1. ?Sa benin yɛ ɔ juli Klistfuɛ klikli’m be su-ɔ?

KƐ AFUƐ 62 sinnin’n, akoto Piɛli klɛli fluwa ko mannin be mɔ ‘Ɲanmiɛn fali be mɔ be sanndili’n, mɔ be ti aofuɛ Pɔnt, nin Galasi, nin Kapadɔs, nin Azi, nin Bitini mɛn nun’n.’ (1 Piɛr 1:1) Klistfuɛ sɔ’m be fin lika fanunfanun. Sa wie’m be tɔli be su. I sɔ’n ti’n, ɔ fata kɛ be wla be fanngan yɛ be kle be atin ng’ɔ fata kɛ be fa’n. Blɛ sɔ nun’n, nn Zerizalɛmun klɔ’n i nunnunlɛ w’a mantan koko. Yɛ lika’n yoli kekle kpa be su. Piɛli seli be kɛ: “Like’n kwlaa be awieliɛ’n w’a mantan.” ?Ngue yɛ ɔ fata kɛ be yo naan b’a kwla jran kekle blɛ sɔ’n nun-ɔn?​—1 Piɛr 4:4, 7, 12.

2, 3. ?Ngue ti yɛ Piɛli wlɛli i niaan Klistfuɛ’m be fanngan kɛ be sɔ be wiengu nun klanman-ɔn? (An nian desɛn ng’ɔ o kan like suanlɛ’n bo i bo lɛ’n.)

² Blɛ sɔ nun’n, Piɛli seli i niaan Klistfuɛ mun kɛ: “Sran ng’ɔ to amun’n, an sike i, nán an ijɔ amun konviabo.” (1 Piɛr 4:9) Glɛki nun ndɛ mma nga be kacili Wawle nun kɛ “an sike i’n” i bo yɛle kɛ “maan i ndɛ lo amun,” annzɛ “an yo i ye.” Piɛli  su se i wiengu Klistfuɛ mun kɛ be niaan ng’ɔ to be’n, kannzɛ bɔbɔ be si i naan be yo ninnge wie mun likawlɛ titi’n, maan be sɔ i nun klanman. ?Ngue ti yɛ sɛ be yo sɔ’n, ɔ ti kpa-ɔ?

³ I sɔ’n yó maan be afiɛn mántan kpa. ?Amun wla kpɛn blɛ mɔ sran kun yiali amun i awlo lɔ’n i su? Blɛ sɔ nun’n, amun klun jɔli kpa. Kɛ amun kusu amun yiali sran kun amun awlo lɔ’n, i sɔ’n yoli maan amun afiɛn mantannin kpa. Nanwlɛ, sɛ e yia e niaan mun e awlo lɔ’n, é sí be kpa. Piɛli blɛ su’n, sa ng’ɔ o Klistfuɛ’m be su’n ti’n, ɔ fata kɛ be fa be wun mantan be wiengu. Andɛ’n, e o ‘mɛn’n i bue nuan.’ I sɔ’n ti’n, ɔ fata kɛ e fa e wun mantan e niaan mun wie.​—2 Timote 3:1.

4. ?Kosan benin mun yɛ é wá tɛ́ be su like suanlɛ nga nun-ɔn?

⁴ ?Blɛ benin nun yɛ e kwla sɔ e wiengu’m be nun-ɔn? ?Ngue ti yɛ wie liɛ’n, e sisi e bo naan y’a sɔ sran nun-ɔn? ?Ngue yɛ é yó naan y’a sɔ e wiengu’m be nun klanman-ɔn? ?Sɛ aniaan kun yia e i awlo’n, wafa sɛ yɛ e kwla kle kɛ e bu i sran-ɔn?

5. ?Wafa sɛ yɛ aɲia’m be bo lɔ’n, e kwla kle kɛ e sɔ sran nun klanman-ɔn?

⁵ Aɲia’m be bo: Zoova nin i anuannzɛ’n be se e kɛ e wɔ aɲia’m be bo. E kunndɛ kɛ be kwlaa nga be kɔ aɲia’m be bo’n, be wun kpaja be. Be ng’ɔ ti be kpɛ klikli’n, yɛ ɔ fata kɛ e yo naan be wun kpaja be kpa-ɔ. (Rɔmfuɛ Mun 15:7) Sɛ é kwlá sé’n, be ti Zoova i aofuɛ. I sɔ’n ti’n, kannzɛ b’a wlawlaman be wun kpa o, annzɛ be ti sɛ o, ɔ fata kɛ e sɔ be nun klanman. (Zak 2:1-4) Sɛ e wun kɛ sran kun bali aɲia’n i bo naan i ngunmin ti lɛ’n, maan e se i kɛ ɔ wa tran e wun lɛ. Sɛ ɔ fata kɛ be kanngan Biblu’n nun ndɛ mma kun nun’n, maan e ukɛ i naan ɔ wun i. Asa ekun’n, maan e kan junman nga bé wá dí’n, i ndɛ e kle i. Sɛ e yo sɔ’n, é klé kɛ e ti “aklunyefuɛ.”​—Rɔmfuɛ Mun 12:13.

6. ?Sɛ e waan é yía sran mun e awlo lɔ’n, wan mun yɛ ɔ fata kɛ e dun mmua bu be akunndan-ɔn?

⁶ Maan e nin be e wla asa: Biblu’n kle kɛ blɛ sunman’n, sran’m be mannin be nga be sikeli be’n, be like be dili. Be yoli sɔ be fa kleli sran nga be sikeli be’n kɛ be kunndɛ kɛ bé trá be janvuɛ, naan be nin be tran fɔuun. (Bo Bolɛ 18:1-8; Jɔlɛ Difuɛ Mun 13:15; Lik 24:28-30) ?Sɛ e waan é yía sran mun e awlo lɔ’n, wan mun yɛ ɔ fata kɛ e dun mmua e bu be akunndan-ɔn? Maan e dun mmua bu aniaan nga e nin be o asɔnun kunngba’n nun’n be akunndan. Mɛn’n su yo tɛ kɔ i ɲrun. I sɔ’n ti’n, ɔ fata kɛ e nin e niaan mun e afiɛn mantan kpa titi. Afuɛ 2011 nun’n, e Anuannzɛ’n i ɲrun dinfuɛ’m be kacili dɔ nga Etazinin lɔ Betɛlifuɛ be fa suan Sasafuɛ Tranwlɛ’n i nun like’n. Laa’n, be yo i nnɔsua nun dɔ 6 miniti 45 su. Sanngɛ siɛn’n, be yo i nnɔsua nun dɔ 6 miniti 15 su. ?Ngue ti-ɔ? Be seli kɛ sɛ aɲia’n wie ndɛ nun’n, betɛlifuɛ’m be kwla yia be wiengu be awlo lɔ. Betɛli wie’m be fali ajalɛ kunngba’n. I sɔ’n ukali Betɛlifuɛ mun naan b’a kwla si be wun kpa.

7, 8. ?Sɛ aniaan kun ba nzra nun ijɔlɛ e asɔnun’n nun’n, wafa sɛ yɛ e kwla sɔ i nun-ɔn?

⁷ Cɛn kunngun’n, aniaan wie’m be ba nzra nun ijɔlɛ e asɔnun’n nun. Ɔ kwla yo akpasua sunianfuɛ’n, annzɛ betɛli’n i ja nunfuɛ kun, annzɛ aniaan kun m’ɔ fin  asɔnun uflɛ nun’n. Kɛ aniaan sɔ’m be ba e asɔnun’n nun’n, maan e sɔ be nun klanman. (An kanngan 3 Zan 5-8 nun.) Wafa nga e kwla yo sɔ’n, i kun yɛle kɛ maan e flɛ be e awlo lɔ naan e nin be wla asa.

⁸ Aniaan bla kun m’ɔ tran Etazinin’n seli kɛ: “Aniaan nga be ba nzra nun ijɔlɛ e asɔnun’n nun’n, e nin min wun e yia be nun sunman nin be yi mun e awlo. E sɔli i sɔ yolɛ w’a cɛ.” Be kwlaa nga be sɔli be nun’n, be wlali be fanngan. Yɛ ɔ yoli be fɛ kpa. Ɔ seli kɛ: “I sɔ mɔ e yo’n, ɔ nin a yoman e nsisɔ le.”

9, 10. (a) ?Be nga e sike be mɔ be kwla cɛ’n, be nun wie mun yɛle wan? (b) ?Be nga be sua’n w’a cɛnman’n, be kwla sike aniaan mun wie? An fa sa kun yiyi nun.

⁹ Be nga e sike be mɔ be cɛ’n: Biblu’n kle kɛ laa’n, kɛ aofuɛ to sran kun’n, ɔ mɛn i lawlɛ. (Zɔb 31:32; Filemɔn 22) Andɛ’n, ɔ fata kɛ e yo sɔ wie. Wie liɛ’n, kɛ akpasua sunianfuɛ kun kɔ asɔnun’m be nun’n, ɔ fata kɛ be mɛn i lawlɛ. Wie liɛ kusu, be nga be tran suklu nga anuannzɛ’n siesie’n be bo’n, annzɛ aniaan nga be kplan Ɲanmiɛn Sielɛ sua mun’n, ɔ fata kɛ e sike be. Asa ekun’n, aniaan nga sanvuɛsa ɲan be mɔ be sua’n saci’n, ɔ fata kɛ e sike be lele naan b’a kplan be sua’n i uflɛ. Nán maan e se kɛ be nga be sua cɛnnin’n be ngunmin yɛ ɔ fata kɛ be sike be-ɔ. Atrɛkpa’n, b’a sike aniaan mun wie pɛ. Kannzɛ e sua’n ti kaan’n, e kwla sike aniaan mun wie.

¹⁰ Aniaan kun m’ɔ tran Kore di Sidi’n kannin blɛ m’ɔ sikeli aniaan wie mɔ be ɔli anuannzɛ’n i suklu wie’m be dilɛ’n, i ndɛ. Ɔ seli kɛ: “I klikli nun’n, n sisili min bo kan. Afin blɛ sɔ nun’n, nn e nin min yi e jali ɔ nin a cɛman. Kpɛkun e sua’n ti kaan. Sanngɛ kɛ e nin aniaan sɔ mun e trannin’n, ɔ yoli e ye kpa. E wunnin i wlɛ kɛ kɛ Zoova i junman’n i dilɛ’n ti sran kun nin i yi be cinnjin’n, be klun jɔ dan.”

11. ?Ngue ti yɛ ɔ fata kɛ e sɔ aniaan nga be ba e asɔnun nun’n, be nun kpa-ɔ?

¹¹ Aniaan nga be bali asɔnun’n nun’n ɔ nin a cɛman’n: Wie liɛ’n, aniaan wie mun annzɛ awlobo wie’m be tu ko tran lika uflɛ. Atrɛkpa’n, kɛ mɔ asɔnun kun mian jasin bofuɛ’m be wun’n, i ti yɛ be kɔ-ɔ. Annzɛ kusu’n, be ti atin bofuɛ yɛ anuannzɛ’n fali be ɔli lɔ-ɔ. Kɛ sran kun kɔ asɔnun uflɛ nun annzɛ ɔ tu kɔ lika uflɛ’n, i sɔ’n timan pɔpɔ. Afin, lika nga ɔ ɔli nun’n nin kɛ ɔ tran lɔ laa’n, ɔ timan kun. Wie liɛ’n, ɔ fata kɛ ɔ suan aniɛn uflɛ, annzɛ ɔ kaci i ninnge yolɛ wafa’n. Sɛ aniaan sɔ’m be nun wie’m be o e asɔnun liɛ nun’n, e kwla yia be e awlo lɔ naan e nin be e di like. Annzɛ e nin be e kwla fite e kɔ lika wie. Sɛ e yo sɔ’n, bé kwlá ɲán janvuɛ uflɛ, yɛ be wun kpája be.

12. ?Sa benin yɛ ɔ kle kɛ ɔ timan cinnjin kɛ e tɔn like kpanngban naan y’a sɔ sran nun-ɔn?

¹² Ɔ timan cinnjin kɛ e tɔn like kpanngban naan y’a fa sɔ sran nun. (An kanngan Lik 10:41, 42 nun.) Aniaan kun kannin blɛ mɔ ɔ nin i yi be boli ngaliɛ  difuɛ junman’n, i dilɛ bo’n i ndɛ. Ɔ seli kɛ: “Blɛ sɔ nun’n, nn e te yo gbanflɛn nin talua. E siman sa kpanngban. Yɛ e wla lo e osufuɛ mun. Cɛn kun nnɔsua’n min yi i wla loli i osufuɛ mun dan. Min waan ń yó naan i wla fi be su kan, sanngɛ ngbɛn-ɔn. Kpɛkun nnɔsua nun dɔ 7 miniti 30 su’n, sran kun boboli e anuan’n. É nían-ɔn, bla kun m’ɔ suan Biblu’n nun like’n yɛ ɔ jin yɛ, ɔ nin i sa nun lomin nsan. Ɔ bali e like yolɛ. E mɛnnin i bia, yɛ e mɛnnin i nzue. Kpɛkun, e tɔnnin te nin sokola kan e mɛnnin i. E timan Suaili aniɛn’n yɛ bla’n kusu timan Angle’n.” Aniaan bian’n seli kɛ, kɛ ɔ fɛ i lɛ’n, be wa trali aniaan nga be o lɔ’n be janvuɛ. Ɔ maan, be klun wa jɔli kpa liɛ su.

13. ?Ngue ti yɛ sɛ e sɔ sran nun’n, ɔ ti kpa-ɔ?

¹³ ?Sran nun sɔlɛ’n ti tankantankan e sa nun? Sɛ ɔ ti sɔ’n, like kpa sán e wun. Yɛle kɛ, e su kwlá traman sran kpa wie i janvuɛ. Yɛ e nin sran mun e su kwlá yiyiman e ɲin su. Sɛ e sɔ sran nun’n, e ɲrun su yoman e koun. ?Sa benin mun ti yɛ wie liɛ’n, sran nun sɔlɛ’n ti kekle e sa nun-ɔn? É wá kán sa sɔ’m be nun wie’m be ndɛ.

14. ?Ngue yɛ é yó naan y’a ɲan blɛ y’a sɔ e wiengu’m be nun, annzɛ y’a wɔ be awlo lɔ-ɔ?

¹⁴ E ɲanman e ti: Zoova i sufuɛ’m be ɲanman be ti. Ɔ fata kɛ be yo ninnge kpanngban. I sɔ’n ti’n, aniaan wie’m be bu i kɛ be leman blɛ naan b’a sɔ sran nun. Sɛ e bu i sɔ wie’n, maan e kaci e akunndan’n. Maan e kunndɛ blɛ naan e fa yia e wiengu mun e awlo lɔ. Yɛ sɛ e wiengu’m be yia e be awlo’n, maan e wɔ. I sɔ yolɛ’n ti cinnjin. Afin, Ɲanmiɛn Ndɛ’n yɛ ɔ se kɛ maan e sike e wiengu-ɔ. (Ebre Mun 13:2) Kɛ e sɔ sran nun’n, ɔ ti kpa dan. Sanngɛ, kɛ ɔ ko yo naan y’a kwla yo sɔ’n, ɔ fata kɛ e yaci ninnge wie mɔ be timan cinnjin’n be yolɛ.

15. ?Ngue ti yɛ sran wie’m be bu i kɛ be kwlá sɔman sran nun be awlo lɔ-ɔ?

¹⁵ E bɔbɔ e wun akunndan nga e bu’n: Wie liɛ’n, e klo kɛ é yía sran kun e awlo lɔ, sanngɛ e sa sin bubu e. Atrɛkpa’n, e sa ɲan. Ɔ maan, e bu i kɛ sran’n i ɲrun wá yó i koun. Annzɛ kusu e leman sika. Ɔ maan, e bu i kɛ e su kwlá sɔman sran’n i nun kɛ aniaan onga mun sa. Sanngɛ, ɔ timan cinnjin kɛ e ɲan ninnge kpanngban e awlo lɔ naan y’a yia sran. Sɛ e sua’n ti yɛiin naan e nin sran e koko yalɛ klanman’n, sran’n i wun kpɛ́jɛ i.

16, 17. ?Sɛ sran nun sɔlɛ’n ti’n e koko’n, ngue yɛ ɔ fata kɛ e yo-ɔ?

¹⁶ Sɛ e kunndɛ kɛ é sɔ́ sran nun naan e klun titi e’n, nán e bu i kɛ e ngunmin yɛ ɔ yo e sɔ-ɔ. Asɔnun kpɛnngbɛn kun m’ɔ tran Angle lɔ’n seli kɛ: “Kɛ é síesíe e wun naan y’a sɔ sran nun’n, e klun kwla titi e kan. Sanngɛ, e si kɛ Zoova yɛ ɔ se kɛ e yo sɔ-ɔ. Yɛ e si kɛ é ɲán su mmlusuɛ dan. Wie liɛ bɔbɔ’n, kɛ e yia sran mun’n, kafe kan yɛ e nɔn-ɔn, kpɛkun e koko yalɛ. I sɔ’n man min aklunjuɛ.” Sɛ sran to e’n, maan e kle i kɛ i ndɛ lo e kpa. (Filipfuɛ Mun 2:4) Sran sunman be klo sa ng’ɔ juli be su’n i ndɛ kanlɛ. Ɔ maan, kɛ e yia be’n yɛ e kwla ti i sɔ ndɛ liɛ mun-ɔn. Asɔnun kpɛnngbɛn kun ekun seli kɛ: “Kɛ n yia aniaan mun min awlo lɔ’n, n si be kpa. Kpɛkun n si sa ng’ɔ o be su’n. Asa ekun’n, be kan wafa nga be sili ndɛ nanwlɛ’n i ndɛ be kle min.” Nanwlɛ, sɛ e kle be nga be to e’n kɛ be ndɛ lo e’n, be wun kpája be.

 ¹⁷ Blɛ sunman’n, aniaan bla kun m’ɔ ti atin bofuɛ’n, ɔ sike aniaan nga be kɔ anuannzɛ’n i suklu’n wie’m be dilɛ’n. Ɔ seli kɛ: “I uflɛ nun’n, min klun titili min kan. Afin min sua’n w’a cɛnman. Kpɛkun ninnge nga be o nun’n, be ti nvuɛn. Be nga be kle aniaan sɔ’m be like’n, be nun kun i yi’n yoli maan min wla guali ase kpa. Ɔ seli kɛ i nun mɔ i wun’n ti akpasua su nianfuɛ’n, aniaan nga be sike be’n be nun wie’m be leman ninnge kpanngban. Sanngɛ, Zoova junman’n i dilɛ’n ti be cinnjin. I sɔ’n, yɛ ɔ yo be fɛ kpa-ɔ. I ndɛ sɔ’n ti’n, min wla kpɛnnin ndɛ kun mɔ e bakan nun’n, e nin kan kleli e titi’n su. Ɔ seli e kɛ: ‘Ɔ flunman kɛ n ko tran kan nnya ngbɛn yɛ be di i lɛ bɔ sanngɛ klolɛ o lɛ’n.’” (Nyanndra Mun 15:17) Ɔ fataman kɛ sran sikelɛ ti’n, e koko. Afin like ng’ɔ ti cinnjin’n, yɛle kɛ maan e kle kɛ sran nga e sike be’n, be ndɛ lo e.

18, 19. ?Ngue ti yɛ sɛ e yia e niaan mun e awlo’n, é bú be wun akunndan kpa-ɔ?

¹⁸ E wiengu’m be wun akunndan nga e bu’n: ?Sɛ e asɔnun’n nun’n, aniaan kun i wun yoman e fɛ nin? Atrɛkpa’n, sran wie yoli e sa laa, yɛ e wla nin a fiman su. Sɛ e buman sran kun wun akunndan kpa’n, e su kwlá yiɛmɛn i e awlo. I sɔ’n ti, ɔ fata kɛ e kaci akunndan nga e bu sran sɔ’n i wun’n.

¹⁹ Biblu’n kle kɛ sɛ e yo e wiengu’m be kpa’n, e nin be e afiɛn kwla sɛ. E kpɔfuɛ mun bɔbɔ’n, e nin be e afiɛn kwla sɛ wie. (An kanngan Nyanndra Mun 25:21, 22 nun.) Sɛ e kloman sran kun sa, naan e  yiɛ i e awlo lɔ’n, i wun akunndan nga e bu’n kwla kaci. Yɛ e nin i e afiɛn sɛ́. Kpɛkun, sran sɔ’n i nzuɛn kpa nga ti yɛ Zoova flɛli i kɛ ɔ wa su i’n, i su yɛ é fá e ɲin é síe-ɔ. (Zan 6:44) Sɛ sran kun lafiman su kɛ é yíɛ i e awlo, naan klolɛ mɔ e klo i’n ti e yiɛ i’n, ɔ nin e kwla tra janvuɛ. ?Klolɛ mɔ e klo sran ti yɛ e yia e wiengu mun e awlo-ɔ? Filipfuɛ Mun ndɛ tre 2 i mma 3 se kɛ: “An bu sran wie’m be sran tra amun bɔbɔ.” I lɛ nun’n, maan e bu ninnge nga be si be yo kpa tra e’n, be akunndan. Atrɛkpa’n, be lafi Ɲanmiɛn su kpa. Annzɛ be si be awlɛn tra kpa. Annzɛ be yi nzuɛn kpa wie’m be nglo. Sɛ e bu be nzuɛn sɔ’m be akunndan’n, é kló be. Ɔ maan, é yía be e awlo.

20. (a) ?Ngue ti yɛ sɛ sran kun yia e’n, ɔ fata kɛ e kle kɛ be kwla lafi e su-ɔ? (b) ?Wafa sɛ yɛ e kwla kle sɔ-ɔ?

²⁰ Davidi usali kɛ: “?Anannganman, wan cɛ yɛ ɔ kwla tran ɔ sua’n nun-ɔn?” (Jue Mun 15:1) I sin’n, Davidi kannin kɛ sran nga i waan ɔ́ trán Zoova i sua’n nun’n, maan i nzuɛn’n yo kpa. I wie yɛle kɛ, maan ɔ yo sran mɔ be kwla lafi i su’n. Jue Mun 15 i mma 4 se kɛ: “Sɛ ɔ ta nda wie’n, kannzɛ ɔ wa miɛn i sa kasiɛn’n, ɔ kpɛmɛn i ndɛ ng’ɔ kannin’n i wun.” Kɛ sran kun yia e i awlo mɔ e kplin su’n, sɛ w’a yoman kɛ asamian ti’n, nán maan kasiɛn su’n, e se kɛ e kɔman kun. Afin atrɛkpa’n, sran ng’ɔ yiali e’n w’a buɛbuɛ i wun. Ɔ maan sɛ y’a ɔman’n, ɔ ti kɛ nn ɔ fɛli ngbɛn. (Matie 5:37) Sran wie’m be liɛ’n, sɛ sran kun yia be naan kasiɛn su’n sran uflɛ mɔ i sa nun yo fɛ’n yia be ekun’n, be se sran ng’ɔ dun mmua yiali be’n kɛ be su kwlá kɔman kun. Sran m’ɔ klo sran’n, ɔ yoman sɔ. Sɛ sran kun yia e’n, kannzɛ like ng’ɔ́ mán e’n ti kaan’n, maan e kle kɛ e si ye. (Lik 10:7) Sɛ kusu e su kwlá kɔman’n, maan e kan kle i ndɛ nun. Sɛ e yo sɔ’n, é klé kɛ e klo sran.

21. ?Ngue ti yɛ sɛ e bu wafa nga sran’m be yo be ninnge mun’n i akunndan’n, sran ng’ɔ yia e’n i klun jɔ́-ɔ?

²¹ Ɔ ti cinnjin kɛ kan e tran lɛ’n, wafa nga sran’m be yo be ninnge mun’n e bu i akunndan. Lika wie’m be nun’n, sɛ sran kun w’a yiaman e naan e kɔ i awlo lɔ’n, ɔ timan ndɛ. Sanngɛ, lika wie’m be nun liɛ’n, ɔ fata kɛ be yia e ka naan y’a wɔ. Asa ekun’n, lika wie’m be nun’n, kɛ be yia sran kun be awlo’n, be fa aliɛ nga be tɔn’n i nun kpafuɛ’n be mɛn i. Kpɛkun, be fɛ i onga’n be man be awlofuɛ mun. Lika wie’m be nun’n, aliɛ kunngba’n yɛ be kwlaa be di-ɔ. Lika wie’m be nun liɛ’n, kɛ be yia sran kun m’ɔ́ kɔ́’n, ɔ fa like ko uka awlofuɛ’m be sa su. Sanngɛ, lika wie’m be nun’n, sran’m be klomɛn i sɔ’n. Nvle wie’m be nun’n, sɛ e yia sran kun e awlo’n, naan ɔ ti i kpɛ klikli’n annzɛ i kpɛ nɲɔn su’n, ɔ kplinman su. Sanngɛ, nvle wie’m be nun’n, kpɛ klikli nga sran kun yia wɔ’n, sɛ w’a kplinman su’n, ɔ yomɛn i fɛ. I kwlaa yoli o, maan e yo like kwlaa nga e kwla yo’n naan sran ng’ɔ yia e’n, i klun jɔ.

22. ?Ngue ti yɛ ɔ ti cinnjin kɛ ‘sran ng’ɔ to e’n, e sike i’ ɔ?

²² Piɛli seli kɛ: “Like’n kwlaa be awieliɛ’n w’a mantan.” (1 Piɛr 4:7) Ɲrɛnnɛn ng’ɔ su wa tɔ mɛn’n su’n, be su wunmɛn i wunsu le kun. Kɛ lika’n cɛ́n m’ɔ́ sán’n, nn mɛn’n yó tɛ kɔ́ i ɲrun. I sɔ’n ti, ɔ fata kɛ e klo e niaan’m be kpa. Piɛli seli kɛ: “Sran ng’ɔ to amun’n, an sike i.” (1 Piɛr 4:9) Andɛ yɛ ɔ fata kɛ e nanti afɔtuɛ sɔ’n su kpa-ɔ. Sɛ e yo sɔ’n, e klun jɔ́ tititi.