Sɛ be ngunmin yɛ be lali sua’n nun, naan sa nga ti yɛ be lali sɔ’n timan cinnjin’n, e kwla se kɛ be kunndɛli be wiengu. Ɔ maan, ɔ fata kɛ asɔnun kpɛnngbɛn’m be yia be wun naan be tu be fɔ.—1 Korɛntfuɛ Mun 6:18.

Sanngɛ, ɔ ti cinnjin kɛ asɔnun kpɛnngbɛn’m be wun ndɛ wie’m be wlɛ kpa naan sɛ bé yía be wun’n, b’a fɛ i su ajalɛ. ?I wie yɛle kɛ, aniaan yasua’n i soman yɛle aniaan bla’n m’ɔ nin i be lali sua kunngba’n nun’n? ?Kɛ be boli nun sanlɛ bo lele’n, be yoli sa wie mɔ i ti’n, asɔnun kpɛnngbɛn’m b’a dun mmua b’a tu be fɔ kun-ɔn? ?Ngue ti yɛ be lali sua kunngba’n nun kɔnguɛ-ɔ? ?Be cicili i laa be sieli? ?Sa wie tɔli be su, yɛ be lemɛn i yowlɛ, i ti yɛ be lali sua kunngba’n nun-ɔn? (Akunndanfuɛ’n 9:11) ?Nin yɛ be lali-ɔ? Sa ngba timan kun. I sɔ’n ti, asɔnun kpɛnngbɛn’m be kwla bu sa wie mun ekun be akunndan naan sɛ bé fá ajalɛ kun’n, b’a fa.

Maan asɔnun kpɛnngbɛn’m be bu sa fanunfanun kwlaa sɔ’m be akunndan. I liɛ’n, sɛ ɔ fata kɛ be yia aniaan sɔ’m be wun naan be tu be fɔ’n, annzɛ sɛ ɔ fataman kɛ be yo sɔ’n, bé wún i wlɛ.