MƐN’N su kɔ ‘i bue nuan.’ I sɔ ti’n lika’n w’a yo kekle. Ɔ maan, ɔ fata kɛ e tra e awlɛn kpa tra laa’n. (2 Timote 3:1-5) Sran sunman be kwlá traman be awlɛn. Be bu be ngunmin be wun akunndan, be klo ndɛnngan, be kwlá nianman be wun su. I sɔ’n ti’n, maan e usa e wun kɛ: ‘?N kwlá traman min awlɛn wie? ?Ngue yɛ sɛ n yo’n, ɔ́ klé kɛ n tra min awlɛn sakpa-ɔ? ?Ngue yɛ ń yó naan awlɛn tralɛ’n w’a kaci min nzuɛn-ɔn?’

?Kɛ Biblu’n se kɛ sran kun ‘trɛ i awlɛn’n,’ i bo’n yɛle benin? Awlɛn tralɛ nga Biblu’n kɛn i ndɛ’n, nɛ́n i yɛle sa’m be ɲrun kekle jranlɛ sa ngbɛn. Sanngɛ, sran ng’ɔ trɛ i awlɛn’n, ɔ lafi su kɛ ɔ́ fín sa sɔ nun fíte. Ɔ bumɛn i ngunmin i wun akunndan sa trilili, i wiengu’m be ndɛ lo i. Be nga be kle i yalɛ annzɛ be fitɛ i awlɛn ba su bɔbɔ’n, ɔ buman be wun akunndan tɛ. Ɔ lafi su kɛ cɛn wie lele’n, ɔ nin sran sɔ’m be nuan sɛ́. Nán ngbɛn ti yɛ Biblu’n se kɛ sran m’ɔ klo sran’n, ɔ trɛ i awlɛn sran wun’n niɔn. * (An nian nzɔliɛ’n i su ndɛ’n.) (1 Korɛntfuɛ Mun 13:4) “Sa nga Nyanmiɛn Wawɛ’n maan sran yo’n,” i kun yɛle awlɛn tralɛ’n. (Galasifuɛ Mun 5:22, 23) ?Ngue yɛ é yó naan y’a yo sran m’ɔ trɛ i awlɛn-ɔn?

Be nga be lafi Zoova su’n, ɔ fɛ i wawɛ’n man be. I sɔ ti’n, sɛ e kunndɛ kɛ é yó sran m’ɔ trɛ i awlɛn’n, maan e srɛ Zoova naan ɔ fɛ i wawɛ’n uka e. (Lik 11:13) Ɲanmiɛn wawɛ’n kwla uka e. Sanngɛ ɔ fata kɛ e bɔbɔ e yo ninnge wie mun. (Jue Mun 86:10, 11) Ɔ fata kɛ e mian e ɲin e tra e awlɛn cɛn kwlakwla naan i sɔ yolɛ’n kaci e nzuɛn. Sanngɛ ɔ ju wie’n, awlɛn tralɛ’n kwla yo kekle. ?Ngue yɛ ɔ kwla uka e naan y’a tra e awlɛn titi-ɔ?

Maan e nian ajalɛ nga Zezi kle e’n su e nanti. Kɛ akoto Pɔlu kán “nzuɛn uflɛ” mɔ i wie yɛle be awlɛn tralɛ’n i ndɛ’n, ɔ seli kɛ: “Sɛ e wun nga Krist maan ɔ jɔ ye’n ti sran’n, wuun é sé kɛ maan ɔ sie amun nin amun klun akunndan’n kwlaa.” (Kolɔsfuɛ Mun 3:10, 12, 15) Kɛ ɔ ko yo naan y’a kwla yo sɔ’n, maan e nian Zezi i ajalɛ’n su. Yɛ maan e lafi su kɛ blɛ ng’ɔ ti su nun’n, Ɲanmiɛn wá yó maan e wun sa’n i kwlaa wíe. Sɛ e yo sɔ’n, kannzɛ sa nga be tɔ e su’n be ti sɛ ti sɛ’n, é kwlá trá e awlɛn titi.—Zan 14:27; 16:33.

E kwlaa e kunndɛ kɛ mɛn klanman’n ju ndɛndɛ. Sanngɛ kɛ e bu wafa nga Zoova trɛ i awlɛn e wun’n i akunndan’n, i sɔ’n uka e maan e kusu e tra e awlɛn wie. Biblu’n se kɛ: “Like nga e Min’n se kɛ ɔ́ yó, ɔ cuɛn-cuɛn-mɛn i ase kɛ sran’m be bu i’n sa. Sanngɛ ɔ trɛ i anwlɛn amun wun, ɔ klo-man kɛ sran kun sa mlin, ɔ klo kɛ sran’m be kwlaa be kaci be  nzuɛn’n.” (2 Piɛr 3:9) Kɛ e wun kɛ Zoova trɛ i awlɛn e wun’n, i sɔ’n yo maan e kusu e tra e awlɛn e wiengu’m be wun. (Rɔmfuɛ Mun 2:4) ?Blɛ benin nun yɛ ɔ fata kɛ e tra e awlɛn-ɔn?

Cɛn kwlakwla’n, ɔ fata kɛ e tra e awlɛn sa sunman nun. I wie yɛle kɛ, sɛ e waan é kán ndɛ wie mɔ e bu i kɛ ɔ ti cinnjin’n, naan e wiengu kun su kɛn i liɛ’n, ɔ fata kɛ e tra e awlɛn naan y’a kpɛmɛn i nuan ndɛ. (Zak 1:19) Asa ekun’n, sɛ sran kun be e awlɛn’n, ɔ fata kɛ e tra e awlɛn naan y’a kanman ndɛ ya su y’a klemɛn i. Maan ɔ tran e klun titi kɛ, Zoova nin Zezi be faman be ɲin be siemɛn i sa kanngan nga e yo be’n be su sa trilili. Sanngɛ, e nzuɛn kpa’m be su yɛ be fa be ɲin be sie-ɔ. Be awlɛn mɔ be trɛ i e wun ti’n, e kwla kaci e nzuɛn tɛ’n. (1 Timote 1:16; 1 Piɛr 3:12)

Sɛ sran wie se e kɛ ndɛ nga e kannin’n annzɛ sa nga e yoli’n timan su’n, ɔ fata kɛ e tra e awlɛn. Afin wie liɛ’n, e kwla fa ya annzɛ e kwla kunndɛ kɛ é kplí e ti. Sanngɛ, Ɲanmiɛn Ndɛ’n wla e fanngan kɛ nán e yo sɔ. Ɔ se kɛ: “Amlin dilɛ ti kpa tra be wun tulɛ. Nán fa ya ndɛndɛ. Afin sinnglinfuɛ yɛ i anwlɛn’n ɔ ti fufu-ɔ.” (Akunndanfuɛ’n 7:8, 9) Kannzɛ ndɛ nga sran’n kannin’n timan nanwlɛ’n, sanngɛ, ɔ fata kɛ e tra e awlɛn, yɛ e bu like nga e waan é yó’n i sin kpa ka naan y’a yo. Kɛ sran’m be tɔnnin Zezi i suɛn’n, i sɔ yɛ ɔ yoli-ɔ.—Matie 11:19.

Siɛ nin niɛn’m be kusu’n, ɔ fata kɛ be tra be awlɛn naan b’a kwla uka be mma mun naan b’a kaci be ayeliɛ’n, annzɛ akunndan tɛ wie mɔ be bu’n. Maan e kan aniaan kun mɔ be flɛ i kɛ Matiasi’n i ndɛ. Ɔ di junman Abloki lɔ Betɛli kun nun. I nun m’ɔ kɔ suklu’n, Ɲanmiɛn su m’ɔ lafi ti’n, i wiengu suklu ba’m be yo i finfin. Sanngɛ, i si nin i nin be siman sɔ. Be sieli i nzɔliɛ kɛ be wa’n i akunndan’n su yo nɲɔnnɲɔn Ɲanmiɛn sulɛ’n nun. Gilisi m’ɔ ti Matiasi i si’n seli kɛ, ɔ fata kɛ ɔ nin i yi be tra be awlɛn kpa naan b’a kwla uka be wa’n. Kosan nga Matiasi fa usa be’n i wie yɛle kɛ: “?Wan yɛle Ɲanmiɛn? ?Biblu’n ti Ɲanmiɛn nuan ndɛ sakpa? ?Wafa sɛ yɛ e kwla si kɛ Ɲanmiɛn yɛ ɔ kunndɛ kɛ e yo like nga sa-ɔ? ?Ngue ti yɛ kɛ n buman akunndan kɛ amun  sa’n, annzɛ n lafiman ndɛ nga amun lafi su’n wie’n, amun bu min fɔ-ɔ?”

Gilisi waan: “Ɔ ju wie’n, e wa’n usa e kosan mun ya su. Sanngɛ, nɛ́n i nin annzɛ n bɔbɔ e wun ya yɛ ɔ fa-ɔ. Sanngɛ, ndɛ nanwlɛ’n i ti yɛ ɔ fa ya-ɔ. Ɔ bu i kɛ ndɛ nanwlɛ ti’n mɛn dilɛ’n ti kekle.” ?Wafa sɛ yɛ Gilisi ukɛli i wa’n niɔn? Ɔ seli kɛ: “Min nin min wa’n e tran ase e koko yalɛ dɔ kpanngban.” Blɛ sunman’n, Gilisi sie i su tie ndɛ nga i wa’n kan’n. Kpɛkun, ɔ usɛ i kosan wie mun naan ɔ́ sí wafa nga ndɛ sɔ’n yo i wa’n, annzɛ ɔ́ sí akunndan ng’ɔ bu’n. Wie liɛ’n, Gilisi yiyi sa kun nun kle i wa’n, kpɛkun, ɔ se i kɛ ɔ bu akunndan naan sɛ ɔ yo’n, bé wá kókó su yalɛ ekun. Wie liɛ kusu’n, kɛ Gilisi i wa’n kan ndɛ wie kle i’n, ɔ se i kɛ ɔ́ wá bú akunndan naan sɛ ɔ yo’n, be ko koko su yalɛ. Yalɛ sɔ mɔ be kokoli i titi ti’n, Matiasi wa wunnin like nga ti yɛ Zezi fɛli i wun kpɔli e ti’n i wlɛ. Kpɛkun, ɔ wunnin i wlɛ kɛ Zoova klo e, naan sɛ ɔ sie e’n, ɔ ti su. Gilisi seli kɛ: “Matiasi i ukalɛ’n w’a yoman pɔpɔ. Ɔ fali blɛ. Sanngɛ, blɛblɛblɛ Zoova i klolɛ’n wa yoli dan i awlɛn nun. Kɛ min nin min yi’n e trali e awlɛn e ukali e wa’n, i bo guali kpa. Nanwlɛ i sɔ’n, yo e fɛ dan.”

Kɛ Gilisi nin i yi’n bé úka be wa’n, be lafili su kpa kɛ Zoova súan be bo. Gilisi seli kɛ: “Blɛ sunman’n, n se Matiasi kɛ, kɛ mɔ min nin i nin e klo i dan ti’n, e srɛ Zoova kpa kɛ ɔ ukɛ i naan ɔ wun ndɛ’m be wlɛ.” Kɛ Gilisi nin i yi’n be miannin be ɲin be ukali be wa’n mɔ be sa sin w’a bubuman be’n, i sɔ’n yo be fɛ kpa.

Sɛ kusu e nian e osufuɛ kun annzɛ e janvuɛ kun m’ɔ kpinndinman’n i lika naan i tukpacɛ’n wieman’n, ɔ fata kɛ e tra e awlɛn. Be flɛ aniaan kun kɛ Elɛnin. * (An nian nzɔliɛ’n i su ndɛ’n.) Ɔ tran Abloki lɔ wie. Maan e kan sa ng’ɔ juli i su’n i ndɛ.

I afuɛ kɔe mɔcuɛ yɛ, Elɛnin i wun’n i ti nun tukpacɛ kun ti’n, sɛ ndɛ wie man aklunjuɛ annzɛ ɔ yo ya’n, annzɛ sɛ sran kun su fɛ’n, ɔ kwlá wunmɛn i wlɛ. Sa sɔ’n boli Elɛnin i wla dan kpa. Ɔ seli kɛ: “N trali min awlɛn tankaan kpa, yɛ n srɛli Ɲanmiɛn blɛ sunman.” Ɔ seli ekun kɛ: “Biblu’n nun ndɛ mma nga n klo i kpa m’ɔ wla min fanngan’n, yɛle Filipfuɛ Mun 4:13, NW. Ɔ se kɛ: ‘Afin sa kwlaa nun’n, sran ng’ɔ man min tinmin’n ti’n, n le wunmiɛn.’” Zoova fanngan nun’n, Elɛnin trɛ i awlɛn jran sa sɔ’n i ɲrun kekle.—Jue Mun 62:6, 7.

Awlɛn tralɛ nun’n, Zoova kle e ajalɛ kpa. (2 Piɛr 3:15) Biblu’n kle kɛ Zoova trɛ i awlɛn. (Neemi 9:30; Ezai 30:18) Kɛ Zoova seli kɛ ɔ́ wá núnnún Sodɔmun klɔ’n, Abraamun usɛli i kosan kpanngban. Sanngɛ, Zoova w’a kpɛman Abraamun i nuan ndɛ. Ɔ fɛli i su sieli i Abraamun i nuan bo. Kpɛkun, ɔ seli Abraamun kɛ sɛ sran kpa blu be o klɔ sɔ’n su’n, ɔ su nunnunmɛn i. (Bo Bolɛ 18:22-33) Blɛ kwlaa sɔ nun’n, Zoova trɛli i awlɛn, w’a kanman ndɛ ya su w’a kleman Abraamun le.

Awlɛn tralɛ’n, ɔ ti nzuɛn uflɛ ng’ɔ fata kɛ Klistfuɛ’m be fa’n, be nun cinnjin kpa kun. Kɛ e mian e ɲin e tra e awlɛn’n, e manman e Si Zoova m’ɔ trɛ i awlɛn’n. Kpɛkun, e tran “be nga be lafi Nyanmiɛn su’n, bɔ be tra be anwlɛn b’ɔ maan be nyan like nga i waan ɔ́ fá mán be’n,” be nun wie.—Ebre Mun 6:10-12.