1-3. (1) ?Wafa sɛ yɛ ɔ fata kɛ e bu ndɛ nanwlɛ m’ɔ o Biblu’n nun’n niɔn? An fa sunnzun ase be yiyi nun. (An nian foto nga be o kan like suanlɛ’n bo i bo lɛ’n.) (2) ?Kosan benin mun yɛ é wá tɛ́ be su-ɔ?

ANDƐ’N, like kun mɔ sran’m be tɛ i yo’n, yɛle kɛ kɛ be ko to like kun butiki nun’n, i sin’n be fa sa be sin. Be nga be tɛ i sɔ yo kpa’n, yɛle be nga be to like ɛntɛnɛti su’n. Wie liɛ’n, like sɔ’n timan kɛ nga be sunnzunnin’n sa, annzɛ i lika wie timan kpa. I sɔ’n ti’n, wie liɛ’n be ko kaci like sɔ’n annzɛ be kunndɛ kɛ be yi be sika’n man be.

² E liɛ’n, e su yoman ndɛ nanwlɛ’n i sɔ le. Nyanndra Mun ndɛ tre 23 i mma 23, NW se kɛ: “To nanwlɛ’n yɛ nán yo i atɛ le. Yo ngwlɛlɛ’n nin afɔtuɛ’n nin sa wlɛ wunlɛ’n be sɔ wie.” Kɛ e ko si ndɛ nanwlɛ’n, ɔ ti kɛ y’a “to” sa. Ɔ maan e kunndɛman kɛ é “yó i atɛ” annzɛ é kpɔ́ci i le. (1 Timote 2:4) Like suanlɛ klikli’n nun’n, e seli kɛ e fali blɛ kpanngban e suannin Biblu’n nun like naan y’a si ndɛ nanwlɛ’n. Aniaan wie’m be kacili be sin sili aɲanbeun ninnge mun. Wie’m be liɛ’n, be nin be osufuɛ nin be janvuɛ’m be yacili ninnge wie’m be yolɛ likawlɛ. Wie mun ekun’n, be kacili be akunndan nin be  nzuɛn’n. Yɛ wie’m be kusu’n, be yacili cɛn’m be dilɛ nin ninnge wie mɔ be nannan’m be yo be’n. E si kɛ ndɛ nanwlɛ’n m’ɔ o Biblu’n nun’n, i kpa tra like kwlaa nga e kpɔcili be’n.

³ Cɛn kun’n, Zezi fali Ɲanmiɛn Sielɛ’n sunnzunnin aata difuɛ kun. Aata difuɛ sɔ’n kunndɛ nɛnnglɛnman kpakpa mun. Kɛ ɔ wunnin kun m’ɔ ti kpa dan’n, ɔ ko yoli i sa nun ninnge’n kwlaa be atɛ fa toli. Nɛnnglɛnman sɔ’n yɛle Ɲanmiɛn Sielɛ’n i su ndɛ nanwlɛ’n. Zezi i ndɛ sɔ’n kle kɛ be nga be kunndɛ ndɛ nanwlɛ’n, bé yí i nglo kɛ ɔ ti be like nanndoliɛ. (Matie 13:45, 46) Kɛ i klikli nun’n, be kannin Ɲanmiɛn Sielɛ’n i su ndɛ nanwlɛ’n nin Biblu’n nun ndɛ cinnjin wie mun ekun be ndɛ kleli e’n, e kpɔcili ninnge wie mun naan y’a kwla fa e ɲin y’a sie su kpa. Sanngɛ, ndɛ nanwlɛ’n w’a yoman Ɲanmiɛn i sufuɛ wie’m be cinnjin kun ti’n be kpɔcili i. Kɛ ɔ ko yo naan i sɔ sa’n w’a juman e su wie’n, maan e fa ndɛ nanwlɛ’n su titi. (An kanngan 3 Zan 2-4 nun.) I sɔ’n kle kɛ ɔ fata kɛ ndɛ nanwlɛ’n i su nantilɛ’n yo e cinnjin tra like kwlaa. I liɛ’n, sɛ é kwlá sé’n, e su yomɛn i atɛ le. ?Sanngɛ wafa sɛ yɛ sran kun kwla yo ndɛ nanwlɛ’n i atɛ-ɔ? ?Yɛ ngue ti-ɔ? ?É yó sɛ naan i sɔ sa’n w’a juman e su wie le? ?Ngue yɛ ɔ kwla uka e naan y’a fa ndɛ nanwlɛ’n su titi-ɔ?

4. ?Ngue ti yɛ Zezi blɛ su’n, sran wie’m b’a nantiman ndɛ nanwlɛ’n su kun-ɔn?

⁴ Zezi blɛ su’n, sran wie’m be sɔli ndɛ nanwlɛ’n nun. Sanngɛ kɛ ɔ́ kɔ́ i ɲrun’n, b’a nantiman su kun. Cɛn kun’n, Zezi yili atrɛ kun. Ɔ yoli maan sran kpanngban kpa be ɲannin aliɛ be dili. Kɛ ɔ yoli sɔ’n, sran kpanngban sɔ’m be suli i su be ɔli Galile Jenvie’n i bue kun lɔ. Sanngɛ Zezi wa kannin ndɛ kun m’ɔ w’a yoman be fɛ mlɔnmlɔn-ɔn. Ɔ seli be kɛ: “Nanwlɛ, sɛ amu’an di-man m bɔ n kacili Sran’n min nnɛn’n, yɛ sɛ amu’an nɔn-man min mmoja’n, an su nyan-man nguan.” Kɛ Zezi kannin sɔ’n, b’a usaman nun kpa naan w’a yiyi nun w’a kle be. Be liɛ nga bé kán’n, yɛle kɛ: “Ndɛ nga ti kekle. ?Wan yɛ ɔ kwla fa su-ɔ?” Kɛ ɔ fin lɛ’n, “be nun kpanngban be tili be wun b’a su-mɛn i su kun.”—Zan 6:53-66.

5, 6. (1) ?Ngue ti yɛ andɛ’n, aniaan wie’m be yacili ndɛ nanwlɛ’n i su nantilɛ-ɔ? (2) ?Blɛ sunman’n, wafa sɛ yɛ i sɔ sa’n ju be su-ɔ?

⁵ Andɛ kusu’n, aniaan wie’m be yacili ndɛ nanwlɛ’n i su falɛ. Wie’m be liɛ’n, kɛ anuannzɛ’n wa yiyili Biblu’n nun ndɛ mma wie’m be nun uflɛ’n, w’a yoman be liɛ’n su. I ti yɛ be yoli sɔ-ɔ. Wie’m be liɛ’n, aniaan kun m’ɔ di junman dan anuannzɛ nun’n, ɔ yoli like wie annzɛ ɔ kannin ndɛ wie m’ɔ loli be ngasi-ɔ. Wie’m be kusu’n, kɛ aniaan kun fali Biblu’n mannin be afɔtuɛ’n, w’a yoman be fɛ. Aniaan wie’m be nin be wiengu Klistfuɛ kun be kacikacili be nuan. Wie mun ekun be liɛ’n, be fa be nga be nin Ɲanmiɛn b’a bu’n annzɛ e kpɔfuɛ’m be ato ndɛ’m be su. Nanwlɛ, e kwlá kanman sa fanunfanun nga ti yɛ sran wie’m be yacili Zoova i sulɛ’n, be kwlaa be ndɛ. (Ebre Mun 3:12-14) Sɛ ɔ ti kɛ be lafili Zezi su kɛ akoto Piɛli sa’n, nn b’a yoman sɔ. Kɛ ndɛ nga Zezi kannin ti’n sran kpanngban be ɔli’n, ɔ usɛli i akoto mun sɛ be kunndɛ kɛ bé kɔ́ wie o. Piɛli tɛli i su kɛ: “?Wan sin yɛ é kɔ́-ɔ? Ɔ ndɛ’n yɛ maan e nyan anannganman nguan-an.”—Zan 6:67-69.

 ⁶ Wie liɛ’n, kɛ be sie mmeli kun nzue nuan’n, aunmuan’n fɛ i blɛblɛblɛ kɔ nzue’n i afiɛn lɔ. Kɛ ɔ́ yó sɔ’n, be wunman nun. I wafa kunngba’n, sran wie’m be liɛ’n, blɛblɛblɛ yɛ be yaci ndɛ nanwlɛ’n i su nantilɛ-ɔ. Atrɛkpa’n, kɛ i sɔ sa’n jú be su’n, b’a siemɛn i nzɔliɛ. I sɔ’n ti’n, Biblu’n wla e fanngan kɛ e nian e wun su kpa. Afin, “sɛ y’a yo-man sɔ-ɔ ɔ cɛ-man naan y’a to a fuan atin’n.” (Ebre Mun 2:1) Blɛ sunman’n, sran ng’ɔ yaci ndɛ nanwlɛ’n i su nantilɛ’n, nán kɛ ɔ sunnzunnin kɛ ɔ́ yó sɔ ti-ɔ. Sanngɛ kɛ m’ɔ w’a niɛnmɛn i wun su ti’n, ɔ nin Zoova be afiɛn w’a mantanman kpa kun. Kpɛkun i agualiɛ su’n, be afiɛn sacili. ?É yó sɛ naan i sɔ sa’n w’a juman e su le?

7. ?É yó sɛ naan y’a yoman ndɛ nanwlɛ’n, i atɛ le?

⁷ Kɛ ɔ ko yo naan y’a kwla nanti ndɛ nanwlɛ’n su titi’n, ɔ fata kɛ e sɔ ndɛ kwlaa nga Zoova kan kle e’n, be nun klanman. Ɔ fata kɛ ndɛ nanwlɛ’n yo e cinnjin tra like kwlaa. Sa’n kwlaa nun’n, maan e nanti Biblu’n nun mmla’m be su. Kɛ Famiɛn Davidi srɛ́ Ɲanmiɛn’n, ɔ seli kɛ ‘ɔ́ fá nanwlɛ atin’n su.’ (Jue Mun 25:5) Davidi fuali kpa kɛ ɔ́ nánti ndɛ nanwlɛ’n su titi. Maan e kusu e fua sɔ wie. Afin sɛ y’a yoman sɔ’n, ɔ cɛman naan e ɲin w’a tran ninnge nga e kpɔcili be’n, be su ekun. Kpɛkun é sé kɛ é kɔ́ be kunndɛlɛ ekun. Sanngɛ e kwlá seman kɛ é nánti Biblu’n nun ndɛ nanwlɛ wie’m be su naan é yáci wie lɛ. Ɔ fata kɛ e nanti ndɛ ‘nanwlɛ’n i kwlaa’ su. (Zan 16:13) Like suanlɛ klikli’n nun’n, e kannin like nnun mɔ e yoli be naan y’a kwla si ndɛ nanwlɛ’n naan y’a fa su’n, be ndɛ. Siɛn’n, maan e kan like nga é yó naan e ɲin w’a tranman ninnge nga e kpɔcili be’n be su ekun’n, be ndɛ.—Matie 6:19.

8. ?Wafa sɛ yɛ blɛ nga Klistfuɛ kun fa yo i ninnge mun’n kwla yo maan ɔ kpɔci ndɛ nanwlɛ’n niɔn? An fa sunnzun ase kun.

⁸ E blɛ’n. Ɔ ti cinnjin kɛ e nian e wun su kpa. Afin sɛ y’a yoman sɔ’n, ɔ cɛman naan y’a fa blɛ kpanngban y’a yiyi e ɲin su, annzɛ y’a wɔ ɛntɛnɛti su annzɛ y’a nian televiziɔn. Ninnge sɔ’m be yolɛ’n timan tɛ sɔ liɛ. Sanngɛ i tɛ lika’n, yɛle kɛ e kwla fa blɛ ng’ɔ fata kɛ e fa suan Biblu’n nun like’n, annzɛ e fa bo jasin fɛ’n, e yo i sɔ ninnge mun. Be flɛ bla kun kɛ Ema. * (An nian nzɔliɛ’n i su ndɛ’n.) I nun m’ɔ te yo kaan’n, ɔ klo nnɛn kpanngɔ su fulɛ kpa. Kɛ ɔ́ kɔ́ i ɲrun’n, ɔ wa wunnin i wlɛ kɛ blɛ ng’ɔ fa yo i sɔ like’n ɔ sɔnnin dan. Ɔ maan ɔ fali ajalɛ kɛ ɔ́ káci i sa. Aniaan bla kun mɔ be flɛ i kɛ Kori Wɛli’n, i su ndɛ’n yoli Ema i ye dan. Laa’n, nnɛn kpanngɔ su fulɛ’n yɛ ɔ ti aniaan bla sɔ’n i junman-ɔn. * (An nian nzɔliɛ’n i su ndɛ’n.) Kɛ é sé yɛ’n, Ema tu i klun su Zoova. Yɛ ɔ fɛ i wun mantan i awlofuɛ mun nin i janvuɛ mun mɔ be su Zoova wie’n, be kpa tra laa’n. Kɛ m’ɔ fɛ i blɛ’n  yo ninnge kpakpa mun ti’n, ɔ nin Ɲanmiɛn be afiɛn mantan. Kpɛkun i klun jɔ.

9. ?Ngue yɛ ɔ kwla yo maan aɲanbeun ninnge’m be yo e cinnjin dan-ɔn?

⁹ Aɲanbeun ninnge mun. Sɛ e kunndɛ kɛ é nánti ndɛ nanwlɛ’n su’n, ɔ fataman kɛ aɲanbeun ninnge’m be yo e cinnjin dan. Kɛ e sili ndɛ nanwlɛ’n, e wunnin i wlɛ kɛ Zoova i sulɛ’n ti cinnjin tra aɲanbeun ninnge’m be kunndɛlɛ’n. Ɔ maan ndɛ nanwlɛ’n ti’n, e yacili ninnge sɔ’m be kunndɛlɛ. Sanngɛ kɛ ɔ́ kɔ́ i ɲrun’n, e kwla wun kɛ e wiengu’m be to ajulisu mannzin nga b’a yi be uflɛuflɛ’n. Ɔ maan e kwla bu i kɛ, kɛ mɔ be kwla to be klunklo like ti’n, be di aklunjuɛ naan like kpa su san e wun. Kɛ i sɔ akunndan ko ba sran kun ti nun’n, i ɲin yiman like ng’ɔ le i’n kun. Kpɛkun, ɔ kwla fɛ i ɲin sie i aɲanbeun ninnge’m be kunndɛlɛ’n su tra Zoova i sulɛ’n. I sɔ sa’n wie yɛ ɔ juli Demasi su-ɔ. “Mɛn’n nun ninnge” mɔ Demasi klo be’n ti’n, w’a suman akoto Pɔlu su kun. (2 Timote 4:10) Atrɛkpa’n, Demasi kloli aɲanbeun ninnge’m be kunndɛlɛ’n trali Ɲanmiɛn i sulɛ’n. Atrɛkpa kusu’n, w’a kunndɛman kɛ ɔ́ klɛ́n i wun dí Ɲanmiɛn i junman’n kɛ Pɔlu sa. ?Ngue yɛ Demasi i su ndɛ’n kle e-ɔ? Atrɛkpa laa’n, e klo aɲanbeun ninnge’m be kpa. Ɔ maan, sɛ y’a nianman e wun su kpa’n, e kwla klo ninnge sɔ mun ekun. Kpɛkun ninnge sɔ’m be klolɛ dan ti’n, e kwla yaci ndɛ nanwlɛ’n i su nantilɛ.

10. ?Wan mun yɛ ɔ fataman kɛ e yaci be lɛ naan be saci e ti nun-ɔn?

¹⁰ E osufuɛ nin e janvuɛ mun. Sɛ e kunndɛ kɛ é nánti ndɛ nanwlɛ’n su titi’n, ɔ fataman kɛ e tran lɛ naan be nga be suman Zoova’n, be saci e ti nun. Kɛ e ko si ndɛ nanwlɛ’n, wafa nga e nin e janvuɛ nin e osufuɛ nga be suman Zoova’n e nanti’n, ɔ kaci. Wie’m be tanndanman e ɲrun. Sanngɛ wie’m be liɛ’n, be kle e yalɛ. (1 Piɛr 4:4) Ɔ nin i sɔ ngba’n, e mian e ɲin e yo like kwlaa nga e kwla yo naan e nin be e afiɛn w’a sɛ titi’n. Kpɛkun e yo be ye wie. E kunndɛ kɛ be klun jɔ e wun. Sanngɛ, nɛ́n i sɔ’n ti yɛ é fɔ́n Zoova i mmla mun-ɔn. Kɛ nga 1 Korɛntfuɛ Mun 15:33 fa kan sa’n, ɔ fataman kɛ e tra sran kwlaa janvuɛ. Be ng’ɔ fata kɛ e nin be e afiɛn mantan kpa’n, yɛle Zoova i sufuɛ mun.

11. ?É yó sɛ naan y’a yaci akunndan tɛtɛ bulɛ’n nin ayeliɛ tɛtɛ mun?

¹¹ Akunndan tɛtɛ bulɛ’n nin ayeliɛ tɛtɛ mun. Sɛ e kunndɛ kɛ é nánti ndɛ nanwlɛ’n su titi’n, ɔ fata kɛ e yo sanwun Zoova ɲrun. (Ezai 35:8; An kanngan 1 Piɛr 1:14-16 nun.) Kɛ e sili ndɛ nanwlɛ’n, e kacili wafa nga e yo ninnge mun naan y’a kwla nanti Biblu’n nun mmla’m be su. E nun wie’m be miannin be ɲin kpa naan b’a kwla kaci be nzuɛn’n. Sanngɛ ɔ fata kɛ e mian e ɲin kpa titi naan ayeliɛ tɛ wie w’a kaciman e nzuɛn. ?Ngue yɛ ɔ kwla uka e naan y’a tɔman sa tɛ yolɛ’n nun-ɔn? Maan e bu like nga Zoova yoli naan y’a kwla yo sanwun’n i akunndan. Ɔ fɛli i Wa Zezi Klist kpɔli e ti. (1 Piɛr 1:18, 19) Sɛ e bu tɛ sɔ’n i cinnjin m’ɔ ti’n i akunndan titi’n, é mían e ɲin é yó like kwlaa nga e kwla yo naan y’a yo sanwun Zoova ɲrun’n.

12, 13. (1) ?Ngue ti yɛ ɔ fata kɛ e wun like nga ti yɛ Zoova kloman kɛ e di cɛn wie mun’n, i wlɛ weiin-ɔn? (2) ?Kosan benin yɛ é wá tɛ́ su siɛn’n niɔn?

¹² Cɛn’m be dilɛ nin e nannan’m be nzuɛn’n. Wie liɛ’n, kɛ e awlofuɛ mun annzɛ  e wiengu junman difuɛ mun annzɛ e wiengu suklu ba’m bé dí cɛn wie mun’n, be kunndɛ kɛ e di wie. Kusu nn cɛn sɔ’m be dilɛ’n timan Zoova i klun su. ?Ngue yɛ é yó naan y’a fɔnman Zoova wun-ɔn? Ɔ fafa kɛ e wun sa nga ti yɛ Zoova klun jɔman cɛn sɔ’m be dilɛ’n su’n, i wlɛ weiin. E kwla kunndɛ cɛn sɔ’m be su ndɛ wie mun e fluwa’m be nun. I liɛ’n, é sí wafa nga be boli cɛn sɔ’m be dilɛ bo’n. Sɛ e bu like nga ti yɛ ɔ fataman kɛ e di cɛn sɔ’m be su akunndan kpa’n, é láfi su kpa kɛ e o nanwlɛ atin’n su, naan e yo “sa ng’ɔ yo e Min’n i fɛ’n.” (Efɛzfuɛ Mun 5:10) Sɛ e lafi Zoova su naan e fɛ i nuan ndɛ su’n, e su yoman srongble.—Nyanndra Mun 29:25.

¹³ E kunndɛ kɛ é nánti ndɛ nanwlɛ’n i atin’n su lele mɛn uflɛ nun lɔ. ?Ngue yɛ é yó naan y’a kwla nanti ndɛ nanwlɛ’n i atin’n su tititi-ɔ? Maan e kan like nsan mɔ e kwla yo’n be ndɛ.

14. (1) ?Ngue ti yɛ sɛ e suan Biblu’n nun like titi’n, e su kpɔciman ndɛ nanwlɛ’n le-ɔ? (2) ?Ngue ti yɛ ngwlɛlɛ’n nin afɔtuɛ’n nin sa wlɛ wunlɛ’n be ti cinnjin man e-ɔ?

¹⁴ Maan e suan Biblu’n nun like titi, yɛ e bu like nga e suan’n i su akunndan kpa. Maan i sɔ yolɛ’n kaci e nzuɛn. Sɛ e yo sɔ titi’n, é kló ndɛ nanwlɛ’n, kpɛkun é fúa kpa kɛ e su kpɔcimɛn i le. Nyanndra Mun ndɛ tre 23 i mma 23, NW se kɛ: “To nanwlɛ’n yɛ nán yo i atɛ le. Yo ngwlɛlɛ’n nin afɔtuɛ’n nin sa wlɛ wunlɛ’n be sɔ wie.” Nán ndɛ nanwlɛ m’ɔ o Biblu’n nun’n i silɛ ngunmin su yɛ ɔ fata kɛ e ka-ɔ. Maan e nanti su wie. E wun sa wlɛ. I sɔ’n ti’n, e wun Zoova i ndɛ ng’ɔ kan be’n, be wlɛ kpa. Ɔ maan, e si kɛ i ndɛ’m be sansanman be wun. Asa ekun’n, e si ngwlɛlɛ. Ɔ maan e wun i wlɛ kɛ ɔ fata kɛ e nanti ndɛ nga e si be’n be su. Ɔ ju wie’n, Zoova fɛ i nuan ndɛ’n man e afɔtuɛ. Yɛle kɛ ɔ fa e ɲin sie i nzuɛn wie mun m’ɔ fata kɛ e wla be ase’n, be su. Afɔtuɛ sɔ mɔ Zoova man e’n, i kpa tra sika lele. I sɔ’n ti’n, ɔ fata kɛ e sɔ nun klanman naan e yo i nuan su sa ndɛndɛ.—Nyanndra Mun 8:10.

15. ?Wafa sɛ yɛ ndɛ nanwlɛ’n kwla sasa e kɛ kplo sa-ɔ?

¹⁵ Maan e nanti ndɛ nanwlɛ’n su cɛn kwlakwla. Biblu’n nun’n, be fa ndɛ nanwlɛ’n be sunnzun kplo nga sonja’m be fa ci be bo’n. (Efɛzfuɛ Mun 6:14) Lalafuɛ nun’n, kplo nga sonja’m be fa ci be bo’n, ɔ sasa be bo lenge’n. Sanngɛ, ɔ fata kɛ be mian nun kpa. Afin sɛ ɔ kponzo be bo’n, ɔ su kwlá sasaman be. I wafa kunngba’n, sɛ e fa ndɛ nanwlɛ’n e ci e bo kɛ kplo sa’n, ɔ́ úka e naan y’a buman akunndan tɛtɛ. Kpɛkun ɔ́ yó maan é fá ajalɛ kpakpa mun. Kɛ sa kekle wie tɔ e su’n, annzɛ e konvi sɔ sa tɛ’n, ndɛ nanwlɛ mɔ e si i’n ti’n, e kwla ɲan wunmiɛn e yo sa kpa. Ka naan  sonja kun w’a ɔ alɛ kunlɛ’n, ɔ nian sɛ i kplo’n ci i bo o. I wafa kunngba’n, ɔ fata kɛ e nian sɛ e nanti ndɛ nanwlɛ’n su cɛn kwlakwla o. Asa kusu’n, ɔ fata kɛ sonja kun fɛ i tokofi’n sɛn i bo naan w’a ɔ alɛ kunlɛ’n. É wá wún wafa nga e kusu e kwla yo sɔ wie’n.

16. ?Ngue ti yɛ kɛ e kle sran’m be ndɛ nanwlɛ’n i sɔ’n uka e naan y’a kwla nanti su titi-ɔ?

¹⁶ Maan e mian e ɲin e kle sran’m be ndɛ nanwlɛ’n. Be fa Biblu’n be sunnzun tokofi. Sonja ng’ɔ si alɛ kun kpa’n, i ɲin kpɛmɛn i tokofi m’ɔ sɛn i bo’n su mlɔnmlɔn. E kusu, ɔ fataman kɛ e ɲin kpa Biblu’n su mlɔnmlɔn. Maan i nun ndɛ’n yo e cinnjin kpa. (Efɛzfuɛ Mun 6:17) E ngba e kwla yo kɛ like klefuɛ kun m’ɔ “kan ndɛ nanwlɛ-ɔ ɔ kpɛ-mɛn i wun’n” sa. (2 Timote 2:15) Kɛ e fa Biblu’n e kle sran’m be like’n, e si ndɛ nanwlɛ’n i kpa, yɛ e klo i kpa tra laa’n. Ɔ maan e kunndɛ kpa kɛ é nánti su tititi.

17. ?Ngue ti yɛ ndɛ nanwlɛ’n i silɛ’n ti e cenjele like dan-ɔn?

¹⁷ Zoova yrali e su dan kpa. Yɛle kɛ, ɔ tikeli e ɲin maan e sili ndɛ nanwlɛ’n. I sɔ’n ti’n, e nin i e afiɛn kwla mantan kpa. Nanwlɛ, i sɔ’n ti e cenjele like dan. Zoova w’a kle e like kpanngban. Sanngɛ sɛ é kwlá sé’n, i su kan yɛ w’a fiti w’a kle e-ɔ. Afin ɔ seli kɛ ɔ́ klé e like naan kɛ ɔ́ fá yó’n w’a fa yo. Sɛ e le nɛnnglɛnman wie’n, é sɛ́sɛ́ i kpa naan w’a mlinman. Ɔ fata kɛ e yo ndɛ nanwlɛ’n i sɔ wie. Sɛ e ‘to nanwlɛ’n, nán yo i atɛ le.’ I liɛ’n, kɛ Davidi sa’n, e kusu é sé Zoova kɛ: “Yo maan n fa ɔ nanwlɛ atin’n.”—Jue Mun 25:5.