɛ’m be kunndɛli kɛ bé yí jue fluwa kun m’ɔ ti klanman’n. Afin, Ɲanmiɛn manmanlɛ jue’m be tolɛ’n ti i sulɛ wie. Jue fluwa uflɛuflɛ’n i wun bui’n ti ble nzuɛnnzuɛn kɛ Biblu Traduction du monde nouveau liɛ’n sa.

16, 17. ?Ngue yɛ ɔ kle kɛ jue fluwa uflɛuflɛ’n nin laa liɛ’n timan kun-ɔn?

¹⁶ Be siesieli jue mun akpasuaakpasua  naan be kunndɛlɛ’n w’a yoman kekle. Kɛ e tike fluwa’n su cɛ’n, e wun wafa nga be siesieli jue mun’n. Jue 1 lele 12 su’n, be kan Zoova i ndɛ. Jue 8 nga be bɛ i sin’n, be kan Zezi nin e ti kpɔlɛ tɛ’n i ndɛ. Ɔ maan, sɛ aniaan kun waan ɔ́ kúnndɛ jue ng’ɔ fata kɛ be to naan w’a ijɔ nzra nun’n, ɔ su fɛman lele.

¹⁷ Be siesieli jue wie’m be nun ndɛ’n i uflɛ. Ɔ maan, be nun ndɛ’m be ti weinwein. Be yoli sɔ yo naan y’a tu e klun y’a to be. I wie yɛle jue nga be flɛ i laa kɛ “Awlɛn tralɛ,” mɔ siɛn’n, be flɛ i kɛ “Maan e tra e awlɛn.” Jue nga be flɛ i laa kɛ “Sie ɔ ti mɔ a fa bu akunndan’n kpa,” siɛn’n, be flɛ i kɛ “E nian e klun akunndan’n su.” ?Ngue ti yɛ be kacili i sɔ-ɔ? Yɛle kɛ, kɛ é tó jue sɔ’n laa’n, ɔ yo kɛ e su man e wiengu’m be afɔtuɛ sa. I sɔ’n kwla yo be nga be ba e aɲia’m be bo’n be nun wie’m be kɛnsrɛn. I wie yɛle be nga be su Zoova ɔ nin a cɛman’n, nin be nga e kle be Biblu’n nun like’n, nin gbanflɛn nin talua mun, ɔ nin aniaan bla mun. I sɔ’n ti, be kacili jue sɔ’n i flɛlɛ’n nin i nun ndɛ’n.

18. ?Ngue ti yɛ ɔ fata kɛ e suan jue nga be o e fluwa uflɛuflɛ nun’n, be tolɛ-ɔ? (An nian nzɔliɛ’n i su ndɛ’n.)

¹⁸ Jue nga be o fluwa To jue aklunjuɛ su manman Zoova nun’n, kɛ é tó be nun sunman’n, ɔ ti kɛ e su srɛ Ɲanmiɛn sa. Ɔ maan, kɛ é tó be’n, e kwla kan wafa nga e wun yo e’n, e kle Zoova. Jue wie’m be wla e fanngan kɛ e ‘klo e wun yɛ e yo sran ye.’ (Ebre Mun 10:24) Ɔ fata kɛ e si miziki mun, nin wafa ng’ɔ fata kɛ e kacikaci e nɛn’n, ɔ nin jue’m be nun ndɛ mun. Aniaan’m be toli jue sɔ mun. Yɛ be o jw.org su. Maan e nian su kpa. Kɛ e o awlo lɔ’n, maan e suan jue’m be tolɛ. I liɛ’n, e kwla tu e klun e to be. *—An nian nzɔliɛ’n i su ndɛ’n.

19. ?Ngue yɛ e ngba e kwla yo m’ɔ ti Ɲanmiɛn i sulɛ wie-ɔ?

¹⁹ Ɲanmiɛn manmanlɛ jue’m be tolɛ’n ti i sulɛ wie. Kɛ e to jue sɔ mun’n, e kle kɛ e klo Ɲanmiɛn naan ninnge ng’ɔ yo man e’n, be yo e fɛ. (An kanngan Ezai 12:5 nun.) Sɛ e to jue mun juejue su’n, e wiengu’m bé nían su. I gbanflɛn o, i talua o, i kpɛnngbɛn o, sɛ e su Zoova ɔ nin a cɛman o, e ngba e kwla to jue e manman Zoova. I sɔ’n ti, nán ɲannzuɛn kun e. Maan e nian ndɛ nga jue tofuɛ kun kannin’n su. Ɔ seli kɛ: “Amun to jue be manman Anannganman.” Nanwlɛ, maan e to jue aklunjuɛ su e manman Zoova.—Jue Mun 96:1.