1. ?Ngue yɛ kɛ e wun i’n, ɔ yo e fɛ-ɔ?

KƐ E wun kɛ Ɲanmiɛn i sufuɛ’m be kpaja kɛ kannin sa’n, i sɔ’n yo e fɛ dan! Afuɛ sin’n, Zoova i sufuɛ’m be kleli sran miliɔn blu tra su be Biblu’n nun like. Kpɛkun, sran miliɔn kpanngban mɔ Ɲanmiɛn ndɛ’n lo be’n, be trannin e Wla kpɛnlɛ cɛn aɲia’n i bo wie. Ɔ maan, be kwla tieli e ti tɛ mɔ Zoova maan Zezi fɛli i wun yili’n, i su ndɛ.​—1 Zan 4:9.

2, 3. (1) ?Ngue ti yɛ kɛ e kpaja kɛ ‘nzraama sa mɛn’n nun’n,’ i sɔ’n ti abonuan-ɔn? (2) ?Ngue yɛ é wá kɛ́n i ndɛ like suanlɛ nga nun-ɔn?

² Zoova i Lalofuɛ’m be kan aniɛn fanunfanun. Sanngɛ, e bo ti kun kɛ awlo kun nunfuɛ mun sa, yɛ e manman Zoova cɛn kwlakwla. (Sa Nglo Yilɛ 7:9) Kannzɛ e tranman lika kunngba nun’n, annzɛ e kanman aniɛn kunngba’n, sanngɛ e ngba e kwla kpaja kɛ ‘nzraama sa mɛn’n nun.’​—Filipfuɛ Mun 2:15.

³ Jasin fɛ mɔ e bo’n nin e bo m’ɔ ti kun’n, ɔ nin e klun mɔ e tu e di junman’n, i kwlaa sɔ’n manman Zoova. ?Wafa sɛ yɛ ninnge nsan sɔ’m be nun’n, e kwla kpaja kɛ kannin sa mɛn’n  nun-ɔn?​—An kanngan Matie 5:14-16 nun.

4, 5. (1) ?Kannzɛ e bo jasin fɛ’n, ngue yɛ ɔ fata kɛ e yo naan y’a kpaja kɛ kannin sa-ɔ? (2) ?Kɛ e kle sran’m be kɛ be ndɛ lo e’n, wafa sɛ yɛ i bo gua-ɔ? (An nian foto ng’ɔ o kan like suanlɛ’n bo i bo lɛ’n.)

⁴ Wafa nga e kwla kpaja kɛ kannin sa’n i kun yɛle kɛ, maan e bo jasin fɛ’n, yɛ e kle sran’m be like naan be kaci Zezi i sɔnnzɔnfuɛ. (Matie 28:19, 20) Afuɛ 1925 nun, Zuɛn 1, Sasafuɛ Tranwlɛ’n seli kɛ, sɛ Klistfuɛ kun ‘w’a kpajaman kɛ kannin sa’ mɛn’n i awieliɛ blɛ nga nun’n, ɔ nin e Min Zezi be su kwlá nantiman klanman. Ɔ seli ekun kɛ: “I sɔ’n ti, ɔ fata kɛ ɔ bo jasin fɛ’n kle sran mun. Yɛ ɔ fata kɛ ɔ nanti Ɲanmiɛn Ndɛ’n m’ɔ ti kɛ kannin sa’n i su.” Jasin fɛ nga e bo’n, ɔ nin e nzuɛn kpa’n ti’n, sran’m be manman Zoova. Kɛ e bo jasin fɛ’n sran’m be fa be ɲin be sie e su. Kɛ e wun be mɔ e sri puɛɛ mɔ e yo be like juejue su’n, be wun kɛ e nzuɛn’n ti kpa. Ɔ maan, be bu e nin Ɲanmiɛn mɔ e su i’n, e wun akunndan kpa. I sɔ’n manman Zoova.

⁵ Zezi seli i sɔnnzɔnfuɛ mun kɛ: ‘Kɛ an wlu awlo’n nun’n, an yo like.’ (Matie 10:12) Lika nga Zezi boli jasin fɛ’n nun lɔ’n, kɛ sran’m be wun aofuɛ kun’n, be fɛ i kɔ be awlo lɔ. Andɛ lika sunman nun’n, sran’m be tɛmɛn i sɔ yo. Kɛ be wun aofuɛ be anuan nun lɛ bɔbɔ’n, be awlɛn’n be be klun. Sanngɛ, sɛ e nin be e sri naan be wun kɛ be ndɛ lo e’n, bé sɔ́ e nun klanman. Kɛ é bó jasin fɛ’n nzra nun’n, mɔ e nin sran mun e sri annzɛ e yo be like juejue su’n, be sisiman be bo naan b’a fa e fluwa mun. Kpɛkun, be kunndɛ kɛ e nin be e koko ndɛ wie’m be su yalɛ. ?A nin a siemɛn i sɔ liɛ’n i nzɔliɛ?

6. ?Ngue yɛ aniaan oke kun nin i yi be yoli naan b’a kwla bo jasin fɛ’n titi-ɔ?

⁶ Angle lɔ aniaan kun nin i yi be kwlá boman jasin fɛ’n awloawlo’m be nun kpa kun. Afin, b’a yo oke, yɛ be timan juejue. I sɔ’n ti’n, be takali tabli kun be awlo’n i ɲrun lɛ. Kpɛkun, be fa e fluwa’m be siesie su. Be awlo’n o suklu kun i wun koko lɛ. I sɔ’n ti’n, be fa fluwa ng’ɔ kwla yo siɛ nin niɛn’m be ye’n be siesie i tabli’n su. Siɛ nin niɛn’m be fali fluwa sɔ’m be nun wie mun. (Be flɛ fluwa sɔ’m be nun kun kɛ Les jeunes s’interrogent. Réponses pratiques.) Blɛ sunman’n, aniaan bla kun m’ɔ ti atin bofuɛ’n, ɔ nin be ko bo jasin fɛ’n. Siɛ nin niɛn’m be sieli i nzɔliɛ kɛ aniaan bla’n i wun yo fɛ. Kpɛkun, be wunnin kɛ aniaan oke nin i yi’n be kunndɛ kpa kɛ bé úka sran mun. Siɛ kun bɔbɔ fali ajalɛ kɛ be kle i Biblu’n nun like.

7. ?Sɛ aofuɛ wie’m be o e jasin fɛ bowlɛ’n nun’n, ngue yɛ é yó naan b’a si Zoova-ɔ?

⁷ Alɛ’n ti’n, sran kpanngban be jaso be nvle liɛ’n nun be ko tran nvle uflɛ nun. ?Sɛ sran sɔ’m be nun wie’m be o e jasin bowlɛ’n nun’n, ngue yɛ é yó naan b’a si Zoova-ɔ? Like klikli ng’ɔ fata kɛ e yo’n, yɛle kɛ maan e suan wafa nga be yo sran like be aniɛn nun’n. Sɛ e kɔ e ɛntɛnɛti  adrɛsi kun su’n (JW Language), e kwla suan wafa nga e nin be e kwla koko yalɛ be aniɛn’n nun’n. Asa ekun’n, sɛ e kɔ jw.org su’n, e kwla fa video nin fluwa mun be aniɛn nun e kle be.​—Mmla’n 10:19.

8, 9. (1) ?Wafa sɛ yɛ lemɔcuɛ afiɛn aɲia’n uka e-ɔ? (2) ?Wafa sɛ yɛ siɛ nin niɛn’m be kwla uka be mma mun naan b’a kwla tɛ kosan’m be su kpa aɲia’m be bo-ɔ?

⁸ Ninnge ng’ɔ fata kɛ e ɲan be naan y’a kwla bo jasin fɛ’n i kpa’n, Zoova fa man e. I wie yɛle kɛ like nga e suɛn i Klistfuɛ mun nin be junman’n aɲia’n i bo lɔ’n, ɔ uka e naan y’a si sran’m be osu nian naan y’a bo be Biblu’n nun like klelɛ bo.

⁹ Blɛ sunman’n, kɛ sran’m be ba e aɲia’m be bo mɔ be wun kɛ ba kanngan’m be tɛ kosan’m be su’n, ɔ bo be nuan. Maan amun kle amun mma’m be like naan be tɛ kosan’m be su kɛ be fa ijɔ titi’n sa. Aniaan wie’m be liɛ’n, ndɛ nga ba kanngan wie’m be kɛnnin i aɲia’m be bo mɔ be tili’n, i ti yɛ be kacili Zoova i sufuɛ-ɔ.​—1 Korɛntfuɛ Mun 14:25.

10. ?Ngue ti yɛ sɛ awlobo kun nunfuɛ’m be su Ɲanmiɛn awlo lɔ’n, be bo yó kun-ɔn?

¹⁰ Like kun ekun mɔ sɛ e yo’n, é kpája kɛ kannin sa’n, yɛle kɛ maan e nin e awlofuɛ mun nin asɔnun nunfuɛ mun e kwlaa e bo yo kun. I wie yɛle kɛ, sɛ e ti siɛ’n, maan e mian e ɲin naan e nin e awlofuɛ mun e su Ɲanmiɛn awlo lɔ. Awlobo wie’m be nian JW televiziɔn likawlɛ. Kpɛkun, be koko su yalɛ. Sa ng’ɔ o  ba kanngan’m be su’n, ɔ nin gbanflɛn nin talua’m be liɛ’n timan kun. Kɛ e nin e awlofuɛ mun é sú Ɲanmiɛn awlo lɔ’n, nán maan e wla fi i sɔ liɛ’n su. Maan e uka e awlofuɛ’m be tinuntinun, naan like nga e suan’n ɔ yo be ye.​—Jue Mun 148:12, 13.

11-13. ?Ngue yɛ e kwla yo naan asɔnun nunfuɛ’m be bo w’a yo kun titi-ɔ?

¹¹ Gbanflɛn nin talua mun, amun kwla yo maan asɔnun nunfuɛ’m be kwlaa be wun kpaja be. I wie yɛle kɛ, amun kwla tra aniaan oke’m be janvuɛ. Amun kwla usa aniaan oke mun like ng’ɔ ukali be naan b’a kwla su Zoova titi’n. Sɛ amun yo sɔ’n, ndɛ nga bé kán’n, ɔ́ wlá amun fanngan. Kpɛkun, ɔ́ wlá be kusu be fanngan wie. Asa ekun’n, ɔ fata kɛ e kwlakwla, i gbanflɛn o, i talua o, i oke o, e yo naan be nga be ba e aɲia’m be bo uflɛuflɛ’n be wun kpaja be. Sɛ e wun be’n, maan e yo be like, e nin be e sri, yɛ e kle be lika nga be kwla tran’n. Maan e fa be e kle e niaan mun. Maan e yo naan be wun be wun fɛ asɔnun’n nun.

¹² Kɛ amún tínngɛ jasin fɛ bolɛ aɲia’n, amun kwla yo naan aniaan oke’m b’a kpaja kɛ kannin sa. Yɛle kɛ, maan amun fa be sie i lika nga be kwla bo jasin fɛ lɛ’n i nun. Amun yo naan be nin gbanflɛn nin talua’m be bo jasin fɛ’n likawlɛ. Aniaan oke mun nin aniaan nga tukpacɛ kle be yalɛ’n, be kwlá boman jasin fɛ’n i kpa kɛ laa’n sa. I sɔ’n ti’n, ɔ ju wie’n be sa sin bubu be. Sanngɛ, kɛ be wun kɛ e bu be akunndan naan e wun sa ng’ɔ o be su’n i wlɛ’n, be wun kpaja be. Kannzɛ bɔbɔ b’a yo oke’n, annzɛ be su Zoova w’a cɛ’n, kɛ e kle kɛ be ndɛ lo e’n, i sɔ’n wla be fanngan. Kpɛkun, be bo jasin fɛ’n juejue su.​—Saun Yolɛ 19:32.

¹³ Laa’n, kɛ Izraɛlifuɛ’m be yia be su Zoova likawlɛ’n be di aklunjuɛ. Jue tofuɛ’n seli kɛ: “Kɛ aniaan’m be tran likawlɛ’n i sɔ’n ti kpa, ɔ yo nyɛnmɛn.” (An kanngan Jue Mun 133:1, 2 nun.) Jue tofuɛ’n seli kɛ, kɛ aniaan’m be yia mɔ be bo ti kun’n, ɔ ti kɛ ngo fanninfannin m’ɔ yo sran i wunnɛn klanman’n sa. Sɛ e kle e niaan’m be kɛ be ndɛ lo e’n, be wla gúa ase. Kpɛkun, i sɔ’n yó maan asɔnun’n nunfuɛ’m be bo yó kun. I sɔ’n ti’n, maan e fa e wun e mantan aniaan nga be o asɔnun’n nun’n, naan e si be kpa.​—2 Korɛntfuɛ Mun 6:11-13.

14. ?Kan e tran lɛ’n, wafa sɛ yɛ e kwla kpaja kɛ kannin sa-ɔ?

¹⁴ E kwla kpaja kɛ kannin sa lika kwlaa. Sɛ e mantanfuɛ’m be wun kɛ be ndɛ lo e’n, bé kúnndɛ kɛ bé sí Zoova. Maan e usa e wun kɛ: ‘?Akunndan benin yɛ min mantanfuɛ’m be bu i min wun-ɔn? ?Min awlo’n nun ti yɛiin, yɛ i nun ninnge’m be ti siesiewa sɛsɛsɛ? ?N yo lika’n nun klanman? ?N uka min mantanfuɛ mun?’ Klistfuɛ wie’m be kleli kɛ be osufuɛ mun, annzɛ be mantanfuɛ mun, annzɛ be wiengu junman difuɛ mun, annzɛ be wiengu suklu ba’m be ndɛ lo be. Kpɛkun, i bo guali kpa. Wafa nga be yoli i sɔ liɛ’n, maan e usa be naan be yiyi nun kle e.​—Efɛzfuɛ Mun 5:9.

15. ?Ngue ti yɛ ɔ ti cinnjin kɛ e tran minndɛ-ɔ?

¹⁵ Sɛ e kunndɛ kɛ é kpája kpa kɛ kannin sa’n, ɔ fata kɛ e wun blɛ nga e o nun yɛ’n i wlɛ. Zezi seli i sɔnnzɔnfuɛ mun kpɛ sunman kɛ be “tran minndɛ.” (Matie 24:42; 25:13; 26:41) Sɛ e bu i kɛ ‘ɲrɛnnɛn dan’n’ te o mmua’n, e su tuman e klun e kanman Zoova i ndɛ’n e kleman sran mun. (Matie 24:21) Ɔ maan, e su kpajaman kpa kɛ kannin sa kun. I kpa bɔbɔ’n, kɛ ɔ́ kɔ́ i ɲrun’n, e su kpajaman kun mlɔnmlɔn.

16, 17. ?Ngue yɛ é yó naan y’a kwla tran y’a minndɛ titi-ɔ?

¹⁶ Andɛ’n, ɔ ti cinnjin kɛ e tran minndɛ. Kɛ lika cɛ́n m’ɔ́ sán’n, nn mɛn’n yó tɛ kɔ́ i ɲrun. Sanngɛ, e si kɛ mɛn’n i nunnunlɛ cɛn nga Zoova sieli’n, ɔ su sɛnmɛn i wun. (Matie 24:42-44) Ka naan i sɔ cɛn’n w’a ju’n, ɔ fata kɛ e tra e awlɛn, yɛ e ɲin tran like nga Zoova wá yó mán e’n su. Maan e kanngan Biblu’n nun titi. Yɛ nán e yaci Zoova srɛlɛ le. (1 Piɛr 4:7) Aniaan wie’m be su Zoova i afuɛ kpanngban yɛ. Maan e nian ajalɛ kpa nga be kle e’n su. Aniaan sɔ’m be nun kun i su ndɛ o afuɛ 2012,  Avrili 15, blɔfuɛ nun Sasafuɛ Tranwlɛ’n i bue 18-21 nun.

¹⁷ Maan e su Zoova juejue su titi, e yo e wiengu’m be ye, yɛ e fa e wun e mantan e niaan mun. Sɛ e yo sɔ’n, e klun jɔ́. Kpɛkun, é wún kɛ blɛ’n sin ndɛndɛ. (Efɛzfuɛ Mun 5:16) Afuɛ kɔe ya nga be sinnin lɛ nun’n, aniaan’m be miannin be ɲin be dili Zoova i junman’n kpa. Andɛ Zoova junman nga e di’n, ɔ kɔ i ɲrun kpa tra laa’n. I sɔ’n kle kɛ e kpaja kpa kɛ kannin sa.

18, 19. ?Wafa sɛ yɛ asɔnun kpɛnngbɛn’m be uka e naan y’a kwla su Zoova kpa titi-ɔ? An fa sa kun yiyi nun.

¹⁸ Kannzɛ bɔbɔ fɔ o e nun’n, sanngɛ e kwla su Zoova kɛ ɔ nin i fata’n sa. Kɛ ɔ ko yo naan i sɔ liɛ’n w’a yo ye’n, Zoova “mannin sran’m be like kɛ be yo.” Sran sɔ mun yɛle asɔnun kpɛnngbɛn mun. (An kanngan Efɛzfuɛ Mun 4:8, 11, 12 nun.) I sɔ’n ti’n, sɛ asɔnun kpɛnngbɛn’m be kɔ e osu nianlɛ’n, maan e sɔ afɔtuɛ nga be man e’n nun klanman.

¹⁹ Angle lɔ aniaan kun nin i yi be tranman klanman. I sɔ’n ti’n, be ko wunnin asɔnun kpɛnngbɛn nɲɔn be wun naan be uka be. Bla’n waan yasua’n faman Ɲanmiɛn sulɛ’n, i nun ta. Yasua’n kusu seli kɛ ɔ siman like kle. I sɔ’n ti’n, blɛ sunman’n be suman Ɲanmiɛn awlo lɔ. Asɔnun kpɛnngbɛn’m be fali aniaan’n nin i yi’n be ɲin sieli i Zezi i ajalɛ’n su. Be wlali yasua’n i fanngan kɛ ɔ nian wafa nga Zezi niannin i sɔnnzɔnfuɛ’m be lika’n su. Yɛ be wlali bla’n i fanngan kɛ ɔ trɛ i awlɛn i wun’n, i wun. Kpɛkun, be kleli be wafa nga be nin be mma nɲɔn’m be kwla su Ɲanmiɛn awlo lɔ’n. (Efɛzfuɛ Mun 5:21-29) Yasua’n miɛnnin i ɲin kpa naan w’a kwla niɛn i awlobo’n i lika kpa. Asɔnun kpɛnngbɛn’m be wlɛli i fanngan kɛ nán maan i sa sin bubu i, sanngɛ maan ɔ srɛ Zoova naan ɔ fɛ i wawɛ’n mɛn i. Afɔtuɛ nga asɔnun kpɛnngbɛn’m be mannin aniaan’n nin i yi’n klolɛ su’n, ɔ ukali be kpa.

20. ?Sɛ e kpaja kɛ kannin sa’n, wafa sɛ yɛ i bo gúa-ɔ?

²⁰ Biblu’n se kɛ: “Sran nga i nyin yi Anannganman b’ɔ nanti i atin’n su’n, i liɛ su ti ye!” (Jue Mun 128:1) Sɛ e kpaja kɛ kannin sa’n, e klun jɔ́ titi. I sɔ’n ti’n, maan e kle sran’m be like naan be si Ɲanmiɛn. Asa ekun’n, maan e nin e awlofuɛ mun nin asɔnun nunfuɛ mun e bo yo kun titi. Yɛ maan e tran minndɛ. Sɛ e yo sɔ’n, sran’m bé wún kɛ e nzuɛn’n ti kpa. Kpɛkun, bé mánmán e Si Zoova.​—Matie 5:16.