SRAN kwlakwla kunndɛ kɛ i klun jɔ. Sanngɛ mɛn’n i awieliɛ blɛ nga nun’n, ‘lika’n ti kekle’ e kwlakwla e su. (2 Timote 3:1) Sran wie’m be liɛ’n, be yo be tɛtɛ. Wie’m be kusu, tukpacɛ’n kle be yalɛ annzɛ be junman’n w’a fi be sa, annzɛ kusu be awlɛn su sran kun w’a wu. Sa sɔ’m be ti’n, be klun jɔman kun. Sran wie’m be kusu sa uflɛ ti yɛ be klun jɔman-ɔn. Zoova i sufuɛ mun bɔbɔ’n, ɔ ju wie’n be sa sin bubu be. Ɔ maan, be klun jɔman kun. ?Sɛ i sɔ sa’n ju e su’n, ngue yɛ é yó naan e klun w’a jɔ kɛ laa’n sa-ɔ?

Sɛ e kunndɛ kɛ é sí kosan sɔ’n i su tɛlɛ’n, ɔ fata kɛ e wun ndɛ wie’m be wlɛ. Yɛle kɛ: ?Ngue yɛ ɔ kle kɛ sran kun i klun ti jɔwa-ɔ? ?Kɛ sa’m be tɔli sran wie’m be su’n, ngue yɛ be yoli naan be klun w’a jɔ titi-ɔ? ?Ngue yɛ é yó naan e klun w’a jɔ kpa w’a tra laa’n niɔn?

Nán srilɛ mɔ sran kun sri’n, yɛ ɔ kle kɛ i klun ti jɔwa-ɔ. Maan e bu sa kun i akunndan e nian: Kɛ sran kun nɔn nzan bo’n, wie liɛ’n, ɔ sriman aɔwi. Sanngɛ, kɛ i ɲin su ko titi’n, ɔ sriman kun. Yɛ ɔ wun kɛ i su sa’m be te o lɛ. Ɔ maan, srilɛ nga sran sɔ’n srili’n, ɔ kleman kɛ i klun ti jɔwa sakpa.—Nyanndra Mun 14:13.

Kɛ sran kun ɲan like kpa kun, annzɛ i wla o su kɛ ɔ́ ɲán like kpa kun’n, i klun jɔ. Kannzɛ sa ng’ɔ o i su’n ti sɛ’n, sanngɛ i klun ti jɔwa titi. (1 Tɛsalonikfuɛ Mun 1:6) Sa wie kwla yo e ya, sanngɛ e klun kwla jɔ. I wie yɛle akoto’m be liɛ’n. Cɛn kun’n, be boli be. Afin, be kannin Zezi i ndɛ. Ɔ nin i sɔ ngba’n, “kɛ bé jáo jɔlɛ difuɛ’m be nyrun lɛ’n, be klun ti jɔwa yɛlɛ kɛ be si kɛ be nyin bɔ be guɛli i ase Jésus dunman nun’n ɔ ti kpa.” (Sa Nga Be Yoli’n 5:41) Nán bolɛ mɔ be boli be’n ti yɛ be klun jɔli-ɔ. Sanngɛ, kɛ mɔ be kwla jrannin kekle’n i ti-ɔ.

Aklunjuɛ’n ɔ timan like mɔ e nin i fin e nin klun-ɔn. Ɔ ti like nga Ɲanmiɛn wawɛ’n maan sran yo’n be nun kun. Ɲanmiɛn wawɛ’n maan “e fa nzuɛn uflɛ.” Sran ng’ɔ fa nzuɛn uflɛ sɔ’n, i klun jɔ. (Efɛzfuɛ Mun 4:24; Galasifuɛ Mun 5:22) Yɛ ɔ wun sa nga be o i su’n, be trawlɛ.

Sa tɛtɛ nga e wun be asiɛ’n su andɛ’n, Zoova w’a kunndɛman le kɛ be ju. Kannzɛ sran’m be yo sa tɛtɛ mun’n, sanngɛ Zoova i klun jɔ titi. Biblu’n se kɛ: “Aklunjuɛ o kan ɔ tran lɛ’n, yɛ ɔ yi i fanngan i nglo lɛ.” (1 Be Nyoliɛ 16:27) Asa ekun’n, kɛ Zoova wun sa kpakpa nga i sufuɛ’m be yo’n, i klun jɔ.—Nyanndra Mun 27:11.

Maan e nian Zoova i ayeliɛ’n su. Yɛle kɛ, kannzɛ sa’m be juman kɛ nga e fa sunnzunnin’n  sa’n, nán e sa sin bubu e. Sanngɛ maan e fa e ɲin sie i ninnge kpakpa nga e le be andɛ’n be su. Yɛ e tra e awlɛn e minndɛ ninnge nga cɛn wie lele’n, é ɲán be’n. *—Nian nzɔliɛ’n i su ndɛ’n.

Sran nga Biblu’n kan be ndɛ’n, sa fanunfanun tɔli be nun sunman be su. Sanngɛ be klun jɔli titi. Be nun kun yɛle Abraamun. Blɛ kun nun’n, ɔ ka kan naan b’a kun i. Yɛ sran wie’m be ti’n, ɔ wunnin i ɲrun. (Bo Bolɛ 12:10-20; 14:8-16; 16:4, 5; 20:1-18; 21:8, 9) Sanngɛ, i klun jɔli titi. Afin, ɔ buli like nga i wla o su kɛ ɔ́ ɲɛ́n i’n, i akunndan. Yɛle kɛ, cɛn wie lele’n, ɔ́ trán be nga Mɛsi’n ɔ́ síe be’n, be nun wie. (Bo Bolɛ 22:15-18; Ebre Mun 11:10) Kɛ Zezi kán Abraamun i ndɛ’n, ɔ seli kɛ: “Kɛ amun nannan Abraam bu kɛ ɔ́ wún min cɛn’n, ɔ yo i fɛ dan, ɔ wunnin cɛn sɔ’n yɛ i klun jɔli.” (Zan 8:56) Sɛ e bu e klun m’ɔ́ wá jɔ́ cɛn wie lele’n i akunndan titi’n, é klé kɛ e nian Abraamun i ayeliɛ’n su.—Rɔmfuɛ Mun 8:21.

Sa sunman be tɔli Pɔlu nin Silasi be su wie. Sanngɛ, be klun jɔli titi. Cɛn kun’n, be boli be, kpɛkun be wlali be bisua. Sanngɛ, bisua lɔ’n, “be nin Nyanmiɛn be kokokli yalɛ, be toli Nyanmiɛn manmanlɛ jue.” (Sa Nga Be Yoli’n 16:23-25) Be kwla jrannin kekle afin, be buli ninnge nga Ɲanmiɛn seli kɛ ɔ́ yó be’n, be su akunndan titi. Asa ekun’n, be si kɛ Klist i dunman nun ti yɛ be wun ɲrɛnnɛn-ɔn. I sɔ’n ti, be klun jɔli. Kɛ e tu e klun e su Ɲanmiɛn’n, mmlusuɛ nga e ɲɛn i’n, maan e bu i akunndan titi. I liɛ’n, é klé kɛ e nian Pɔlu nin Silasi be ayeliɛ’n su.—Filipfuɛ Mun 1:12-14.

Andɛ kusu’n, sa fanunfanun tɔ aniaan sunman be su. Ɔ nin i sɔ ngba’n, be klun jɔ. Afuɛ 2013, Novanblu nun’n, aunmuan’n tuli kekle kpa Filipinin lɔ. Ɔ sacili aniaan 1.000 tra su be sua mun. Aniaan kun mɔ be flɛ i kɛ Zɔrzu’n, i sua’n sacili wie. Ɔ tran klɔ nga be flɛ i kɛ Takloban’n i su lɔ. Ɔ seli kɛ: “Blɛ kekle sɔ nun’n, aniaan’m be klun jɔli titi. Wafa nga e klun jɔli’n, be kwlá kanman.” Sɛ e bu ninnge nga Zoova yoli mannin e’n, be akunndan’n, kannzɛ sa kekle tɔ e su bɔbɔ’n, e klun jɔ́ titi. ?Ngue ekun yɛ Zoova yo man e mɔ i ti’n, ɔ fata kɛ e klun jɔ-ɔ?

Like cinnjin kpa nga ti yɛ e klun jɔ’n, yɛle kɛ e si e Si Ɲanmiɛn m’ɔ sie nglo nin asiɛ’n. Yɛ ɔ ti e Janvuɛ.—Jue Mun 71:17, 18.

Kɛ mɔ Zoova yili e, mɔ e kwla yo ninnge wie mɔ be yo e fɛ’n ti’n, e klun jɔ dan. (Akunndanfuɛ’n 3:12, 13) Asa ekun’n, i fanngan nun’n, e su i. Yɛ e si like nga ti yɛ ɔ yili e’n, ɔ nin wafa ng’ɔ fata kɛ e nanti’n. (Kolɔsfuɛ Mun 1:9, 10) Andɛ’n, sran kpanngban be siman like ng’ɔ fata kɛ be yo naan be klun w’a jɔ’n. Ndɛ nga Pɔlu kannin’n, ɔ kle sɔ weiin. Ɔ seli kɛ: “‘Like nga sran fi nyinma a wun-mɛn i’n, bɔ be su a ti-man, bɔ i wun akunndan a ba-man be klun’n, like sɔ’n yɛ Nyanmiɛn yo mɛnnin i klofuɛ mun-ɔn.’ E liɛ’n, Nyanmiɛn maan i Wawɛ’n yi like sɔ’n nglo kleli ye.” (1 Korɛntfuɛ Mun 2:9, 10) Kɛ mɔ e si like nga Ɲanmiɛn waan ɔ́ yó mán e’n, ɔ nin like nga ti yɛ ɔ yili e’n ti’n, e klun jɔ.

Zoova yoli like kun mannin e m’ɔ leman wunsu-ɔ. Yɛle kɛ, ɔ fali ajalɛ naan w’a kwla yaci sa tɛ nga e yo’n w’a cɛ e. (1 Zan 2:12) Asa ekun’n, ɔ yoli maan e kwla ɲan anannganman nguan mɛn uflɛ’n nun. (Rɔmfuɛ Mun 12:12) Kɛ é sé yɛ’n, Zoova maan e le janvuɛ kpanngan mɔ e nin be e su i likawlɛ-ɔ. (Jue Mun 133:1) Asa ekun’n, ɔ sasa e naan Satan nin i mmusu’m b’a ɲanman e. (Jue Mun 91:11) Sɛ e bu ninnge kpakpa sɔ mɔ Zoova yo man e’n be akunndan’n, e klun jɔ́ kpa ekun.—Filipfuɛ Mun 4:4.

?Sɛ Klistfuɛ kun i klun ti jɔwa’n, i klun kwla jɔ kpa ekun? Zezi seli kɛ: “Ń kɛ́n i sɔ klé amun naan amun klun jɔ kɛ n liɛ’n sa, yɛ amun klun jɔ lelele.” (Zan 15:11) Ndɛ sɔ’n kle kɛ, e klun kwla jɔ kpa ekun tra laa’n. Aklunjuɛ’n ti kɛ sin sa. Kɛ e wlawla sin’n nun yie kaka’n, ɔ jue dan. I wafa kunngba’n, Ɲanmiɛn i wawɛ’n yɛ maan e klun kwla jɔ titi-ɔ. Ɔ maan, ɔ fata kɛ e srɛ Ɲanmiɛn titi kɛ ɔ fɛ i wawɛ’n man e. Asa ekun’n, Biblu’n mɔ Ɲanmiɛn fɛli i wawɛ’n mannin sran mun yɛ be klɛli’n, maan e kanngan nun titi naan e bu su akunndan.—Jue Mun 1:1, 2; Lik 11:13.

Like kun ekun m’ɔ fata kɛ e yo’n, yɛle kɛ maan e tu e klun e su Zoova. (Jue Mun 35:27; 112:1) Biblu’n se kɛ: “Maan ɔ nyin yi Nyanmiɛn, yɛ nanti i mmla’m be su. Like ng’ɔ fata kɛ klɔ sran kwlakwla yo’n yɛ ɔ o lɛ-ɔ.” (Akunndanfuɛ’n 12:13) Zoova yili e kɛ e yo i klun sa. I sɔ’n ti’n, sɛ e tu e klun su i’n, e klun jɔ́ dan. *—Nian nzɔliɛ’n i su ndɛ’n.

Sɛ e klun jɔ kpa titi’n, é ɲán su mmlusuɛ kpanngban. I wie yɛle kɛ, Zoova i klun jɔ́ e wun kpa ekun. Afin, ɔ wun kɛ kannzɛ sa’m be o e su’n, sanngɛ e su i aklunjuɛ su. (Mmla’n 16:15; 1 Tɛsalonikfuɛ Mun 5:16-18) Asa ekun’n, aɲanbeun ninnge’m be kunndɛlɛ’n yoman e cinnjin ngboko. Sanngɛ, e yo like kwlaa nga e kwla yo naan Ɲanmiɛn w’a sie e’n. (Matie 13:44) Kɛ e yo Zoova i klun sa mɔ e wun kɛ i bo gua kpa man e’n, e klun jɔ kpa ekun. Yɛ e wun kpaja e. Kpɛkun, kɛ e wiengu’m be wun e’n, be klun jɔ wie.—Sa Nga Be Yoli’n 20:35; Filipfuɛ Mun 1:3-5.

Biblu’n se kɛ: “Aklunjuɛ’n ti kɛ ayre sa.” (Nyanndra Mun 17:22) Ndɛ kun mɔ fluwa sifuɛ kun kannin’n, ɔ nin ndɛ sɔ mɔ Biblu’n kan’n be kɔ likawlɛ. Ɔ seli kɛ ‘sɛ sran kun i klun jɔ naan like ng’ɔ le i’n ju i’n, tukpacɛ wie’m be su ɲɛnmɛn i.’

Kannzɛ lika’n ti kekle e su’n, sanngɛ Ɲanmiɛn wawɛ’n ti’n, e klun kwla jɔ. I sɔ’n ti, maan e srɛ Ɲanmiɛn, e suan Biblu’n nun like, yɛ e bu su akunndan naan Ɲanmiɛn fɛ i wawɛ’n man e. Asa ekun’n, maan e bu ninnge nga Zoova yo man e ikisa’n, be akunndan. Maan e nian be nga be kle e ajalɛ kpa’n be ayeliɛ’n su. Kpɛkun, maan e yo Ɲanmiɛn i klun sa’n. Sɛ e yo i kwlaa sɔ’n, ndɛ ng’ɔ o Jue Mun 64:11 nun’n, ɔ́ yó e liɛ wie. Ɔ se kɛ: “Maan be nga Anannganman bu be sran kpa’n be klun jɔ i ti. Maan be fiɛ i sin.”