FLUWA nga Matie klɛli’n nun’n, ɔ seli kɛ: “Jésus wluli Nyanmiɛn i sua’n nun naan w’a fuan be kwlaa nga be yo like atɛ lɔ’n, nin be nga be to like’n, yɛ ɔ su sika mma kacifuɛ’m be tabli’n nin be nga be yo okunmomo atɛ’n be bia’m be bo guali. Yɛ ɔ seli be kɛ: ‘Be klɛli i kɛ: “Bé wá flɛ́ n sua’n lika bɔ sran nin Nyanmiɛn be koko yalɛ nun,” sanngɛ amu’an fa kaci awiefuɛ’m be fiawlɛ.’”—Matie 21:12, 13.

Lalafuɛ nun’n, be nga be di aata Ɲanmiɛn i sua’n nun lɔ’n, be di sran’m be lufle. Yɛle kɛ be gua ninnge’m be gua’n su dan. I wie yɛle okunmomo mɔ be yo be atɛ’n. Okunmomo’m be gua’n w’a cɛnman. Ɔ maan, yalɛfuɛ mun bɔbɔ be kwla to be fa yi tɛ. Sanngɛ, Zuifu’m be lalafuɛ fluwa wie’m be se kɛ Klistfuɛ klikli’m be blɛ su’n, be yoli okunmomo nɲɔn atɛ sika ɔkwlɛ denie kun. Ɔ fata kɛ sran kun di junman cɛn ba 25 naan w’a ɲan sika sɔ’n. Nanwlɛ, yalɛfuɛ’m b’a kwlá toman okunmomo kun. Afin, be gua’n cɛnnin. (Saun Yolɛ 1:14; 5:7; 12:6-8) Sa sɔ’n ti, Simeɔn Bɛnin Gamaliɛli m’ɔ ti Zuifu’m be like klefuɛ’n, ɔ fali ya dan. Ɔ maan, ɔ seli kɛ nán maan Zuifu’m be yi tɛ dan kɛ laa’n sa kun. Kɛ ɔ yoli sɔ’n, be tili okunmomo’m be gua’n su ndɛndɛ kpa. Ɔ maan, sika nga be fa to okunmomo nɲɔn laa’n, m’ɔ ti sika ɔkwlɛ denie kun’n, be wa buli nun kpɛ ya.

I kwlaa sɔ’n kle kɛ, be nga be yo ninnge’m be atɛ Ɲanmiɛn sua’n nun lɔ’n be di sran’m be lufle. Ɔ maan, sɛ Zezi seli kɛ be ti “awiefuɛ’n,” ɔ ti su.