1, 2. ?Ngue ti yɛ ɔ ti cinnjin kɛ e fa ndɛ nga Zoova kan’n su titi-ɔ? (An nian foto ng’ɔ o kan like suanlɛ’n bo i bo lɛ’n.)

GBANFLƐN NIN TALUA mun, sran’m be man amun afɔtuɛ kpanngban. Amun like klefuɛ’m be kwla se amun kɛ sɛ amun di suklu ju mmua kpa’n, annzɛ amun fa junman wie’m be dilɛ cici amun ti’n, amún ɲán sika kpa. Sanngɛ, afɔtuɛ nga Zoova man amun’n, ɔ nin sran’m be liɛ’n timan kun. Zoova klo kɛ amun mian amun ɲin di junman kpa suklu lɔ naan cɛn wie lele’n, amun a ɲan sika kan amun a fa ti amun wun ɲanman nun. (Kolɔsufuɛ Mun 3:23) Sanngɛ, ɔ si kɛ dɔ nga su mɔ amun te yo gbanflɛn annzɛ talua’n, amun fa ajalɛ wie mun. Yɛ ajalɛ sɔ’m be ti’n, cɛn wie lele’n, amun liɛ kwla yo ye annzɛ amun kwla wun amun ɲrun. I sɔ’n ti’n, ɔ kle amun ngwlɛlɛ, naan ninnge nga amun yo be mɛn’n i awieliɛ blɛ nga nun’n, be jɔ i klun.—Matie 24:14.

² Zoova si sa’n kwlaa. Ɔ si sa nga be su wa ju’n, ɔ nin cɛn nin dɔ trele nga i su yɛ mɛn’n wíe’n. (Ezai 46:10; Matie 24: 3, 36) Asa ekun’n, Zoova si amun. Like ng’ɔ fata kɛ amun yo naan amun klun w’a jɔ’n, ɔ nin like nga sɛ amun yo’n amún wún amun ɲrun’n, ɔ si i kwlaa. Amun kwla bu i kɛ afɔtuɛ nga sran’m be man’n, ɔ ti kpa. Sanngɛ sɛ afɔtuɛ sɔ’m be takaman Ɲanmiɛn Ndɛ’n su naan amun fa su’n, nn amun a faman ajalɛ kpa.—Nyanndra Mun 19:21.

3, 4. ?Kɛ Adan nin Ɛvu be fali Satan i afɔtuɛ’n su’n, wafa sɛ yɛ i bo guali-ɔ?

³ Satan yɛ ɔ boli afɔtuɛ tɛtɛ’m be manlɛ bo-ɔ. Ɔ seli Ɛvu kɛ sɛ ɔ nin Adan be fa be bɔbɔ be tiaun ajalɛ’n, bé dí aklunjuɛ. (Bo Bolɛ 3:1-6) Sanngɛ, Satan i bɔbɔ i wun akunndan yɛ ɔ buli-ɔ. Ɔ kunndɛ kɛ Adan nin Ɛvu nin ba nga bé wá wú be’n, be yaci Zoova lɛ naan be su i bɔbɔ. Kusu nn w’a yoman like fi w’a manman be. Like kwlaa nga be le i’n, Zoova yɛ ɔ mannin be-ɔ. Zoova dili fie klanman kpa kun mannin be. Asa ekun’n, kɛ ɔ́ yí be’n, fɔ nunman be nun. Ɔ maan be kwla ka nguan nun tititi.

⁴ Sanngɛ, Adan nin Ɛvu be ɲin w’a yiman Ɲanmiɛn m’ɔ mannin be nguan’n. I sɔ’n ti, be afiɛn sacili. Yɛ awieliɛ wieli be tɛ. Yɛle kɛ, be yoli oke, kpɛkun be wuli. Ba nga be wuli be’n, be wunnin be ɲrun wie. Yɛ andɛ nin andɛ e ngba e o ɲrɛnnɛn’n nun. (Rɔmunfuɛ Mun 5:12) Andɛ’n, sran sunman be buman Ɲanmiɛn nuan ndɛ’n i like fi. Like nga be klo kɛ bé yó’n, yɛ be yo-ɔ. (Efɛzifuɛ Mun 2:1-3) Biblu’n kle kɛ be nga be yo ɲin kekle Ɲanmiɛn su’n, be siman “ngwlɛlɛ.”—Nyanndra Mun 21:30.

5. (1) ?Ngue yɛ Ɲanmiɛn lafili su kɛ sran wie’m bé yó-ɔ? (2) ?Yɛ i ɲin guali ase?

⁵ Zoova lafili su kɛ sran wie’m bé wá kúnndɛ kɛ bé sí i naan bé sú i. Ɔ si kɛ gbanflɛn nin talua kpanngban bé yó sɔ wie. (Jue Mun 103:17, 18; 110:3) Gbanflɛn nin talua sɔ’m be ndɛ lo Zoova dan. Sɛ a o be nun wie’n, e kwla se kɛ Ɲanmiɛn maan “ninnge kpakpa’m be” ti sin yia ɔ. Yɛ i sɔ’n yo maan ɔ klun jɔ. (An kanngan Jue Mun 103:5 nun; Nyanndra Mun 10:22) Like suanlɛ nga nun’n, é wá kán ninnge kpakpa sɔ’m be nun nnan be ndɛ. Be yɛle ninnge nga Ɲanmiɛn man e naan y’a kwla si i’n, nin janvuɛ kpa nga amun kwla ɲan be’n, nin ninnge kpakpa nga amun kwla fa sie amun ɲrun kɛ amún yo be’n, ɔ nin alaje mɔ amun di’n.

6. (1) ?Ngue ti yɛ ɔ ti cinnjin kɛ e fa e wun mantan Ɲanmiɛn-ɔn? (2) ?Ngue yɛ Zoova man e naan y’a kwla fa e wun y’a mɛntɛn i-ɔ?

⁶ Nnɛn’m be kwlá siman Ɲanmiɛn m’ɔ yili be’n, naan se kɛ bé fá be wun mɛ́ntɛn i. Sanngɛ e liɛ’n, e kwla yo sɔ. (Matie 4:4) Kɛ e fa ndɛ nga Ɲanmiɛn kan’n su’n, e yo akunndanfuɛ, e si ngwlɛlɛ, yɛ e klun jɔ. Zezi seli kɛ: “Be nga be wun i wlɛ kɛ be mian Ɲanmiɛn wun’n be liɛ su ti ye.” (Matie 5:3) Ɲanmiɛn fɛli i nuan ndɛ’n mannin e. Yɛ i fanngan nun’n, ‘junman difuɛ nanwlɛfuɛ m’ɔ si ngwlɛlɛ’n,’ ɔ yi fluwa kpanngban man e naan y’a kwla lafi Ɲanmiɛn su kpa. (Matie 24:45) Fluwa sɔ’m be kwla uka e naan e nin Ɲanmiɛn e afiɛn w’a mantan kpa.—Ezai 65:13, 14.

7. ?Wafa sɛ yɛ Biblu’n nin fluwa nga anuannzɛ’n yi be’n, be kwla uka amun-ɔn?

 ⁷ Biblu’n nin fluwa nga anuannzɛ’n yi be’n, be kwla uka amun naan amun a yo ngwlɛlɛfuɛ nin akunndanfuɛ. (An kanngan Nyanndra Mun 2:10-14 nun.) Ɔ maan, sɛ sran wie waan ɔ́ láka amun’n, amún wún i wlɛ. I wie yɛle kɛ, be su kwlá lakaman amun kɛ Ɲanmiɛn nunman lɛ. Yɛ be su kwlá lakaman amun kɛ sika nin aɲanbeun ninnge mun yɛ be kwla yo naan amun klun w’a jɔ-ɔ. Sɛ amun yo ngwlɛlɛfuɛ nin akunndanfuɛ’n, amun su yoman sa wie naan cɛn wie lele’n, amun a wun i su afɛ. Ɔ maan, amun bɔbɔ amún wún kɛ Zoova klo amun sakpa, naan ɔ klo kɛ amun liɛ yo ye.—Jue Mun 34:9; Ezai 48:17, 18.

8. (1) ?Ngue ti yɛ ɔ fata kɛ amun fa amun wun mantan Ɲanmiɛn dɔ nga su-ɔ? (2) ?Sɛ amun yo sɔ’n, cɛn wie lele’n amun liɛ yó sɛ?

⁸ Ɔ ka kan’n, bé núnnún Satan i mɛn’n sekeseke. Zoova kunngba cɛ yɛ ɔ kwla sasa e-ɔ. I yɛ ɔ kwla uka e naan y’a ɲan aliɛ nin ninnge nga e sa mian be wun’n niɔn. (Abakik 3:2, 12-19) I sɔ’n ti’n, dɔ nga su yɛ ɔ fata kɛ amun fa amun wun mɛntɛn i, naan amun lafi i su kpa-ɔ. (2 Piɛli 2:9) Sɛ amun yo sɔ’n, kannzɛ lika’n yó sɛ yó sɛ’n, amún kán ndɛ kunngba nga Davidi kannin’n wie. Ɔ seli kɛ: “N yiman min nyin Anannganman su mlɔnmlɔn. Sɛ ɔ nin min wo nun’n, srɛ kunman min, min wun usuman min.”—Jue Mun 16:8.

9. (1) ?Kɛ nga Zan 6:44 fa kan’n sa’n, ngue yɛ Zoova yo-ɔ? (2) Kɛ e to Zoova i sufuɛ kun mɔ e simɛn i laa’n, ngue yɛ ɔ yo e ɲɛnmɛn-ɔn?

⁹ Kɛ e to sran kun m’ɔ suman Zoova’n, e kwla si i dunman’n. Sɛ ɔ ti ble annzɛ ɔkwlɛ’n, sɛ ɔ ti tɛnndɛn annzɛ tika’n, e kwla si i wie. Sanngɛ, kɛ e to sran kun m’ɔ su Zoova’n, e si kɛ ɔ klo Zoova. E si kɛ Zoova niɛnnin i awlɛn nun lɔ naan like kpa ng’ɔ wunnin i’n ti’n, ɔ flɛli i kɛ ɔ wa su i wie. (An kanngan Zan 6:44 nun.) Kannzɛ e siman lika ng’ɔ fin’n,  ɔ nin wafa nga be tɛli i’n, sanngɛ e si i su ndɛ kpanngban. Yɛ i kusu si e su ndɛ kpanngban wie.

10, 11. (1) ?Ngue yɛ ɔ kle kɛ Zoova i sufuɛ’m be bo ti kun-ɔn? (2) ?Wafa sɛ yɛ i sɔ’n yo wɔ-ɔ?

¹⁰ Kɛ e wun Zoova i sufuɛ kun cɛ’n, kannzɛ e nin i e kanman aniɛn kunngba’n, sanngɛ e si kɛ e bo ti kun. Afin, e nɲɔn’n e kan “aniɛn sanwun.” (Sofoni 3:9, NW) Yɛle kɛ, e lafi Ɲanmiɛn su, e nanti mmla kunngba’n su, yɛ e wla o like kunngba’n su. I sɔ’n ti, e lafi e wiengu su, yɛ e nin i e afiɛn kwla mantan kpa.

¹¹ Gbanflɛn nin talua mun, sɛ amun su Zoova’n, amun kwla di amun nuan be se kɛ amun le janvuɛ kpafuɛ mun. Kannzɛ amun nin a wunman aniaan wie mun le’n, maan amun lafi su kɛ be kwlaa be ti amun janvuɛ. ?Kɛ amun niɛn i sa’n, be nga be suman Zoova’n, be kwla ɲan janvuɛ kɛ ngalɛ’n sa?

12. ?Ngue yɛ amun kwla fa sie amun ɲrun kɛ amún yó-ɔ?

¹² An kanngan Akunndanfuɛ’n 11:9–12:1 nun. ?Gbanflɛn nin talua mun, amun fali ninnge wie’m be sieli amun ɲrun kɛ amún yó be? ?Yɛ an su mian amun ɲin naan amún yó ninnge sɔ mun? Wienun-ɔn, amun fali ajalɛ kɛ amún kánngan Biblu’n nun cɛn kwlala, annzɛ amún tɛ́ kosan’m be su klanman kpa aɲia’m be bo lɔ. Annzɛ kusu amun klo kɛ amún fá Biblu’n bé bó jasin fɛ’n i kpa trá laa’n. ?Sɛ amun bɔbɔ annzɛ sran wie sie i nzɔliɛ kɛ amun su yo sɔ sakpa’n, i sɔ’n yó amun sɛ? Atrɛkpa’n, i sɔ’n yó amun fɛ dan. I kpa bɔbɔ’n, ɔ fata kɛ amun di su aklunjuɛ. Afin, Zoova klo kɛ amun yo ninnge sɔ mun. Ninnge sɔ’m be wie yɛ Zezi yoli-ɔ.—Jue Mun 40:9; Nyanndra Mun 27:11.

13. ?Ngue ti yɛ Ɲanmiɛn sulɛ’n ti kpa tra mɛn’n nun ninnge’m be kunndɛlɛ’n niɔn?

¹³ Sɛ Zoova i junman dilɛ’n ti amun cinnjin’n, amun klun jɔ́, afin amún wún i wlɛ kɛ like kpa yɛ amun yo-ɔ. Pɔlu seli kɛ: “An jran kekle, nán amun wun usu amun. Amun di e Min’n i junman’n i kpa titi. Afin amun si kɛ e Min’n i junman nga amun di’n, ɔ su kaman ngbɛn.” (1 Korɛntifuɛ Mun 15:58) Be nga be kunndɛ kɛ bé ɲán sika kpanngban’n, nin be nga be kunndɛ kɛ be dunman fu mɛn’n nun’n, be klun jɔman. Kannzɛ bɔbɔ ninnge nga be yo’n, ɔ yo ye be sa nun’n, sanngɛ be wun kɛ i kwlaa sɔ’n ti afɛ ngbɛn. (Liki 9:25) Salomɔn i su ndɛ’n kle sɔ weiin.—Rɔmunfuɛ Mun 15:4.

14. ?Afɔtuɛ benin yɛ Salomɔn i su ndɛ’n man amun-ɔn?

¹⁴ Salomɔn ɲannin sika kpanngban kpa. Yɛ ɔ ɲannin kwlalɛ dan. Kɛ ɔ fɛ i lalafuɛ nun lele andɛ’n, be nga be ɲannin aɲrunɲan kɛ i sa’n, b’a sɔnman. I bɔbɔ seli kɛ: “Like nga be flɛ i aklunjuɛ’n [n kunndɛli kɛ] ń wún i bo naan ń nían kɛ ɔ fa ti’n. Kpɛkuun ń wún like kpakpa nga bɔ maan sran klun jɔ’n i bo.” (Akunndanfuɛ’n 2:1-10) I sɔ’n ti, ɔ kplannin sua nglanmannglanman kpa mun. Ɔ dili i klunklo waka fie mun. Nanwlɛ, ɔ yoli like kwlaa ng’ɔ klo’n. ?Sanngɛ, i klun jɔli? Ɔ si’ɛ. Kɛ Salomɔn niannin ninnge kwlaa ng’ɔ yoli be’n, ɔ dili i nanwlɛ kɛ: “I kwlaa ti afɛ ngbɛn. [...] Junman kekle kwlaa bɔ sran di’n, mmlusuɛ nun-man wie fi nun.” (Akunndanfuɛ’n 2:11) ?Salomɔn  i su ndɛ sɔ’n manman amun afɔtuɛ?

15. (1) ?Ngue ti yɛ ɔ ti cinnjin kɛ amun lafi Ɲanmiɛn su-ɔ? (2) ?Kɛ nga Jue Mun 32:8 fa kan’n sa’n, sɛ amun lafi Ɲanmiɛn su’n, amun liɛ yó sɛ?

¹⁵ Kɛ sran wie’m be fa ajalɛ tɛ mɔ bé wún i su afɛ’n, yɛ be fa tu be wun fɔ-ɔ. Zoova kunndɛman kɛ i sɔ sa’n ju amun su wie. Ɔ klo kɛ amun fɛ i nuan ndɛ’n su. I lɛ nun’n, ɔ fata kɛ amun lafi i su kpa. Sɛ amun fa ajalɛ ng’ɔ jɔ i klun’n, ɔ su yoman amun nsisɔ le. Zoova se kɛ “klolɛ nga an fa kloli i dunman mɔ i ti’n, amun dili junman” mɛnnin i’n, i wla su fiman su le. (Ebre Mun 6:10) I sɔ’n ti’n, amun yo like kwlaa nga amun kwla yo’n naan amun lafi i su kpa. I liɛ’n, amún fá ajalɛ kpa. Kpɛkun, amun bɔbɔ amún wún i wlɛ kɛ like nga amun Si Ɲanmiɛn kunndɛ’n, yɛle kɛ amun liɛ yo ye sakpa.—An kanngan Jue Mun 32:8 nun.

16. ?Ngue ti yɛ kɛ é fá e klunklo ajalɛ’n, ɔ fata kɛ e nian e wun su-ɔ?

¹⁶ Pɔlu klɛli i kɛ: “Lika nga Zoova i wawɛ’n wo lɛ’n, alaje o lɛ.” (2 Korɛntifuɛ Mun 3:17) Zoova di alaje. Yɛ wafa ng’ɔ yili e’n ti’n, e di alaje wie. Sanngɛ, ɔ klo kɛ, kɛ é fá e klunklo ajalɛ’n, e nian e wun su naan y’a yoman e wun abɔlɛ. Atrɛkpa’n, amun wiengu’m be nian bian nin bla nna nga be fa fite nzra nun’n. Wie’m be kunndɛ bla nin bian sukusuku. Wie’m be fa be wun wlɛ i be wun kpinngbinlɛ ninnge nga be kwla fa be nguan’n sie i wie nuan’n, be nun. Yɛ wie mun ekun, be nɔn drɔgi annzɛ be nɔn nzan ngboko. Amun kwla bu i kɛ sɛ amun yo kɛ be sa’n, amun wun kpája amun kpa. Sanngɛ, blɛ sunman’n, be nga be yo i sɔ sa mun’n, be ɲan su tukpacɛ. Yɛ wie’m be wu bɔbɔ. (Galasifuɛ Mun 6:7, 8) Gbanflɛn nin talua nga be yo sa tɛtɛ sɔ mun’n, be kwla bu i kɛ be su di alaje. Sanngɛ, nɛ́n i sɔ’n yɛ be flɛ i alaje dilɛ’n niɔn.—Titi 3:3.

17, 18. (1) ?Ngue ti yɛ sɛ amun nanti Ɲanmiɛn i mmla’m be su’n, amún dí alaje kpa dan-ɔn? (2) ?Ngue yɛ ɔ kle kɛ Adan nin Ɛvu be dili alaje dan tra andɛ sran mun-ɔn?

¹⁷ Sɛ amun ɲin yi Zoova’n, amún ɲán su ye dan. I wie yɛle kɛ, tukpacɛ wie’m be su ɲanman amun, yɛ amún dí alaje dan. (Jue Mun 19:8-12) Kɛ amun nanti Ɲanmiɛn i mmla’m be su’n, amun kle Ɲanmiɛn nin amun si nin amun nin’m be kɛ amun ɲin w’a ti. Ɔ maan, amun si nin amun nin bé láfi amun su, yɛ bé mán amun atin naan amun yo ninnge sunman. Zoova seli kɛ ɔ ka kan’n, ɔ́ mɛ́n i sufuɛ nanwlɛfuɛ’m be kwlaa be alaje kpafuɛ’n. Biblu’n se kɛ “bé ɲán be ti mlɔnmlɔn kɛ Ɲanmiɛn i mma mun sa.”—Rɔmunfuɛ Mun 8:21.

¹⁸ Alaje sɔ’n yɛ Ɲanmiɛn mannin Adan nin Ɛvu-ɔ. I nun mɔ be o Edɛnin fie’n nun lɔ’n, like kunngba cɛ yɛ Ɲanmiɛn seli be kɛ nán be yo-ɔ. Yɛle kɛ nán be di waka kun i mma’n. (Bo Bolɛ 2:9, 17) ?Amun bu i kɛ mmla sɔ’n, ɔ ti be mianmianlɛ? Cɛcɛ. Mmla nga sran’m be kpɛ be mɔ be mian be wiengu’m be kɛ be nanti su’n, be ti tɛkɛtɛkɛ dan. Sanngɛ  Zoova liɛ’n, ɔ mannin Adan nin Ɛvu be mmla kunngba cɛ.

19. ?Ngue yɛ Zoova nin Zezi be kle e mɔ i ti’n, é ɲán e ti mlɔnmlɔn-ɔn?

¹⁹ Zoova nin e nanti klanman. W’a manman e mmla kpanngban. Sanngɛ, ɔ kle e like naan e klo Ɲanmiɛn nin sran. Ɔ kle e kɛ maan e bu mmla ng’ɔ mannin e’n be su akunndan, naan e kpɔ like ng’ɔ ti tɛ’n. (Rɔmunfuɛ Mun 12:9) Cɛn kun’n, kɛ Zezi kán Ɲanmiɛn ndɛ’n oka’n su’n, ɔ kannin sa nga ti yɛ sran’m be yo sa tɛtɛ mun’n, i ndɛ. (Matie 5:27, 28) Kɛ Zezi wá síe sran mun mɛn uflɛ nun lɔ’n, ɔ́ klé e like tititi naan e wun sa ng’ɔ ti kpa’n, ɔ nin ng’ɔ ti tɛ’n be ngbaciɛ’n. (Ebre Mun 1:9) Asa ekun’n, Zezi yó maan e su buman akunndan tɛtɛ’m be kun, yɛ fɔ su tranman e nun kun. Blɛ sɔ nun’n, sran fi su lakaman e kɛ e yo sa tɛ. Yɛ e su fɔnman naan se kɛ é wún i su afɛ. I agualiɛ su’n, ‘é ɲán e ti mlɔnmlɔn.’

20. (1) ?Kannzɛ Ɲanmiɛn di alaje, sanngɛ ɔ yo like kwlaa ng’ɔ klo’n? (2) ?Wafa sɛ yɛ e kwla niɛn i ayeliɛ’n su-ɔ?

²⁰ Maan e wun i wlɛ kɛ, mɛn uflɛ nun lɔ’n, nán like kwlaa nga e klo kɛ é yó’n yɛ é yó-ɔ. Afin, sa’n kwlaa nun’n, ɔ fata kɛ e yi i nglo kɛ e klo Ɲanmiɛn nin sran. Sɛ like kwlaa nga e yo’n ɔ taka klolɛ’n su’n, nn Zoova i ayeliɛ’n su yɛ e nian-ɔn. Zoova bɔbɔ di alaje, yɛ ɔ kwla yo like kwlaa ng’ɔ klo’n. Sanngɛ, ɔ fali ajalɛ kɛ ɔ́ yó ninnge kwlaa klolɛ su. I wie yɛle wafa ng’ɔ nin e tran’n. (1 Zan 4:7, 8) I sɔ’n kle kɛ, kɛ e nian Ɲanmiɛn i ayeliɛ’n su’n, yɛ e kwla di alaje’n i kpafuɛ’n niɔn.

21. (1) ?Kɛ Davidi buli ninnge nga Zoova yo mɛnnin i’n be akunndan’n, wafa sɛ yɛ i sɔ’n yoli i-ɔ? (2) ?Like suanlɛ nga i sin liɛ nun’n, ngue yɛ é wá fá e ɲin é síe su-ɔ?

²¹ Zoova maan amun si i. Ɔ mannin amun janvuɛ kpakpa mun. Ɔ yoli maan amun le like kun mɔ amun kwla fa amun wla gua su-ɔ. Yɛ ɔ mannin amun ninnge kpanngban wie mun ekun. (Jue Mun 103:5) Kɛ amun bu i kwlaa sɔ’n i akunndan’n, atrɛkpa’n, amun kan ndɛ kunngba nga Davidi kannin’n wie. Cɛn kun’n, kɛ ɔ́ srɛ́ Ɲanmiɛn’n, ɔ seli i kɛ: “A yo maan n wun nguan’n i atin’n. Kɛ be nin wɔ tran’n, be klun jɔ lele tra su, aklunjuɛ nga be di’n ɔ lɛman awieliɛ.” (Jue Mun 16:11) Like suanlɛ nga i sin liɛ’n nun’n, é wá fá e ɲin é síe i Jue Mun 16 su’n, i nun ndɛ wie mun ekun be su. I liɛ’n, amún sí like ng’ɔ fata kɛ amun yo naan amun liɛ w’a yo ye’n.