GBANFLƐN NIN TALUA’M BE LIƐ
9: An si amun wun kpa
?I BO’N YƐLE BENIN?
Yɛle kɛ maan amun si amun nzuɛn’n, nin like nga amun lafi su’n, ɔ nin ninnge nga amun bu i kɛ be ti kpa’n.
?NGUE TI YƐ I SƆ’N TI CINNJIN-ƆN?
Sɛ amun kle kɛ like nga amun lafi su’n ti amun cinnjin kpa’n, amun su manman amun wiengu’m be atin naan be laka amun.
“Sran kpanngban be ti kɛ bebe ba sa. Be bɔbɔ be faman be klunklo ajalɛ. Sran uflɛ yɛ ɔ kle be wafa ng’ɔ fata kɛ be wlawla be wun-ɔn.”—Adrian.
“Kannzɛ bɔbɔ wie liɛ’n, sa ng’ɔ ti kpa’n i yolɛ’n ti kekle man min’n, sanngɛ n mian min ɲin. Be nga be wla min fanngan kɛ n yo sa ng’ɔ ti kpa’n, kɛ e nin be o’n, min wun kpaja min. Ɔ maan, be yɛ n tra be janvuɛ-ɔ.”—Kutune.
NDƐ NGA BIBLU’N KAN’N: “Nán amun fa mɛn nga nunfuɛ’m be ayeliɛ’n kun. Sanngɛ amun kaci amun akunndan’n naan amun kaci mlɔnmlɔn.”—Rɔmunfuɛ Mun 12:2.
LIKE NGA AMUN KWLA YO’N
Bu sran wafa nga a ti dɔ nga su’n, ɔ nin sran wafa nga a kunndɛ kɛ á yó i cɛn wie lele’n i akunndan. I sɔ yolɛ nun’n, bu ninnge nga a si be yo’n, nin nga a siman be yo’n, ɔ nin ninnge nga a lafi be su’n, be akunndan. Usa ɔ wun kosan nga mun:
Ninnge nga a si be yo’n: ?Ngue yɛ n si i yo kpa-ɔ? ?N ti sran m’ɔ yo ninnge mun dɔ su-ɔ? ?N si min wun su nian? ?N tu min klun n di junman? ?N ti klun ufuefuɛ? ?Sa kpakpa benin mun yɛ n yo be-ɔ?
YO NGA NIAN: Sɛ ɔ wla kpɛnman like kpa kun mɔ a yoli’n su’n, usa ɔ si nin ɔ nin annzɛ ɔ janvuɛ kpa kun. Kpɛkun, like nga ti yɛ be bu i kɛ like sɔ’n ti kpa’n, maan be kan kle wɔ.
NDƐ NGA BIBLU’N KAN’N: “Maan sran kun bu like nga i bɔbɔ yo’n i sin nian. I liɛ’n, sɛ ɔ́ dí aklunjɔɛ’n, like nga i bɔbɔ yo’n i ti yɛ ɔ́ dí aklunjɔɛ-ɔ. Nán maan ɔ fa like nga sran uflɛ yo’n sunnzun i liɛ’n.”—Galasifuɛ Mun 6:4.
Ninnge nga a siman be yo’n: ?Nzuɛn tɛ benin yɛ ɔ fata kɛ n mian min ɲin kpa naan m’an wlɛ i ase-ɔ? ?Blɛ benin nun yɛ min konvi sɔ sa tɛ kun i yolɛ-ɔ? ?Ninnge benin mun yɛ ɔ fata kɛ n nian min wun su naan m’an yoman be-ɔ?
NDƐ NGA BIBLU’N KAN’N: “Sɛ e se kɛ: ‘Sa tɛ kaansa nunman e wun’n,’ nn e su laka e bɔbɔ e wun.”—1 Zan 1:8.
Ninnge nga a lafi be su’n: ?Mmla benin yɛ n nanti su-ɔ? ?Ngue ti-ɔ? ?N lafi su kɛ Ɲanmiɛn o lɛ? ?Ngue ti yɛ n lafi su kɛ ɔ o lɛ sakpa-ɔ? ?Ninnge benin mun yɛ sran’m be yo mɔ n bu i kɛ ɔ timan su-ɔ? ?Ngue ti-ɔ? ?Sa benin yɛ n lafi su kɛ bé jú e ɲrun lɔ-ɔ?
NDƐ NGA BIBLU’N KAN’N: “Akunndan bulɛ’n wá nían ɔ su, yɛ sa wlɛ wunlɛ’n sásá ɔ.”—Ɲanndra Mun 2:11.
Ninnge wie mɔ be kwla yo ɔ fɛ ekun'n
KOSAN 10 MƆ GBANFLƐN NIN TALUA’M BE USA’N BE SU TƐLƐ
?N si min wun kpa?
Wun like ng’ɔ fata kɛ a yo’n, ɔ nin ng’ɔ fataman kɛ a yo’n i wlɛ. Yɛ wun like nga a si i yo kpa’n, ɔ nin nga a simɛn i yo’n, ɔ nin like nga a kunndɛ kɛ á yó’n be wlɛ. I liɛ’n, sɛ sran wie jran ɔ wun kɛ a yo like wie’n, á fá ajalɛ ng’ɔ ti kpa’n.
