1, 2. (1) ?Junman benin yɛ ɔ yoli Zezi i cinnjin kpa-ɔ? (2) ?Ngue ti-ɔ? (3) ?E mɔ ‘e nin Ɲanmiɛn e di junman’n,’ é yó sɛ́ naan y’a si junman’n i di kpa?

ZEZI KLIST yoli ajuin difuɛ. I sin’n, ɔ wa boli jasin fɛ’n. (Mark 6:3; Rɔmfuɛ Mun 15:8) Ɔ sili junman nɲɔn sɔ’m be di kpa. I nun m’ɔ ti ajuin difuɛ’n, ɔ suannin ninnge nga be fa sɛ waka’n, be nun junman dilɛ kpa. Kɛ ɔ ɲannin afuɛ 30, w’a yoman ajuin difuɛ kun. Ɔ wa boli jasin fɛ’n i mlɔnmlɔn siɛn’n. Ɲanmiɛn ndɛ m’ɔ si i kpa ti’n, ɔ ukali sran mun naan b’a si ndɛ nanwlɛ’n. (Matie 7:28; Lik 24:32, 45) Zezi wunnin i wlɛ kɛ i yɛ ɔ ti junman’m be nun cinnjin kpafuɛ ng’ɔ fata kɛ ɔ di’n niɔn. I bɔbɔ seli kɛ Ɲanmiɛn Sielɛ’n i ndɛ kanlɛ wie ti yɛ Ɲanmiɛn sunmɛnnin i asiɛ’n su-ɔ. (Matie 20:28; Lik 3:23; 4:43) Ɔ fali jasin fɛ bolɛ’n kacili i junman mlɔnmlɔn. Kpɛkun ɔ ukali sran uflɛ mun naan be kusu be di junman sɔ’n wie.—Matie 9:35-38.

² E nun sunman e timan ajuin difuɛ. Sanngɛ e ngba’n, e bo jasin fɛ’n e kle e wiengu mun. Junman sɔ’n ti cinnjin dan ti’n, Ɲanmiɛn bɔbɔ di wie. Biblu’n se kɛ “e nin Nyanmiɛn yɛ e di junman nin-ɔn.” (1 Korɛntfuɛ Mun 3:9; 2 Korɛntfuɛ Mun 6:4) Jue tofuɛ’n seli kɛ Ɲanmiɛn i ndɛ’n “taka nanwlɛ’n su.” (Jue Mun 119:159, 160) Zoova i ndɛ’n ti nanwlɛ sakpa. I sɔ’n ti’n, e kunndɛ kɛ é yó jasin bofuɛ kun m’ɔ “kan ndɛ nanwlɛ-ɔ ɔ kpɛ-mɛn i wun’n.”  (An kanngan 2 Timote 2:15 nun.) E fluwa’m be nun cinnjin kpafuɛ nga e fa kle sran’m be like naan b’a si Zoova nin Zezi nin Ɲanmiɛn Sielɛ’n, yɛle Biblu’n. I sɔ’n ti’n, e kunndɛ kɛ é sí Biblu’n nun ndɛ’n i nun yiyi kpa. Kɛ ɔ ko yo naan y’a si jasin fɛ’n i bo kpa’n, Zoova i anuannzɛ’n mannin e ninnge wie mun. Ɔ ti cinnjin kɛ e si wafa nga e kwla fa ninnge sɔ mun e uka sran mun kpa’n. Afin ninnge sɔ mun yɛ e fa kle be Biblu’n nun like titi-ɔ.

3. (1) ?Kɛ é bó jasin fɛ’n, ngue yɛ ɔ fata kɛ ɔ yo e cinnjin-ɔn? (2) ?Kɛ nga Sa Nga Be Yoli’n 13:48 fa kan sa’n, wan mun yɛ ɔ fata kɛ e kunndɛ be-ɔ?

³ ?Ngue ti yɛ e se kɛ “ninnge nga e fa kle sran’m be Biblu’n nun like titi’n” mɔ e seman kɛ “ninnge nga e fa bo jasin fɛ’n titi’n niɔn”? Afin kɛ é bó jasin é klé sran mun’n, ndɛ wie mun yɛ e bo be jɔ e kle be-ɔ. Sanngɛ, kɛ é klé sran’m be like’n, e yiyi ndɛ sɔ’m be nun kpa naan be wun i wlɛ. I liɛ’n, be kwla fa ajalɛ. Ɔ ka kan’n, mɛn’n wíe. I sɔ’n ti’n, ɔ fata kɛ e mian e ɲin e bo sran’m be Biblu’n nun like klelɛ bo. Yɛ e kle be like lele naan be si ndɛ nanwlɛ’n naan be kaci Zezi i sɔnnzɔnfuɛ. I sɔ’n kle kɛ, ɔ fata kɛ e tu e klun e kunndɛ “be kwlaa nga be nin nguan m’ɔ leman awieliɛ’n fata’n,” yɛ e uka be naan be bo Zoova i sulɛ bo.—An kanngan Sa Nga Be Yoli’n 13:44-48 nun. * (An nian nzɔliɛ’n i su ndɛ’n.)

4. ?É yó sɛ́ naan y’a wun “be kwlaa nga be nin nguan m’ɔ leman awieliɛ’n fata’n”?

⁴ ?É yó sɛ́ naan y’a wun “be kwlaa nga be nin nguan m’ɔ leman awieliɛ’n fata’n”? Zezi seli i sɔnnzɔnfuɛ klikli’m be kɛ: “Klɔ kwlaa nga an ju su’n, sɛ ɔ ti dan o, sɛ ɔ ti kaan o, an usa sɛ sran kpa wie o lɛ b’ɔ kwla sike amun’n, an sike i wun lɛ.” I sɔ’n kle kɛ ɔ fata kɛ be bo jasin fɛ’n naan b’a wun be kwlaa nga be nin nguan m’ɔ leman awieliɛ’n fata’n. (Matie 10:11) I kunngba’n yɛ ɔ fata kɛ e yo i andɛ-ɔ. Sanngɛ, sɛ sran kun yo e finfin naan ɔ kle kɛ Ɲanmiɛn ndɛ’n timɛn i cinnjin’n, nán maan e se kɛ saan fii e bo jasin fɛ’n e kle i. Be nga be kan be wun ase’n, mɔ be kunndɛ kpa kɛ bé sí Ɲanmiɛn ndɛ’n yɛ e kunndɛ be-ɔ. E kwla fa junman sɔ’n, e sunnzun ajuin junman nga Zezi dili’n. Zezi dun mmua kunndɛ waka kpa kun m’ɔ kwla fa bobo bia annzɛ anuan, annzɛ be kɔmin su waka annzɛ like uflɛ’n. I sin’n, ɔ fɛ i junman dilɛ ninnge mun fa bobo like ng’ɔ kunndɛ kɛ ɔ bobo’n. Andɛ kusu’n, e dun mmua kunndɛ be nga Ɲanmiɛn ndɛ’n lo be kpa’n. I sin’n, e fa ninnge nga e fa kle sran’m be Biblu’n nun like’n e uka be kpa naan be kaci Zezi i sɔnnzɔnfuɛ.—Matie 28:19, 20.

5. ?Ngue like yɛ ɔ fata kɛ e si i ninnge nga e fa kle sran’m be Biblu’n nun like titi’n, be su-ɔ? An fa sunnzun ase be yiyi nun. (An nian foto nga be o kan like suanlɛ’n bo i bo lɛ’n.)

⁵ I nun mɔ Zezi ti ajuin difuɛ’n, maan e bu ninnge ng’ɔ fa be di junman’n, i akunndan kan e nian. * (An nian nzɔliɛ’n i su ndɛ’n.) Ninnge sɔ mun’n, ɔ le kun nin i junman trele kun mɔ be fa di-ɔ. Ɔ fa wie sunnzun waka’n, ɔ fa wie klɛklɛ su annzɛ ɔ fa wie kpɛ. Asa ekun’n, ɔ fa wie kpaci waka’n annzɛ ɔ fa wie bobo nun. I wafa kunngba’n, ninnge nga e fa kle sran’m be Biblu’n nun like titi’n, ɔ le kun nin junman trele kun mɔ e fa di-ɔ. É wá  kán wafa nga e kwla fa ninnge sɔ mun e di junman’n i ndɛ.

6, 7. (1) ?Wafa sɛ yɛ e kwla fa fluwa kpe kan ng’ɔ kan e ɛntɛnɛti adrɛsi’n i ndɛ’n, e di junman-ɔn? (2) ?Ngue ti yɛ e fa sran’m be yialɛ fluwa’n, e yia sran mun e aɲia’m be bo-ɔ?

⁶ Fluwa kpe kan ng’ɔ kan e ɛntɛnɛti adrɛsi’n i ndɛ’n. Ɔ ti kaan sɔ, sanngɛ ɔ kwla uka sran mun naan b’a si e. Asa ekun’n, ɔ fa sran’m be ɲin sie i e ɛntɛnɛti adrɛsi jw.org su trele. Kɛ sran’m be kɔ e ɛntɛnɛti’n adrɛsi su’n, be kwla wun junman nga e di’n, i wlɛ kpa. Kpɛkun, be kwla kunndɛ kɛ e kle be Biblu’n nun like. Sran kɔe 400.000 tra su be klɛli be dunman jw.org su naan e ko kle be Biblu’n nun like. Yɛ cɛn kwlaa’n, sran kɔe ya kpanngban be klɛ be dunman. I sɔ’n ti, lika kwlaa nga é kɔ́’n, maan e fa fluwa kpe kan sɔ’n i wie tra nun. I liɛ’n, e kwla fa man be nga e nin be e yia nun’n.

⁷ Sran’m be yialɛ fluwa’n. Be klɛli fluwa sɔ’n su kɛ: “É wlá ɔ fanngan kɛ a nin Zoova i Lalofuɛ’m be suan Biblu’n nun like [...] e aɲia’m be bo annzɛ sran kun kwla kle wɔ like.” Fluwa sɔ’n kan junman nga e di’n i ndɛ. Kpɛkun, be nga be “si kɛ be di Nyanmiɛn ninnge’m be yalɛ’n,” ɔ wla be fanngan kɛ be suan Biblu’n nun like. (Matie 5:3) Sanngɛ sɛ sran kun suan Biblu’n nun like o, annzɛ ɔ suanman like o, ɔ kwla tran e aɲia’m be bo. Sɛ ɔ ba’n, ɔ́ sí Biblu’n nun ndɛ kpanngban.

8. ?Ngue ti yɛ ɔ ti cinnjin kɛ e yia sran mun titi e aɲia’m be bo-ɔ? An fa sa kun yiyi nun.

⁸ ?Ngue ti yɛ ɔ ti cinnjin kɛ e yia sran mun titi e aɲia’m be bo-ɔ? Afin sɛ be ba’n, bé wún kɛ e timan kɛ Ɲanmiɛn sulɛ wafa’m be nunfuɛ mun sa. Bé síe i nzɔliɛ kɛ e fa ndɛ nanwlɛ m’ɔ o Biblu’n nun’n e kle sran mun, yɛ e uka be naan be si Ɲanmiɛn. (Ezai 65:13) Bian kun nin i yi mɔ be tran Etazinin’n, be sieli i sɔ’n i nzɔliɛ. Be flɛ bian’n kɛ Rei yɛ i yi’n suan Linda. Be lafi Ɲanmiɛn su yɛ be waan bé sí i kpa. I sɔ’n ti’n, be ɔli asɔnun kwlaa nga be o be klɔ’n su’n be nun. Be waan kwlaa naan b’a fa ajalɛ kɛ bé kɔ́ asɔnun trele kun nun’n, ɔ fata kɛ asɔnun sɔ’n yia like nɲɔn be nuan. I klikli’n, ɔ fata kɛ be wun i wlɛ kɛ asɔnun sɔ’n nun lɔ’n, be kle sran’m be like kpa. Kpɛkun i nɲɔn su’n, ɔ fata kɛ asɔnun sɔ’n i nunfuɛ’m be wlawla be wun kpa. Asɔnun nga be o be klɔ’n su’n, be diman be yalɛ. I sɔ’n ti’n, be fali afuɛ kpanngban kpa naan b’a kwla wlanwlan be kwlaa sɔ’m be su. Sanngɛ be kleli be wun yalɛ ngbɛn. Afin, b’a wunman kɛ asɔnun sɔ’m be nun kun kleli be like kpa kun sa. Asa ekun’n, asɔnun sɔ’m be nunfuɛ’m be wlawlaman be wun kpa mlɔnmlɔn. Kɛ be ɔli asɔnun kasiɛn nga be si i’n nun’n, Linda ɔli junman yɛ Rei kusu fali atin naan ɔ́ kɔ́ awlo. Kɛ Rei kɔ́ awlo’n, ɔ wunnin Ɲanmiɛn Sielɛ Sua kun. Kpɛkun, ɔ seli i wun kɛ: ‘Maan n wlu lɔ n ko nian like nga be yo i lɔ’n ke!’ Kɛ ɔ wluli lɔ’n like ng’ɔ wunnin i’n, ɔ nin a wunmɛn i asɔnun wafawafa nga be wlanwlannin be su’n, be nun le. Be kwlaa nga be o Ɲanmiɛn Sielɛ Sua’n nun lɔ’n, be wun yoli i fɛ. Kpɛkun, be wlawlali be wun klanman kpa. Rei ko trannin ase be ɲrun lɔ yɛ like nga be kleli i lɔ’n, ɔ yoli i fɛ dan. Rei i su ndɛ’n ti’n, e wla kpɛn ndɛ kun mɔ akoto Pɔlu kannin’n su. Pɔlu kannin kɛ kpɛ klikli nga sran kun tran aɲia kun bo’n, wafa nga i wun fa yo i ti’n, ɔ se kɛ: “Nyanmiɛn wo amun afiɛn sakpa.” (1 Korɛntfuɛ Mun 14:23-25) Kɛ ɔ fin lɛ’n, Mɔnnɛn cɛn kwlaa Rei kɔ aɲia’m be bo. I sin’n, ɔ trannin aɲia nga e yo be lemɔcuɛ afiɛn nun’n, be bo wie. Linda wa ɔli aɲia’m be bo wie. Be wa suannin Biblu’n nun like, kpɛkun be yoli be batɛmun. Kɛ ɔ́ yó sɔ’n, nn be le afuɛ 70 tra su.

9, 10. (1) ?Ngue ti yɛ e fluwa nɲa’m be nun junman dilɛ ti pɔpɔ-ɔ? (2) Amun kan wafa nga e kwla fa fluwa nɲa ?Ngue yɛle Ɲanmiɛn Sielɛ’n? e bo jasin fɛ’n i ndɛ.

⁹ Fluwa nɲa mun. Fluwa nɲa fanunfanun nga e le be’n, be ti mɔcuɛ. Kɛ é fá be é bó jasin fɛ’n, e wun kpaja e kpa. Yɛ be uka e naan e nin sran mun y’a bo yalɛ kokolɛ bo. E boli fluwa nɲa sɔ’m be yilɛ bo afuɛ 2013 nun. Yɛ lele nin andɛ’n, y’a yi miliar kɔe nnun. Be kwlaa be wafa’n ti kun. Ɔ maan, sɛ e si wafa nga e kwla fa kun e bo jasin fɛ’n, é sí be onga’m be nun junman di. ?Wafa sɛ yɛ e kwla fa be e bo yalɛ kokolɛ bo-ɔ?

¹⁰ Be flɛ e fluwa nɲa kun kɛ ?Ngue yɛle Ɲanmiɛn Sielɛ’n? Sɛ e kunndɛ kɛ é fá bó jasin fɛ’n, maan e fa kle sran’n, kpɛkun e usɛ i kɛ: “?W’a usa ɔ wun le kɛ ngue yɛle Ɲanmiɛn Sielɛ’n? ?A bu i kɛ ...?” I sin’n, maan ɔ kle kosan sɔ’n i su tɛlɛ wafa nsan’m be nun kun ng’ɔ ti i liɛ su’n. Sɛ i su tɛlɛ ng’ɔ kleli’n ti su o, annzɛ ɔ timan su o, maan e tike fluwa nɲa’n su. Kpɛkun, e fɛ i ɲin sie i lika nga be klɛli lɛ kɛ “ndɛ nga Biblu’n kan’n” i su. Maan e kanngan Daniɛl 2:44 nin Ezai 9:5 be nun ndɛ mɔ be klɛli be lɛ’n, be nun. Be klɛli fluwa’n i sin lɔ kɛ “bu kosan nga su akunndan: ?Kɛ Ɲanmiɛn Sielɛ’n i su famiɛn’n wá síe mɛn’n, lika’n wá yó sɛ?” Kwlaa naan e nin sran’n y’a titi nun’n, maan e fa kosan sɔ’n e usɛ i. I liɛ’n, e kwla koko su yalɛ cɛn uflɛ. Kɛ e kɔ sran’n i osu nianlɛ’n, e kwla fɛ i ɲin sie i fluwa Jasin fɛ kpa kun fin Ɲanmiɛn! i ndɛ tre nso’n su. Fluwa sɔ’n yɛ e fa bo sran’m be Biblu’n nun like klelɛ bo-ɔ.

11. (1) ?Ndɛ benin mun yɛ be o e periodiki’m be nun-ɔn? (2) ?Ngue yɛ ɔ fata kɛ e bɔbɔ e si-ɔ?

¹¹ Periodiki mun. Be yɛle Sasafuɛ Tranwlɛ’n nin An Tinnge! E yi be kpanngban tra e fluwa onga mun. Asa ekun’n, be o aniɛn kpanngban nun tra e fluwa onga mun. Be nga be kanngan e periodiki’m be nun’n, be tran nvle kpanngban nun. I sɔ’n ti’n, ndɛ nga be ti sran wafawafa kwlaa be cinnjin’n, yɛ be o fluwa sɔ’m be nun-ɔn. Maan e fa fluwa sɔ mun e uka sran mun naan be wun like ng’ɔ ti cinnjin kpa man e andɛ’n i wlɛ. Kɛ ɔ ko yo naan y’a kwla yo sɔ’n, ɔ fata kɛ e bɔbɔ e si like nga ti yɛ be yili fluwa sɔ mun’n.

12. (1) ?Wan’m be ti yɛ be yili fluwa An Tinnge! niɔn? (2) ?Wafa sɛ yɛ ɔ kwla yo sran’m be ye-ɔ? (3) Koko nun wa’n, kɛ an fali fluwa sɔ’n dili junman’n, sɛ i su ndɛ fɛ wie o lɛ’n, an kan.

¹² An Tinnge! Ɔ ti be nga be si Biblu’n nun ndɛ’n i kan ɔ nin be nga be simɛn i mlɔnmlɔn’n be liɛ. Sran sɔ’m be nun wie’m be siman ndɛ nga Klistfuɛ’m be lafi su’n, be nun wie fi. Wie mun ekun be lafiman su kɛ Ɲanmiɛn sulɛ wafa’m be nun kun sa ti kpa. Yɛ wie’m be wunmɛn i wlɛ kɛ Biblu’n nun ndɛ’n kwla yo be ye. Kɛ ɔ ko yo naan sran wafawafa sɔ’m b’a lafi su kɛ Ɲanmiɛn o lɛ sakpa’n, i ti yɛ e yili fluwa An tinnge! niɔn. (Rɔmfuɛ Mun 1:20; Ebre Mun 11:6) Asa ekun’n, fluwa sɔ’n kwla uka be naan b’a lafi su kɛ Biblu’n ti “Nyanmiɛn ndɛ sakpa.” (1 Tɛsalonikfuɛ Mun 2:13) Afuɛ 2018 nun’n, An tinnge! nsan nga be fiteli’n be fali e ɲin sieli i ndɛ nga’m be su: “Like nga é yó naan e klun w’a jɔ’n,” nin “Afɔtuɛ 12 mɔ be kwla yo awlobo’m be ye’n,” yɛ “Like ng’ɔ kwla uka be nga be sran w’a wu’n.”

13. (1) ?Wan’m be ti yɛ be yili fluwa Sasafuɛ Tranwlɛ’n nga e fa bo jasin fɛ’n niɔn? (2) Koko nun wa’n, kɛ an fali fluwa sɔ’n dili junman’n, sɛ i su ndɛ fɛ wie o lɛ’n, an kan.

¹³ Sasafuɛ Tranwlɛ’n nga e fa bo jasin fɛ’n, ɔ ti be nga be ɲin yi Ɲanmiɛn mɔ Biblu’n ti be cinnjin’n be liɛ. Ɔ yiyi Biblu’n nun ndɛ’n nun weinwein kle be. Atrɛkpa’n, sran sɔ’m be si Biblu’n nun ndɛ’n i kan. Sanngɛ be  wunman like nga Biblu’n kle i sakpasakpa’n i wlɛ kpa. (Rɔmfuɛ Mun 10:2; 1 Timote 2:3, 4) Afuɛ 2018 nun’n, Sasafuɛ Tranwlɛ’n nsan nga be fiteli’n be fali e ɲin sieli i ndɛ nga’m be su: “?Biblu’n kwla yo e ye andɛ?,” “?Cɛn wie lele’n, e liɛ’n yó sɛ?” yɛ “?Ɔ ndɛ lo Ɲanmiɛn?”

14. (1) ?Video nnan benin mun yɛ e fa kle sran’m be like-ɔ? (2) Kɛ an fali video sɔ mun dili junman’n, sɛ i su ndɛ fɛ wie o lɛ’n, an kan.

¹⁴ Video mun. Andɛ’n, ninnge nga ajuin difuɛ’m be fa di junman’n, be nun wie’m be nanti kolan su. I sɔ’n ti’n, be fɛman kɛ Zezi blɛ su ajuin difuɛ’m be sa. Andɛ’n kusu’n, kɛ é bó jasin fɛ’n, e fa fluwa nga e yi be mun e man sran mun. Kpɛkun e bo e video mun e kle be wie. E fa video sɔ’m be nun nnan e fa kle sran’m be like. Be yɛle: ?Ngue ti yɛ Biblu’n nun like suanlɛ’n ti cinnjin ɔn? nin ?Wafa sɛ yɛ e kle sran’m be Biblu’n nun like ɔ? nin ?Ngue yɛ be yo i Ɲanmiɛn Sielɛ Sua’n nun lɔ ɔ? yɛ Zoova i Lalofuɛ mun: ?Wan mun yɛle e? Video sɔ’m be nun wie’m be diman miniti nɲɔn. E kwla bo be kpɛ klikli nga e to sran’n. Video nga be cɛ kan’n, be liɛ’n kɛ e kɔ sran’m be osu nianlɛ’n annzɛ kɛ sran kun le blɛ’n, yɛ e kwla bo-ɔ. Video sɔ’m be ti kpa dan. Afin be wla sran’m be fanngan kɛ be suan Biblu’n nun like, yɛ be bla e aɲia’m be bo.

15. ?Kɛ sran kun nian e video mun i klɔ aniɛn nun’n, i su ye benin yɛ ɔ kwla ɲɛn i-ɔ? An fa sa wie mun yiyi nun.

¹⁵ Bla kun fin Miklonezi. Aniɛn ng’ɔ ti i kpa’n yɛle Yapɛzi’n. Kɛ aniaan bla kun toli i’n, ɔ boli video ?Ngue ti yɛ Biblu’n nun like suanlɛ’n ti cinnjin ɔn? Yapɛzi nun kleli i. Kɛ video’n boli i bo cɛ’n, bla’n seli kɛ: “Yoo, min aniɛn nga n kan’n niɔn. Ɔ bo min nuan o! N kwla se kɛ sran ng’ɔ ijɔ’n, ɔ fin e asa liɛ’n su lɔ. Min aniɛn’n yɛ ɔ kan-ɔn.” I sin’n, ɔ seli kɛ ɔ́ kɔ́ e ɛntɛnɛti adrɛsi jw.org su kó kánngan e fluwa’m be nun, yɛ ɔ́ nían e video mun i klɔ aniɛn’n nun. (An nian Sa Nga Be Yoli’n 2:8, 11.) Aniaan bla kun tran Etazinin. Kpɛkun i niaan bian kun i wa’n tran nvle uflɛ nun. Aniaan bla sɔ’n fali video kunngba’n be aniɛn’n nun ko mɛnnin i niaan bian wa sɔ’n ɛntɛnɛti su. Kɛ bian’n niannin video’n, ɔ klɛli ndɛ blɛli aniaan bla’n i ɛntɛnɛti adrɛsi’n su. Ɔ seli i kɛ: “Ndɛ ng’ɔ wluwluli min wun kpa’n, yɛle ng’ɔ se kɛ klunwifuɛ kun yɛ ɔ sie mɛn’n. I sɔ’n ti’n, min ja nun lɛ’n, n klɛli min dunman naan be kle min Biblu’n nun like.” Like ng’ɔ yo ɲɛnmɛn’n, yɛle kɛ aniaan bla’n i niaan bian wa sɔ’n tran nvle kun mɔ b’a tannin Zoova i Lalofuɛ’m be jasin fɛ bolɛ lɔ’n, i nun.

16. ?Ngue ti yɛ be yili fluwa nga mun-ɔn? (1) Amun tie Ɲanmiɛn ndɛ’n naan amun a ɲan nguan tititi, (2) Jasin fɛ kpa kun fin Ɲanmiɛn!, (3) ?Wan mun yɛ be yo Zoova i klun sa’n andɛ ɔ?

¹⁶ Fluwa pɛplɛɛplɛ mun. Be nun kun yɛle fluwa Amun tie Ɲanmiɛn ndɛ’n naan amun a ɲan nguan tititi. * (An nian nzɔliɛ’n i su ndɛ’n.) Kɛ ɔ ko yo naan y’a kle be nga be siman kanngan kpa’n, ɔ nin be nga be leman e fluwa’m be wie fi be klɔ aniɛn nun’n, be ndɛ nanwlɛ’n, i ti yɛ e yili fluwa sɔ’n niɔn. Be flɛ kun ekun kɛ Jasin fɛ kpa kun fin Ɲanmiɛn! E kwla fa bo sran’m be Biblu’n nun like klelɛ bo. Kɛ e to sran kun’n, e kwla fa like suanlɛ 14 nga be o fluwa’n i sin bui su’n, e kle i. I sin’n, e se i kɛ ɔ kle ng’ɔ ti i cinnjin’n. Kpɛkun, maan e bo i like klelɛ bo like suanlɛ sɔ’n su. ?Kɛ a kɔ sran’m be osu nianlɛ’n, i sɔ yɛ a yo-ɔ? E fluwa pɛplɛɛplɛ’m be nsan su’n yɛle  ?Wan mun yɛ be yo Zoova i klun sa’n andɛ ɔ? Fluwa sɔ’n kwla uka Biblu’n nun like suanfuɛ mun naan b’a wun junman nga e anuannzɛ’n di’n i wlɛ. Kɛ ɔ ko yo naan y’a si wafa nga e kwla fa fluwa sɔ mun e kle sran’m be like’n, maan e nian afuɛ 2017, Marsi nun Klistfuɛ mun nin be junman’n aɲia fluwa’n nun.

17. (1) ?Ngue ti yɛ be yili fluwa nga e fa kle sran’m be like’n mun-ɔn? (2) ?Sɛ be yo sran kun i batɛmun bɔbɔ’n, ngue yɛ ɔ fata kɛ ɔ yo-ɔ? (3) ?Ngue ti-ɔ?

¹⁷ E fluwa mun. Sɛ e bo sran kun i like klelɛ bo fluwa pɛplɛɛplɛ’m be nun kun nun’n, nán e se kɛ é mínndɛ lele naan y’a kle i like fluwa ?Ngue like yɛ Biblu’n kle i sakpasakpa ɔ? nun. Fluwa sɔ’n kwla uka sran’n naan w’a si Biblu’n nun ndɛ cinnjin mun. Sɛ sran’n wie fluwa sɔ’n i nun like suan’n naan e wun kɛ ɔ kɔ i ɲrun Ɲanmiɛn sulɛ nun’n, e kwla fa fluwa ‘Maan e yo sa nga e yo ɔ e si kɛ Ɲanmiɛn klo e’n’ e kle i like. Fluwa sɔ’n kwla uka Biblu’n nun like suanfuɛ’n naan w’a wun wafa ng’ɔ kwla nanti Biblu’n nun mmla’m be su tititi’n. Sɛ be yo sran kun i batɛmun bɔbɔ’n, ɔ fata kɛ ɔ wie fluwa nɲɔn sɔ’m be nun like suan. I sɔ’n úkɛ i naan w’a lafi Zoova su tankaan kpa naan w’a su i titi.—An kanngan Kolɔsfuɛ Mun 2:6, 7 nun.

18. (1) ?E mɔ e kle sran’m be ndɛ nanwlɛ’n, ngue yɛ 1 Timote 4:16 wla e fanngan kɛ e yo-ɔ? (2) ?Kɛ e yo sɔ’n, wafa sɛ yɛ i bo’n gua-ɔ? (3) ?Ngue ti yɛ e fa ninnge nga e fa kle sran’m be Biblu’n nun like titi’n e bo jasin fɛ’n niɔn?

¹⁸ E mɔ e su Zoova’n, ɔ fata kɛ e bo “jasin fɛ’n b’ɔ ti nanwlɛ’n” e kle sran mun naan b’a kwla ɲan nguan m’ɔ leman awieliɛ’n. (Kolɔsfuɛ Mun 1:5; an kanngan 1 Timote 4:16 nun.) Kɛ ɔ ko yo naan y’a kwla yo sɔ’n, anuannzɛ’n yili ninnge wie mun naan e fa kle sran’m be Biblu’n nun like. (An nian kuku nga be flɛ i kɛ “ Ninnge nga e fa kle sran’m be Biblu’n nun like titi’n” i nun.) Maan e mian e ɲin e fa ninnge sɔ mun e di junman. Blɛ nga jasin bofuɛ kun fá ninnge sɔ’m be nun kun dí junman’n, ɔ o i bɔbɔ sa nun. Sanngɛ nán sran’m be fluwa cɛcɛlɛ ti yɛ e kɔ be wun wunlɛ-ɔ. Be nga Ɲanmiɛn ndɛ’n timan be cinnjin’n, nán e man be fluwa. Nán e wla fi i sɔ’n liɛ’n su. E kunndɛ kɛ é úka be nga be kan be wun ase’n, mɔ be kunndɛ kɛ bé sí Ɲanmiɛn sakpa’n, mɔ be nin “nguan m’ɔ leman awieliɛ’n fata’n,” naan be kaci Zezi i sɔnnzɔnfuɛ.—Sa Nga Be Yoli’n 13:48, NW; Matie 28:19, 20.