?Ngue ti yɛ ɔ fataman kɛ e fa fluwa nga Zoova i Lalofuɛ’m be yi be’n, e sie i ɛntɛnɛti adrɛsi uflɛ su-ɔ?

Kɛ mɔ e yoman e fluwa nin ninnge nga e yi be’n, be atɛ ti’n, sran wie’m be bu i kɛ be kwla fa sie i ɛntɛnɛti adrɛsi uflɛ su. Sanngɛ, sɛ be yo sɔ’n, nn b’a fɔn e ɛntɛnɛti adrɛsi’n i su mmla’n. * (An nian nzɔliɛ’n i su ndɛ’n.) Yɛ i bo kwla gua tɛ man be. Mmla sɔ’n se kɛ ɔ fataman kɛ sran kun fa e desɛn annzɛ foto, annzɛ fluwa, annzɛ like wie nzɔliɛ, annzɛ e miziki, annzɛ e video, annzɛ kusu like uflɛ m’ɔ o e ɛntɛnɛti adrɛsi su’n, ɔ fa sie i ɛntɛnɛti adrɛsi uflɛ su. ?Ngue ti yɛ mmla sɔ’n ti cinnjin-ɔn?

Ninnge kwlaa nga be o e ɛntɛnɛti adrɛsi su’n, mmla o be su (Copyright). Mmla sɔ’m be ti cinnjin. Afin i sɔ’n yo maan sran’m be kwlá faman ninnge nga be o e ɛntɛnɛti adrɛsi su’n be yoman like kwlaa nga be klo’n. Wie liɛ’n, be nga be nin Ɲanmiɛn b’a bu’n, annzɛ sran uflɛ wie mun mɔ be kunndɛ kɛ bé sáci Zoova i Lalofuɛ mun annzɛ sran’m be ti nun’n, be fa ninnge nga e yi be’n, be sie be ɛntɛnɛti adrɛsi’m be su. Sanngɛ, be ɛntɛnɛti adrɛsi sɔ’m be su’n, be fa ninnge wie mun mɔ be sanngan sran’m be akunndan’n, be sie i lɔ wie. (Jue Mun 26:4; Nyanndra Mun 22:5) Sran wie’m be fa e fluwa nin e video mun, annzɛ e ɛntɛnɛti adrɛsi’n i nzɔliɛ (jw.org) sie i be ninnge wie mun mɔ be yo be atɛ’n be su. Sanngɛ kɛ mɔ mmla o e ninnge sɔ’m be su ti’n, e kwla fa sran sɔ mun kɔ jɔlɛ difuɛ’m be ja su naan be yaci i sɔ’n i yolɛ. (Nyanndra Mun 27:12) Sɛ e man sran wie mun annzɛ e niaan’m be atin naan be fa e fluwa nin e video mun sie i ɛntɛnɛti adrɛsi uflɛ su’n, annzɛ sɛ e man be atin naan be fa e ɛntɛnɛti adrɛsi’n i nzɔliɛ (jw.org) be sie i ninnge wie mɔ be yo be atɛ’n be su’n, jɔlɛ difuɛ’m be su kwlá jranman e sin.

Sɛ e faman e fluwa mun annzɛ e video mun jw.org su, naan e ko fa be ɛntɛnɛti adrɛsi uflɛ su’n, i bo kwla gua tɛ. “Sran kpa nanwlɛfuɛ b’ɔ si ngwlɛlɛ’n” i ngunmin i lika yɛ Zoova sin man e ninnge ng’ɔ fata kɛ e ɲan be naan y’a kwla su i kpa’n niɔn. (Matie 24:45) E ɛntɛnɛti adrɛsi www.pr418.com, nin jw Televiziɔn, ɔ nin Watchtower ɛntɛnɛti su fluwa siewlɛ’n, be su yɛ ‘sran kpa nanwlɛfuɛ’n’ sie ninnge ng’ɔ yi be mun-ɔn. Asa ekun’n, e le like nsan mɔ e kwla fa sie i e tablɛti annzɛ pɔtablu annzɛ e ɔrdinatɛli su-ɔ. Be yɛle JW Language^® nin JW Library^®, ɔ nin JW Library Sign Language^®. Sɛ e kɔ e ɛntɛnɛti adrɛsi sɔ’m be su’n, annzɛ ninnge nsan nga e boboli be su lɛ’n be su’n, e su wunman like kun m’ɔ ti Satan liɛ’n lɔ le. Sanngɛ sɛ e ko fa e fluwa mun annzɛ e video mun ɛntɛnɛti adrɛsi uflɛ su’n, i bo kwla gua tɛ. Afin be kwla kaci i nun ninnge wie mun.—Jue Mun 18:27; 19:9.

Asa ekun’n, sɛ e fa e fluwa annzɛ e video mun e sie i ɛntɛnɛti adrɛsi uflɛ su’n, i sɔ’n kwla yo maan be nga be nin Ɲanmiɛn b’a bu’n, annzɛ sran wie’m be kan Zoova i anuannzɛ’n i wun ndɛ tɛtɛ. Aniaan wie’m be nin sran sɔ’m be si akplowa ɛntɛnɛti su. I sɔ’n saci Zoova i dunman. Nɛ́n i sɔ yɛ ɔ fata kɛ be yo naan b’a kaci sran kun i akunndan’n, annzɛ b’a ukɛ i naan w’a si ndɛ nanwlɛ’n niɔn. (1 Timote 6:3-5; 2 Timote 2:23-25) Asa kusu’n, sran wie’m be kpɛ be ɛntɛnɛti adrɛsi ba, kpɛkun be yo kɛ be ti anuannzɛ’n i nunfuɛ annzɛ i ɲrun dinfuɛ kun sa. Sran sɔ’m be timan kpa. Anuannzɛ’n i ɲrun dinfuɛ wie fi lemɛn i bɔbɔ i ɛntɛnɛti adrɛsi liɛ.

Kɛ e wla sran’m be fanngan kɛ be wɔ jw.org su’n, i sɔ’n kle kɛ e suan “jasin fɛ” bolɛ junman’n i bo. (Matie 24:14) E ɛntɛnɛti adrɛsi nin ninnge nga e fa e fluwa nin e video mun sie su’n, be yo kpa be kɔ be ɲrun titi. E kunndɛ kɛ sran’m be kwlaa be ɲan su ye. Ɔ maan, sɛ e kɔ jw.org su’n e kwla fa e fluwa nin e video mun e man sran mun trele ɛntɛnɛti su, annzɛ e kwla fa e ɛntɛnɛti adrɛsi jw.org bɔbɔ’n, e man be. Sɛ e yo sɔ’n, é klé sran mun kɛ “sran kpa nanwlɛfuɛ b’ɔ si ngwlɛlɛ’n” i ngunmin lika yɛ Zoova sin man e ninnge ng’ɔ fata kɛ e ɲan be naan y’a kwla su i kpa-ɔ.