1, 2. (a) ?Afuɛ 2018 nun’n, cɛn benin yɛ é dí-ɔ? (b) ?Ngue ti yɛ cɛn sɔ’n ti i liɛ ngunmin-ɔn? (An nian foto ng’ɔ o kan like suanlɛ’n bo i bo lɛ’n.)

AFUƐ 2018 nun, Marsi i le 31 su’n, sran miliɔn kpanngban bé dí cɛn kun. Cɛn sɔ’n nun’n, kɛ wia’n ko tɔ’n, Zoova i Lalofuɛ’m be nin sran wie mun ekun bé yía naan bé wlá kpɛ́n e ti tɛ mɔ Zezi fɛli i wun yili’n su. Nanwlɛ, e Wla kpɛnlɛ cɛn’n ti i liɛ ngunmin. Afin afuɛ kwlaa nun’n, asiɛ wunmuan su sran miliɔn kpanngban be bo yo kun be di cɛn sɔ’n.

² E si kɛ, kɛ Zoova nin Zezi be wun kɛ mɛn wunmuan’n nun’n, sran kpanngban kpa be yia be di cɛn cinnjin sɔ’n, be klun jɔ dan. Biblu’n kan kɛ: “Sran kpanngban kpa, sran fi kwlá ka-man be, sran sɔ’m be fin mɛnmɛn’n kwlaa nin nvle-nvle’n kwlaa nun, sran wafa-wafa’n kwlaa o be nun, be ijɔ aniɛn wafa-wafa’n kwlaa. [...] Be kpan kekle kpa be se kɛ: ‘E Nyanmiɛn b’ɔ ti bia’n su’n, nin Bua Gbanflɛn’n, be ti yɛ e nyannin e ti-ɔ.’” (Sa Nglo Yilɛ 7:9, 10) Nanwlɛ, kɛ afuɛ kwlakwla’n sran kpanngban kpa be yia e Wla kpɛnlɛ cɛn  aɲia’n i bo mɔ be yi Zoova nin Zezi be ayɛ’n, i sɔ’n yo ɲɛnmɛn dan.

3. ?Kosan benin mun yɛ é wá tɛ́ be su like suanlɛ nga nun-ɔn?

³ Ɔ ti cinnjin kɛ e tinuntinun e usa e wun kɛ: (1) ?Wafa sɛ yɛ n kwla buabua min wun naan m’an ɲan e wla kpɛnlɛ cɛn aɲia’n i su ye-ɔ? (2) ?Ngue ti yɛ e kwla se kɛ e wla kpɛnlɛ cɛn’n kle kɛ Ɲanmiɛn i sufuɛ’m be bo ti kun-ɔn? (3) ?Ngue yɛ n kwla yo naan anuansɛ w’a tran Zoova i sufuɛ’m be afiɛn titi-ɔ? (4) ?Cɛn wie lele’n, e su yoman e Wla kpɛnlɛ cɛn aɲia’n kun? ?Sɛ ɔ ti sɔ’n, blɛ benin nun-ɔn? Like suanlɛ nga nun’n, é wá tɛ́ kosan sɔ’m be su.

4. ?Ngue ti yɛ ɔ ti cinnjin kɛ e tran e Wla kpɛnlɛ cɛn aɲia’n i bo-ɔ?

⁴ ?Ngue ti yɛ ɔ ti cinnjin kɛ e tran e Wla kpɛnlɛ cɛn aɲia’n i bo-ɔ? Yɛle kɛ, aɲia sɔ’n i yolɛ’n ti Zoova i sulɛ wie. Kɛ e mian e ɲin e tran aɲia cinnjin sɔ’n i bo’n, Zoova nin Zezi be sie i nzɔliɛ. Ɔ maan, sɛ w’a yoman kɛ sa kekle wie ti’n, maan Zoova nin Zezi be wun e aɲia sɔ’n i bo. Sɛ Zoova wun kɛ e aɲia’m be ti e cinnjin’n, ɔ́ klɛ́ e dunman ‘nguan fluwa’n nun.’ Be kwlaa nga bé ɲán anannganman nguan’n, be dunman o fluwa sɔ’n nun.—Malasi 3:16; Sa Nglo Yilɛ 20:15.

5. ?Kɛ ɔ ka lemɔcuɛ nɲɔn kun é yó e Wla kpɛnlɛ cɛn aɲia’n, ngue yɛ é yó naan sɛ e lafi Ɲanmiɛn su sakpa’n y’a wun i wlɛ-ɔ?

⁵ Kɛ ɔ ka lemɔcuɛ nɲɔn kun é yó e Wla kpɛnlɛ cɛn aɲia’n, maan e fa blɛ e srɛ Ɲanmiɛn. Yɛ maan e bu wafa nga e nin Zoova e nanti’n i akunndan nian sɛ e afiɛn sɛ kpa o. (An kanngan 2 Korɛntfuɛ Mun 13:5 nun.) Akoto Pɔlu seli i wiengu Klistfuɛ mun kɛ: “Amun bɔbɔ an bu amun klun lɔ nian sɛ an lafi Krist su sakpa o.” I sɔ’n ti, maan e tinuntinun e usa e wun kɛ: ‘?N lafi su tankaan kɛ anuannzɛ nga’n i kunngba cɛ yɛ Zoova kpɛli i kɛ ɔ yo i klun sa-ɔ? ?Ninnge nga n yo be’n, be kle kɛ n lafi su kɛ e o mɛn’n i awieliɛ, naan ɔ cɛ kan’n Satan su sieman mɛn’n kun? ?Wafa nga n lafi Zoova nin Zezi be su siɛn’n, ɔ tra i nun mɔ n boli Zoova i sulɛ bo’n?’ (Matie 24:14; 2 Timote 3:1; Ebre Mun 3:14) Sɛ e bu wafa nga e tɛ kosan sɔ’m be su’n i akunndan’n, ɔ́ yó e ye dan. Afin, i sɔ’n yɛ maan sɛ e lafi Ɲanmiɛn su kpa’n é wún i wlɛ.

6. (a) ?Ngue yɛ ɔ fata kɛ e yo naan y’a ɲan anannganman nguan-ɔn? (b) ?Ka naan y’a yo e Wla kpɛnlɛ cɛn aɲia’n, ngue yɛ asɔnun kpɛnngbɛn kun yo-ɔ? (c) ?Wafa sɛ yɛ e kwla niɛn i ayeliɛ’n su-ɔ?

⁶ Ka naan y’a yo e Wla kpɛnlɛ cɛn aɲia’n, like nga e kwla yo’n i kun yɛle kɛ, maan e kanngan e fluwa nga be kle sa nga ti yɛ cɛn sɔ’n ti cinnjin’n be nun. (An kanngan Zan 3:16; 17:3 nun.) Sɛ e kunndɛ kɛ é ɲán anannganman nguan’n, ɔ fata kɛ e si Zoova, yɛ e lafi i Wa Zezi su. I sɔ’n ti, e fluwa’m be nun ndɛ akpasua nga be kwla uka e naan y’a fa e wun y’a  mantan Ɲanmiɛn nin Zezi’n, maan e kunndɛ be e sie naan e suan nun like. I sɔ yɛ aniaan kun m’ɔ ti asɔnun kpɛnngbɛn w’a cɛ’n, ɔ yo-ɔ. Afuɛ kwlaa nun’n, Sasafuɛ Tranwlɛ’n i nun ndɛ akpasua nga be kan e Wla kpɛnlɛ cɛn’n, ɔ nin wafa nga Zoova nin Zezi be kle kɛ be klo e’n be ndɛ’n, ɔ kunndɛ be sie. Kpɛkun, kɛ ɔ ka lemɔcuɛ nɲɔn kun bé yó e Wla kpɛnlɛ cɛn aɲia’n, ɔ kanngan be nun ekun. Yɛ ɔ bu like nga ti yɛ cɛn sɔ’n ti cinnjin’n i su akunndan. Ɔ ju wie’n, ɔ fa fluwa nga b’a fite uflɛuflɛ’n be nun ndɛ akpasua kun annzɛ nɲɔn fa uka laa liɛ’m be su. Asa ekun’n, Biblu’n nun ndɛ mma nga e Wla kpɛnlɛ cɛn aɲia’n i blɛ nun e kanngan be nun’n, ɔ kanngan nun, yɛ ɔ bu su akunndan. Asɔnun kpɛnngbɛn sɔ’n waan kɛ ɔ yo sɔ’n, ɔ si ndɛ wie mun ekun afuɛ kwlakwla, kpɛkun, ɔ klo Zoova nin Zezi kpa tra laa’n. Sɛ e yo sɔ wie’n, é kló Zoova nin Zezi kpa trá laa’n. Kpɛkun, é klé kɛ e si ye.

7. (a) ?Kɛ Zezi srɛ́ Ɲanmiɛn kɔnguɛ’n, ndɛ benin yɛ ɔ kannin-ɔn? (b) ?Ngue yɛ ɔ kle kɛ Zoova tɛli Zezi i srɛlɛ’n su-ɔ?

⁷ Kɛ Zezi nin i akoto’m be yiali kɔnguɛ mɔ bé dí aliɛ nga be flɛ i kɛ e Min’n i aliɛ’n, ɔ srɛli Ɲanmiɛn. Ɔ kannin wafa ng’ɔ nin i Si be bo ti kun’n i ndɛ. Asa ekun’n, ɔ srɛli Ɲanmiɛn kɛ maan i sɔnnzɔnfuɛ’m be bo yo kun sɔ wie. (An kanngan Zan 17:20, 21 nun.) Zoova tɛli i Wa’n i srɛlɛ’n su. Afin, Zoova i Lalofuɛ’m be bo ti kun. E Wla kpɛnlɛ cɛn aɲia’n, yɛ ɔ kle kpa kɛ be bo ti kun-ɔn. Ɔ maan, aɲia sɔ’n timan kɛ e aɲia onga’m be sa. Cɛn sɔ nun’n, sran wafawafa kwlaa, i blɔfuɛ o, i sran ble o, mɔ be o nvle fanunfanun nun’n, be yia, be kle kɛ be lafi su kɛ Zoova sunmɛnnin i Wa’n kɛ ɔ wa de sran mun. Nvle wie’m be nun’n, sran ble nin blɔfuɛ’m be yiaman likawlɛ be suman Ɲanmiɛn. Sɛ be yia bɔbɔ’n, sran wie’m be bu i kɛ ɔ nin sɔ’n fataman. Sanngɛ, Zoova nin Zezi be bumɛn i sɔ. Kɛ be wun wafa nga e bo ti kun e Wla kpɛnlɛ cɛn’n nun’n, ɔ yo be fɛ dan.

8. ?Ndɛ benin yɛ Zoova maan Ezekiɛli kannin-ɔn?

⁸ E mɔ e su Zoova’n, kɛ e wun kɛ e bo ti kun’n i sɔ’n boman e nuan. Zoova maan i nuan ijɔfuɛ Ezekiɛli kannin kɛ i sɔ sa’n jú. Ɔ kannin waka nɲɔn be ndɛ. Waka kun ti Zida liɛ, yɛ kun ti Zozɛfu liɛ. Zoova seli Ezekiɛli kɛ ɔ fa waka bue nɲɔn sɔ mun mantan su naan be yo waka kun. (An kanngan Ezekiɛl 37:15-17 nun.) Afuɛ 2016, Zuie nun blɔfuɛ nun Sasafuɛ Tranwlɛ’n i nun ndɛ akpasua ng’ɔ tɛ fluwa’n i nun kannganfuɛ’m be kosan’m be su’n, ɔ yiyi ndɛ sɔ’n nun. Ɔ se kɛ: “Zoova maan Ezekiɛli klɛli kɛ i sufuɛ’m bé sá be sin mɛn ng’ɔ tali nda kɛ ɔ́ fá mán be’n i nun, naan bé káci nvle kunngba. Ezekiɛli i ndɛ sɔ’n kle kɛ, kɛ ɔ fɛ i mɛn i awieliɛ blɛ’n nun’n, Ɲanmiɛn i sufuɛ’m be bo yó kun titi.”

9. ?Kɛ é yó e Wla kpɛnlɛ cɛn aɲia’n afuɛ kwlakwla’n, ngue yɛ e wun i m’ɔ kle kɛ ndɛ nga Ezekiɛli kannin’n ɔ kpɛn su-ɔ?

⁹ Kɛ ɔ fɛ i afuɛ 1919 nun’n, Zoova maan i sufuɛ nga be lafi su kɛ bé kɔ́ ɲanmiɛn su’n, be yo ninnge mun sɛsɛsɛ, yɛ be bo ti kun. Be ti Zida i waka liɛ’n i nzɔliɛ. Be nga be lafi su kɛ bé ɲán anannganman nguan asiɛ’n su wa’n, be fali be wun  mantannin Klistfuɛ nga Ɲanmiɛn kpali be sieli be ngunmin’n. Be nga be lafi su kɛ bé trán asiɛ’n su’n, be ti Zozɛfu i waka liɛ’n i nzɔliɛ. Zoova seli kɛ ɔ́ fá waka bue nɲɔn sɔ mun mántan su naan be kaci “waka wunmuan kunngba” i sa nun. (Ezekiɛl 37:19) Zoova yoli maan be ng’ɔ kpali be sieli be ngunmin’n, be nin be nga be ti i “bua’m be wie” mun’n, b’a kaci ‘akpasua kun.’ (Zan 10:16; Zakari 8:23) Andɛ’n, be ngba be bo ti kun be su Zoova. Yɛ be Famiɛn’n ti kun, yɛle Zezi Klist mɔ Ezekiɛli flɛli i kɛ Ɲanmiɛn i ‘sufuɛ Davidi’n.’ (Ezekiɛl 37:24, 25) Kɛ e yia e yo e Wla kpɛnlɛ cɛn aɲia’n afuɛ kwlakwla’n, e wun kɛ Ɲanmiɛn i sufuɛ akpasua nɲɔn sɔ’m be bo ti kun kɛ Ezekiɛli fa kannin’n sa. ?Sanngɛ ngue yɛ e tinuntinun é yó naan Ɲanmiɛn i sufuɛ’m be bo w’a yo kun titi-ɔ?

10. ?Ngue yɛ e tinuntinun é yó naan e bo w’a yo kun titi-ɔ?

¹⁰ ?Ngue yɛ e tinuntinun é yó naan e bo w’a yo kun titi-ɔ? Maan e mian e ɲin naan e yo wun ase kanfuɛ. I nun mɔ Zezi o asiɛ’n su’n, ɔ seli i sɔnnzɔnfuɛ mun kɛ maan be kan be wun ase. (Matie 23:12) Mɛn’n nun sran sunman be bu i kɛ be ti kpa tra be wiengu mun. Sanngɛ e liɛ’n, maan e yo wun ase kanfuɛ. Maan e ɲin yi asɔnun kpɛnngbɛn mun yɛ e nanti atin  nga be kle e’n su. Sɛ e yo sɔ’n, yɛ e bo yó kun asɔnun’n nun titi-ɔ. Asa ekun’n, sɛ e kan e wun ase’n, Ɲanmiɛn klun jɔ́ e wun. Afin, Ɲanmiɛn “nin be nga be tu be wun mun be lɛ i, sanngɛ ɔ yo aenvuɛfuɛ’m be ye.”—1 Piɛr 5:5.

11. ?Ngue ti yɛ sɛ e bu kpanwun nin nzan’n be su akunndan’n, e nin e niaan mun e bo yó kun titi-ɔ?

¹¹ ?Ngue ekun yɛ ɔ fata kɛ e yo naan e bo w’a yo kun titi-ɔ? Yɛle kɛ, ka naan y’a yo e Wla kpɛnlɛ cɛn aɲia’n, maan e bu like nga kpanwun nin nzan’n be ti i nzɔliɛ’n, i akunndan. I li nnɔsua nun mɔ é yó aɲia sɔ’n, yɛ ɔ fata kɛ e yo sɔ kpa-ɔ. (1 Korɛntfuɛ Mun 11:23-25) Kpanwun mɔ kpanwun ayre nunman nun’n, ɔ ti Zezi i wunnɛn mɔ fɔ nunman nun m’ɔ fa yili e ti tɛ’n, i nzɔliɛ. Nzan’n ti i mmoja’n i nzɔliɛ. Sanngɛ, ɔ fata kɛ e fa e ɲin sie ndɛ cinnjin wie’m be su ekun. Yɛle kɛ, e ti kpɔlɛ tɛ’n kle kɛ Zoova nin i Wa Zezi be klo e. Afin, Zoova fɛli i Wa’n mannin. Yɛ Zezi kusu kplinnin su kɛ ɔ́ fɛ́ i wun yí e ti tɛ. Sɛ e bu klolɛ mɔ be klo e’n i akunndan’n, é kló be wie.Sɛ e kwlakwla e klo Zoova’n, e bo yó kun titi.

12. ?Ɲanndra benin yɛ Zezi buli m’ɔ kle kɛ Zoova klo kɛ e yaci sa nga e wiengu’m be yo e’n, e cɛ be-ɔ?

¹² Like nsan su nga e kwla yo naan e bo w’a yo kun titi’n, yɛle kɛ maan e yaci sa nga e wiengu’m be yo e’n e cɛ. Sɛ e yo sɔ’n, é klé kɛ e si ye. Afin e ti kpɔlɛ tɛ’n ti’n, Zoova kwla yaci e sa tɛ mun cɛ e. Kɛ ɔ ko yo naan y’a wun sa nga ti yɛ ɔ fata kɛ e yaci sa e cɛ’n, Zezi buli famiɛn kun nin i junman difuɛ’m be wun ɲanndra kun. Ɲanndra sɔ’n o Matie 18:23-34 nun. Kɛ e kanngan ndɛ mma sɔ’m be nun’n, maan e usa e wun kɛ: ‘?N tu min klun n fa like nga Zezi kleli’n su? ?N tra min awlɛn aniaan’m be wun yɛ e nin be e ti e wun aniɛn? ?Kɛ min wiengu’m be lo min ngasi’n, n yaci n cɛ be?’ Sa nga e wiengu’m be yo e’n, be nun wie’m be ti tɛ dan. Ɔ maan, kɛ mɔ fɔ o e nun ti’n, kɛ ɔ yo naan e yaci sa sɔ mun e cɛ’n, ɔ timan pɔpɔ. Sanngɛ, like nga Zoova waan e yo’n, yɛ Zezi kleli e-ɔ. (An kanngan Matie 18:35 nun.) Zezi kleli kɛ sɛ sa tɛ nga e niaan’m be yo e’n, ɔ yo be nsisɔ naan e yaci cɛman be’n, Zoova kusu su yaciman e liɛ mun cɛman e. Ɔ fata kɛ e bu i sɔ liɛ’n i akunndan kpa. Kɛ ɔ ko yo naan e bo w’a yo kun titi’n, ɔ fata kɛ e yaci sa nga e wiengu’m be yo e’n, e cɛ be.

13. ?Ngue yɛ é yó naan e nin e niaan mun y’a di anuansɛ titi-ɔ?

¹³ Kɛ e yaci sa nga e niaan’m be yo e’n e cɛ be’n, e nin be e tran klanman. Akoto Pɔlu seli kɛ maan e kplin e ɲin naan e bo yo kun, naan e di anuansɛ. (Efɛzfuɛ Mun 4:3) I sɔ’n ti, e Wla kpɛnlɛ cɛn aɲia’n i blɛ nun’n, maan e bu wafa nga e nin e niaan mun e tran’n i akunndan kpa. I li cɛn sɔ’n i kɔnguɛ nun yɛ ɔ fata kɛ e yo sɔ kpa-ɔ. I lɛ nun’n, maan e usa e wun kɛ: ‘?Be nga be si min’n, be wun kɛ n faman sa nga be yo min’n n sieman min klun trilili? ?Sran’m be sie i nzɔliɛ kɛ n kplin min ɲin naan e nin aniaan mun e bo w’a yo kun titi?’ Ɔ fata kɛ e bu kosan cinnjin sɔ’m be su akunndan.

14. ?Ngue yɛ é yó naan y’a kle kɛ ‘sa nga e wiengu yo e’n, ɔ sɔn e nun i klolɛ mɔ e klo i’n ti-ɔ’?

¹⁴ Like nnan su nga e kwla yo naan e bo w’a yo kun titi’n, yɛle kɛ maan e klo sran kɛ Zoova sa. (1 Zan 4:8) Nán maan e se kɛ: “N kwla klo min niaan mun, sanngɛ ɔ timan cinnjin kɛ n fa min wun mantan  be.” Sɛ e se sɔ’n, nn e nantiman afɔtuɛ kun mɔ Pɔlu mannin’n su. Ɔ seli kɛ: “Sa nga amun wiengu yo bɔ an wun i’n, maan ɔ sɔn amun nun i klolɛ bɔ an klo i’n ti.” (Efɛzfuɛ Mun 4:2) Kɛ Pɔlu seli kɛ “sa nga amun wiengu yo bɔ an wun i’n, maan ɔ sɔn amun” nun’n, ɔ kan guali su kɛ “i klolɛ bɔ an klo i’n ti.” Sran wafawafa be o asɔnun’n nun. Zoova yɛ maan sran sɔ’m be bɛli i sulɛ-ɔ. (Zan 6:44) I sɔ’n kle kɛ ɔ wunnin kɛ sa wie’m be ti’n, ɔ fata kɛ ɔ klo be. ?Sɛ Zoova klo be’n, e bɔbɔ yɛ é sé kɛ e kloman be-ɔ? Ɔ fata kɛ e klo be kɛ Zoova kunndɛ’n sa.—1 Zan 4:20, 21.

15. ?Ngue ti yɛ e si kɛ cɛn wie lele’n, e su yoman e Wla kpɛnlɛ cɛn aɲia’n kun-ɔn?

¹⁵ E si kɛ cɛn wie lele’n, e su yoman e Wla kpɛnlɛ cɛn aɲia’n kun. Afin, Pɔlu seli i niaan Klistfuɛ nga be kpali be sieli be ngunmin’n mun kɛ maan be wla kpɛn Zezi i wie’n su afuɛ kwlakwla, naan be bo ‘i wie ndɛ’n su lele ɔ fa ju i balɛ.’ (1 Korɛntfuɛ Mun 11:26) Asa ekun’n, kɛ Zezi kán mɛn’n i awieliɛ i ndɛ’n, ɔ kɛnnin i balɛ’n i ndɛ wie. Kɛ ɔ́ kán ɲrɛnnɛn dan m’ɔ su wa ju’n i ndɛ’n, ɔ seli kɛ: ‘Nzɔliɛ’n ng’ɔ kle kɛ m bɔ n kacili Sran’n n su ba’n, ɔ́ fíte ɲanmiɛn su lɔ, nvlenvle’n kwlaa bé bó awuyomo, bé wún m bɔ n kacili Sran’n kɛ n wo ɲanmiɛn ble’n su n su ba. Ḿ bá yasua su, kɛ ɔ́ yó sɔ’n, min nyrun ɔ́ yó ɲanɲan yɛ ɔ́ yó sro. Kɛ awɛ’n ko tɛ’n, ń súnman min anzi mun, bé wá yía be mɔ Ɲanmiɛn fali be mɔ be o mɛn wunmuan’n nun’n, kɛ ɔ fin ɲanmiɛn m’ɔ la nglo lɔ plaii’n i bue kun su lele fa ju i bue kun ekun su lɔ’n yɛ ɔ́ yó i sɔ nin-ɔn.’ (Matie 24:29-31) Zezi “wá yía be mɔ Ɲanmiɛn fali” be’n. Yɛle kɛ, ɔ́ fá Klistfuɛ nga Ɲanmiɛn kpali be sieli be ngunmin’n mɔ be te o asiɛ’n su’n bé kɔ́ ɲanmiɛn su. Ɲrɛnnɛn dan’n nun’n, yɛ ɔ́ fá be kɔ́ ɲanmiɛn su-ɔ. Ɔ́ yó sɔ kwlaa naan Armagedɔn alɛ’n w’a ju. Armagedɔn alɛ’n nun’n, Zezi nin sran 144.000 be nin asiɛ su famiɛn’m bé kún, yɛ bé kwlá be. (Sa Nglo Yilɛ 17:12-14) Ɔ maan, kɛ Zezi ko fa be nga Ɲanmiɛn kpali be sieli be ngunmin’n be kwlaa ko wɔ ɲanmiɛn su’n, yɛ e su yoman e Wla kpɛnlɛ cɛn aɲia’n kun-ɔn.

16. ?Ngue ti yɛ w’a fua kpa kɛ á trán e Wla kpɛnlɛ cɛn aɲia’n i bo-ɔ?

¹⁶ Maan e mian e ɲin naan e tran e Wla kpɛnlɛ cɛn aɲia mɔ é wá yó i afuɛ 2018, Marsi i le 31 nun’n i bo. Yɛ maan e srɛ Zoova kɛ ɔ fɛ i wawɛ’n man e, naan e yo e liɛ nga e kwla yo naan i sufuɛ’m be bo w’a yo kun titi’n. (An kanngan Jue Mun 133:1 nun.) Cɛn kun’n, é yó e Wla kpɛnlɛ cɛn aɲia’n i kasiɛn’n. Sanngɛ ka naan cɛn sɔ’n w’a ju’n, maan e kle kɛ e aɲia sɔ mɔ i ti’n e bo’n yo kun afuɛ kwlakwla’n, ɔ ti e cinnjin kpa.