?KƐ A kunndɛ kɛ á sí dɔ’n, ngue yɛ a yo-ɔ? Atrɛkpa’n, a nian ɔ mɔntri’n nun. Ɔ maan, sɛ dɔ kun nin miniti 30 yɛ w’a ju’n, á wún i wlɛ. ?Sɛ ɔ janvuɛ kun usa ɔ kɛ dɔ benin yɛ w’a ju’n, á tɛ́ i su sɛ?

Wafa nga be bo dɔ lika kun nun’n, ɔ nin lika uflɛ nun liɛ’n timan kun. Dɔ nga lika wie’m be nun’n be se kɛ 1:30, lika uflɛ’n be se kɛ 13:30. Sanngɛ lika wie mun ekun be nun’n, be se kɛ ɔ ka miniti 30 naan nnɔsua nun dɔ 2 w’a ju.

?Wafa sɛ yɛ laa Ɲanmiɛn i sufuɛ’m be blɛ su’n, sran’m be bo dɔ’n niɔn? Wafa nga be bo dɔ’n, ɔ ti fanunfanun wie. Biblu’n i bue nga i klikli nun’n be klɛli i Ebre nun’n, ɔ kle kɛ, kɛ sran’m bé bó dɔ’n, be se kɛ be o “ngwlɛmun,” annzɛ “wia jran” annzɛ “midi su,” annzɛ kusu “nnɔsua.” (Bo Bolɛ 8:11; 19:27; 43:16; Mmla’n 28:29; 1 Famiɛn Mun 18:26) Sanngɛ, ɔ ju wie’n, dɔ trele kun yɛ be bo-ɔ.

Jɔlɛ Difuɛ Mun ndɛ tre 7, i mma 19 kle kɛ blɛ sɔ nun’n, wie liɛ’n kɛ sran’m bé bó dɔ’n, be se kɛ: “Lika’n w’a bu nun.” Zezi blɛ su’n, kɛ lika’n san lele m’ɔ́ fá cɛ́n’n, be kpɛkpɛli blɛ sɔ’n nun nnan. Kɛ Glɛki nin Rɔmunfuɛ’m be yoli sɔ wie-ɔ.

Zezi Klist i jasin fɛ nga i sɔnnzɔnfuɛ nnan’m be klɛli’n nun’n, be kannin wafa nga be kpɛkpɛli blɛ sɔ nun’n i ndɛ kpɛ sunman. I wie yɛle kɛ, Matie 14:25 se kɛ “akɔ nyinman klikli su” yɛ Zezi nantili nzue’n su naan w’a to i sɔnnzɔnfuɛ’m be lɔ-ɔ. Kɛ Zezi bú ɲanndra kun’n, ɔ seli kɛ: “Sɛ awlo bo kpɛn kun si kɔnguɛ dɔ nga awiefuɛ’n bá su’n, ɔ́ trán mínndɛ i, ɔ su yaci-mɛn i lɛ kɛ ɔ fiti i sua’n.”—Matie 24:43.

Kɛ Zezi wlɛ́ i sɔnnzɔnfuɛ’m be fanngan kɛ be ɲin tran su titi’n, ɔ kannin dɔ fanunfanun nnan sɔ’m be ndɛ. Ɔ seli be kɛ: “An si-man cɛn nga awlo kpɛn’n bá-a, sɛ nnɔsua o, sɛ kɔnguɛ o, sɛ akɔ nyinman klikli su o, sɛ nglɛmun o.” (Mark 13:35) “Nnɔsua” nga Zezi kɛn i ndɛ’n, ɔ bo i bo kɛ wia’n ko tɔ’n lele fa ju dɔ 21 su. “Kɔnguɛ” ng’ɔ kɛn i ndɛ’n ɔ bo i bo dɔ 21 su lele fa ju kɔnguɛ mbluniɛn nun. “Akɔ nyinman klikli su” m’ɔ kɛn i ndɛ’n, ɔ bo i bo kɔnguɛ mbluniɛn nun lele fa ju aliɛ njɛnniɛn su dɔ 3 su. Atrɛkpa’n, blɛ sɔ nun mɔ akɔ ɲinman klikli’n bo’n, yɛ sran’m be trali Zezi-ɔ. (Mark 14:72) Yɛ “nglɛmun” nga Zezi kɛnnin i ndɛ’n, ɔ bo i bo aliɛ njɛnniɛn su dɔ 3 su lele fa ju blɛ mɔ wia’n tu i bo’n.

Kannzɛ blɛ sɔ nun’n, sran’m be leman mɔntri kɛ e sa’n, sanngɛ be le be wafa nga be bo dɔ’n.