1. ?Sɛ y’a nianman e wun kpa’n, akunndan benin yɛ e kwla bu-ɔ?

ƝANMIƐN i nuan ndɛ mɔ e si i’n, i su nantilɛ’n timan pɔpɔ manman e. Like nga ti yɛ ɔ ti sɔ’n, i kun yɛle kɛ, ɔ fata kɛ e yo wun ase kanfuɛ naan y’a kwla yo sa ng’ɔ ti kpa’n. Kusu, mɛn’n i awieliɛ blɛ nga nun’n, kɛ ɔ yo naan e yo wun ase kanfuɛ’n, ɔ ti kekle. Afin, sran sunman ‘be bu be bɔbɔ be wun akunndan, be yo sika klofuɛ, be di be nuan, be tu be wun’ yɛ be ‘siman be wun su nian.’ (2 Timote 3:1-3) E mɔ e su Ɲanmiɛn’n, e si kɛ nzuɛn sɔ’m be ti tɛ. Sanngɛ, sɛ y’a nianman e wun kpa’n, e kwla bu i kɛ be nga be le i sɔ nzuɛn’m be ninnge’m be yo ye be sa nun, naan be di aklunjuɛ. (Jue Mun 37:1; 73:3) I sɔ’n ti’n, e kwla se e wun kɛ: ‘?Sɛ min wiengu’m be ninnge liɛ’m be lo min tra min bɔbɔ liɛ mun’n, ɔ timan min wun yalɛ klelɛ ngbɛn yɛ ɔ o lɛ-ɔ? ?Sɛ n yo wun ase kanfuɛ’n, sran’m be ɲin yí min?’ (Lik 9:48) Sɛ y’a nianman e wun su naan e bu akunndan kɛ mɛn nunfuɛ’m be sa’n, i bo gúa tɛ. Yɛle kɛ, e nin e niaan mun e afiɛn kwla saci. Asa ekun’n, sran’m be su wunman kɛ e  ti Klistfuɛ sakpa. Sanngɛ, sɛ e suan laa Ɲanmiɛn i sufuɛ nga be yoli wun ase kanfuɛ’n be su like, naan e nian be ayeliɛ’n su’n, é ɲán su ye kpa.

2. ?Kosan benin mun yɛ é wá tɛ́ be su like suanlɛ nga nun-ɔn?

² ?Ngue ti yɛ laa sran wie’m be kwla kacili Ɲanmiɛn i janvuɛ-ɔ? ?Ngue yɛ be yoli mɔ i ti yɛ Ɲanmiɛn klun jɔli be wun-ɔn? ?Ngue yɛ maan be ɲannin wunmiɛn be yoli sa ng’ɔ ti kpa’n niɔn? Sɛ e kanngan sran sɔ’m be su ndɛ nga Biblu’n kan’n nun naan e bu su akunndan’n, é láfi Ɲanmiɛn su kpa trá laa’n.

3, 4. (1) ?Ninnge fanunfanun benin mun yɛ Zoova fa kle e like-ɔ? (2) ?Ngue ti yɛ ɔ fataman kɛ e ka Ɲanmiɛn ndɛ’n, i silɛ ngunmin su-ɔ?

³ Zoova man e afɔtuɛ yɛ ɔ kle e like naan y’a kwla lafi i su kpa titi. Ninnge fanunfanun ng’ɔ fa yo sɔ’n, yɛle Biblu’n, nin fluwa nga anuannzɛ’n yi be’n, nin e ɛntɛnɛti adrɛsi’n, nin JW televiziɔn, ɔ nin e aɲia kanngan nin dandan mun. Sanngɛ, Zezi kleli kɛ nán e ka Ɲanmiɛn ndɛ’n i silɛ’n i ngunmin su. Afin, ɔ seli kɛ: ‘Min aliɛ’n yɛle sran ng’ɔ sunmannin min’n i klun sa’n yolɛ nin junman ng’ɔ mannin min’n i bo guagualɛ.’—Zan 4:34.

⁴ Zezi seli kɛ, kɛ ɔ yo Ɲanmiɛn i klun sa’n, ɔ ti kɛ aliɛ yɛ ɔ su di sa. Kɛ e ɲan aliɛ kpa e di’n, e wun kpaja e, yɛ e ɲan wunmiɛn. I wafa kunngba’n, sɛ e yo Ɲanmiɛn i klun sa’n, e wun kpája e kpɛkun é láfi i su kpa. I wie yɛle kɛ, ɔ ju wie’n, kɛ é kɔ́ jasin fɛ bolɛ’n, afɛ’n o e su. Sanngɛ, kɛ e ko bo jasin lele mɔ e sa e sin awlo’n, e wun kɛ e wun kpaja e, yɛ e klun ti jɔwa.

5. ?Sɛ e ti ngwlɛlɛfuɛ’n, mmlusuɛ benin yɛ é ɲɛ́n i-ɔ?

⁵ Kɛ e yo like nga Zoova se e kɛ e yo’n, e kle kɛ e ti ngwlɛlɛfuɛ. (Jue Mun 107:43) Be nga be ti ngwlɛlɛfuɛ kusu’n, be liɛ su ti ye dan. Afin, Biblu’n se kɛ: “Ninnge nga be to be gua kpan’n, [ngwlɛlɛ’n] ɔ yo nɔnnin tra be. [...] Be nga be nyɛn i’n, ɔ man be nguan.” (Nyanndra Mun 3:13-18) Zezi seli kɛ: “Sɛ an si sa sɔ’n naan an fa su’n, amun liɛ su ti ye.” (Zan 13:17) Sɛ Zezi i sɔnnzɔnfuɛ’m be fa like ng’ɔ kleli be’n su’n, bé dí aklunjuɛ tititi. Nanwlɛ, like nga Zezi kleli’n nin i ajalɛ’n ng’ɔ kleli be’n, yɛ ɔ fata kɛ ɔ yo be cinnjin-ɔn.

6. ?Ngue ti yɛ ɔ ti cinnjin kɛ e nanti like nga be kleli e’n su titi-ɔ?

⁶ Mankanninsiɛn’m be suannin like naan b’a kwla yo moto annzɛ loto nga be sacili’n. Kannzɛ bɔbɔ mankanninsiɛn kun di i junman’n w’a cɛ’n, sanngɛ, ɔ fata kɛ ɔ nian like nga be kleli i’n su naan w’a kwla di i junman’n i kpa titi. I wafa kunngba’n, ɔ fata kɛ e nanti like nga be kleli e’n su. I klikli nun’n, kɛ be kleli e Biblu’n nun ndɛ’n mɔ e nantili su’n, e dili aklunjuɛ. Sanngɛ, kɛ ɔ ko yo naan y’a di aklunjuɛ titi’n, ɔ fata kɛ e nanti like nga Zoova kle e’n su titi.

7. ?Ngue yɛ ɔ fata kɛ e yo naan y’a ɲan laa Ɲanmiɛn i sufuɛ’m be su ndɛ’n i su ye-ɔ?

⁷ Sa wie’m be nun’n, kɛ ɔ yo naan e kan e wun ase’n, ɔ kwla yo kekle man e. Like suanlɛ nga nun’n, é wá fá e ɲin é síe i sa sɔ’m be su. Kpɛkun, é wá wún wafa nga laa Ɲanmiɛn i sufuɛ nanwlɛfuɛ’m be kannin be wun ase’n. Nán e kanngan be su ndɛ’n nun e guɛ i lɛ sa ngbɛn. Sanngɛ, maan e bu like nga be yoli’n i su akunndan, naan e nian be ayeliɛ’n su.

8, 9. ?Wafa sɛ yɛ Sa Nga Be Yoli’n 14:8-15 kle kɛ Pɔlu ti wun ase kanfuɛ-ɔ? (An nian desɛn ng’ɔ o kan like suanlɛ’n bo i bo lɛ’n.)

⁸ Ɲanmiɛn klo kɛ ɔ́ “dé sran’m be kwlaa naan be wun sa ng’ɔ ti nanwlɛ’n i wlɛ kpa.” (1 Timote 2:4) ?Be nga be nin a siman ndɛ nanwlɛ’n, wafa sɛ yɛ e bu be-ɔ? Akoto Pɔlu boli jasin fɛ’n kleli Zuifu mɔ be si Zoova’n. Sanngɛ, ɔ boli jasin fɛ’n kleli amuin sɔfuɛ mun wie. I nun m’ɔ́ bó jasin fɛ’n klé amuin sɔfuɛ mun’n, sa kun juli. Sa sɔ’n nun’n, Pɔlu kleli kɛ ɔ ti wun ase kanfuɛ.

⁹ Kɛ Pɔlu tú i ajalɛ klikli’n ɔ́ kó bó jasin fɛ’n, ɔ nin Barnabasi be juli klɔ kun mɔ be flɛ i kɛ Listri’n su. Be nga be o lɔ mɔ be kan Likaonin aniɛn’n, be manmannin Pɔlu nin Barnabasi. Yɛ be fali be amuin nga be flɛ be kɛ Zesi nin Ɛɛmɛsi be dunman’n tɔnnin be. ?I sɔ’n yoli Pɔlu nin Barnabasi be fɛ? ?Be buli i kɛ be su kleman be yalɛ kɛ klɔ nɲɔn nga be dun mmua ɔli su lɔ’n sa? ?Be buli i kɛ be wun yo sran’m be fɛ naan i ti’n, bé síe be su bé tíe jasin fɛ’n? Ɔ si’ɛ mlɔnmlɔn! Biblu’n kle kɛ be fali ya dan kpa, yɛ be kpannin kekle be seli kɛ: “?Nja mun, nguɛ ti yɛ an yo sɔ ɔ? Nán an sɔ ye, e ti sran kɛ amun sa wie.”—Sa Nga Be Yoli’n 14:8-15.

10. ?Ngue ti yɛ Pɔlu nin Barnabasi b’a bumɛn i kɛ be ti kpa tra be nga be kan Likaonin aniɛn’n niɔn?

¹⁰ Pɔlu nin Barnabasi be seli Likaonin lɔfuɛ’m be kɛ be ti sran kɛ be sa. Nán kɛ be ti amuin sɔfuɛ wie ti-ɔ. Sanngɛ, be ndɛ’n i bo yɛle kɛ, fɔ o be nun wie. Ɲanmiɛn yɛ ɔ sunmannin Pɔlu nin Barnabasi kɛ be ko bo jasin fɛ’n niɔn. (Sa Nga Be Yoli’n 13:2) Asa ekun’n, Ɲanmiɛn kpali be sieli be ngunmin, yɛ be lafi su kɛ bé kɔ́ ɲanmiɛn su. Sanngɛ, b’a bumɛn i kɛ be ti kpa tra amuin sɔfuɛ sɔ mun. Be wunnin i wlɛ kɛ, sɛ be sɔ jasin fɛ’n nun klanman’n, bé kɔ́ ɲanmiɛn su wie.

11. ?Kɛ é bó jasin fɛ’n, wafa sɛ yɛ e kwla kle kɛ e ti wun ase kanfuɛ kɛ Pɔlu sa-ɔ?

¹¹ Like nga Ɲanmiɛn i sufuɛ kun kwla yo fa kle kɛ ɔ ti wun ase kanfuɛ’n, i kun yɛle nga Pɔlu yoli’n. Nán e bu i le kɛ jasin fɛ’n mɔ e bo’n, annzɛ sa fanunfanun nga Zoova maan e kwla yo be’n ti’n, e ti e liɛ ngunmin. I lɛ nun’n, maan e tinuntinun e usa e wun kɛ: ‘?Wafa sɛ yɛ n bu min jasin bowlɛ nun lɔfuɛ mun-ɔn? ?N bu sran akpasua wie’m be wun akunndan tɛ?’ Lika kwlaa nga Zoova i Lalofuɛ’m be o’n, be kunndɛ be nga be klo kɛ bé tíe jasin fɛ’n. Be nga sran’m be buman be sran bɔbɔ’n, Zoova i Lalofuɛ’m be suan be aniɛn’n, ɔ nin wafa nga be yo ninnge mun’n naan b’a kwla bo jasin fɛ’n b’a kle be. Be bumɛn i le kɛ be ti kpa tra be nga be bo jasin fɛ’n kle be’n. I kpa bɔbɔ’n, be fa be wun mantan sran’m be tinuntinun. Be yo sɔ naan sran’m be kwlaa b’a kwla sɔ Ɲanmiɛn Sielɛ’n i jasin fɛ’n nun.

12. ?Wafa sɛ yɛ Epafrasi kleli kɛ i wiengu’m be ndɛ lo i-ɔ?

¹² Like kun ekun nga e kwla yo fa kle kɛ e ti wun ase kanfuɛ’n yɛle kɛ, maan e srɛ e man e niaan nga be “lafi Ɲanmiɛn su kpa kɛ e sa’n.” (2 Piɛr 1:1, NW) I sɔ yɛ Epafrasi yoli-ɔ. Biblu’n kɛn i ndɛ kpɛ nsan cɛ. I nun mɔ be wlali Pɔlu i bisua Rɔmun lɔ’n, ɔ klɛli fluwa ko mannin Klistfuɛ nga be o Kolɔsu lɔ’n. Fluwa sɔ’n nun’n, ɔ kannin Epafrasi i ndɛ. Ɔ seli kɛ: “Epafrasi [...] srɛ Ɲanmiɛn tankaan kpa man amun cɛn kwlaa.” (Kolɔsfuɛ Mun 4:12, NW) Epafrasi si i niaan sɔ mun, yɛ be ndɛ lo i kpa. Pɔlu  seli kɛ ɔ ti ‘i wiengu bisuafuɛ.’ I sɔ’n kle kɛ sa wie’m be o Epafrasi su. (Filemɔn 23) Ɔ nin i sɔ ngba’n, i wiengu’m be ndɛ loli i. Yɛ ɔ srɛli Ɲanmiɛn mannin be. Kɛ Epafrasi sa’n, ɔ fata kɛ e srɛ Ɲanmiɛn e man e niaan mun. Kɛ é yó sɔ’n, e kwla bo be tinuntinun be dunman. Kɛ e srɛ e man e niaan mun’n, be ɲan su ye dan.—2 Korɛntfuɛ Mun 1:11; Zak 5:16.

13. ?Kɛ é srɛ́ Ɲanmiɛn’n, wafa sɛ yɛ e kwla nian Epafrasi i ayeliɛ’n su-ɔ?

¹³ Maan e bu sran kun mɔ e si i dunman mɔ e kwla srɛ Ɲanmiɛn e mɛn i’n, i akunndan. Ɔ kwla yo e janvuɛ kun m’ɔ o asɔnun’n nun, annzɛ e awlofuɛ kun mɔ sa wie’m be o i su’n. Atrɛkpa’n, ɔ fata kɛ ɔ fa ajalɛ cinnjin wie mun, annzɛ ɔ fata kɛ ɔ jran kekle naan w’a fɔnman Ɲanmiɛn i mmla’n. E niaan wie’m be kusu Ɲanmiɛn su mɔ be lafi’n ti’n, be wlali be bisua. Be boboli be dunman’n jw.org su. E kwla srɛ Ɲanmiɛn man be wie. (An tin SALLE DE PRESSE > VEILLE JURIDIQUE > Témoins de Jéhovah emprisonnés en raison de leur foi su.) Aniaan wie mun ekun’n, be sran wuli. Yɛ wie’m be liɛ’n, sanvuɛsa w’a ɲan be, annzɛ kusu alɛ w’a tɔ be asa liɛ’n su lɔ. Sanngɛ Ɲanmiɛn sa, be te o nguan nun. Yɛ wie mun ekun’n, sika ndɛ’n ti kekle be su. Nanwlɛ, e niaan nga e kwla srɛ Ɲanmiɛn e man be’n, be diman be yalɛ. Kɛ e srɛ Ɲanmiɛn e man e wiengu mun’n, e kle kɛ be ndɛ lo e, naan e buman e ngunmin e wun akunndan. (Filipfuɛ Mun 2:4) Zoova tie i sɔ srɛlɛ mun.

14. ?Ngue yɛ ɔ kle kɛ wafa nga Zoova sie i su sran’m be nuan bo’n, ɔ leman wunsu-ɔ?

¹⁴ Like nga e kwla yo i ekun e fa kle kɛ e ti wun ase kanfuɛ’n yɛle kɛ, kɛ sran kun kán ndɛ klé e’n, maan e sie e su e tie. Zak ndɛ tre 1, i mma 19 wla e fanngan kɛ maan e ‘sie e su e tie ndɛ nga be kan’n kpa.’ I lɛ nun’n, ajalɛ nga Zoova kle’n ɔ leman wunsu. (Bo Bolɛ 18:32; Zozie 10:14) Maan e  kanngan ndɛ ng’ɔ o Ezipt Lɔ Tulɛ 32:11-14 nun’n nun. (An kanngan nun.) Zoova w’a mianman Moizi i afɔtuɛ wun. Sanngɛ, ɔ yacili i nun ɔ kɛnnin i klun ndɛ’n weiin. Moizi yoli sa wie mɔ be timan su-ɔ. Ɔ nin i sɔ ngba’n, Zoova sieli i su i nuan bo. Nanwlɛ, sran kwlaa ng’ɔ lafi Zoova su m’ɔ srɛ i’n, ɔ sie i su i nuan bo.

15. ?Wafa sɛ yɛ e kwla nian Zoova i ayeliɛ’n su-ɔ?

¹⁵ Maan e tinuntinun e usa e wun kɛ: ‘?Sɛ Zoova bɔbɔ kɛnnin i wun ase tieli Abraamun, nin Rasɛli, nin Moizi, nin Zozie, nin Manɔaki, nin Eli, ɔ nin Ezekiasi be nuan ndɛ’n, ɔ fataman kɛ n yo sɔ wie? ?N sie min su min niaan’m be kwlaa be nuan bo, yɛ sɛ ɔ nin i fata’n, n fa afɔtuɛ nga be man min’n su? ?Aniaan wie annzɛ min awlofuɛ wie o lɛ mɔ n kwla niɛn i lika-ɔ? ?I lɛ nun’n, like trele benin yɛ ń yó-ɔ?’—Bo Bolɛ 30:6; Jɔlɛ Difuɛ Mun 13:9; 1 Famiɛn Mun 17:22; 2 Be Nyoliɛ 30:20.

16. ?Kɛ Simɛi yoli Davidi i finfin’n, ngue yɛ Davidi yoli-ɔ?

¹⁶ Kɛ e wiengu’m be yo e finfin’n, maan e tra e awlɛn be wun. Sɛ e yo sɔ’n, é klé kɛ e ti wun ase kanfuɛ. (Efɛzfuɛ Mun 4:2) I lɛ nun’n, Davidi kleli e ajalɛ kpa. (An kanngan 2 Samiɛl 16:5-13 nun.) Famiɛn Saili i osufuɛ kun mɔ be flɛ i kɛ Simɛi’n, ɔ kpɛli Davidi nin i sran’m be nzowa. Kpɛkun, ɔ totoli be yɛbuɛ. Davidi kwla yo naan i sɔ liɛ’n kpɛ kpe. Sanngɛ, w’a yoman sɔ. Ɔ trɛli i awlɛn Simɛi i wun. ?Ngue ti yɛ Davidi kwla trɛli i awlɛn dan sɔ-ɔ? Sɛ e kanngan Jue Mun nsan su nun’n, é wún i wlɛ.

17. (1) ?Ngue ti yɛ Davidi kwla trɛli i awlɛn-ɔn? (2) ?Wafa sɛ yɛ e kwla niɛn i ayeliɛ’n su-ɔ?

¹⁷ I nun mɔ Davidi i wa Absalɔmun kunndɛli kɛ ɔ́ kún i’n, yɛ ɔ klɛli ndɛ ng’ɔ o Jue Mun nsan su nun’n niɔn. Blɛ kunngba sɔ’n nun yɛ Simɛi yoli Davidi i finfin-ɔn. Sanngɛ, Davidi kwla trɛli i awlɛn. Davidi klɛli i Jue Mun 3:5 nun kɛ: “Kɛ n kpan flɛ Anannganman’n, ɔ jrɛn i oka’n su lɔ ɔ tɛ min su.” Kɛ be yo e finfin’n, maan e srɛ Ɲanmiɛn kɛ Davidi fa yoli’n sa. Sɛ e yo sɔ’n, Zoova fɛ́ i wawɛ’n mán e naan y’a kwla tra e awlɛn. Maan e tinuntinun e usa e wun kɛ: ‘?Sɛ sran wie yo min sa’n, ń nían min wun su, yɛ ń yáci ń cɛ́ i? ?N lafi su kɛ Zoova wun sa nga be yo min’n naan ɔ́ jrán min sin?’

18. ?Sɛ e nanti Zoova i mmla’m be su’n, i su ye benin yɛ é ɲɛ́n i-ɔ?

¹⁸ Sɛ e yo sa nga e si kɛ ɔ ti kpa’n, é klé kɛ e ti ngwlɛlɛfuɛ. Kpɛkun, Zoova yrá e su. Biblu’n se kɛ: “Akunndan’n ti kpa tra nɛnnglɛnman, ɔ lɛ nyrun tra nanndoliɛ like’n kwlaa.” (Nyanndra Mun 8:11) Sran ng’ɔ ti ngwlɛlɛfuɛ’n, ɔ si sa, yɛ ɔ wun sa wlɛ. Sanngɛ ng’ɔ ti cinnjin’n yɛle kɛ, ajalɛ ng’ɔ fa be’n, be ti kpa. Ijrewa mun bɔbɔ’n, be le be ngwlɛlɛ liɛ. Afin, be kunndɛ aliɛ nga be ko di i ayrɛ blɛ nun’n be sie. (Nyanndra Mun 30:24, 25) Klist yo like ng’ɔ jɔ i Si klun’n titi. Biblu’n se kɛ Klist ti’n, e si kɛ Ɲanmiɛn ti ngwlɛlɛfuɛ. (1 Korɛntfuɛ Mun 1:24; Zan 8:29) Maan e kusu e kle kɛ e ti ngwlɛlɛfuɛ. Yɛle kɛ e yo sa ng’ɔ ti kpa’n kpɛkun e kan e wun ase. Sɛ e yo sɔ’n Ɲanmiɛn yrá e su. (An kanngan Matie 7:21-23 nun.) I sɔ’n ti, maan e kwlakwla e mian e ɲin titi naan asɔnun’n nun’n, e kan e wun ase e su Zoova. Sa ng’ɔ ti kpa’n, i yolɛ timan pɔpɔ. Sanngɛ kɛ e mian e ɲin e yo’n, e kle kɛ e ti wun ase kanfuɛ. Sɛ e kan e wun ase kusu’n, é dí aklunjuɛ. Yɛ aklunjuɛ sɔ’n su wieman le.