Cɛn kun’n, Zezi ɔli Izraɛli nvle’n i sin lɔ Rɔmunfuɛ’m be lika nga be flɛ i kɛ Siri’n i asa’n su. Bla kun m’ɔ timan Zuifu’n, ɔ wa seli i kɛ ɔ yo i ye. Kɛ Zezi tɛ́ i su’n, ɔ buli ɲanndra kun. Ɲanndra sɔ’n nun’n, kɛ ɔ́ kán be nga be timan Zuifu’n be ndɛ’n, ɔ fali alua’m be sunnzun ase. Kɛ Zezi fá sunnzun ase sɔ’n, Ebre nun ndɛ ng’ɔ kannin mɔ be kacili i Wawle’n nun kɛ “alua’n,” ɔ loman sran ngasi. Moizi Mmla’n kle kɛ alua’n ti like fiɛn. (Saun Yolɛ 11:27) ?I sɔ’n ti, é sé kɛ Zezi su kpɛ bla sɔ’n nin be kwlakwla nga be timan Zuifu’n be nzowa?

Cɛcɛ. Like ng’ɔ ti Zezi i cinnjin blɛ sɔ nun’n, i ndɛ yɛ ɔ su kan-ɔn. Ɔ yiyi nun kleli i sɔnnzɔnfuɛ mun kɛ Zuifu’m be ye yolɛ yɛ ɔ ti i cinnjin dan blɛ sɔ’n nun-ɔn. Kɛ ɔ ko yo naan bla m’ɔ timan Zuifu’n w’a wun i sɔ liɛ’n i wlɛ’n ti’n, ɔ fali sunnzun ase. Ɔ seli i kɛ: “Kɛ bé fá ba kanngan’m be kpaun’n gúa alua’m be bo’n, ɔ ti-mɛn i su.” (Matie 15:21-26; Mark 7:26) Glɛki nin Rɔmunfuɛ’m be nun sunman be klo alua. Ɔ maan, be fa be sie i be awlo’n nun. Yɛ be nin be mma’m be kan ngowa. Sunnzun ase sɔ mɔ Zezi fali’n, w’a loman bla’n i ngasi. I sɔ’n ti, ɔ tɛli Zezi su kɛ: “Nannan, ɔ ti sɔ, sanngɛ kusu alua’m be di kpaun i munmun b’ɔ gua be si tabli’n bo’n.” Zezi wunnin kɛ bla’n lafi Ɲanmiɛn su. Ɔ maan, ɔ yoli i mo. Kpɛkun, ɔ yoli i wa bla’n i juejue.—Matie 15:27, 28.

Pɔlu o mmeli kun m’ɔ su kɔ Itali’n nun. Aunmuan’n fitaman aɔwi. I sɔ’n ti, kɛ be juli klɔ kun su’n, Pɔlu seli kɛ maan be minndɛ kan naan b’a wɔ. (Sa Nga Be Yoli’n 27:9-12) ?Sɛ Pɔlu kannin sɔ’n, i ndɛ yo fɛ?

Lalafuɛ nun’n, mmeli kanfuɛ’m be si kɛ ayrɛ blɛ nun’n, jenvie nga be flɛ i kɛ Mediterane’n i su sinlɛ’n ti kekle dan. Kɛ ɔ fɛ i Novanblu i le 15 su lele m’ɔ́ fá jú Marsi i le 15 su’n, jenvie’n i su sinlɛ timan kekle. Sanngɛ, Sɛptanblu annzɛ Ɔktɔblu nun yɛ Pɔlu su kɔ lika-ɔ. Be flɛ Rɔmunfuɛ’m be fluwa sifuɛ kun kɛ Vezetiusi. Ɔ seli kɛ: ‘Anglo wie’m be nun’n, jenvie su sinlɛ ti pɔpɔ. Anglo wie’m be nun liɛ’n, sran ng’ɔ́ sín su’n i klun titi i. Sanngɛ, anglo wie’m be nun’n, be kwlá sinman su kaan sa.’ Vezetiusi seli kɛ, kɛ ɔ fɛ i Mɛ i le 27 lele Sɛptanblu i le 14 su’n, be kwla sin jenvie’n su. Sanngɛ, kɛ ɔ fɛ i Sɛptanblu i le 15 lele Novanblu i le 11 su’n, ɔ nin kɛ ɔ fɛ i Marsi i le 11 lele Mɛ i le 26 su’n, sran ng’ɔ́ sín jenvie’n su’n i klun titi i. Ɔ ju wie bɔbɔ’n, blɛ sɔ’m be nun’n, be kwlá faman jenvie’n. Pɔlu si i kwlaa sɔ’n, afin ɔ kɔ lika titi. Mmeli kanfuɛ’n nin sran ng’ɔ le mmeli’n be si sɔ wie. Sanngɛ, b’a faman Pɔlu i ndɛ’n su. Ɔ maan, be mmeli’n sacili.—Sa Nga Be Yoli’n 27:13-44.