Maan e si “sran’m be kwlaa” be aunnvuɛ
Kɛ Zezi klé i sɔnnzɔnfuɛ mun wafa ng’ɔ fata kɛ be bo jasin fɛ’n, ɔ dili be nanwlɛ kɛ nán sran ngba yɛ ɔ́ síe i su be nuan bo-ɔ. (Lik 10:3, 5, 6) Andɛ’n kɛ é bó jasin fɛ’n, e wun i sɔ liɛ’n. Sran wie’m be kan e ndɛ tɛtɛ. Ɔ maan, kɛ ɔ yo naan e si be aunnvuɛ’n, naan e bo jasin fɛ’n e kle be’n, ɔ kwla yo kekle e sa nun.
Sran ng’ɔ si aunnvuɛ’n, i wiengu’m be ndɛ lo i. Kɛ sa o be su’n, ɔ wun i wlɛ. Kpɛkun, be yo i annvɔ. Ɔ maan, ɔ kunndɛ kɛ ɔ́ úka be. Sɛ e siman be nga e to be’n be aunnvuɛ’n, e su boman jasin fɛ’n juejue su. Yɛ e su kwlá ukaman be naan b’a si Ɲanmiɛn ndɛ’n. Kɛ e trɔ sin’n, ɔ fata kɛ e fita nun naan w’a jue kpa. I wafa kunngba’n, sɛ e si sran’m be aunnvuɛ’n, é bó jasin fɛ’n juejue su é klé be.—1 Tɛsalonikfuɛ Mun 5:19.
?Ngue yɛ é yó naan y’a si sran’m be aunnvuɛ kpa y’a tra laa-ɔ? E kwla nian Zoova nin Zezi nin akoto Pɔlu be ajalɛ’n su. Ndɛ akpasua nga nun’n, é wá kán sran nsan sɔ’m be ndɛ.
MAAN E NIAN ZOOVA I AYELIƐ’N SU
Sran’m b’a bua Zoova i su ato lele i afuɛ akpi ko ju wie yɛ. Sanngɛ, Zoova te “yo be nga be si-man ye’n ɔ nin klunwifuɛ’m be ye.” (Lik 6:35) ?Wafa sɛ yɛ ɔ yo be ye-ɔ? Yɛle kɛ, ɔ trɛ i awlɛn be wun. Ɔ klo kɛ ɔ́ dé “sran’m be kwlaa.” (1 Timote 2:3, 4) Zoova kloman klunwi ayeliɛ mun. Sanngɛ, sran’m be ndɛ lo i. Yɛ ɔ kunndɛman kɛ be nun kun sa wu.—2 Piɛr 3:9.
Zoova si kɛ Satan si sran’m be laka kpa. (2 Korɛntfuɛ Mun 4:3, 4) Zoova i su ndɛ nga sran sunman be tili’n, ɔ timan nanwlɛ. Kɛ ɔ fɛ i be bakan nun lele’n, yɛ be kannin ndɛ sɔ mun kleli be-ɔ. I sɔ’n ti, kɛ ɔ yo naan be fa ndɛ nanwlɛ’n su’n, ɔ timan pɔpɔ. Sanngɛ, Zoova kunndɛ kpa kɛ ɔ́ úka be. ?Ngue yɛ ɔ kle sɔ-ɔ?
Ninivufuɛ’m be su ndɛ’n kle sɔ. Ninivufuɛ’m be yo be wiengu’m be like yaya. Sanngɛ, Zoova seli Zonasi kɛ: “Niniv b’ɔ ti klɔ dan, bɔ sran akpi-akpi ya sran akpi-akpi ablaɔn (120.000) bɔ be wunman sa wlɛ’n, be o su’n, [...] yɛ n ko si-man be aunnvuɛ-ɔ?” ( Zonas 4:11) Ninivufuɛ’m be siman Zoova i su ndɛ nanwlɛ’n. Sanngɛ Zoova sili be aunnvuɛ. I sɔ’n ti, ɔ sunmannin Zonasi kɛ ɔ ko kan ndɛ kle be.
Zoova bu sran’m be nguan’n i like cinnjin. Kɛ e bu i sɔ wie-ɔ. I sɔ’n ti, e kunndɛ kɛ é úka be naan be si i. Kannzɛ bɔbɔ ɔ yo e kɛ be su sɔman ndɛ nanwlɛ’n nun klanman’n, sanngɛ e kunndɛ kɛ é kán klé be.
MAAN E NIAN ZEZI I AYELIƐ’N SU
Zezi ti kɛ i Si sa. Kɛ ɔ wunnin sran mun’n, be yoli i annvɔ. “Afin be ti afɛfuɛ yɛlɛ kɛ b’a bo je kɛ bua bɔ be lɛ-man sunianfuɛ’n sa.” (Matie 9:36) Zezi si kɛ sran sɔ’m be like klefuɛ’m be yo be tɛtɛ, yɛ like nga be kle be’n, ɔ timan nanwlɛ. Asa ekun’n, ɔ si kɛ sa wie’m be ti’n, sran nga be bɛ i ndɛ’n i tielɛ’n, be nun sunman be su sumɛn i su. Ɔ nin i sɔ ngba’n, ɔ kleli be like kpanngban.—Mark 4:1-9.
Sɛ a to sran kun naan ɔ sɔman ɔ nun klanman’n, nán ɔ sa sin bubu wɔ.
Sa wie’m be ti’n, sran wie’m be sɔ e nun klanman, yɛ wie’m be sɔman e nun.
Kɛ sran’m be sɔman ndɛ nga e kan kle be’n nun klanman’n, maan e wun sa nga ti yɛ be yo sɔ’n i wlɛ. Atrɛkpa’n, sa tɛtɛ mɔ be nga be tɔn be wun suɛn kɛ be ti Klistfuɛ’n be yo’n ti’n, be buman Klistfuɛ’m be wun akunndan kpa, annzɛ wafa nga be bu Biblu’n, ɔ timan su. Sran wie’m be liɛ’n, e su ndɛ nga be tili’n, ɔ timan nanwlɛ. Yɛ wie’m be bu i kɛ sɛ be nin e koko yalɛ’n, be osufuɛ mun annzɛ be mantanfuɛ’m bé yó be finfin.
Be nga e to be e jasin fɛ bowlɛ’n nun’n, sa’m be tɔli be nun wie’m be su laa. Yɛ be te wun i su afɛ. Be flɛ ngaliɛ difuɛ kun kɛ Kimun. Ɔ seli kɛ alɛ’n ti’n, i jasin fɛ bowlɛ’n nun lɔfuɛ’m be nun sunman be leman like fi kun. Be bumɛn i kɛ cɛn wie lele’n be liɛ yó ye. Be awlɛn’n w’a kpɔtɔ be klun, yɛ be lafiman sran fi su kun. Lika sɔ’n nun lɔ’n, sran wie’m be tanndan Zoova i Lalofuɛ’m be ɲrun naan be yaci jasin fɛ’n i bolɛ. Cɛn kun bɔbɔ’n, kɛ Kimun bó jasin fɛ’n, be yoli i like yaya.
Sran’m be yo Kimun i tɛtɛ. ?Sanngɛ ngue yɛ ɔ ukɛ i naan w’a kwla si be aunnvuɛ titi-ɔ? Ɔ bu ndɛ ng’ɔ o Nyanndra Mun 19:11 nun’n i su akunndan titi. Ɔ se kɛ: “Sran ng’ɔ si ngwlɛlɛ’n ɔ fa-man ya ndɛndɛ.” Kɛ Kimun bu sa ng’ɔ tɔli i jasin fɛ bowlɛ’n nun lɔfuɛ’m be su’n i akunndan’n, be yo i annvɔ. Asa ekun’n, nán sran ngba yɛ ɔ yo i tɛtɛ-ɔ. Sran wie’m be sɔ i nun klanman. Ɔ maan, ɔ ko nian be osu titi.
Maan e tinuntinun e usa e wun kɛ: ‘?Sɛ ɔ ti kɛ n siman ndɛ nanwlɛ’n, naan Zoova i Lalofuɛ’m be waan bé bó jasin fɛ’n klé min’n, wafa sɛ yɛ ń sɔ́ be nun-ɔn?’ Sɛ be tɔnnin be suɛn kleli e’n, atrɛkpa’n, e su sɔman be nun klanman. Ɔ maan, sɛ be si e aunnvuɛ’n, ɔ́ yó e fɛ. Zezi seli kɛ like nga e kunndɛ kɛ e wiengu’m be yo man e’n, maan e yo i kunngba sɔ’n e man be. I sɔ’n ti, maan e wun sa ng’ɔ o be su’n i wlɛ. Yɛ maan e tra e awlɛn be wun. Kannzɛ bɔbɔ ɔ timan pɔpɔ’n, sanngɛ i sɔ yɛ ɔ fata kɛ e yo-ɔ.—Matie 7:12.
MAAN E NIAN PƆLU I AYELIƐ’N SU
Kɛ akoto Pɔlu bó jasin fɛ’n, sran wie’m be yoli i tɛtɛ. Sanngɛ, ɔ sili be aunnvuɛ. Afin, i bɔbɔ yoli Klistfuɛ’m be sɔ wie laa. Ɔ seli kɛ: “Laa’n, n kannin Ɲanmiɛn i wun ndɛ tɛ, n kleli i sufuɛ’m be yalɛ, yɛ n tuli min wun. Ɔ nin i sɔ ngba’n, ɔ sili min aunnvuɛ. Afin ɔ si kɛ n wunman sa wlɛ, yɛ n lafimɛn i su ti yɛ n yoli sa sɔ mun-ɔn.” (1 Timote 1:13, NW) Pɔlu si kɛ Zoova nin Zezi be sili i aunnvuɛ dan. Kɛ sran’m be tɛnndɛnnin i ɲrun naan ɔ yaci jasin fɛ’n i bolɛ’n, ɔ wunnin sa nga ti yɛ be yo sɔ’n i wlɛ. Afin, i bɔbɔ yoli sɔ wie laa.
Kɛ Pɔlu kán Ɲanmiɛn ndɛ’n, ɔ wunnin sran wie mɔ be lafi ato ndɛ wie’m be su kpa-ɔ. ?Wafa sɛ yɛ i sɔ’n yoli Pɔlu-ɔ? Sa Nga Be Yoli’n ndɛ tre 17, i mma 16 se kɛ, kɛ Pɔlu o Atɛnin lɔ’n, “amuɛn kpanngban b’ɔ wun be klɔ’n su’n ti i awlɛn kpɛ i klun.” Sanngɛ, Pɔlu jrannin ninnge nga sran’m be yo m’ɔ be i awlɛn’n su kleli be like. (Sa Nga Be Yoli’n 17:22, 23) Kɛ mɔ sran’m be finwlɛ’n ti fanunfanun’n ti’n, Pɔlu fa ajalɛ fanunfanun, kɛ ‘ɔ ko yo naan w’a de be’n’ ti.—1 Korɛntfuɛ Mun 9:20-23.
Kɛ é kán ndɛ é klé be nga be sɔman e nun klanman’n, annzɛ be lafi ato ndɛ wie’m be su’n, maan e nian Pɔlu i ayeliɛ’n su. E kwla jran be su ndɛ nga e si i’n su naan y’a “kan sran’m be delɛ’n i ndɛ” y’a kle be. (Ezai 52:7) Be flɛ aniaan bla kun kɛ Dorote. Ɔ seli kɛ: “E jasin fɛ bowlɛ’n nun lɔ’n, be kleli sran’m be kɛ Ɲanmiɛn i like yolɛ yo ya, naan ɔ kpli ɔ di sran’m be jɔlɛ. Kɛ n to be’n, n yo be mo. Afin be lafi su kpa kɛ Ɲanmiɛn o lɛ. Kpɛkun, n fa be ɲin n sie i Zoova i su ndɛ nga Biblu’n kan’n su. Yɛ n kan ninnge kpakpa ng’ɔ́ wá yó be cɛn wie lele’n, i ndɛ kle be.”
“AN YO BE KPA LELE AN KWLA BE”
Kɛ lika’n cɛ́n m’ɔ́ sán’n, nn é mántan mɛn’n i awieliɛ cɛn’n i koko kpa. Ɔ maan, sran’m be “sa tɛ nga be yo’n i tɛ’n ɔ́ trá laa liɛ’n.” (2 Timote 3:1, 13) Sanngɛ ɔ fataman kɛ be ayeliɛ’n ti’n, e yaci be aunnvuɛ silɛ, annzɛ e wla bo e wun. Zoova kwla wla e yakpa naan y’a ‘yo be kpa lele y’a kwla be.’ (Rɔmfuɛ Mun 12:21) Be flɛ atin bofuɛ kun kɛ Zesika. Ɔ se kɛ blɛ sunman’n, sran ng’ɔ to be’n, be tu be wun, yɛ be fa e bɔbɔ nin jasin fɛ mɔ e bo’n, be yiyi be ɲin su. Ɔ se ekun kɛ: “I sɔ’n kwla bubu e sa sin. Kɛ e nin sran kun e bo yalɛ kokolɛ bo’n, n srɛ Zoova min klun lɔ. N se i kɛ ɔ uka min naan n bu sran sɔ’n i wun akunndan kunngba ng’ɔ bu’n wie.” Zesika bumɛn i ngunmin i wun akunndan. Sanngɛ, like ng’ɔ kwla yo naan w’a uka sran mun’n, i akunndan yɛ ɔ bu-ɔ.
E kunndɛ be nga be klo kɛ bé sí ndɛ nanwlɛ’n titi.
Kɛ ɔ́ kɔ́ i ɲrun’n, be nun wie’m be kwla kplin su kɛ e kle be ndɛ nanwlɛ’n.
Asa ekun’n, kɛ e nin e niaan mun é bó jasin fɛ’n, maan e wla be fanngan. Zesika se kɛ, kɛ ɔ nin aniaan’m bé bó jasin fɛ’n, sɛ sa wie ju aniaan kun su’n, ɔ boman su. Sanngɛ, ɔ kan ndɛ kun m’ɔ kwla wla sran fanngan’n. I wie yɛle kɛ, ɔ kan ndɛ wie fa kle kɛ kannzɛ sran wie’m be sɔman e nun klanman’n, sanngɛ jasin fɛ’n mɔ e bo’n, i bo’n gua kpa.
Zoova si kɛ ɔ ju wie’n, jasin fɛ bolɛ’n timan pɔpɔ manman e. Sanngɛ kɛ ɔ wun kɛ e si sran’m be aunnvuɛ kɛ i bɔbɔ fa yo’n sa’n, ɔ yo i fɛ dan. (Lik 6:36) Zoova su siman mɛn tɛ nga nunfuɛ’m be aunnvuɛ sa trilili. Maan e lafi su kɛ ɔ si cɛn ng’ɔ́ núnnún mɛn’n. Sanngɛ, kwlaa naan cɛn sɔ’n w’a ju’n, nán e sisi e bo naan y’a bo jasin fɛ’n. (2 Timote 4:2) I sɔ’n ti, maan e si “sran’m be kwlaa” be aunnvuɛ, naan e bo jasin fɛ’n juejue su e kle be.
