1, 2. ?Wafa sɛ yɛ Tonin i su ndɛ’n kle kɛ e kwla kaci e nzuɛn’n niɔn?

BE FLƐ gbanflɛn kun kɛ Tonin. I si wuli. Ɔ ɔli suklu lele juli kolɛzi, sanngɛ suklu dilɛ’n timɛn i cinnjin. I kpa bɔbɔ’n, i waan ɔ́ yáci suklu dilɛ, naan i ndɛ nunman diplɔmun ndɛ nun. Fue cɛn nin Mɔnnɛn cɛn kwlaa’n, ɔ kɔ flimun nianlɛ, yɛ ɔ nin i janvuɛ’m be yiyi be ɲin su. Tonin i ɲin su timan kekle, yɛ ɔ nɔnman drɔgi. Sanngɛ, ɔ wunman like trele kun ng’ɔ́ yó i mɛn’n nun-ɔn. Asa ekun’n, ɔ lafiman su kɛ Ɲanmiɛn o lɛ. Cɛn kun’n, kɛ ɔ wunnin Zoova i Lalofuɛ nɲɔn’n, ɔ seli be kɛ ɔ lafiman su kɛ Ɲanmiɛn o lɛ. Aniaan’m be mɛnnin i fluwa nɲɔn naan ɔ kanngan be nun.—Be flɛ fluwa sɔ mun kɛ La vie a-t-elle été créée? yɛ Cinq questions à se poser sur l’origine de la vie.

² Tonin kanngannin fluwa sɔ’m be nun lele be ɲɔnɲɔnnin. Kɛ aniaan’m bé wún i ekun’n, akunndan ng’ɔ bu i laa’n w’a kaci. Ɔ maan, ɔ seli be kɛ: “Ɲanmiɛn kun o lɛ sakpa.” Tonin boli Biblu’n nun like suanlɛ bo. Kpɛkun ɔ kacili i nzuɛn’n blɛblɛblɛ. Laa’n, suklu dilɛ’n timɛn i cinnjin. Sanngɛ, kɛ ɔ boli Biblu’n nun like suanlɛ bo’n, i dunman tɛli be nga be di junman kpa be suklu lɔ’n, be nun wie. I sɔ’n boli be suklu’n i su  kpɛn’n i nuan. Cɛn kun’n, ɔ seli Tonin kɛ: “Nanwlɛ, ɔ nzuɛn’n w’a yo kpa dan, yɛ a di junman kpa siɛn’n. ?Zoova i Lalofuɛ mɔ a fa ɔ wun mantan be’n, i ti-ɔ?” Ɔ tɛli i su kɛ ɛɛn-ɛn. Kpɛkun, like nga Zoova i Lalofuɛ’m be kle i’n, ɔ bo su kleli i. Tonin ɲɛnnin i diplɔmun’n, yɛ andɛ’n ɔ ti titi atin bofuɛ, kpɛkun ɔ ti asɔnunfuɛ’m be ukafuɛ. Tonin wunnin kɛ Zoova ti Siɛ kpa, yɛ i sɔ’n yo i fɛ dan.—Jue Mun 68:6.

3. ?Afɔtuɛ benin yɛ Zoova man gbanflɛn nin talua mun-ɔn?

³ Gbanflɛn nin talua mun, Toni i su ndɛ’n kle kɛ amun ndɛ lo Zoova. Ɔ klo kɛ amun klun jɔ, yɛ amun liɛ yo ye. I sɔ’n ti, ɔ wla amun fanngan kɛ maan ‘amun wla kpɛn i su.’ (Akunndanfuɛ’n 12:1) Nán cɛn ngba yɛ i sɔ yolɛ’n ti pɔpɔ-ɔ. Sanngɛ, amun kwla yo sɔ. Sɛ amun fa amun wun wlɛ i sa nun’n, amun liɛ yó ye dɔ nga su. Yɛ kɛ amún wá yó kaklaka’n, amún ɲán su ye ekun. Kɛ ɔ ko yo naan amun a wun i sɔ liɛ’n i wlɛ kpa’n, é wá kán sa nɲɔn be ndɛ. I klikli’n yɛle like ng’ɔ ukali Izraɛlifuɛ mun naan b’a kwla wlu mɛn nga Ɲanmiɛn seli kɛ ɔ́ fá mán be’n i nun’n. Kpɛkun i nɲɔn su’n, yɛle like nga ti yɛ Davidi kwla jrannin Goliati i ɲrun m’ɔ kwlɛli i’n.

4, 5. ?Kɛ e bu wafa nga Izraɛlifuɛ’m be kwlali Kanaanfuɛ mun’n, ɔ nin wafa nga Davidi kwlali Goliati’n i akunndan’n, ngue yɛ e wun i wlɛ-ɔ? (An nian desɛn ng’ɔ kan like suanlɛ’n bo i bo lɛ’n.)

⁴ ?Kɛ Izraɛlifuɛ’m bé wá wlú mɛn nga Zoova fa mannin be’n i nun’n, afɔtuɛ benin yɛ ɔ mannin be-ɔ? ?Ɔ seli be kɛ be suan alɛ kunlɛ naan be sa tɔ nun kpa? Cɛcɛ! (Mmla’n 28:1, 2) Sanngɛ, ɔ seli be kɛ be ɲin yi i, yɛ be lafi i su. (Zozie 1:7-9) Klɔ sran’m be kwla bu i kɛ nán afɔtuɛ kpa-ɔ. Sanngɛ, afɔtuɛ’m be nun kpafuɛ’n niɔn. Afin, kɛ Izraɛlifuɛ’m be fali su’n, Zoova fanngan nun’n, be kwlali Kanaanfuɛ mun. (Zozie 24:11-13) I sɔ’n kle kɛ, sɛ amun lafi Ɲanmiɛn su’n, amún fá ndɛ ng’ɔ kan’n su. Be nga be lafi i su’n, be liɛ yo ye tititi. Kɛ ɔ fɛ i laa lele andɛ’n, e wun i sɔ liɛ’n weiin.

⁵ Goliati ti safuɲrɛn. I tɛnndɛn’n fuanfuan mɛtri nsan. Yɛ alɛ ninnge’m be yo sro dan. (1 Samiɛl 17:4-7) Davidi liɛ’n, kpafloko kun yɛ ɔ o i sa nun-ɔn. Sanngɛ, ɔ lafi Ɲanmiɛn su. Be nga be lafiman Ɲanmiɛn su’n, be kwla bu i kɛ Davidi i ti w’a saci, i ti yɛ i waan ɔ nin Goliati bé kún-ɔn. Sanngɛ nanwlɛ, Goliati yɛ ɔ su di sinnzin-ɔn.—1 Samiɛl 17:48-51.

6. ?Ngue yɛ é wá kɛ́n i ndɛ like suanlɛ nga nun-ɔn?

⁶ Lika suanlɛ ng’ɔ sinnin lɛ nun’n, e kannin like nnan mɔ be kwla uka amun naan amun liɛ w’a yo ye’n, be ndɛ. E wunnin kɛ ɔ fata kɛ amun fa amun wun mantan Ɲanmiɛn, amun tra be nga be klo Ɲanmiɛn’n be janvuɛ, amun fa ninnge wie mun sie amun ɲrun kɛ amún yó be. Yɛ ɔ fata kɛ an bu alaje mɔ Ɲanmiɛn maan amun di’n, i like dan. Sɛ amun yo sɔ’n, mmlusuɛ nga amún ɲán be ekun’n, é wá kán be ndɛ like suanlɛ nga nun. I sɔ’n ti, é wá fá e ɲin é síe i Jue Mun 16 su’n, i nun ndɛ wie’m be su.

7. (1) ?Ngue yɛ be fa sie sran ng’ɔ lafi Ɲanmiɛn su’n, i nzɔliɛ-ɔ? (2) ?Ngue yɛ ɔ ti Davidi i cenjele like-ɔ? (3) ?Wafa sɛ yɛ i sɔ’n yoli i-ɔ?

⁷ Sran ng’ɔ lafi Zoova su’n, ɔ bu akunndan ng’ɔ bu’n wie. Ɔ fɛ i wun wlɛ i sa nun, yɛ ɔ fua kpa kɛ i ɲin yí i titi.  (1 Korɛntifuɛ Mun 2:12, 13) Davidi kleli kɛ ɔ lafi Ɲanmiɛn su kpa. Cɛn kun’n, ɔ seli kɛ: “Anannganman, min like liɛ nga n nyɛnnin i’n, yɛlɛ wɔ.” (Jue Mun 16:5) Davidi nin Zoova be afiɛn mantan kpa. Yɛ ɔ fɛ i wun wlɛli i sa nun. I sɔ’n ti i cenjele like dan. (Jue Mun 16:1) Ɔ maan, ɔ kwla seli kɛ: “Min wun kpaja min.” Like fi manman Davidi i aklunjuɛ kɛ ɔ nin Zoova be afiɛn m’ɔ mantan’n sa.—An kanngan Jue Mun 16:9, 11 nun.

8. ?Ngue yɛ amun kwla yo naan amun liɛ w’a yo ye-ɔ?

⁸ Be nga be klo sika nin mɛn dilɛ’n, be klun kwlá jɔman kɛ Davidi liɛ’n sa. (1 Timote 6:9, 10) Aniaan bian kun m’ɔ tran Kanada’n, ɔ seli kɛ: “Nán like nga e kwla ɲɛn i mɛn nun’n, i ti yɛ e klun kwla jɔ kpa-ɔ. Sanngɛ, sɛ e man Ɲanmiɛn Zoova m’ɔ man e like kpakpa kwlaa’n i like’n, yɛ e klun kwla jɔ sakpa-ɔ.” (Zaki 1:17) Sɛ amun lafi Zoova su kpa naan amun su i’n, amun liɛ yó ye. ?Yɛ ngue yɛ ɔ fata kɛ amun yo naan amun a lafi i su kpa-ɔ? Amun fa blɛ be kanngan Biblu’n nun. Asa ekun’n, amun bo amun ɲin ase be nian ninnge nglanmannglanman ng’ɔ yili be’n. Yɛ amun bu i nzuɛn’m be su akunndan. I wie yɛle klolɛ m’ɔ klo amun’n.—Rɔmunfuɛ Mun 1:20; 5:8.

9. ?Ngue yɛ amún yó naan amun nzuɛn’n w’a yo kpa-ɔ?

⁹ Kɛ siɛ kpa kun m’ɔ klo i mma mun sa’n, Zoova tu e fɔ. Davidi buli fɔ nga Zoova tuli i’n i like dan. Ɔ seli kɛ: “Ń lá Anannganman ase, afin ɔ ti min afɔtuɛ manfuɛ. Kɔnguɛ bɔbɔ’n, n wun i sɔ min akunndan’n nun.” (Jue Mun 16:7) Davidi buli wafa nga Ɲanmiɛn yo ninnge mun’n, i su akunndan. Ɔ maan, i nzuɛn’n yoli kpa. Sɛ amun nian Davidi i ayeliɛ’n su’n, amún kló Ɲanmiɛn kpa, yɛ amún kúnndɛ titi kɛ amún yó sa ng’ɔ jɔ i klun’n. Klisifuɛ ng’ɔ yo sɔ’n, ɔ yi i nglo kɛ i ɲin w’a ti. Be flɛ aniaan bla kun kɛ Klisitinin. Ɔ seli kɛ ɔ fa blɛ kanngan e fluwa wie’m be nun, kpɛkun, ɔ bu su akunndan. I waan kɛ ɔ yo sɔ’n, ɔ wun kɛ i dunman nun ti yɛ Zoova klɛli ndɛ sɔ mun-ɔn.

10. ?Kɛ nga Ezai 26:3 fa kan sa’n, sɛ Ɲanmiɛn ndɛ’n ti amun cinnjin’n, ngue yɛ amún yó-ɔ?

¹⁰ Sɛ Ɲanmiɛn i nuan ndɛ’n ti amun cinnjin’n, amún bú akunndan ng’ɔ bu’n wie. I wie yɛle wafa nga Ɲanmiɛn bu mɛn’n nin sa nga bé wá jú mɛn’n nun’n. Zoova yɛ ɔ tikeli amun ɲin naan amun a kwla si ndɛ cinnjin sɔ mun-ɔn. Ɔ yoli sɔ naan amun wun like ng’ɔ ti cinnjin’n i wlɛ. I liɛ’n, amun kwla fa ajalɛ kpakpa mun. Kpɛkun, kɛ amún bú sa nga bé wá jú mɛn’n nun’n i akunndan’n, amun klun su titiman amun. (An kanngan Ezai 26:3 nun.) Be flɛ aniaan bian kun kɛ Zozie. Ɔ tran Etazinin. Ɔ seli kɛ sɛ amun nin Zoova amun afiɛn mantan’n, amún wún like ng’ɔ ti cinnjin’n, ɔ nin ng’ɔ timan cinnjin’n be wlɛ.

11. ?Wan mun yɛ Davidi trali be janvuɛ-ɔ?

¹¹ An kanngan Jue Mun 16:3 nun. Davidi si sran ng’ɔ kwla tra be janvuɛ’n. Sran sɔ mun yɛle be nga be klo Zoova’n. I waan kɛ ɔ nin sran sɔ’m be o’n, i klun jɔ dan. Ɔ seli ekun kɛ sran sɔ’m be ti Ɲanmiɛn i “sufuɛ kpakpa” mun. Afin, be mian be ɲin be nanti Zoova i mmla’m be su. Jue tofuɛ kun ekun kannin sɔ wie. Ɔ seli kɛ: “Be bɔ be nyin yi wɔ’n, bɔ be fa ɔ mmla nga a sie be’n su’n, be kwlaa be ti min janvuɛ.” (Jue Mun 119:63) Kɛ nga e fa wunnin i like suanlɛ ng’ɔ sinnin lɛ’n nun sa’n, amun kwla tra be nga be klo Zoova mɔ  be ɲin yi i’n be nun kpanngban be janvuɛ. Nán be nga amun afuɛ’n ti kun’n, be ngunmin yɛ ɔ fata kɛ amun tra be janvuɛ-ɔ.

12. ?Ngue ti yɛ Davidi nin Zonatan be kacili janvuɛ kpa-ɔ?

¹² Davidi w’a trɛmɛn i wiengu’m be ngunmin be janvuɛ. ?Amun kwla bo Davidi i janvuɛ’m be nun kun i dunman? Atrɛkpa’n, amun bu Zonatan i akunndan. Wafa nga Biblu’n kan Davidi nin Zonatan be janvuɛ tralɛ’n i ndɛ’n, ɔ yo ɲɛnmɛn dan. ?Sanngɛ, amun si kɛ Zonatan tra Davidi afuɛ 30? ?Ngue ti yɛ be kacili janvuɛ kpa-ɔ? Be nɲɔn’n be lafili Ɲanmiɛn su kpa ti-ɔ. Asa ekun’n, be ɲin yili be wiengu. Yɛ be kloli be wiengu i nzuɛn’n. I wie yɛle kɛ, kɛ be nin Ɲanmiɛn i kpɔfuɛ’m bé kún’n, be yili i nglo kɛ be ti yakpafuɛ.—1 Samiɛl 13:3; 14:13; 17:48-50; 18:1

13. ?Ngue yɛ amun kwla yo naan amun a ɲan janvuɛ kpanngban-ɔn? An fa sa kun yiyi nun.

¹³ Amun kusu sɛ amun tra be nga be klo Zoova mɔ be ɲin yi i’n be janvuɛ’n, amún klun jɔ́ kɛ Davidi nin Zonatan be liɛ’n sa. Be flɛ aniaan bla kun kɛ Kiera. Ɔ su Zoova i afuɛ kpanngban yɛ. Ɔ seli kɛ: “N trali [aniaan] kpanngban kpa be janvuɛ. Be tran nvle fanunfanun nun. Yɛ be ti sran wafawafa.” Gbanflɛn nin talua mun, amun yo sɔ wie. I liɛ’n, amún wún kɛ Biblu’n nun ndɛ’n nin Ɲanmiɛn i wawɛ’n be ti’n, Ɲanmiɛn i sufuɛ mɔ be o mɛn wunmuan nun’n, be ti kɛ awlobo kun i nunfuɛ mun sa.

14. (1) ?Wafa sɛ yɛ amun kwla fa like kpa be sie amun ɲrun kɛ amún yó-ɔ? (2) ?Ndɛ benin yɛ gbanflɛn wie’m be kannin-ɔn?

¹⁴ An kanngan Jue Mun 16:8 nun. Davidi si kɛ like ng’ɔ fata kɛ sran kun yo be’n, be nun cinnjin kpafuɛ’n yɛle Ɲanmiɛn i sulɛ. Amun nian Davidi i ayeliɛ’n su. Kɛ amún fá ninnge wie mun síe amun ɲrun kɛ amún yó be’n, an bu Zoova i akunndan. Sɛ amun yo sɔ’n, amun liɛ yó ye. Be flɛ aniaan bian kun kɛ Sitivɛnin. Ɔ seli kɛ: “N fa like kun n sie min ɲrun kɛ ń yó. Kpɛkun n yo i sakpa. Ɔ maan, kɛ n nian min  sin mɔ n wun kɛ n su yo kpa tra laa’n, min klun jɔ.” Aniaan gbanflɛn kun fin Alemaɲin. Sanngɛ kɛ é sé yɛ’n, ɔ su Zoova nvle uflɛ nun. Ɔ seli kɛ: “Kɛ ń má yó oke’n mɔ ń bú like kwlaa nga n yoli be min gbanflɛn nun’n i akunndan’n, n kunndɛman kɛ ń wún i kɛ min ngunmin min wun akunndan yɛ n buli-ɔ.” Sɛ akunndan sɔ’n wie yɛ amun bu’n, nn amun yo like kwlaa nga amun kwla yo’n, naan Ɲanmiɛn ɲan kɔmin, yɛ an yo sran’m be ye. (Galasifuɛ Mun 6:10) Amun fa Zoova i junman wie’m be sie amun ɲrun kɛ amún dí. Kpɛkun, amun srɛ Zoova kɛ ɔ uka amun naan amun di junman sɔ mun. Sɛ amun srɛ i sɔ’n, ɔ́ tɛ́ amun su.—1 Zan 3:22; 5:14, 15.

15. ?Ninnge benin mun yɛ amun kwla fa sie amun ɲrun kɛ amún yó be-ɔ? (An nian kuku nga be flɛ i kɛ “ Ninnge nga amun kwla yo be’n” nun.)

¹⁵ ?Ninnge benin mun yɛ amun kwla fa sie amun ɲrun kɛ amún yó be-ɔ? Kɛ amún tɛ́ kosan’m be su aɲia’m be bo lɔ’n, amun kwla tɛ be su kɛ nga amun fa wun ndɛ’m be wlɛ’n sa. Cɛn wie lele’n, amun kwla yo atin bofuɛ, annzɛ Betɛli lɔ junman difuɛ. Asa ekun’n, amun kwla se kɛ amún súan aniɛn uflɛ naan amun bó jasin fɛ’n klé sran kpanngban. Be flɛ gbanflɛn kun kɛ Baraki. Ɔ ti blɛ kwlaa nun Ɲanmiɛn junman difuɛ. Ɔ seli kɛ: “Kɛ n tinnge cɛn kwlakwla mɔ n si kɛ n fa min wunmiɛn kwlaa n su Zoova’n, min klun jɔ dan. Junman uflɛ fi kwlá manman min aklunjuɛ sɔ.”

16. (1) ?Wafa sɛ yɛ Davidi buli Zoova i mmla mun-ɔn? (2) ?Yɛ ngue ti-ɔ?

¹⁶ An kanngan Jue Mun 16:2, 4 nun. Like suanlɛ ng’ɔ sinnin lɛ nun’n, e wunnin kɛ, kɛ e nanti Ɲanmiɛn i mmla’m be su’n, e di alaje kpafuɛ’n. Afin e klo sa ng’ɔ ti kpa’n, yɛ e kpɔ sa tɛ’n. (Amɔs 5:15) Zoova ti kpa dan. Like kpakpa kwlaa be fin i. Davidi miɛnnin i ɲin kpa naan w’a nian Ɲanmiɛn i ayeliɛ’n su, naan w’a klo ninnge nga Zoova klo be’n. Asa ekun’n, ɔ kpɔli ninnge nga Zoova seli kɛ be ti tɛ’n. Ninnge sɔ’m be nun kun yɛle amuin sɔlɛ’n. Amuin sɔlɛ’n wla sran finfin nun. Sran ng’ɔ sɔ amuin’n, manmanlɛ m’ɔ fata kɛ ɔ fa man Zoova’n, ɔ fa man sran uflɛ, annzɛ like uflɛ.—Ezai 2:8, 9; Sa Nglo Yilɛ 4:11.

17, 18. (1) ?Amuin sɔlɛ’n i su ndɛ benin yɛ Davidi kannin-ɔn? (2) ?Ngue yɛ andɛ sran’m be yo mɔ i ti’n be ‘ɲrɛnnɛn’n, ɔ uka su-ɔ’?

¹⁷ Lalafuɛ nun’n, kɛ sran’m bé sɔ́ be amuin mun’n, blɛ sunman’n be kunndɛ bla nin bian sukusuku yɛ be yo i wunsu ɲannzuɛn sa mun. (Oze 4:13, 14) Blɛ sɔ nun’n, sran kpanngban be klo amuin sɔlɛ. Afin be klo sa sukusuku nga be yo be lɔ’n. ?Sanngɛ i sɔ’n, mannin be aklunjuɛ? Ɔ si’ɛ mlɔnmlɔn. Davidi seli kɛ amuin sɔfuɛ’m be “nyrɛnnɛn i su ɔ uka.” Wie liɛ bɔbɔ’n, be fa be mma’m be yi tɛ be man be amuin mun. (Ezai 57:5) Zoova kpɔ sa tɛtɛ nga be yo be’n. (Zeremi 7:31) Sɛ blɛ sɔ nun amun o lɛ wie, naan amun si nin amun nin be su Zoova’n, nn ɔ́ yó amun fɛ dan.

¹⁸ Andɛ’n, Ɲanmiɛn sulɛ wafa nga be timan su’n be kleman sran’m be kɛ bla nin bian kunndɛlɛ sukusuku’n, nin be wiengu yasua kunndɛlɛ, annzɛ be wiengu bla kunndɛlɛ’n ti like tɛ. I sɔ’n ti’n, be nga be yo i sɔ sa’m be bu i kɛ be di alaje. Afin, be yo like kwlaa nga be klo’n. Kusu nn, be ‘ɲrɛnnɛn’n ɔ uka su’ tititi. (1 Korɛntifuɛ Mun 6:18, 19) Atrɛkpa’n, amun sie i sɔ liɛ’n i nzɔliɛ. I sɔ’n ti, gbanflɛn nin talua mun, amun fa ndɛ nga amun Si Ɲanmiɛn kan’n su. Sɛ  amun ɲin yi i’n, amún ɲán su ye. Amun bu wafa nga bian nin bla kunndɛlɛ sukusuku’n i bo gua’n i akunndan. I liɛ’n, amun su yoman sa wie naan i sin’n, amun a wun i su afɛ. (Galasifuɛ Mun 6:8) Zozie mɔ e kɛnnin i ndɛ’n, ɔ seli kɛ: “E klunklo ajalɛ mɔ e kwla fa’n ti’n, e kwla yo like kwlaa nga e klo’n. Sanngɛ, sɛ y’a nianman e wun kpa naan e yo sa tɛ’n, e klun su jɔman.”

19, 20. ?Kɛ gbanflɛn nin talua’m be lafi Zoova su mɔ be ɲin yi i’n, i su ye benin yɛ be ɲɛn i-ɔ?

¹⁹ Zezi seli kɛ: “Sɛ amun fa min ndɛ’n su titi’n, nn amun ti min sɔnnzɔnfuɛ sakpa, yɛ amún sí ndɛ nanwlɛ’n, kpɛkun ndɛ nanwlɛ’n ti’n amún ɲán amun ti.” (Zan 8:31, 32) É lá Zoova i ase lele. Afin, e nunman Ɲanmiɛn sulɛ wafa ng’ɔ timan su’n nun. Yɛ be kwlá lakaman e. Kpɛkun, e faman ato ndɛ’m be su. E lafi su kɛ cɛn wie lele’n, é ‘ɲán e ti mlɔnmlɔn kɛ Ɲanmiɛn i mma mun sa.’ (Rɔmunfuɛ Mun 8:21) Dɔ nga su bɔbɔ’n, sɛ amun fa like nga Zezi kleli’n su’n, amun “sí ndɛ nanwlɛ’n.” Ɔ maan, amún ɲán amun ti.

²⁰ Gbanflɛn nin talua mun, amun bu alaje mɔ Ɲanmiɛn maan amun di’n, i like dan. Amun yo sa ng’ɔ ti kpa’n. Sɛ dɔ nga su amun fa ajalɛ ng’ɔ ti kpa’n, cɛn wie lele’n, amun liɛ yó ye. Aniaan gbanflɛn kun seli kɛ: “Kɛ sran kun i gbanflɛn nun annzɛ i talua nun’n ɔ yo sa ng’ɔ ti kpa’n, cɛn wie lele’n, i sɔ’n úkɛ i. Yɛle kɛ, sɛ ɔ su kunndɛ junman wie di’n, annzɛ sɛ ɔ fata kɛ ɔ ja bla annzɛ bian’n, annzɛ sɛ ɔ fata kɛ ɔ minndɛ kan’n, ɔ́ kwlá fá ajalɛ kpa.”

21. ?Ngue yɛ ɔ fata kɛ amun yo naan amun a ɲan “nguan kpafuɛ’n” niɔn?

²¹ Like nga sran’m be flɛ i mɛn dilɛ Satan i mɛn tɛ kain nga nun’n, ɔ ti le nɲɔn kun like. Sran fi siman e ɲrun lɔ sa. (Zaki 4:13, 14) I sɔ’n ti, amun yo like nga amun kwla yo i dɔ nga su naan amun a ɲan “nguan kpafuɛ’n,” mɔ yɛle nguan nga Ɲanmiɛn kwla man amun i mɛn uflɛ nun lɔ’n. (1 Timote 6:19) Zoova mianman sran fi kɛ ɔ su i. Sɛ amún sú i o annzɛ amun su sumɛn i o, ɔ o amun bɔbɔ amun sa nun. Amun fa amun wun mantan Zoova cɛn kwlaa. Yɛ ‘ninnge kpakpa’ kwlaa ng’ɔ man amun’n, amun bu be like dan. (Jue Mun 103:5) Sɛ amun yo sɔ’n, amun kwla lafi su kɛ Zoova yó maan amun klun jɔ́ dan. Yɛ amun aklunjuɛ sɔ’n su wieman le.—Jue Mun 16:11.