Maan e talo Zoova
“Anannganman sasa i sufuɛ’m be nguan’n. Be bɔ be talo i’n, be wun sa’n ɔ wie.”—JUE MUN 34:23.
1. ?Kɛ Ɲanmiɛn i sufuɛ nanwlɛfuɛ wie’m be fɔn’n, wafa sɛ yɛ ɔ yo be-ɔ?
AKOTO Pɔlu seli kɛ: “Eee, n ti nyrɛnnɛnfuɛ dan!” (Rɔmfuɛ Mun 7:24) Andɛ’n, e nun sunman e kan ndɛ nga Pɔlu kɛnnin i lɛ’n wie. E kunndɛ kɛ é yó like ng’ɔ yo Zoova fɛ’n. Sanngɛ, fɔ m’ɔ o e nun’n ti’n, e yo sa tɛ. Ɔ maan, e sa sin bubu e, annzɛ e wla bo e wun. Klistfuɛ nga be yoli sa tɛ dan’n, be nun wie’m be bu i kɛ Ɲanmiɛn su yaci cɛman be le.
2. (a) ?Ndɛ benin yɛ Jue Mun 34:23 kan m’ɔ kle kɛ ɔ fataman kɛ Zoova i sufuɛ ng’ɔ yo sa tɛ’n, i wla bo i wun-ɔn? (b) ?Ngue yɛ like suanlɛ nga nun’n, é wá kɛ́n i ndɛ-ɔ? (An nian kuku nga be flɛ i “ ?Be ti like uflɛ i nzɔliɛ?” nun.)
2 Ɲanmiɛn Ndɛ’n kle kɛ sɛ sran kun yo sa tɛ naan ɔ talo Zoova’n, ɔ fataman kɛ i wla bo i wun kun. (An kanngan Jue Mun 34:23 nun.) ?Sanngɛ, wafa sɛ yɛ e kwla kle kɛ e talo Zoova-ɔ? ?Sɛ e yo sa tɛ’n, ngue yɛ ɔ fata kɛ e yo naan Zoova w’a si e aunnvuɛ-ɔ? Kɛ ɔ ko yo naan y’a wun kosan sɔ’m be su tɛlɛ’n, é wá kán fiawlɛ klɔ nga be o Izraɛli lɔ laa’n, be ndɛ. Kɛ Ɲanmiɛn fali Mmla mannin Izraɛlifuɛ mun’n, ɔ seli be kɛ be kpa fiawlɛ klɔ mun. Kɛ afuɛ 33 nun be dili Pantekɔtu’n, Ɲanmiɛn i sufuɛ’m be wa dili mmla uflɛ su. Sanngɛ, fiawlɛ klɔ sɔ’m be kle e wafa nga Zoova bu sa tɛ’n. Asa ekun’n, be kle e akunndan nga Zoova bu i sa tɛ yofuɛ mun nin be nga be kaci be nzuɛn’n be wun’n. I sɔ’n ti, maan e kan like nga ti yɛ Zoova maan be kpali fiawlɛ klɔ mun’n, i ndɛ.
“AMUN KPA FIAWLƐ KLƆ” MUN
3. ?Ngue yɛ ɔ fata kɛ Izraɛlifuɛ’m be fa yo sran kunfuɛ’n niɔn?
3 Kɛ be kun sran’n, ɔ yo Zoova i ya dan. I sɔ’n ti, laa Izraɛli lɔ’n, sɛ “sran nga be kunnin i’n i klunngbɔ tufuɛ’n” wun sran kunfuɛ’n, ɔ fata kɛ ɔ kun i wie. (Kalɛ 35:19) Kɛ ɔ ko kun i’n, nn w’a tua sa tɛ m’ɔ yoli’n i akatua’n. Sɛ b’a kunmɛn i ndɛndɛ’n, fiɛn trán be mɛn’n nun. I sɔ’n ti, Zoova seli be kɛ: “Nán amun yo mɛn nga amun tran nun’n i fiɛn. Sran kunlɛ’n kusu saci mɛn.”—Kalɛ 35:33, 34.
4. ?Sɛ sanvuɛsa ɲan Izraɛlifuɛ kun naan ɔ kun sran’n, ngue yɛ ɔ fata kɛ ɔ yo-ɔ?
4 ?Yɛ sɛ nán Izraɛlifuɛ kun i ɲinfu yɛ ɔ kunnin sran’n nin? Sanvuɛsa yɛ ɔ ɲɛnnin i-ɔ. Sanngɛ i kwlaa yoli o, ɔ kunnin sran. (Bo Bolɛ 9:5) Zoova kleli kɛ be kwla si i sɔfuɛ’n i aunnvuɛ. Sanngɛ, ɔ fata kɛ ɔ wanndi ko fia fiawlɛ klɔ nsiɛn’n be nun kun su. I liɛ’n, sran ng’ɔ wuli’n i klunngbɔ tufuɛ’n su kunmɛn i wie. Sɛ ɔ o lɔ’n, be su yomɛn i like fi. Sanngɛ, ɔ fata kɛ ɔ ka lɔ lele saan Ɲanmiɛn ɲrun jranfuɛ’m be su kpɛn’n w’a wu.—Kalɛ 35:15, 28.
5. ?Ngue ti yɛ sɛ e si fiawlɛ klɔ’m be su ndɛ’n, é wún i wlɛ kɛ Zoova si aunnvuɛ-ɔ?
5 Nán klɔ sran yɛ ɔ seli Izraɛlifuɛ mun kɛ be kpa be klɔ wie’m be fa yo fiawlɛ klɔ-ɔ. Zoova bɔbɔ yɛ ɔ seli kɛ be yo sɔ-ɔ. Ɔ seli Zozie kɛ: “Kan kle Izraɛlfuɛ’m be kɛ yoo: ‘Amun kpa fiawlɛ klɔ nga m maan Moiz kɛnnin i ndɛ kleli amun’n.’” (Zozie 20:1, 2, 7, 8) Zoova maan klɔ sɔ’m be ti be liɛ ngunmin. Ajalɛ sɔ mɔ Zoova fali’n, ɔ kle kɛ ɔ si aunnvuɛ. Kpɛkun, ɔ kle e like ng’ɔ fata kɛ e yo naan y’a kle kɛ y’a talo Zoova’n.
MAAN Ɔ “KAN SA NG’Ɔ JULI’N” KLE KPƐNNGBƐN MUN
6, 7. (a) ?Sɛ sanvuɛsa ɲan sran kun naan ɔ kun sran’n, ngue yɛ ɔ fata kɛ kpɛnngbɛn’m be yo-ɔ? (An nian desɛn ng’ɔ o kan like suanlɛ’n bo i bo lɛ’n.) (b) ?Ngue ti yɛ ɔ fata kɛ sran kunfuɛ’n, ɔ kan sa ng’ɔ juli’n kle kpɛnngbɛn mun-ɔn?
6 Sɛ sanvuɛsa ɲan Izraɛlifuɛ kun naan ɔ kun sran’n, ɔ fata kɛ ɔ wanndi wɔ fiawlɛ klɔ kun su. Kɛ ɔ ju klɔ’n i anuan nun lɛ’n, ɔ fata kɛ “ɔ kan sa ng’ɔ juli’n kle” kpɛnngbɛn mun. Kpɛkun, ɔ fata kɛ be mɛn i atin naan ɔ wlu klɔ’n nun lɔ. (Zozie 20:4) Kɛ ɔ cɛ kan’n, ɔ fata kɛ be fɛ i wɔ kan ɔ kunnin sran lɔ’n be kpɛnngbɛn’m be ja su, naan be di i jɔlɛ. (An kanngan Kalɛ 35:24, 25 nun.) Sɛ kpɛnngbɛn sɔ’m be wun kɛ sanvuɛsa yɛ ɔ ɲɛnnin i’n, ɔ fata kɛ be fɛ i sɛ i sin fiawlɛ klɔ’n su lɔ.
7 ?Ngue ti yɛ ɔ fata kɛ sran’n kan sa ng’ɔ juli’n kle kpɛnngbɛn mun-ɔn? Afin, kpɛnngbɛn’m be nian Izraɛli mɛn’n su naan fiɛn w’a traman nun. Asa ekun’n, be uka sran nga sanvuɛsa ɲɛnnin i’n naan Zoova yaci sa ng’ɔ yoli’n cɛ i. Fluwa sifuɛ kun seli kɛ: ‘Sɛ sran kunfuɛ’n w’a ko taloman kpɛnngbɛn mun’n, be kwla kun i. Sɛ i sɔ sa ju’n, i bɔbɔ yɛ ɔ kunndɛli-ɔ. Afin, w’a nantiman Ɲanmiɛn mmla’n su.’ Nanwlɛ, ɔ fata kɛ sran nga sanvuɛsa ɲɛnnin i’n, ɔ wɔ fiawlɛ klɔ kun su naan ɔ ko talo kpɛnngbɛn mun. Sɛ w’a yoman sɔ’n, sran ng’ɔ wuli’n i osufuɛ kun kwla kun i wie.
8, 9. ?Sɛ Klistfuɛ kun yo sa tɛ’n, ngue ti yɛ ɔ fata kɛ ɔ ko wun asɔnun kpɛnngbɛn’m be wun-ɔn?
8 Andɛ’n, sɛ Klistfuɛ kun yo sa tɛ’n, ɔ fata kɛ ɔ ko wun asɔnun kpɛnngbɛn’m be wun naan be ukɛ i. ?Ngue ti yɛ ɔ ti cinnjin kɛ ɔ yo sɔ-ɔ? Like nsan ti-ɔ. I klikli’n yɛle kɛ, Zoova sieli asɔnun kpɛnngbɛn mun naan be di be nga be yo sa tɛ’n be jɔlɛ. (Zak 5:14-16) I nɲɔn su’n yɛle kɛ, ɔ sieli asɔnun kpɛnngbɛn mun naan be uka sa tɛ yofuɛ ng’ɔ kaci i nzuɛn’n naan ɔ fɛ i wun mantan Zoova ekun. Yɛ be ukɛ i naan w’a yoman sa tɛ sɔ’n kun. (Galasifuɛ Mun 6:1; Ebre Mun 12:11) I nsan su’n yɛle kɛ, asɔnun kpɛnngbɛn’m be si wafa nga be kwla fɔnvɔ sran’n naan i wla w’a gua ase’n. I sɔ’n ti, Zoova seli kɛ asɔnun kpɛnngbɛn’m be ti kɛ “nzue ba m’ɔ sonji lika kee nun’n sa.” (Ezai 32:1, 2) Nanwlɛ, ajalɛ sɔ mɔ Zoova fali’n, ɔ kle kɛ ɔ si aunnvuɛ dan.
9 Kɛ aniaan wie’m be yoli sa tɛ’n, be kan kleli asɔnun kpɛnngbɛn mun. Yɛ asɔnun kpɛnngbɛn’m be fɔnvɔli be. Ɔ maan, be wla guali ase dan. I wie yɛle aniaan bian kun liɛ’n. Be flɛ i kɛ Daniɛli. Kɛ ɔ yoli sa tɛ’n, ɔ fiali su anglo kpanngban kpa. I waan: “Kɛ ɔ cɛli sɔ’n, n seli n klun lɔ kɛ asɔnun kpɛnngbɛn’m be kwlá yoman like fi manman min kun.” Sanngɛ, i klun titili i cɛn kwlakwla. Afin, ɔ buli i kɛ cɛn wie lele’n, sran’m bé sí sa tɛ ng’ɔ yoli’n. Kɛ ɔ́ srɛ́ Zoova’n, ɔ dun mmua kpɛtɛ i. Cɛn kun’n, ɔ ko wunnin asɔnun kpɛnngbɛn’m be wun naan be ukɛ i. Ɔ seli kɛ: “Nanwlɛ, kɛ ɔ yo naan n kan sa nga n yoli’n n kle be’n, w’a yoman pɔpɔ. Sanngɛ, kɛ n kannin’n, ɔ ti kɛ sran wie w’a sike trɔ nɔnninnɔnin wie min wati w’a jin sa.” Siɛn’n, kɛ Daniɛli srɛ́ Zoova’n, i klun titimɛn i kun. Koko nun wa’n, be sieli i asɔnunfuɛ’m be lika nianfuɛ.
MAAN “Ɔ KO FIA KLƆ SƆ’M BE NUN KUN SU”
10. ?Sɛ sanvuɛsa ɲan sran kun naan ɔ kun sran’n, ngue yɛ ɔ fata kɛ ɔ yo naan b’a yaci b’a cɛ i-ɔ?
10 Sɛ sanvuɛsa ɲan sran kun naan ɔ kun sran’n, ɔ fata kɛ ɔ wanndi wɔ fiawlɛ klɔ ng’ɔ mantan koko’n i su lɔ ndɛndɛ. I liɛ’n, be kwla yaci cɛ i. (An kanngan Zozie 20:4 nun.) Sanngɛ, ɔ fata kɛ ɔ ka lɔ lele saan Ɲanmiɛn ɲrun jranfuɛ’m be su kpɛn’n wa wu. I sɔ’n timan pɔpɔ. Afin, ɔ́ yáci i junman’n, ɔ nin i awlo’n. Yɛ ɔ su kwlá finman fiawlɛ klɔ’n nun fiteman. * (An nian nzɔliɛ’n i su ndɛ’n.) (Kalɛ 35:25) Sanngɛ, i sɔ yɛ ɔ fata kɛ ɔ yo-ɔ. Sɛ ɔ fin klɔ’n nun fite’n, nn ɔ buman sa ng’ɔ yoli’n i ndɛ. Ɔ maan, be kwla kun i wie.
11. ?Sɛ sran kun yo sa tɛ’n, ngue yɛ ɔ fata kɛ ɔ yo naan Ɲanmiɛn w’a wun kɛ ɔ kunndɛ kɛ ɔ si i aunnvuɛ-ɔ?
11 Andɛ kusu’n, ɔ fata kɛ Klistfuɛ ng’ɔ yo sa tɛ’n, ɔ yo ninnge wie mun naan Ɲanmiɛn w’a yaci w’a cɛ i. Yɛle kɛ, ɔ fata kɛ ɔ yaci sa tɛ’n i yolɛ. I kpa bɔbɔ’n, sɛ like wie ti ɔ kwla yo sa tɛ’n, ɔ fataman kɛ ɔ yo i sɔ like’n. Laa Korɛnti lɔ’n, Klistfuɛ kun yoli sa tɛ. Sanngɛ i sin’n, ɔ kacili i nzuɛn’n. Like ng’ɔ yoli m’ɔ kle sɔ’n, akoto Pɔlu yiyili nun. Ɔ seli kɛ: “An nian amun ngokoɛ’n b’ɔ yo Nyanmiɛn fɛ’n, kɛ i agualiɛ ti kpa-a. Ɔ maan an nian amun wun su kpa, an kpli amun ti, an fa ya sa tɛ’n ti, amun nyin yi Nyanmiɛn, an de min awuliɛ kpa, an jran min sin, yɛ an tu sran ng’ɔ yo sa’n i fɔ kpa!” (2 Korɛntfuɛ Mun 7:10, 11) Sɛ e kplin e ɲin naan e yaci sa tɛ’n i yolɛ’n, Zoova wún kɛ sa nga e yoli’n yo e nzisɔ, naan e kunndɛ kɛ ɔ si e aunnvuɛ.
12. ?Ngue yɛ ɔ fata kɛ Klistfuɛ kun yaci i yolɛ naan Ɲanmiɛn w’a si i aunnvuɛ-ɔ?
12 ?Ngue yɛ ɔ fata kɛ Klistfuɛ kun yaci i yolɛ naan Ɲanmiɛn w’a si i aunnvuɛ-ɔ? Sɛ ɔ klo ninnge wie mun, naan sanngɛ ninnge sɔ’m be ti, ɔ kwla yo sa tɛ’n, ɔ fataman kɛ ɔ yo. (Matie 18:8, 9) ?Sɛ e janvuɛ’m be laka e kɛ e yo ninnge nga Zoova kloman be’n, e nin be san nun ekun? ?Sɛ nzan nɔnlɛ’n yɛ ɔ kle e yalɛ nin? ?Sɛ e wun kɛ be su nɔn nzan lika kun’n, é kɔ́ lɔ? ?Sɛ bian annzɛ bla kunndɛlɛ’n yɛ ɔ kle e yalɛ’n, é nían flimun nga be kle i sɔ like’n? ?Kɛ e kɔ ɛntɛnɛti su’n, é kó níɛn i sɔ like naan w’a saci e ti nun? Maan e yo like kwlaa nga e kwla yo naan y’a fɔnman Zoova i mmla’n. I liɛ’n, ngokɔɛ’n su kunman e. Nanwlɛ, sran ng’ɔ wun kɛ Zoova klo i’n, i liɛ su ti ye.—Ezai 54:7, 8.
“KƐ Ɔ YO NAAN SRAN NG’Ɔ WULI’N I KLUNNGBƆ TUFUƐ W’A NYƐNMƐN I’N TI”
13. Kɛ sran kunfuɛ’n o fiawlɛ klɔ’n nun lɔ’n, be kwlá yomɛn i like fi, yɛ ɔ kwla di aklunjuɛ. ?Ngue ti-ɔ?
13 Kɛ sran kunfuɛ’n o fiawlɛ klɔ’n nun lɔ’n, be kwlá yomɛn i like fi. Zoova seli kɛ maan “ɔ ko fia klɔ sɔ’m be nun kun su.” (Zozie 20:1-3) Zoova kunndɛman kɛ be di sran kunfuɛ’n i jɔlɛ kpɛ nɲɔn sa kunngba’n ti. Asa ekun’n, sran ng’ɔ wuli’n i klunngbɔ tufuɛ’n kwlá wluman klɔ’n nun lɔ kɛ ɔ́ kó kún sran kunfuɛ’n. Kɛ sran kunfuɛ’n ko ju fiawlɛ klɔ’n nun lɔ’n, ɔ ti kɛ w’a talo Zoova sa. Nán bisua yɛ ɔ wo-ɔ. Afin, ɔ kwla di junman. Ɔ kwla yo i wiengu’m be ye, yɛ ɔ kwla tu i klun su Zoova. Nanwlɛ, ɔ kwla yo like kwlaa ng’ɔ kwla di su aklunjuɛ’n.
Maan e lafi su kɛ Zoova yaci sa nga e yo’n cɛ e. (An nian ndɛ kpɔlɛ 14-16 be nun.)
14. ?Sɛ Klistfuɛ kun yoli sa tɛ naan ɔ kacili i nzuɛn’n, ngue ti yɛ ɔ fata kɛ i wla gua ase-ɔ?
14 Ɲanmiɛn i sufuɛ wie’m be yacili sa tɛ’n i yolɛ. Sanngɛ, be klun te titi be. Be nun wie’m be liɛ’n, be bu i kɛ Zoova i wla su fiman sa nga be yoli’n su le. Sɛ e bu i sɔ wie’n, nɛ́n i su-ɔ. Maan e wun i wlɛ kɛ, kɛ Zoova ko yaci sa kun ko cɛ’n, ɔ boman su diman jɔlɛ kun. I sɔ’n ti, ɔ fataman kɛ e koko. Daniɛli mɔ e kɛnnin i ndɛ’n, ɔ wunnin i wlɛ sɔ. Kɛ ɔ ko wunnin asɔnun kpɛnngbɛn’m be wun mɔ be ukɛli i’n, i wla guali ase dan. Ɔ seli kɛ: “N klun w’a titiman min kun. Kɛ Zoova ko yaci sa kun’n, nn w’a yaci. Kɛ ng’ɔ fa kannin’n sa’n, ɔ fa e sa tɛ m’ɔ ti kɛ trɔ nɔnnin wie sa’n, ɔ jin i mmuammua kpa. E su wunmɛn i kun.” Kɛ sran kunfuɛ’n o fiawlɛ klɔ’n nun lɔ’n, srɛ kunmɛn i. Afin, ɔ si kɛ klunngbɔ tufuɛ’n su kɔmɛn i kunlɛ klɔ’n nun lɔ. I wafa kunngba’n, kɛ Zoova ko yaci e sa tɛ’n ko cɛ e’n, ɔ fataman kɛ e bu i kɛ cɛn wie lele’n, ɔ́ bó su dí jɔlɛ ekun.—An kanngan Jue Mun 103:8-12 nun.
15, 16. ?Kɛ a wun kɛ Zezi fɛli i wun yili e ti tɛ naan ɔ jran e nuan kpata Ɲanmiɛn’n, ngue ti yɛ i sɔ’n yo wɔ fɛ-ɔ?
15 Like nga ti yɛ ɔ fata kɛ e lafi su kɛ Zoova si e aunnvuɛ’n, ɔ tra Izraɛlifuɛ’m be liɛ’n. Kɛ Pɔlu wunnin kɛ ɔ kwlá nantiman Zoova i mmla’m be su sɛsɛsɛ’n, ɔ seli kɛ ɔ ti “nyrɛnnɛnfuɛ” dan. Sanngɛ i sin’n, ɔ seli kɛ: “Nyanmiɛn kwla o! Afin i yɛ maan e Min Jésus-Krist deli ye-ɔ.” (Rɔmfuɛ Mun 7:25) ?Ngue yɛ ndɛ sɔ’n kle e-ɔ? Laa’n, Pɔlu yoli sa tɛ. Sanngɛ, ɔ miɛnnin i ɲin naan w’a fɔnman Ɲanmiɛn i mmla’n kun. Ɔ kacili i nzuɛn’n. Tɛ mɔ Zezi fɛli i wun yili’n ti’n, Pɔlu lafili su kɛ Zoova yacili i sa tɛ’n cɛli i. E ti kpɔlɛ tɛ sɔ’n ti’n, e kusu e klun titiman e. E wla gua ase. (Ebre Mun 9:13, 14) Zezi ti Ɲanmiɛn ɲrun jranfuɛ’m be su kpɛn. I dunman nun ti’n, be nga be fa be wun mantan Ɲanmiɛn’n, “bé kwlá nyán be ti mlɔnmlɔn, afin ɔ o lɛ titi ɔ srɛ Nyanmiɛn kɛ ɔ nian be su.” (Ebre Mun 7:24, 25) Laa Izraɛli lɔ’n, Ɲanmiɛn ɲrun jranfuɛ’m be su kpɛn’n yi Izraɛlifuɛ’m be ti tɛ, naan be wun i wlɛ kɛ Ɲanmiɛn yacili sa nga be yoli’n cɛli be. Ɲanmiɛn ɲrun jranfuɛ nga e le i’n, yɛle Zezi. Ɔ jran e nuan kpata Ɲanmiɛn naan ɔ “si ye aunnvuɛ, naan blɛ nga e sa mian’n, ɔ yo e ye, yɛ ɔ ti e wun nyanman nun.”—Ebre Mun 4:15, 16.
16 Like nga é yó naan y’a kle kɛ e talo Zoova’n, yɛle kɛ maan e lafi e ti tɛ mɔ Zezi fɛli i wun yili’n su. Sran’m be kwlakwla be ti tɛ yɛ Zezi fɛli i wun yili-ɔ. Sanngɛ, maan e tinuntinun e lafi su kɛ e kwla ɲan su mmlusuɛ. (Galasifuɛ Mun 2:20, 21) Maan e lafi su kɛ e ti kpɔlɛ tɛ’n ti’n, Zoova yaci sa tɛ nga e yo’n cɛ e, naan e kwla ɲan anannganman nguan. Nanwlɛ, e tinuntinun e dunman nun ti yɛ Zoova maan Zezi fɛli i wun yili tɛ-ɔ.
17. ?Ngue ti yɛ ɔ fata kɛ Zoova yɛ e talo i-ɔ?
17 Kɛ Zoova seli Izraɛlifuɛ’m be kɛ be kpa fiawlɛ klɔ mun’n, i sɔ’n kle kɛ ɔ si aunnvuɛ dan. Ɔ kle ekun kɛ klɔ sran’n i nguan’n ti like cinnjin. Asa ekun’n, ɔ kle e kɛ asɔnun kpɛnngbɛn’m be kwla uka e. Yɛ e wun like ng’ɔ fata kɛ e yo naan y’a kle kɛ y’a kaci e nzuɛn’n. Kɛ Zoova ko yaci sa kun ko cɛ’n, ɔ boman su diman jɔlɛ kun. I sɔ’n ti, maan e talo Zoova. I kunngba cɛ yɛ sɛ e talo i’n, é fíte nun-ɔn. (Jue Mun 91:1, 2) ?Sanngɛ, wafa sɛ yɛ e kwla kle kɛ e si aunnvuɛ, naan e yo sa’n i nuan su kɛ Zoova sa-ɔ? Like suanlɛ ng’ɔ́ bá lɛ nun’n, é wá wún kosan sɔ’n i su tɛlɛ’n.
^ ndɛ kpɔlɛ 10 Zuifu’m be fluwa sifuɛ kun klɛli kɛ, sran kunfuɛ’n i osufuɛ’m be ko niɛn i osu fiawlɛ klɔ’n nun lɔ.
