BE FLƐ aniaan bla kun kɛ Diana. Ɔ le afuɛ 80 tra su. Sa sunman be tɔli i su. I wun ɲannin tukpacɛ nga be flɛ i kɛ azaimɛɛ’n, be fɛ i ɔli dɔɔtrɔ kun nun, kpɛkun ɔ wuli. Asa ekun’n, Diana i wa yasua nɲɔn be wuli. Yɛ i bɔbɔ le kansɛli. Sanngɛ, kɛ Diana kɔ aɲia’m be bo’n, annzɛ ɔ bo jasin fɛ’n, aniaan’m be sie i nzɔliɛ kɛ i klun ti jɔwa titi.

Be flɛ akpasua sunianfuɛ kun kɛ Jɔnun. Ɔ klo i junman’n kpa. Ɔ dili junman sɔ’n lele afuɛ 43 tra su. Yɛ ɔ kunndɛman kɛ ɔ́ dí junman uflɛ. Sanngɛ, i osufuɛ kun m’ɔ kwlaman nun’n i lika nianlɛ ti’n, ɔ jrɛnnin i junman’n. Kɛ aniaan nga be si Jɔnun be wun i aɲia dandan’m be bo’n, be wun kɛ w’a kaciman. I klun ti jɔwa titi.

?Ngue yɛ ɔ uka Diana nin Jɔnun naan be klun w’a jɔ titi-ɔ? ?Wafa sɛ yɛ sran kun mɔ afɛ o i su’n, i klun kwla jɔ-ɔ? ?Sɛ ɔ fata kɛ sran kun jrɛn i junman m’ɔ klo i dilɛ’n, ɔ́ yó sɛ naan i klun w’a jɔ? Biblu’n tɛ kosan sɔ’m be su. Ɔ se kɛ: “Maan be nga Anannganman bu be sran kpa’n be klun jɔ i ti.” (Jue Mun 64:11) Sɛ e si like ng’ɔ kwla man e aklunjuɛ tititi’n, ɔ nin like ng’ɔ kwlá manman e aklunjuɛ sɔ’n, é wún Biblu’n nun ndɛ sɔ’n i wlɛ.

Titi’n, kɛ é yó ninnge wie mun’n, e di aklunjuɛ. I wie yɛle bla nin bian jalɛ’n, ba wulɛ’n, annzɛ junman mɔ be man e Zoova i anuannzɛ’n nun’n. Ninnge kwlaa sɔ’m be fin Zoova. I sɔ’n ti, e di be su aklunjuɛ. Zoova yɛ maan e ja bian annzɛ bla-ɔ. I yɛ maan e wu ba-ɔ. Yɛ i yɛ maan be man e junman asɔnun’n nun-ɔn.—Bo Bolɛ 2:18, 22; Jue Mun 127:3; 1 Timote 3:1.

Ninnge wie’m be man aklunjuɛ sɔ. Sanngɛ, aklunjuɛ sɔ’n ti le nɲɔn kun like. Wie liɛ’n, e wun annzɛ e yi’n kwla kunndɛ bla annzɛ bian e bo, annzɛ ɔ kwla wu. (Ezekiɛl 24:18; Oze 3:1) Ba nga e wu be’n, be kwla yo ɲin kekle e su annzɛ Ɲanmiɛn su. Yɛ be kwla tu be asɔnun’n nun. Biblu’n kle kɛ Samiɛli i wa yasua’m b’a suman Zoova kɛ ɔ nin i fata’n sa. Davidi kunndɛli Bat-seba m’ɔ ti sran uflɛ yi’n. I sɔ’n ti, ɔ wunnin i ɲrun dan.  (1 Samiɛl 8:1-3; 2 Samiɛl 12:11) Kɛ i sɔ sa’m be ju’n, e klun kwlá jɔman. Afɛ’n nin awlabɔɛ’n ngunmin yɛ be o e su-ɔ.

Wie liɛ kusu’n, tukpacɛ wie ti’n, annzɛ e osufuɛ wie i lika nianlɛ ti’n, annzɛ ajalɛ wie mɔ anuannzɛ’n w’a fa be’n ti’n, ɔ fata kɛ e jran Ɲanmiɛn junman nga e di’n. Aniaan nga be jrannin be junman sɔ’n, be seli kɛ aklunjuɛ nga be di i laa’n, be kwlá dimɛn i sɔ kun.

Ninnge sɔ’m be su aklunjuɛ nga e di’n, be ti le nɲɔn kun like. Sanngɛ, ninnge wie’m be o lɛ mɔ kannzɛ kekle tɔ e su’n, be kwla man e aklunjuɛ titi-ɔ. Afin, kɛ kekle tɔli Samiɛli, nin Davidi, nin Ɲanmiɛn i sufuɛ wie mun ekun be su’n, be klun jɔli tititi.

Kɛ be se kɛ sran kun i klun jɔ’n yɛle Zezi liɛ’n. Biblu’n se kɛ kwlaa naan Zezi w’a ba asiɛ’n su’n, “i klun jɔ [Zoova] i ɲrun lɛ cɛn kwlaa.” (Nyanndra Mun 8:30, NW) Kɛ ɔ bali asiɛ’n su’n, sa kekle wie’m be tɔli i su. Sanngɛ i Si i klun sa yolɛ ti’n, i klun jɔli. (Zan 4:34) ?Yɛ kɛ bé kún i nin? Biblu’n se kɛ: “Aklunjuɛ mɔ be fa sieli i ɲrun’n ti’n, kɛ be fɛ i sieli ɲrɛnnɛn waka’n su’n, ɔ trɛli i awlɛn.” (Ebre Mun 12:2) Maan e fa e ɲin e sie i aklunjuɛ kpafuɛ’n i su ndɛ nɲɔn mɔ Zezi kannin’n su.

Cɛn kun’n, kɛ Zezi i sɔnnzɔnfuɛ 70 be ko boli jasin fɛ’n lele mɔ be sali be sin’n, be kannin ninnge nga be yoli be’n i ndɛ kleli i. Be yoli ninnge sunman, yɛ be fuannin mmusu mun. I sɔ’n ti, be klun jɔli dan. Sanngɛ Zezi seli be kɛ: “Nán amun di aklunjuɛ mmusu mɔ amun kwla be’n ti. Sanngɛ amun di aklunjuɛ, afin b’a klɛ amun dunman ɲanmiɛn su lɔ.” (Liki 10:1-9, 17, 20) Nanwlɛ, kɛ Zoova i klun jɔ e wun’n, i sɔ liɛ’n leman wunsu. Yɛ i sɔ’n man e aklunjuɛ dan tra junman kwlaa nga be kwla man e anuannzɛ’n nun’n.

Cɛn kun ekun’n, kɛ Zezi klé sran kpanngban be like’n, Zuifu bla kun seli i kɛ: “Bla nga a ti i ku sɛ nun ba’n, ɔ nin ɲɔnflɛn nga a nɔnnin’n, be liɛ su ti ye.” Afin, Zezi i ndɛ’n wluwluli i wun dan. Sanngɛ, Zezi tɛli i su kɛ: “Cɛcɛ! Se kɛ be nga be ti Ɲanmiɛn ndɛ’n mɔ be fa su’n, be liɛ su ti ye!” (Liki 11:27, 28)  E mma’m be ayeliɛ kpa’n ti’n, e klun kwla jɔ. Sanngɛ, like ng’ɔ kwla yo naan e klun w’a jɔ tititi’n, yɛle kɛ maan e ɲin yi Zoova, yɛ maan e nin i e afiɛn mantan kpa.

Kɛ e si kɛ Zoova i klun jɔ e wun’n, ɔ yo e fɛ dan. Ɔ maan, kannzɛ sa kekle o e su’n, sanngɛ e klun jɔ. Aklunjuɛ sɔ mɔ e di’n, ɔ wieman le. Nanwlɛ, kɛ blɛ kekle nun e nin Zoova e nanti klanman’n, e klun jɔ dan. (Rɔmunfuɛ Mun 5:3-5) Asa ekun’n, Zoova fɛ i wawɛ’n man be nga be lafi i su’n. I sɔ’n ti’n, be klun jɔ. Afin, nzuɛn nga Ɲanmiɛn wawɛ’n yo maan klɔ sran yi i nglo’n, i kun yɛle aklunjuɛ dilɛ. (Galasifuɛ Mun 5:22) Kɛ e bu i sɔ liɛ’n i akunndan’n, e wun ndɛ ng’ɔ o Jue Mun 64:11 nun’n, i wlɛ. Ɔ se kɛ: “Maan be nga Anannganman bu be sran kpa’n be klun jɔ i ti.”

I sɔ’n ti, e wun sa nga ti yɛ Diana nin Jɔnun be klun ti jɔwa titi kusu nn kekle o be su’n, i wlɛ. Diana seli kɛ: “N taloli Zoova kɛ bakan kun fa talo i si’n annzɛ i nin’n sa.” Ɔ seli ekun kɛ: “N si kɛ Zoova yrali min su. Yɛle kɛ, n kwla bo jasin fɛ’n i titi. Yɛ kɛ ń yó sɔ’n, srilɛ o min nuan.” ?Yɛ Jɔnun li? ?Kɛ ɔ jrɛnnin i junman’n, ngue yɛ ɔ ukɛli i naan i klun w’a jɔ titi, naan w’a tu i klun w’a bo jasin fɛ’n niɔn? I waan: “Kɛ ɔ fɛ i afuɛ 1998 nun’n, anuannzɛ’n fali min naan n kle like i suklu kun nun (École de formation ministérielle). I sɔ’n ti, n fali blɛ kpanngban n suannin like kpa trali laa’n.” Jɔnun seli kɛ, kɛ ɔ nin i yi be jrannin be junman’n, w’a yoman kekle be sa nun. Afin, be fuali kɛ bé dí junman kwlaa nga Zoova fá mán be’n. I waan: “W’a yoman e nsisɔ.”

Aniaan kpanngban be wunnin kɛ ndɛ ng’ɔ o Jue Mun 64:11 nun’n, ɔ ti nanwlɛ. I wie yɛle aniaan bian kun nin i yi be liɛ’n. Be dili junman Etazinin lɔ Betɛli’n nun afuɛ lele 30 tra su. I sin’n, be seli be kɛ be yo Ngunmin atin bofuɛ. Aniaan sɔ’n nin i yi be waan: “Kɛ a klo like kun mɔ like sɔ’n fi ɔ sa’n, ɔ yo ya. Sanngɛ, ɔ fataman kɛ ɔ yo ɔ ya sa trilili.” Kɛ be ɔli be junman uflɛ’n su lɔ’n, b’a sisiman be bo, be nin aniaan nga be o lɔ’n, be boli jasin fɛ’n. Be waan: “Kɛ é srɛ́ Ɲanmiɛn’n, e kan ninnge trele wie’m be ndɛ. Yɛ kɛ e wun kɛ Ɲanmiɛn tɛ e srɛlɛ’n su’n, i sɔ’n wla e fanngan, yɛ e klun jɔ. Kɛ e juli lɔ cɛ’n, aniaan wie’m be yoli atin bofuɛ. Yɛ be nga e kle be Biblu’n nun like’n, be nun nɲɔn be kɔ be ɲrun kpa.”

Kɛ ɔ yo naan e klun jɔ titi’n, ɔ timan pɔpɔ. Afin ɔ jue wie’n, e kwla koko. Sanngɛ ndɛ nga Zoova kannin m’ɔ o Jue Mun 64:11 nun’n, ɔ gua e awlɛn su nzue dan. Kannzɛ e sa sin bubu e’n, e kwla lafi su kɛ sɛ e nin Zoova e nanti klanman titi’n, ‘e klun jɔ́.’ Asa ekun’n, Zoova seli kɛ ɔ́ wá yí “nyanmiɛn ng’ɔ la nglo lɔ plaii’n, nin asiɛ’n be uflɛ.” Maan e ɲin tran blɛ mɔ ndɛ sɔ’n wá kpɛ́n su’n, i su. Blɛ sɔ nun’n, fɔ su tranman sran’m be nun kun. Be ‘klun jɔ́, yɛ be wun blíblí be cɛn kwlakwla’ like nga Zoova wá yó be’n, be ti.—Ezai 65:17, 18.

I sɔ’n kle kɛ e su tɔman tukpacɛ kun. Cɛn kwlaa, kɛ é jáso nglɛmun’n, e wun kpája e dan. Ninnge kwlaa nga ti yɛ dɔ nga su e klun jɔman’n, be su tranman lɛ kun. Zoova seli kɛ “be su bo-man laa sa’m be su be di-man jɔlɛ kun. Be su bu-man be akunndan kun.” E sran nga be wuli’n, bé cɛ́n nguan yɛ é sɔ́ be nun. Yɛ e wun yó e kɛ talua kaan kun m’ɔ le afuɛ 12 i si nin i nin be liɛ’n sa. Kɛ talua sɔ’n wuli’n, Zezi cɛnnin i. Kɛ i si nin i nin be wunnin i sɔ’n, “ɔ boli be nuan dan.” (Marki 5:42) Asa ekun’n, blɛ sɔ nun’n, sran’m be kwlaa bé yó sa i nuan su, yɛ Zoova maan be klun jɔ́ tititi.