BE WULI min afuɛ 1934 nun. Be flɛ min si’n kɛ Flɛdi Moloanin yɛ min nin’n suan Ɛdina. Kɛ bé wú min’n, nn be su Zoova w’a di afuɛ 20. Be kleli min like naan n klo Zoova. I sɔ’n yo min fɛ dan. E trannin klɔ kaan kun m’ɔ suan Parsɔnun’n su. Ɔ o Kanzasi i ngua lɔ lika’n nun. E asɔnun nunfuɛ’m be nun sunman be o Klistfuɛ nga Ɲanmiɛn kpali be sieli be ngunmin’n, be nun. E nin e awlofuɛ mun e kɔ aɲia’m be bo yɛ e bo jasin fɛ’n titi. Fue cɛn nnɔsua nun’n, e ko bo jasin fɛ’n klɔ’n nun akpɔ’m be su. Andɛ’n, be flɛ i sɔ liɛ’n kɛ nzra nun jasin fɛ bolɛ. Wie liɛ’n, kɛ e bo jasin fɛ’n lele mɔ y’a fɛ’n, e baba man e bɔnbɔn glase.

E asɔnun nunfuɛ’m b’a sɔnman. Kusu e jasin fɛ bowlɛ’n cɛnnin kpa. Be nga be tran lɔ’n, be nun wie’m be di fie. Kɛ e man be fluwa’n, be nun wie’m be man e ninnge nga be fa tɔn tro’n, annzɛ akɔ annzɛ klenzua. Fluwa nga e fa man sran mun’n, e baba w’a dun mma w’a man be ti sika. I ti’n, ninnge kwlaa nga be man e’n, e bɔbɔ e di.

Min si nin min nin be fa flono be bo jasin fɛ’n. Kɛ mɔ n ti kaan ti’n, n kwlá fa diman junman. Sanngɛ, kɛ min si nin min nin bé kɔ́ sran’m be osu nianlɛ’n, annzɛ bé kɔ́ sran’m be Biblu’n nun like klelɛ’n mɔ bé bó aniaan bian Ritɛrfɔdu i nzra nun ijɔlɛ’n, n uka be.

Baba fali bafu dan kun cicili i e loto’n i ti su. Ɔ maan kɛ ɔ́ bó kasɛti’n, sran nga be o mmua’n be kwla ti. Bafu sɔ’n ukali e jasin fɛ bolɛ’n nun kpa. Baba dun mmua bo miziki kan. Kɛ ɔ wun kɛ sran’m be su sie be su’n, kpɛkun ɔ su bo kasɛti’n. Wie liɛ’n, nzra nun ijɔlɛ mɔ i nun ndɛ’n taka Biblu’n su’n, yɛ ɔ bo-ɔ. I sin’n, ɔ man be nga Ɲanmiɛn ndɛ’n ti be cinnjin’n be fluwa.

Kɛ e ɔli Kanzasi lɔ klɔ kaan kun m’ɔ suan Serivali’n su’n, baba fali loto ɔli kan sran’m be tran lɛ Mɔnnɛn cɛn be yiyi be ɲin su’n. Sanngɛ, polisie’m be wa seli baba kɛ ɔ fɛ i loto’n wɔ lika uflɛ. Baba fali loto’n ɔli lika sɔ’n i wun koko lɛ akpɔ kun nuan. I liɛ’n, be nga be o lɔ bé yíyí be ɲin su’n, be kwla ti ndɛ’n. Blɛ kɛ  ngalɛ sa’n be nun’n, kɛ min nin baba nin min ɲrun kpɛnngbɛn Jeri e o likawlɛ’n, min wun kpaja min kpa.

Afuɛ sɔ’m be nun’n, e fali ajalɛ wie mun naan y’a kwla bo jasin fɛ’n lika nga sran’m be tanndan e ɲrun’n, be nun. Kɛ nga n fa boli su ndɛ’n i bo bolɛ nun sa’n, e jaso kɔnguɛ mbluniɛn nun, yɛ e fa e fluwa mun e wlawla sran’m be anuan’m be bo blɛlɛlɛ. I sin’n, e ngba e yia klɔ’n i tiwa lɔ. I liɛ’n, sɛ polisie’m be trali aniaan kun’n, é wún i wlɛ.

Ɔ ju wie’n kɛ é bó jasin fɛ’n, e klɛ fluwa wie’m be su, e fa sende e wun. Kpɛkun e fa wlanwlan klɔ’n nun. Jasin fɛ bolɛ wafa sɔ’n yoli min fɛ dan. Min wla kpɛn su kɛ cɛn kun’n, aniaan’m be ɔli e klɔ lɔ. Yɛ be nanti sinnin klɔ’n nun. Ndɛ nga be fa klɛli fluwa ng’ɔ sendesende be wun su’n se kɛ ‘Ɲanmiɛn sulɛ wafa’m be laka sran mun yɛ be wua sran mun.’ Be boli nantilɛ bo e awlo’n i ɲrun lɛ. Be nanti sinnin klɔ’n nun kilomɛtri kun tra su. Kpɛkun be sali be sin be bali e awlo’n i ɲrun lɛ ekun. Ɲanmiɛn sa, sran fi w’a jranman be ɲrun. I kpa bɔbɔ’n, sran kpanngban be kunndɛ kɛ bé sí like nga aniaan’m be su yo’n nun kpa.

Blɛ sunman’n, e nin min awlofuɛ mun e kɔ Tɛkzasi lɔ aɲia dandan’m be bo. Baba di junman susute ng’ɔ nian alie ja’m be su’n, i nun. Ɔ maan e kwla fa alie e kɔ aɲia dandan’m be bo annzɛ e kɔ e osufuɛ’m be osu nianlɛ, e tuaman sika. Be flɛ n manmin i ɲrun kpɛnngbɛn yasua’n kɛ Flɛdi Wisima. I yi’n suan Elali. Be tran Tɛkzasi lɔ klɔ ng’ɔ suan Tanplu’n su. Kɛ afuɛ 1900 sinnin’n, yɛ be kleli min tɔntɔn sɔ’n i Biblu’n nun like-ɔ. Kpɛkun be yoli i batɛmun. Kɛ ɔ́ yó sɔ’n, nn ɔ ti gbanflɛn kan. Ɔ kannin Ɲanmiɛn ndɛ’n kleli i niaan mun. Ɔ kan kleli min manmin wie. Aniaan nga be tran Tɛkzasi i afiɛn lɔ lika nun’n, be si min tɔntɔn sɔ’n kpa. Afin ɔ dili junman nga andɛ’n akpasua sunianfuɛ’m be di’n. I klun ti ufue, ɔ di aklunjuɛ, yɛ ɔ su Zoova juejue su. Ɔ kleli min ajalɛ klanman kpa.

Afuɛ 1941 nun’n, e fali alie e ɔli aɲia dan kun bo Misuri akpasua’n su lɔ klɔ kun m’ɔ suan Sɛn Lui’n su. Aɲia sɔ’n i bo lɔ’n, be seli gbanflɛn nin talua’m be kwlaa kɛ be tran likawlɛ naan be tie ndɛ kun mɔ aniaan bian Ritɛrfɔdu wá yíyí nun’n. Ndɛ sɔ’n yɛ: “Famiɛn’n i mma mun.” Kɛ aniaan bian Ritɛrfɔdu wieli ndɛ’n i nun yiyi’n, ɔ nin aniaan nga be nin i di junman’n, be mannin gbanflɛn nin talua 15.000 nga be o lɛ’n, be tinuntinun be fluwa kun. Ndɛ nga be klɛli i fluwa sɔ’n su’n, i bo yɛle kɛ ‘Ba kanngan mun.’

Afuɛ 1943 Avrili nun’n, e ɔli aɲia dan kun bo Kanzasi asa’n su lɔ klɔ kun mɔ be flɛ i Kɔfivili’n su. Aɲia sɔ’n i bo lɔ’n, be seli kɛ é wá yó suklu kun asɔnun kwlaa be nun siɛn’n. Suklu sɔ’n yɛ be flɛli i kɛ Ɲanmiɛn junman dilɛ suklu’n niɔn. Be mannin e suklu sɔ’n i su fluwa kun. Fluwa sɔ’n i nun like suanlɛ’m be ti 52. Kɛ ɔ cɛli kan’n, afuɛ kunngba sɔ’n nun’n, n dili min junman klikli’n suklu sɔ’n i bo. Aɲia dan sɔ’n i bo’n, be yoli min nin sran wie mun e batɛmun. Nzue ba nga be yoli e batɛmun nun’n, ɔ jɔ dan kpa.

Kɛ afuɛ 1951 nun’n, n wieli suklu di’n, n kunndɛli kɛ ń yó like trele kun. Min ɲrun kpɛnngbɛn’n di junman Betɛli lɔ. N fali ajalɛ kɛ, ń kó dí junman Betɛli lɔ wie. I sɔ’n ti’n, n klɛklɛli fluwa nga sɛ aniaan kun kunndɛ kɛ ɔ́ kɔ́ Betɛli’n ɔ klɛklɛ su’n, kpɛkun n fa ɔli Betɛli. I sin’n, afuɛ 1952 Marsi i le 10 su’n, n boli Betɛli lɔ junman dilɛ bo. Ajalɛ kpa yɛ n fali-ɔ. Afin, i sɔ’n ukali min maan n kwla suli Zoova kpa.

Min waan ń kó dí junman kan be yi e periodiki nin e fluwa wie’m be lɔ’n, sanngɛ, b’a manman min atin le. Be seli min kɛ n cɛ aliɛ. I sin’n, n ma kacili aliɛ tɔnfuɛ. N kloli junman sɔ’n kpa, yɛ be kleli min like kaka. Kɛ e ko wie e junman’n liɛ’n di’n, e ko lo wunmiɛn. Kpɛkun aniaan uflɛ’m be kaci e. Cɛn wie’n, min wunmiɛn lolɛ blɛ nun’n, n kɔ Betɛli i fluwa siesiewlɛ lɔ n ko suan Biblu’n nun like. I sɔ’n yoli maan n ma lafili Zoova su kpa. Kpɛkun e afiɛn mantannin kpa. Asa ekun’n, i sɔ’n yoli maan n fuali kpa kɛ ń dí junman Betɛli lɔ ń cɛ́ kpa. Min niaan bian Jeri yacili Betɛli lɔ junman dilɛ afuɛ 1949 nun. I sin’n, ɔ jali Patrisia. Be trannin Betɛli’n i wun koko lɛ. Ɔ maan, kɛ n boli junman dilɛ bo Betɛli lɔ’n, be suannin min bo yɛ be wlali min fanngan kpa.

Kɛ n ɔli Betɛli lɔ m’ɔ dili le nɲɔn kun’n, aniaan’m be waan be su kunndɛ Betɛli lɔ aniaan wie mun mɔ be si nzra nun ijɔ’n, naan be sinsin asɔnun’m be su. Aniaan ng’ɔ fata kɛ be ko nian be osu’n, be tran  mmua kpa. Be nun wie’m be tranwlɛ’n nin Bluklinin be afiɛn kwla ju kilo 320. Kɛ aniaan sɔ’m be ju aniaan nga be kɔ be osu nianlɛ’n be klɔ’n su lɔ’n, be ijɔ nzra nun yɛ be nin aniaan’m be bo jasin fɛ’n likawlɛ. Aniaan’m be seli min kɛ n ko di i sɔ junman’n wie. Kɛ n boli junman sɔ’n i dilɛ bo’n, min klun titili min kan. Laa’n, nzra nun ijɔlɛ di dɔ kun. Kɛ n kɔ aniaan’m be osu nianlɛ’n, n fu alie nun. Min wla kpɛn sa kun m’ɔ juli min su Mɔnnɛn cɛn nnɔsua kun’n, i su. Afuɛ 1954 nun arɛ blɛ nun yɛ sa sɔ’n juli-ɔ. Kɛ n wieli aniaan wie’m be o su nian mɔ ń sá min sin’n, n fuli alie kun nun. Ɔ fata kɛ e ju Niyɔki lɔ ndɛ nun. Sanngɛ kɛ e juli atin nun’n, nzue’n boli tɔlɛ bo. Kɛ ɔ́ tɔ́’n nn aunmuan fíta kekle kpa, nn laglasi gúa. Ɔ maan, e alie’n sacili. I sɔ’n ti’n, y’a juman Niyɔki lɔ ndɛ nun. E juli lɔ Kisie cɛn nglɛmun dɔ nnun su. Kɛ e juli lɔ’n, n fuli alie uflɛ nun yɛ n ɔli Betɛli lɔ-ɔ. Kɛ n juli Betɛli lɔ cɛ’n, yɛ n ɔli aliɛ tɔnlɛ-ɔ. N kali siɛn bɔbɔ. Kusu, m’an fɛ. Afin kɔnguɛ’n, m’an lafiman kpa. Sanngɛ junman nga n dili i asɔnun’m be nun’n, nin aniaan fanunfanun nga n wunnin be’n, be ti’n, n di aklunjuɛ dan.

Kɛ n cɛli Betɛli lɔ kan’n, n ma ijɔli anuannzɛ’n i aladio nun wie. Be flɛ i kɛ WBBR. Lemɔcuɛ kwlaa nun’n, e nin aniaan wie mun e yi wafa nga sran kun kwla suan Biblu’n nun like’n, i nglo. E junman diwlɛ’n o nglo sua kun nun. Sua sɔ’n o lika nga be flɛ i kɛ 124 Columbia Heights. Aniaan bian Alɛkzandɛɛ Makimilan m’ɔ dili junman Betɛli lɔ afuɛ kpanngban’n, ɔ ijɔli anuannzɛ’n i aladio nun wie blɛ sunman. Titi’n, e kpɛ i kpo e flɛ i kɛ aniaan bian Maki. Sa kekle sunman be tɔli i su. Sanngɛ w’a kpɔciman Zoova le. I lɛ nun’n, ɔ kleli e gbanflɛn nga e o Betɛli lɔ’n, e ajalɛ klanman kpa.

Afuɛ 1958 nun’n, be mannin min junman uflɛ. N ma boli be nga be ba Gileadi suklu’n i dilɛ’n be ukalɛ bo. Kɛ aniaan’m be ko wie suklu’n i di’n, be nga anuannzɛ’n fa be kɔ nvle uflɛ nun’n, n uka be maan be ɲan fluwa nga bé fá fú aviɔn nun bé kɔ́’n. Aniaan nga bé sá be sin be nvle’n nun kusu’n, n uka be maan be ju be klɔ lɔ klanman. Blɛ sɔ’n nun’n, sɛ sran kun waan ɔ́ fá aviɔn kɔ́ lika’n, ɔ bo kalɛ dan. I sɔ’n ti’n, aniaan nga anuannzɛ’n fa be kɔ sran ble nin Azi mɛn nun’n, be fu mmeli dandan nga be sua trɔ’n, be nun. Kɛ afuɛ’m bé sín’n, mɔ sran kpanngban bé fá aviɔn bé kɔ́ lika’n, i ngua’n wa yoman dan kun. I sɔ’n ti’n, aniaan’m be dan lika be wa fali aviɔn naan b’a wɔ kan anuannzɛ’n fa be kɔ lɔ’n.

Afuɛ 1960 nun’n, n kunndɛli aviɔn mannin aniaan nga be o Etazinin’n naan b’a kwla tran aɲia dandan nga bé yó be Abloki lɔ afuɛ 1961 nun’n, be bo. Be yoli aɲia dan sɔ’m be nun kun Alemaɲin lɔ klɔ nga be flɛ i kɛ Anbugu’n su. Lɔ aɲia liɛ’n, i bo yɛ n trannin-ɔn. Kɛ aɲia’n wieli’n, min nin aniaan nsan mɔ be di junman Betɛli lɔ’n, e fali loto Alemaɲin lɛ e ɔli Itali. Kɛ e juli lɔ’n, e ɔli klɔ nga be flɛ i kɛ Rɔmun’n su. E ko niannin aniaan nga be o Rɔmun lɔ Betɛli’n nun’n, be osu. I sin’n, e ɔli Aflansi. Kpɛkun, e sinnin okaoka wie’m be afiɛn naan y’a ju Ɛspaɲin lɔ. Awa tanninnin e niaan nga be o lɔ’n be jasin fɛ’n i bolɛ. Kɛ e juli lɔ’n, e fali e fluwa wie mun e mannin e niaan nga be tran klɔ nga be flɛ i kɛ Baselɔnin’n su. E cicili fluwa sɔ’m be wun kɛ like wie yɛ e su fa cɛ e niaan mun sa. Kɛ e wunnin e niaan mun’n, ɔ yoli e fɛ dan. Kɛ e tuli e bo Ɛspaɲin lɛ’n, e ɔli Amstɛɛdamun. I sin’n, e sali e sin Niyɔki lɔ.

 Afuɛ 1962 nun’n, be seli min kɛ n uka aniaan 583 naan be ko tran aɲia dandan nga é yó be nvle wie’m be nun’n, be bo. Afuɛ 1963 nun yɛ be yoli aɲia sɔ mun-ɔn. Aniaan sɔ’m be ɔli Abloki, nin Azi, nin Pasifiki Sidi. I sin’n, be ɔli Onolulu, nin Pasadena. Kpɛkun, be ɔli Liban, nin Jɔdanin. Min nin aniaan nga e nin be di junman’n, e kunndɛli aviɔn, nin lawlɛ nin fluwa wie mun naan aniaan sɔ’m b’a kwla tran aɲia sɔ’m be bo.

Afuɛ 1963 nun’n, n ɲannin suyralɛ uflɛ ekun. Yɛle kɛ Zuɛn i le 29 su’n, e nin Lila Rogɛɛ e jali. Lila fin Misuri, yɛ ɔ ɔli Betɛli lɔ junman dilɛ afuɛ 1960 nun. Kɛ e jali m’ɔ dili lemɔcuɛ kun’n, e ɔli Glɛsi nin Ezipti yɛ Liban. I sin’n, e ɔli Jɔrdanin. Awa tanninnin e jasin fɛ’n i bolɛ nvle sɔ’n su. Ɔ maan, sɛ Zoova i Lalofuɛ’m be kunndɛ kɛ bé kɔ́ lɔ’n, be manman be fluwa. I sɔ’n ti’n, kɛ é kɔ́’n e klun titili e. Sanngɛ kɛ e juli lɔ’n, aniaan’m be sɔli e nun klanman. E wunnin kɛ aniaan wie’m be bali e atin kpalɛ. Be klɛli fluwa dan kun su kɛ: “Zoova i Lalofuɛ mun, amun mo nin balɛ.” I sɔ’n yoli e fɛ kpa. E wlanwlannin lika nga Biblu’n kan be ndɛ’n be nun wie’m be nun. E wunnin lika nga Abraamun nin Izaaki nin Zakɔbu be trannin lɛ’n. E wunnin lika nga Zezi nin i akoto’m be boli jasin fɛ’n lɛ’n. Kpɛkun, e wunnin lika nga Klistfuɛ klikli’m be takali asɔnun klikli’n, mɔ i sin’n, be boli jasin fɛ’n lele fa juli “asiɛ’n i awieliɛ” lɔ’n.—Sa Nga Be Yoli’n 13:47.

E nin Lila e dili junman likawlɛ afuɛ 55. Blɛ kwlaa sɔ’n nun’n, ɔ suannin min bo kpa. E ɔli Ɛspaɲin nin Pɔɔtigali kpɛ sunman. Kusu nn, awa tanninnin aniaan nga be o lɔ’n, be jasin fɛ bolɛ’n. E wlali aniaan’m be fanngan. Kpɛkun, e mannin be fluwa nin ninnge wie mun mɔ be sa mian be wun’n. E ko niannin e niaan wie mun mɔ be wlali be bisua Kadisi lɔ’n, be osu bɔbɔ. N ijɔli nzra nun n fa wlali be fanngan. I sɔ’n yoli min fɛ kpa.

Kɛ ɔ fɛ i afuɛ 1963 nun’n, n ukali aniaan wie mun maan be ɔli aɲia dandan’m be bo. Be ɔli sran ble mɛn nun’n, nin Ɔstrali, nin Abloki, nin Faa Ɛsti, nin Awayi, nin Nuvɛli Zelandi, yɛ Pɔrto Riko. Asa ekun’n, be ɔli Amlɛnkɛn’m be mɛn’n i ngua lɔ nin i afiɛn lɔ lika’m be nun. E nin Lila e trannin aɲia dandan kpanngban be bo. I wie yɛle nga e yoli i Polɔɲin klɔ nga be flɛ i kɛ Vaasovi’n su afuɛ 1989 nun’n. Aniaan nga be fin Risi’n, be nun kpanngban be bali. Kpɛ klikli nga bé trán aɲia dan kun bo’n, yɛle ngalɛ’n. E wunnin aniaan wie mun mɔ Ɲanmiɛn su mɔ be lafi ti’n, be wlali be bisua afuɛ kpanngban Iniɔn Sovietiki lɔ’n.

N niannin aniaan nga be di junman Betɛli’m be nun’n, ɔ nin ngaliɛ difuɛ’m be osu. N wlali be fanngan. Junman sɔ’n i dilɛ’n mannin min aklunjuɛ kpa. Kɛ e ɔli Kore di Sidi’n, e wunnin aniaan 50 mɔ be wlali be bisua Suwɔnun lɔ’n mun. Aniaan sɔ’m be ngba be bu akunndan kpa. Yɛ be kunndɛ wafa nga be kwla yo naan b’a su Zoova kpa’n. Kɛ e wunnin aniaan sɔ mun’n, i sɔ’n wlali e fanngan kpa.—Rɔmfuɛ Mun 1:11, 12.

Afuɛ kpanngban nga be sinnin lɛ’n be nun’n, n wunnin wafa nga Zoova yrɛli i sufuɛ’m be su’n. Kɛ bé yó min batɛmun afuɛ 1943 nun’n, nn jasin bofuɛ’m be ti sran kɔe 100.000. Siɛn’n, sran miliɔn 8 tra su be su Zoova nvle 240 nun. Aniaan nga be dili  Gileadi suklu’n, be junman nga be miannin be ɲin be dili’n i wie ti yɛ jasin bofuɛ’m be wa sɔnnin sɔ-ɔ. E nin be nun kpanngban kpa e dili junman likawlɛ. Kpɛkun, n ukali be nun wie mun maan be kwla dili be junman’n i kpa. I sɔ’n yo min fɛ dan.

I nun nga n ti gbanflɛn kan’n, n fali ajalɛ kɛ ń dí junman ń mán Zoova mlɔnmlɔn. N klɛklɛli fluwa nga be nga be kunndɛ bé kɔ́ Betɛli’n, be klɛklɛ su’n. kpɛkun n fa ɔli. Ajalɛ sɔ’n mɔ n fali’n, ɔ yo min fɛ dan. Blɛ kwlaa sɔ’n nun’n, Zoova yrali min su dan. E klo Betɛli junman nga e di’n kpa. Yɛ e nin Lila nin aniaan kpanngban mɔ be tran Bluklinin’n e dili junman likawlɛ afuɛ lele 50 tra su. Kpɛkun, e trali janvuɛ kaka kpa.

E te di junman Betɛli. Yɛ min yi Lila suan min bo cɛn kwlakwla. Siɛn’n, n le afuɛ 84 tra su. Sanngɛ n di junman cinnjin kpa kun. Yɛle kɛ e nin aniaan wie mun e fa ajalɛ wie mun naan asɔnun’m b’a ɲan be fluwa mun. Yɛ e fa ajalɛ wie mun ekun naan aniaan’m b’a kle sran wie’m be Biblu’n nun like.

Kɛ n o Zoova i anuannzɛ’n nun’n, ɔ yo min fɛ dan. N wun kɛ ndɛ ng’ɔ o Malasi 3:18 nun’n ti su. Ɔ se kɛ: “Amún wún ngbaciɛ ng’ɔ o sran kpa nin sran ng’ɔ bu-man Nyanmiɛn nin i nuan ndɛ’n be like fi’n be afiɛn’n, ɔ nin ngbaciɛ ng’ɔ o sran ng’ɔ su Nyanmiɛn nin sran ng’ɔ su-man Nyanmiɛn’n be afiɛn’n.” E wun kɛ mɛn’n ɔ yo tɛ kɔ i ɲrun titi. Sran’m be leman like kpa kun sa mɔ be kwla fa be wla be gua su-ɔ. Yɛ be diman aklunjuɛ kpa. Sanngɛ, be nga be su Zoova’n, be liɛ’n, kannzɛ lika’n yo kekle be su sɛ’n, be di aklunjuɛ. Kpɛkun be lafi like kpa kun su. Kɛ n bo jasin fɛ’n n kle sran mun, i sɔ’n yo min fɛ dan. (Matie 24:14) Ɔ ka kan’n, Ɲanmiɛn Sielɛ’n, ɔ́ síe asiɛ’n. Yɛ ɔ́ yó maan asiɛ’n káci lika klanman kpa. E kunndɛ kɛ cɛn sɔ’n ju ndɛndɛ. I liɛ’n, sran’m be su tɔman tukpacɛ kun, be klun jɔ́, yɛ bé trán nguan nun tititi.